Hebreos 10:1-39
10 Tumen le Leyoʼ u yoochel le maʼalob baʼaloʼob kun taaloʼoboʼ, baʼaleʼ maʼ táan u yeʼesik jach bixoʼobiʼ; le oʼolaleʼ kex ka kʼuʼubuk kíimsbil baʼalcheʼob cada jaʼabeʼ junpuliʼ maʼ tu páajtal u beetaʼal u yutsil chúukaʼanchajal le máaxoʼob ku natsʼkubaʼob tiʼ Diosoʼ.
2 Tumen wa beyoʼ, ¿maʼ wa jeʼel u xuʼulul kaʼach u kʼuʼubul kíimsbil baʼalcheʼobeʼ? Tumen le máaxoʼob beetik le kiliʼich meyajoʼ, jeʼel u pʼáatal kaʼach limpioil u concienciaʼob ken tsʼoʼokok u perdonartaʼal u kʼebanoʼob juntéeniliʼeʼ.
3 Baʼaleʼ maʼ beyiʼ, le kíimsbil baʼalcheʼobaʼ láalaj jaʼab ku beetaʼal utiaʼal u kʼaʼajal tiʼ máak u kʼebanoʼob.
4 Tumen u kʼiʼikʼel wakaxoʼob yéetel u kʼiʼikʼel chivoʼobeʼ maʼ tu páajtal u luʼsik le kʼebanoʼoboʼ.
5 Bey túunoʼ le ka taal Cristo way Luʼumeʼ, tu yaʼalaj tiʼ Dios: «‹Maʼ ta wóotaj a kʼam kíimsbil baʼalcheʼobiʼ mix uláakʼ siibaloʼob, baʼaleʼ ta preparartajten junpʼéel wíinklil.
6 Maʼ utschaj ta tʼaan baʼalcheʼob tóokaʼanoʼob tu túulisiloʼobiʼ, mix siibaloʼob tu yoʼolal le kʼebanoʼ›.
7 Ka túun tin waʼalaj: ‹¡Ile! Teneʼ taalen (tu rolloil le librooʼ yaan baʼax tsʼíibtaʼan tin woʼolal) utiaʼal ka in beet baʼax a kʼáat, in Dios›».
8 Ka tsʼoʼok u yaʼalik: «Maʼ ta wóotaj a kʼamiʼ, mix utschaj ta tʼaan kíimsbil baʼalcheʼob mix uláakʼ siibaloʼob, mix baʼalcheʼob tóokaʼanoʼob tu túulisiloʼobiʼ mix siibaloʼob utiaʼal le kʼebanoʼ» —baʼaloʼob ku kʼuʼubul jeʼex u yaʼalik le Leyoʼ—
9 ka túun tu yaʼalaj: «¡Ile! Teneʼ taalen utiaʼal ka in beet baʼax a kʼáat». Bey túunoʼ, tu luʼsaj le yáax baʼax tsʼaʼanoʼ ka tu jeelintaj yéetel le u kaʼapʼéeloʼ.
10 Tu yoʼolal le «baʼax u kʼáat» Diosoʼ, tsʼoʼok k-kiliʼichkúuntaʼal úuchik u kʼuʼubul u wíinklil Cristo juntéeniliʼ.
11 Tsʼoʼoleʼ tuláakal sacerdoteeʼ sáamsamal ku bin tu kúuchil u meyaj utiaʼal meyaj tu yoʼolal le kaajoʼ, bey xan utiaʼal u kʼubik kíimsbil baʼalcheʼob yaʼab u téenel, kex le baʼaloʼobaʼ junpuliʼ maʼ tu páajtal u luʼsik tuláakal le kʼebanoʼoboʼ.
12 Baʼaleʼ le máakaʼ, utiaʼal u luʼsik le kʼebanoʼob utiaʼal tuláakal kʼiinoʼ chéen junpʼéeliliʼ kíimsbil siibal tu kʼubaj, ka túun kulaj tu x-noʼoj kʼab Dios;
13 desde teʼ kʼiin jeʼeloʼ káaj u páaʼtaj tak ken kʼuchuk u kʼiinil u tsʼaʼabal le máaxoʼob pʼekmiloʼ bey kʼáancheʼ utiaʼal u tʼalkúuntik u yookoʼobeʼ.
14 Tumen chéen yéetel junpʼéeliliʼ kíimsbil siibaleʼ letiʼeʼ tsʼoʼok u yutsil chúukaʼankúuntik utiaʼal mantatsʼ le máaxoʼob táan u kiliʼichkúuntaʼaloʼoboʼ.
15 Tsʼoʼoleʼ le kiliʼich muukʼoʼ ku jaajkúuntiktoʼon leloʼ, tumen ka tsʼoʼok u yaʼalik:
16 «‹Lelaʼ letiʼe núuptʼaan ken in beet tu yéeteloʼob le ken tsʼoʼokok le kʼiinoʼob jeʼeloʼ —ku yaʼalik Jéeoba—. Yaan in tsʼáaik in leyoʼob tu puksiʼikʼaloʼob, yéetel yaan in tsʼíibtik tu tuukuloʼob›»,
17 ka túun tu yaʼalaj: «Junpuliʼ maʼ ken in kʼaʼajs u kʼebanoʼob, mix le baʼaloʼob kʼaastak u beetmoʼoboʼ».
18 Le oʼolaleʼ, bey tumen tsʼoʼok u perdonartaʼal le baʼaloʼobaʼ, maʼ kʼaʼabéet u kaʼa kʼuʼubul siibal tu yoʼolal le kʼebanoʼ.
19 Le oʼolaleʼ, sukuʼuneʼex, tu yoʼolal u kʼiʼikʼel Jesuseʼ, maʼ saajkoʼon bin tu bejil u yookbal le kiliʼich kúuchiloʼ.
20 Le túumben bejaʼ junpʼéel bej ku biskoʼon tiʼ kuxtal, yéetel Jesús jeʼekʼabttoʼon le ka táatsʼmáan teʼ cortinaoʼ; le cortinaaʼ u wíinklil.
21 Tsʼoʼoleʼ tumen yaan xan toʼon juntúul nojoch sacerdote ku meyaj tu yotoch Dioseʼ,
22 koʼoneʼex natsʼikba yéetel u jaajil u yóol k-puksiʼikʼal bey xan yéetel junpʼéel fe muʼukʼaʼan, tumen tsʼoʼok u pʼaʼatal limpioil k-puksiʼikʼaleʼex úuchik u pʼoʼobol k-concienciaʼex bey xan k-wíinklileʼex.
23 Mix juntéen unaj k-chʼaʼik saajkil k-aʼalik tu táan tuláakal máak baʼax esperanzail yaantoʼon, tumen chúukaʼan u yóol le máax tsʼaamiltoʼon le promesaoʼ.
24 Koʼoneʼex kaxtik xan bix jeʼel k-paklan áantikbaʼex utiaʼal ka yanak yaabilaj t-baatsil bey xan utiaʼal k-beetik baʼaloʼob maʼalobtak.
25 Tsʼoʼoleʼ maʼ unaj u pʼáatal maʼ k-muchʼikbaʼex jeʼex suuk u beetik jujuntúul máakoʼobeʼ, baʼaxeʼ unaj k-paklan líiʼsik k-óol; lelaʼ maases unaj k-beetik le táan k-ilkeʼex u náatsʼal le kʼiinoʼ.
26 Tumen wa t-óoliliʼ k-kʼebantal ken tsʼoʼokok k-kanik tubeel le jaajoʼ, minaʼan uláakʼ kíimsbil siibal utiaʼal u perdonartaʼal k-kʼebanoʼob,
27 baʼax yaneʼ u páaʼtaʼal yéetel saajkil u kʼuchul u kʼiinil u juzgartaʼal máak, yéetel yaan xan u nojoch pʼujaʼanil Dios kun xuʼulsik tiʼ le máaxoʼob pʼekmiloʼ.
28 Jeʼel máaxak maʼ tu tsʼoʼokbesik le baʼax ku yaʼalik u Ley Moiseseʼ, maʼ unaj u chʼaʼabal óotsilil tiʼiʼ, baʼaxeʼ unaj u kíimil ken tsʼoʼokok u jaajkúuntaʼal baʼax tu beetaj tumen kaʼatúul wa óoxtúul máak.
29 Wa beyoʼ, ¿maʼ wa túun maas nojoch castigo ku náajmatik juntúul máax tsʼoʼok u pepeʼchaʼatik u Paal Dios, tsʼoʼok u mixbaʼalkúuntik le kʼiʼikʼ jetsʼkúuntik le núuptʼaan meyajnaj utiaʼal u kiliʼichkúuntaʼaloʼ, yéetel tsʼoʼok u poʼopochʼik le kiliʼich muukʼ beetik u chʼaʼabal óotsilil tiʼoʼ?
30 Tumen k-kʼaj óol le máax aʼal lelaʼ: «Teen ken in sut u jeel le kʼaas ku beetkoʼoboʼ; teen ken in tsʼáa baʼax ku náajmatkoʼob»; tsʼíibtaʼan xan: «Jéeobaeʼ yaan u juzgartik u kaajal».
31 Jach sajbeʼentsil u lúubul máak tu kʼab le kuxaʼan Diosoʼ.
32 Baʼax unaj a beetkeʼexeʼ a kʼaʼajsikeʼex le kʼiinoʼob tsʼoʼok u máanoʼoboʼ, le ka sáasilkuntaʼabeʼexoʼ yéetel le ka chúukpaj a wóoleʼex a muʼyajteʼex yaayaj baʼaloʼoboʼ.
33 Yaan kʼiineʼ jóoʼsaʼabeʼex tu táan máakoʼob utiaʼal u yaʼalaʼalteʼex baʼal yéetel utiaʼal u beetaʼal a muʼyajeʼex, yéetel yaan kʼiineʼ múul muʼyajnajeʼex* yéetel le máaxoʼob beetaʼab le baʼaloʼob tiʼobaʼ.
34 Tumen teʼexeʼ ta chʼaʼajeʼex óotsilil tiʼ le máaxoʼob oksaʼanoʼob kaʼach carceloʼ, tsʼoʼoleʼ yéetel kiʼimak óolal ta chaʼajeʼex u toʼokol le baʼaxoʼob yaanteʼexoʼ, tumen a wojleʼex yaanteʼex junpʼéel baʼal maas maʼalob yéetel maʼ tu kʼastal.
35 Le oʼolaleʼ maʼ u xuʼulul a tʼaaneʼex yéetel u jaajil a wóoleʼex; wa ka beetkeʼex beyoʼ yaan a kʼamkeʼex yaʼab utsiloʼob.
36 Kʼaʼabéet u chúukpajal a wóoleʼex tiʼ Dios, utiaʼal beyoʼ ken tsʼoʼokok a beetkeʼex le baʼax u kʼáatoʼ ka a wileʼex u béeytal le baʼax u yaʼalmajteʼexoʼ.
37 Tumen «chéen junpʼíit kʼiin u bin», yéetel «le máax táan u taaloʼ yaan u kʼuchul, jach tu yorail ken kʼuchuk».
38 «Baʼaleʼ le máax toj u kuxtal tin táaneʼ yaan u seguer u kuxtal tu yoʼolal u fe», chéen baʼaleʼ, «wa ku suut paachileʼ maʼ ken u kiʼimakkúunt u yóol in puksiʼikʼal».
39 Baʼaleʼ toʼoneʼ maʼ táakpajaʼanoʼon ichil le máaxoʼob ku suutoʼob paachil utiaʼal u xuʼulsaʼaltiʼoboʼ, baʼaxeʼ táakpajaʼanoʼon ichil le máaxoʼob yaan u fejoʼob yéetel yaan u seguer u kuxtaloʼoboʼ.*
