Apocalipsis 6:1-17
6 Tin wilaj le ka luʼsaʼab junpʼéel tiʼ le siete selloʼob tumen le Tamanoʼ, ka tin wuʼuyaj xan u tʼaan juntúul tiʼ le kantúul querubinoʼoboʼ; ka tu yaʼalaj kʼaʼam jeʼex u kíilbal cháakeʼ: «¡Koʼoten!».
2 Tsʼoʼoleʼ paakatnajeneʼ, yéetel, ¡ileʼex!, juntúul sak tsíimin; le máax natʼmiloʼ u machmaj junpʼéel arco; ka tsʼaʼab junpʼéel corona tiʼ, yéetel jóokʼ táan u tsʼáanchaʼatik u enemigoʼob, jóokʼ utiaʼal u tsʼáanchaʼatikoʼob tu chúukaʼanil.
3 Le ka tu luʼsaj xan le u kaʼapʼéel sellooʼ, tin wuʼuyaj u yaʼalik le u kaʼatúul querubinoʼ: «¡Koʼoten!».
4 Ka túun jóokʼ uláakʼ tsíimin, juntúul tsíimin chak bey kʼáakʼeʼ; le máax natʼmiloʼ tsʼaʼab u páajtalil u luʼsik u jeetsʼelil yóokʼol kaab, utiaʼal ka u paklan kíimsuba le máakoʼoboʼ; ka tsʼaʼab junpʼéel nuxiʼ espada tiʼ.
5 Le ka tu luʼsaj xan le u yóoxpʼéel sellooʼ, tin wuʼuyaj u yaʼalik le u yóoxtúul querubinoʼ: «¡Koʼoten!». Tsʼoʼoleʼ paakatnajen, yéetel, ¡ileʼex!, juntúul box tsíimin. Le máax natʼmiloʼ u chʼúuymaj junpʼéel balanza.*
6 Chúumuk xan tiʼ le querubinoʼoboʼ yaan baʼax tin wuʼuyaj u juum, bey junpʼéel tʼaan táan u yaʼalik: «U tojol junwuutsʼ* trigoeʼ junpʼéel denario,* u tojol óoxwuutsʼ cebadaeʼ junpʼéel denario xan; tsʼoʼoleʼ kanáant u aceiteil oliva bey xan le vinooʼ».
7 Le ka tu luʼsaj xan le u kanpʼéel sellooʼ, tin wuʼuyaj u yaʼalik le u kantúul querubinoʼ: «¡Koʼoten!».
8 Tsʼoʼoleʼ paakatnajeneʼ, yéetel, ¡ileʼex!, juntúul sakpileʼen tsíimin; le máax natʼmiloʼ u kʼaabaʼeʼ Kíimil. Paachil tiʼ letiʼeʼ, naatsʼ u taal le Muknaloʼ.* Ka túun tsʼaʼabtiʼob páajtalil yóokʼol junpʼéel u kanbúujil le luʼumoʼ, utiaʼal ka kíimsajnakoʼob yéetel junpʼéel chowak espada, yéetel wiʼijil, yéetel kʼaakʼas kʼojaʼaniloʼob bey xan yéetel tsʼíitsʼik baʼalcheʼob.
9 Le ka tu luʼsaj xan le u cinco sellooʼ, yáanal le altaroʼ tin wilaj u kʼiʼikʼel le máaxoʼob kíimsaʼaboʼob úuchik u tsʼoʼokbeskoʼob u tʼaan Diosoʼ, bey xan úuchik u beetik u j-jaajkunajiloʼob.
10 Tʼaanajoʼob kʼaʼam táan u yaʼalikoʼob: «Yuumtsil, u Nojoch Jalaʼachil tuláakal baʼal, teech kiliʼichech yéetel ka waʼalik u jaajil, ¿tak baʼax kʼiin a juzgartik yéetel a castigartik le u kajnáaliloʼob Luʼum tu wekoʼob k-kʼiʼikʼeloʼ?».
11 Tiʼ cada juntúuleʼ tsʼaʼab junpʼéel chowak sak nookʼ; ka aʼalaʼabtiʼob ka u jeʼelsubaʼob uláakʼ junpʼíit kʼiin maas, tak ken chúukpajak tuláakal u yéet palitsiloʼob yéetel u sukuʼunoʼob nukaʼaj kíimsbiloʼob jeʼex úuchik u kíimsaʼaloʼob letiʼobeʼ.
12 Tin wilaj xan le ka tu luʼsaj le u seis sellooʼ, ka yanchaj junpʼéel nojoch kíilbal luʼum; le Kʼiinoʼ booxchaj jeʼex junpʼéel nookʼ beetaʼan yéetel u tsoʼotsel chivoeʼ, yéetel u túulisil le Lunaoʼ suunaj bey kʼiʼikʼeʼ,
13 ka lúub Luʼum u estrellailoʼob kaʼan, jeʼex u júutul u muumun ich junkúul higuera ken tíitaʼak tumen junpʼéel kʼaʼamkach iikʼeʼ.
14 Le kaʼan túunoʼ tu kotsʼuba jeʼex junpʼéel rolloeʼ, ka saʼati, ka túun péeksaʼab tu kúuchiloʼob tuláakal le puʼukoʼob yéetel tuláakal le islaʼoboʼ.
15 U reyiloʼob Luʼum, le jalaʼach máakoʼoboʼ, le comandanteʼoboʼ,* le ayikʼal máakoʼoboʼ, le muʼukʼaʼanoʼoboʼ, le palitsiltaʼanoʼoboʼ bey xan le maʼ palitsiltaʼanoʼoboʼ, binoʼob utiaʼal u taʼakikubaʼob ich sajkaboʼob bey xan tu nukuch tuunichiloʼob le puʼukoʼoboʼ.
16 Ka joʼopʼ u sen aʼalikoʼob tiʼ le puʼukoʼob yéetel tiʼ le tuunichoʼoboʼ: «Lúubkeʼex t-óokʼol yéetel taʼakoʼoneʼex utiaʼal maʼ k-ilaʼal tumen le Máax kulukbal teʼ tronooʼ bey xan utiaʼal maʼ k-kaxtaʼal tumen u pʼujaʼanil le Tamanoʼ,
17 tumen tsʼoʼok u kʼuchul u noj kʼiinil u pʼujaʼaniloʼob, ¿máax túun jeʼel u páajtal u pʼáatal waʼatalileʼ?».
Notas
^ Wa: «chʼuyub pʼiis».
^ Gr.: kóiniks. Lelaʼ kex 700 gramos u aalil.
^ Lelaʼ u boʼolil u meeyjil junpʼéel kʼiin. Ilaʼak Tipʼ. 11.
^ Lit.: «Hades». Ilaʼak Tipʼ. 8.
^ Gr.: kilíarkos, juntúul máak tsʼaʼan u nuʼukt 1,000 soldadoʼob.
