Hechos 1:1-26
1 Le yáax tsʼíib tin beetoʼ, Teófilo, ku tʼaan tiʼ tuláakal le baʼaxoʼob káaj u beetik yéetel u kaʼansik Jesusoʼ,
2 tak le kʼiin ka chʼaʼab utiaʼal bisbil teʼ kaʼanoʼ, le tsʼokaʼaniliʼ u yaʼalik baʼax unaj u beetik le apostoloʼob tu yéeyajoʼ; lelaʼ tu yaʼalajtiʼob jeʼex úuchik u nuʼuktaʼaltiʼ tumen le kiliʼich muukʼoʼ.*
3 Ka tsʼoʼok u muʼyaj Jesuseʼ yaʼab bix úuchik u chíikbeskubatiʼob utiaʼal u yeʼesik jach tu jaajil kuxaʼan. Letiʼobeʼ tu yiloʼob tu yáamil cuarenta kʼiinoʼob, yéetel letiʼeʼ tu tsolajtiʼob le baʼaloʼob yaan yil yéetel u Reino Diosoʼ.
4 Le u muchʼmuba tu yéeteloʼoboʼ, tu yaʼalajtiʼob: «Maʼ a lukʼleʼex Jerusalén, baʼaxeʼ seguernak a páaʼtkeʼex le baʼax u yaʼalmaj le Taata u tsʼáaikoʼ, jeʼex úuchik in waʼalikteʼexoʼ;
5 tumen u jaajileʼ, Juaneʼ yéetel jaʼ tu tsʼáaj okjaʼ, baʼaleʼ teʼexeʼ yaan u tsʼaʼabal a wokjaʼex yéetel kiliʼich muukʼ maʼ yaʼab kʼiinoʼob úuchuk lelaʼ».
6 Ka tsʼoʼok u muchʼkubaʼobeʼ tu kʼáatoʼobtiʼ: «Yuumtsil, ¿yaan wa a jel tsʼáaik u Reino Dios tu luʼumil Israel teʼ kʼiinoʼobaʼ?».
7 Letiʼeʼ tu núukajtiʼob: «Chéen tiʼ le Taata yaan teʼ kaʼan yaan u páajtalil u yaʼalik baʼax kʼiin ken úuchuk le baʼaloʼobaʼ, baʼaleʼ teʼexeʼ maʼ kʼaʼabéet a wojéeltikeʼex baʼax kʼiin ken úuchkoʼobiʼ;
8 chéen baʼaleʼ yaan a kʼamkeʼex páajtalil ken kʼuchuk le kiliʼich muukʼ ta wóokʼoleʼexoʼ, yéetel yaan a beetkabaʼex j-jaajkunajil tiʼ teen tu kaajil Jerusalén, tiʼ tuláakal u luʼumil Judea, Samaria bey xan tak tu maas náachil le Luʼumaʼ».
9 Ka tsʼoʼok u yaʼalik le baʼaloʼobaʼ, chʼúuyaʼab tu táan u yich u apostoloʼobeʼ ka piʼix tumen junpʼéel múuyal, ka túun pʼáat maʼ chíikaʼan u yilaʼal tumen u apostoloʼobiʼ.
10 Le jach chʼiikil u paakatoʼob kaʼan le táan u bin Jesusoʼ, tu tséeloʼobeʼ téek waʼalaj xan kaʼatúul xiiboʼob sak u nookʼoʼob,
11 ka tu yaʼaloʼob: «Xiibeʼex tiʼ u luʼumil Galilea, ¿baʼaxten waʼalakbaleʼex táan a paktikeʼex le kaʼanoʼ? Le Jesús chʼaʼab ichileʼex utiaʼal bisbil teʼ kaʼanoʼ, yaan u suut tu kaʼatéen jeʼex tsʼoʼok a wilkeʼex u bin teʼ kaʼanoʼ».
12 Le apostoloʼob túunoʼ lukʼoʼob tiʼ junpʼéel puʼuk ku kʼaabaʼtik u Puʼukil Olivoʼob, ka túun suunajoʼob Jerusalén. U náachil le puʼukaʼ letiʼe bukaʼaj ku chaʼabal u xíimbaltaʼal tu kʼiinil Sabadooʼ.*
13 Ka túun kʼuchoʼob teʼ kaajoʼ, naʼakoʼob teʼ cuarto yaan kaʼanal teʼ tuʼux u kʼubéentmubaʼoboʼ; ichiloʼobeʼ tiʼ yaan kaʼach Pedro, Juan, Santiago, Andrés, Felipe, Tomás, Bartolomé, Mateo, Santiago u paal Alfeo, Simón le máax ku yaʼalaʼal jach u tsʼaamaj u yóoloʼ, yéetel Judas u paal Santiago.
14 Tuláakloʼobeʼ mantatsʼ ku muchʼkubaʼob kaʼach orar jeʼex u chʼaʼtukultmiloʼobeʼ, lelaʼ ku beetkoʼob kaʼach junmúuchʼ yéetel jujuntúul koʼoleloʼob, yéetel María u maama Jesús, bey xan yéetel u yíitsʼinoʼob Jesús.
15 Teʼ kʼiinoʼoboʼ Pedroeʼ waʼalaj chúumuk tiʼ le sukuʼunoʼoboʼ, ka tu yaʼalaj (tuláakal le yaʼabkach máakoʼob u muchʼmubaʼoboʼ, yaan kex ciento veinte u túulal):
16 «Xiibeʼex, sukuʼuneʼex, kʼaʼabéetchaj u yúuchul le baʼax ku yaʼalik le Kiliʼich Tsʼíiboʼ, le baʼax péeksaʼab u profetizart David tumen le kiliʼich muukʼ yoʼolal Judasoʼ, le máax nuʼukt le máakoʼob yiknal Jesús utiaʼal ka u mach u bisoʼoboʼ;
17 letiʼ xaneʼ tiʼ yaan kaʼach t-éeteleʼ, tsʼoʼoleʼ táakpaj xan tiʼ le meyaj kʼubéentaʼantoʼonoʼ.
18 (Le máak túunaʼ tu manaj junpʼéel kʼáax yéetel le taakʼin ikil boʼotaʼabik u kʼasaʼaniloʼ, ka tsʼoʼokeʼ lúub chinchinpoolileʼ ka xíik u nakʼ, ka joykʼaj u choochel.
19 Lelaʼ ojéeltaʼab tumen u kajnáaliloʼob Jerusalén, le oʼolaleʼ tiʼ le kʼáaxaʼ tsʼaʼab u kʼaabaʼt Akéldama ichil le tʼaan ku beetkoʼoboʼ, lelaʼ u kʼáat u yaʼaleʼ, u Kʼáaxil Kʼiʼikʼ.)
20 Tumen tsʼíibtaʼan tu libroil Salmos: ‹X-tokoychajak le kúuchil tuʼux ku pʼáatloʼ, yéetel mix máak ka kajlakiʼ›, ku yaʼalik xan: ‹Le meyaj* tsʼaʼantiʼoʼ, chʼaʼabak tumen yaanal›.
21 Le oʼolaleʼ, kʼaʼabéet u yéeyaʼal juntúul tiʼ le xiiboʼob máanoʼob t-éetel ichil tuláakal le kʼiinoʼob tiʼ yaan kaʼach Yuumtsil Jesús ichiloʼonoʼ,
22 desde ka tsʼaʼab u yokjaʼ tumen Juan tak le kʼiin ka chʼaʼab ichiloʼon utiaʼal bisbil kaʼanoʼ, bey túunoʼ juntúul tiʼ le xiiboʼobaʼ letiʼ ka kʼuchuk u jaajkúunt t-éetel le úuchik u kaʼa kuxkíintaʼal Jesusoʼ».
23 Ka túun tu tʼanoʼob kaʼatúuliʼ: juntúuleʼ José le máax ku yaʼalaʼal Barsabás yéetel Justo tiʼeʼ, uláakʼ juntúuleʼ Matías.
24 Letiʼobeʼ orarnajoʼob táan u yaʼalikoʼob: «Kiʼichkelem Yuum Jéeoba,* teech a kʼaj óol u puksiʼikʼal tuláakal máakeʼ, eʼes máakalmáak tiʼ le kaʼatúul máakoʼob tsʼoʼok a yéeyikaʼ,
25 utiaʼal ka u beet le meyaj kʼubéentaʼanoʼ bey xan ka u beet u apostolil; lelaʼ letiʼe baʼaxoʼob tu xúumpʼattaj Judas utiaʼal ka xiʼik u beet chéen baʼax u kʼáatoʼ».
26 Letiʼob túuneʼ buulnajoʼob tu yoʼolal le kaʼatúul máakoʼobaʼ, ka jóoʼsaʼab u kʼaabaʼ Matías; lelaʼ letiʼe máax túun táakpaj yéetel le once apostoloʼoboʼ.
Notas
^ Wa: «espíritu santo». Ilaʼak Tipʼ. 16.
^ Lelaʼ kex junpʼéel kilómetro u náachil.
^ Lelaʼ u meeyjil u kanáantik le múuchʼuliloʼ.
^ Ilaʼak Tipʼ. 2.
