Apocalipsis 18:1-24
18 Ka tsʼoʼok le baʼaloʼobaʼ, tin wilaj uláakʼ juntúul ángel ku yéemel kaʼan yéetel nojoch páajtalil; le Luʼumoʼ sáasilchaj tu yoʼolal u nojbeʼenil le angeloʼ.
2 Le angelaʼ yéetel tuláakal u muukʼ tu kʼaʼam aʼalaj: «¡Tsʼoʼok u lúubul! ¡Tsʼoʼok u lúubul le Nojoch Babiloniaoʼ, yéetel tsʼoʼok u suut junpʼéel kúuchil utiaʼal u kajtal demonioʼob, bey xan junpʼéel kúuchil tuʼux ku taʼakikuba tuláakal pʼekbeʼen yéetel kʼaakʼas chʼíichʼ, junpʼéel kúuchil chuup yéetel kʼaakʼas iikʼ jeʼel u kíimsik máakeʼ!
3 Tumen tu yoʼolal u vinoil u kʼaakʼas tsʼíibolal, u vinoil u núupkʼebaneʼ, u kajnáaliloʼob tuláakal kaajoʼobeʼ tsʼoʼok u lúubloʼob; u reyiloʼob yóokʼol kaabeʼ tsʼoʼok u núupkʼebantaloʼob tu yéetel; u j-koonoliloʼob yóokʼol kaab xaneʼ tsʼoʼok u ayikʼaltaloʼob tu yoʼolal le koʼokoj baʼaloʼob ku manik le koʼolel minaʼan u suʼtal utiaʼal u pulik u taakʼinoʼ».
4 Ka tin wuʼuyaj uláakʼ tʼaan teʼ kaʼan táan u yaʼalik: «In kaajaleʼex, jóokʼeneʼex tiʼ le kaajaʼ utiaʼal maʼ a táakpajleʼex tiʼ u kʼebanoʼob yéetel utiaʼal maʼ a muʼyajtikeʼex le noj yajiloʼob kun taal tu yóokʼoloʼ.
5 Tumen u kʼebanoʼobeʼ tsʼoʼok u niktal yéetel tsʼoʼok u kʼuchul tak teʼ kaʼanoʼ; Dios túuneʼ tsʼoʼok u kʼaʼajsik le baʼaloʼob kʼaastak u beetmoʼ.
6 Suteʼex u jeel tiʼ; jach jeʼex tu beetaj tiʼ uláakʼ máakoʼobeʼ bey xan ka a beeteʼextiʼ, kaʼapáak ka a suteʼex u jeel le kʼaas u beetmoʼ; teʼ copa tuʼux tu xaʼakʼtaj vinooʼ, kaʼapáak ka a xaʼakʼteʼex vino a tsʼáaʼextiʼ.
7 Jach jeʼel bix úuchik u nojbeʼenkúuntkuba yéetel jeʼel bix úuchik u bisik junpʼéel koʼokoj kuxtal ichil x-maʼ suʼtaliloʼ, bey xan ka a beeteʼex u muʼyaj yéetel u yokʼol. Tumen maʼ tu xuʼulul u yaʼalik ichil u puksiʼikʼal: ‹Kulukbalen bey juntúul reinaeʼ, maʼ kimen in wíichamiʼ, yéetel mix bikʼin bíin okʼolnaken›.
8 Tu yoʼolal leloʼ, chéen ichil junpʼéel kʼiin kun kʼuchul tuláakal u noj yajiloʼob: kíimil, okʼol yéetel wiʼijil; tsʼoʼoleʼ yaan u xuʼulsaʼaltiʼ yéetel kʼáakʼ, tumen jach nojoch u páajtalil Jéeoba le máax juzgartoʼ.
9 »Tuláakal le u reyiloʼob yóokʼol kaab núupkʼebanchajoʼob tu yéetel, máaxoʼob xan múul kajlajoʼob tu yéetel táan u biskoʼob junpʼéel koʼokoj kuxtal ichil x-maʼ suʼtalileʼ, yaan u yokʼoloʼob yéetel yaan u loʼoloxik u tseemoʼob yéetel yaayaj óolal, le ken u yiloʼob u buutsʼil u tóokaʼaloʼ.
10 Yaan u waʼataloʼob náach tiʼ letiʼ tu yoʼolal u saajkiloʼob tiʼ le baʼax úuchtiʼoʼ, yéetel yaan u yaʼalikoʼob: ‹¡Óotsilech, óotsilech, le nojoch kaajoʼ, Babilonia le kaaj jach yaan u páajtaliloʼ, tumen chéen ichil junpʼéel hora juzgartaʼabech tumen Dios!›.
11 »U j-koonoliloʼob xan le yóokʼol kaaboʼ, táan u yokʼoloʼob yéetel táan u tʼaanoʼob yéetel yaayaj óolal tu yoʼolal le kaajaʼ, tumen bejlaʼeʼ mix máak manik le jejeláas baʼaloʼob ku konkoʼoboʼ:
12 u jejeláasil baʼaloʼob jeʼex oro, plata, jatsʼuts tuunichoʼob, perlaʼob, maʼalob lino, morado* nookʼ, seda, yéetel chak nookʼ; bey xan tuláakal baʼal beetaʼan yéetel kiʼibok cheʼ, tuláakal baʼax beetaʼan yéetel marfil, kiʼichkelem cheʼob, cobre, hierro yéetel mármol;
13 bey xan canela, u xaʼakʼiloʼob janal, incienso, kiʼibok aceite, olíbano, vino, u aceiteil oliva, harina, trigo, wakaxoʼob, tamanoʼob, tsíiminoʼob, carretaʼob, palitsiloʼob yéetel uláakʼ máakoʼob.
14 Jach beyoʼ, tuláakal le u takʼan ich cheʼob ka tsʼíiboltik kaʼachoʼ, beoraaʼ minaʼan tiʼ teech; le kiʼikiʼ janaloʼob yéetel le kiʼichkelem baʼaloʼob yaantech kaʼachoʼ, tsʼoʼok u xuʼupul yéetel mix bikʼin kun yantaltech tu kaʼatéen.
15 »Le máaxoʼob konik kaʼach le baʼaloʼobaʼ, máaxoʼob ayikʼalchajoʼob tu yoʼolal le kaajaʼ, tu yoʼolal u saajkiloʼob tiʼ le baʼax úuchtiʼoʼ yaan u pʼáatloʼob waʼatal náach tiʼ letiʼ, yéetel yaan u yokʼoloʼob; yaan u tʼaanoʼob yéetel yaayaj óolal
16 táan u yaʼalikoʼob: ‹¡Óotsil, óotsil... le nojoch kaajoʼ, le u búukintmaj kaʼach maʼalob lino, morado nookʼ yéetel chak nookʼoʼ, le u jach jatsʼutskíintmuba kaʼach yéetel oro, jatsʼuts tuunichoʼob, bey xan yéetel perlaʼoboʼ,
17 tumen chéen ichil junpʼéel hora ka xuʼulsaʼab tiʼ tuláakal le yaʼabkach ayikʼalil yaan kaʼach tiʼoʼ!›.
»Tuláakal xan u capitanil barco, tuláakal máax ku viajar tiʼ kʼáaʼnáab, tuláakal le marineroʼoboʼ, bey xan tuláakal le máaxoʼob ku kaxtik u kuxtaloʼob teʼ kʼáaʼnáaboʼ, pʼáatoʼob waʼatal náach tiʼ le kaajoʼ,
18 kʼaʼam tʼaanajoʼob le ka tu yiloʼob u buutsʼil u tóokaʼaloʼ, ka tu yaʼaloʼob: ‹¿Baʼax kaajil jeʼel u keʼetel yéetel le nojoch kaajaʼ?›.
19 Ka túun tu tosajoʼob luʼum tu pooloʼob, ka kʼaʼam tʼaanajoʼob táan u yokʼoloʼob yéetel táan u yaʼalikoʼob ichil u yaayaj óolaloʼob: ‹¡Óotsil, óotsil... le nojoch kaajoʼ, le baʼax oʼolal ayikʼalchaj tuláakal le máaxoʼob yaan u barcoʼob teʼ kʼáaʼnáaboʼ, tumen chéen ichil junpʼéel hora ka xuʼulsaʼabi!›.
20 »¡Teech, kaʼan, kiʼimakchajak a wóol tu yoʼolal, bey xan teʼex, j-kiliʼicheʼex, apostoleʼex yéetel profetaʼex, tumen Dioseʼ tsʼoʼok u castigartik le kaaj yoʼolal le baʼax tu beetajteʼexoʼ!».
21 Juntúul muʼukʼaʼan ángel túuneʼ, tu chʼúuyaj junpʼéel tuunich bey jeʼex u nojoch tuunichil molinoeʼ, ka tu píikchʼintaj teʼ kʼáaʼnáaboʼ táan u yaʼalik: «Bey xan kun séeb píikchʼintbil Babiloniaoʼ; yaan u píikchʼintaʼal kabal le nojoch kaajoʼ, yéetel mix bikʼin kun kaʼa ilbil.
22 Mix bikʼin kun kaʼa uʼuybil tiʼ teech u juum u kʼaay le máaxoʼob ku paxkoʼob arpaoʼ, mix le ku paxkoʼob uláakʼ nuʼukuloʼoboʼ, le ku yustikoʼob flautaoʼ mix le ku yustikoʼob trompetaoʼ. Maʼ kun kaʼa ilbil tiʼ teech juntúul máax ku beetik wa baʼax meyajil, yéetel mix bikʼin kun kaʼa uʼuybil tiʼ teech u juum u tuunichil junpʼéel molino táan u juuchʼ.
23 Mix junpʼéel lámpara kun kaʼa juul u sáasil ta wóokʼol; tsʼoʼoleʼ tiʼ techeʼ mix bikʼin kun kaʼa uʼuybil u tʼaan juntúul noviotsil wa noviatsil. Tuláakal lelaʼ yaan u yúuchul, tumen le máaxoʼob koniktech baʼaloʼob kaʼachoʼ letiʼ u maas maʼalob j-koonoliloʼob yóokʼol kaab; tsʼoʼoleʼ úuchik a beetik a x-meenileʼ* ta tusaj tuláakal le kaajoʼoboʼ.
24 Jach beyoʼ, teʼ kaajaʼ tiʼ weʼek u kʼiʼikʼel le profetaʼoboʼ, le j-kiliʼichoʼoboʼ, bey xan tuláakal le máaxoʼob tsʼoʼok u kíimsaʼaloʼob way Luʼumeʼ».
Notas
^ Lit.: «púrpura». Le coloraʼ yaan yil yéetel ayikʼalil, tsikbeʼenil yéetel jalaʼachil.
^ Wa: «x-espiritistail».
