Apocalipsis 20:1-15
20 Ka tin wilaj juntúul ángel táan u yéemel teʼ kaʼanoʼ, u machmaj u llaveil le taamkach chʼeʼenoʼ bey xan junpʼéel nojoch cadena.
2 Ka tu machaj le nojoch kaanoʼ, le úuchben kaanoʼ, le ku yaʼalaʼal Kʼaasilbaʼal* yéetel Satanás tiʼoʼ, ka tu kʼaxaj tu yáamil mil jaʼaboʼob.
3 Tsʼoʼoleʼ tu píikchʼintaj teʼ taamkach chʼeʼenoʼ, ka tu makaj u jool yéetel tu sellartaj, utiaʼal beyoʼ maʼ u seguer u tusik u kajnáaliloʼob Luʼum, tak ken tsʼoʼokok le mil jaʼaboʼoboʼ. Le ken tsʼoʼokok le baʼaloʼobaʼ yaan u jáalkʼabtaʼal tu yáamil junpʼíit kʼiin.
4 Ka tin wilaj tronoʼob, bey xan le máaxoʼob kulajoʼoboʼ; tiʼ letiʼobeʼ tsʼaʼab páajtalil utiaʼal u juzgaroʼob. Jach beyoʼ, tin wilaj le máaxoʼob kíimsaʼaboʼob yéetel báat úuchik u jaajkúuntikoʼob baʼaloʼob yaan yil yéetel Jesús bey xan yéetel Diosoʼ. Le máakoʼobaʼ maʼ tu adorartoʼob le tsʼíitsʼik baʼalcheʼoʼ mix u estatuail, yéetel maʼ tu chaʼaj u marcartaʼal u táanpoolaloʼobiʼ, mix u kʼaboʼob. Letiʼob túuneʼ kuxlajoʼob, ka reinarnajoʼob tu yáamil mil jaʼaboʼob yéetel Cristo.
5 (U maasil le kimenoʼoboʼ maʼ séeb kuxlajoʼobiʼ, tak ka tsʼoʼok le mil jaʼaboʼoboʼ.) Lelaʼ letiʼe yáax máakoʼob kaʼa kuxkíintaʼaboʼoboʼ.
6 Kiʼimak u yóol yéetel kiliʼich tuláakal máax ku táakpajal ichil le yáax máakoʼob ku kaʼa kuxkíintaʼaloʼoboʼ; le kaʼa kíimiloʼ minaʼan páajtalil tu yóokʼoloʼob, baʼaxeʼ yaan u meyajoʼob bey sacerdoteʼob utiaʼal Dios bey xan utiaʼal Cristo, yéetel yaan u reinaroʼob tu yéetel ichil le mil jaʼaboʼoboʼ.
7 Le ken tsʼoʼokok túun le mil jaʼaboʼoboʼ, Satanaseʼ yaan u jáalkʼabtaʼal teʼ tuʼux kʼalaʼanoʼ,
8 yéetel yaan u jóokʼol utiaʼal u tusik le kaajoʼob yanoʼob tu kantiʼitsil yóokʼol kaaboʼ,* Gog yéetel Magog, utiaʼal beyoʼ ka u muchʼkíintoʼob utiaʼal le baʼateltáambaloʼ. Le máaxoʼob kun muchʼkíintbiloʼoboʼ jach táaj yaʼaboʼob jeʼex u arenail le kʼáaʼnáaboʼ.
9 Letiʼobeʼ jóokʼoʼob jejeláas tuʼuxoʼob teʼ yóokʼol kaaboʼ, ka tu baʼpachtoʼob u campamento le j-kiliʼichoʼoboʼ, bey xan le kaaj yaabiltaʼanoʼ. Baʼaleʼ, éem kʼáakʼ desde teʼ kaʼanoʼ ka tóokaʼaboʼob.
10 Le Kʼaasilbaʼal tuskoʼob kaʼachoʼ píikchʼintaʼab ichil le kʼáaʼnáab de kʼáakʼ yéetel azufreoʼ, teʼ tuʼux píikchʼintaʼab xan le tsʼíitsʼik baʼalcheʼ yéetel le maʼ jaajil profetaoʼ; teʼeloʼ tiʼ kun beetbil u muʼyajoʼob* bul kʼiin yéetel bul áakʼab utiaʼal kʼiinoʼob minaʼan u xuuliʼ.
11 Tin wilaj xan junpʼéel nojoch sak trono bey xan le máax kulukbal yóokʼoloʼ. Tu táaneʼ púutsʼ le Luʼum bey xan le kaʼanoʼ, yéetel maʼ ilaʼab tuʼux tsʼoʼokoʼobiʼ.
12 Le máaxoʼob kimenoʼob kaʼachoʼ, le nuuktakoʼoboʼ bey xan le mejentakoʼoboʼ, tin wilaj waʼalakbaloʼob tu táan le tronooʼ, ka chóolaʼab le rolloʼoboʼ. Baʼaleʼ chóolaʼab uláakʼ rollo, u rolloil le kuxtaloʼ. Le kimenoʼob túunoʼ juzgartaʼaboʼob tu yoʼolal le baʼax tu beetoʼoboʼ, jeʼex tsʼíibtaʼanil teʼ rolloʼoboʼ.
13 Le kʼáaʼnáab xanoʼ tu kʼubaj le kimenoʼob yaan ichiloʼ; le kíimil yéetel le Muknaloʼ* tu kʼuboʼob xan le kimenoʼob yaan ichiloʼoboʼ. Ka juzgartaʼab cada juntúul máak tu yoʼolal le baʼax tu beetoʼ.
14 Ka tsʼoʼokeʼ, le kíimil yéetel le Muknaloʼ píikchʼintaʼaboʼob ichil le kʼáaʼnáab de kʼáakʼoʼ. Le kʼáaʼnáab de kʼáakʼoʼ letiʼe kaʼa kíimiloʼ.
15 Tsʼoʼoleʼ, tuláakal le máaxoʼob maʼ tsʼíibtaʼan u kʼaabaʼob tu libroil le kuxtaloʼ láaj píikchʼintaʼaboʼob ichil le kʼáaʼnáab de kʼáakʼoʼ.
Notas
^ Lit.: «Diablo», u kʼáat u yaʼaleʼ j-líiʼsaj tʼaan.
^ Ilaʼak Tipʼ. 16.
^ Wa: «kʼalbiloʼob».
^ Lit.: «Hades». Ilaʼak Tipʼ. 8.
