Hechos 11:1-30
11 Le apostoloʼob túun yéetel le sukuʼunoʼob yanoʼob Judeaoʼ tu yuʼuboʼob u yaʼalaʼaleʼ tak bin máakoʼob maʼ judíoʼob tsʼoʼok u kʼamkoʼob u tʼaan Dios.
2 Le oʼolaleʼ ka bin Pedro tu kaajil Jerusaleneʼ, le máaxoʼob ku yaʼalikoʼob kʼaʼabéet u súutkʼuptikuba* máakoʼ, káaj u baʼateltʼaanoʼob tu yéetel,
3 táan u yaʼalikoʼobeʼ letiʼeʼ ook tu yotoch máakoʼob maʼ súutkʼuptaʼanoʼobiʼ yéetel jaan xan tu yéeteloʼob.
4 Pedro túuneʼ káaj u tsoliktiʼob jach bix úuchik tuláakal le baʼaloʼoboʼ, ka tu yaʼalajtiʼob:
5 «Le tiaʼanen kaʼach tu kaajil Jope táan in orareʼ, máan tin wich táan in wilik junpʼéel nuʼukul ku yéemel bey junpʼéel nuxiʼ nookʼ de lino xitʼaʼan tu kantiʼitsil táan u yéemsaʼal desde teʼ kaʼanoʼ, ka kʼuch tak tin wiknal.
6 Ka tin jach pakteʼ, tu yóokʼoleʼ tin wilaj yaan u baʼalcheʼiloʼob luʼum kantsʼíit u yookoʼob, tsʼíitsʼik baʼalcheʼob, baʼaloʼob kuxaʼanoʼob ku jíiltikubaʼob yéetel chʼíichʼoʼob ku xikʼnaloʼob.
7 Tin wuʼuyaj xan junpʼéel tʼaan ku yaʼalikten: ‹¡Pedro, líikʼen, kíims a jaantoʼob!›.
8 Baʼaleʼ teneʼ tin waʼalaj: ‹Junpuliʼ maʼ ken in beete, Yuumtsil, tumen mix juntéen okok tin chiʼ baʼaloʼob éekʼtak yéetel maʼ uts u jaantaʼaloʼobiʼ›.
9 Le tʼaan teʼ kaʼanoʼ tu kaʼa aʼalaj: ‹Xuʼuluk a waʼalik éekʼtak le baʼaloʼob tsʼoʼok u limpiokíintaʼaloʼob tumen Diosoʼ›.
10 Tu yóoxtéen ka úuch lelaʼ le baʼaloʼobaʼ láaj chʼúuyaʼaboʼob bisbil teʼ kaʼan tu kaʼatéenoʼ.
11 Teʼ súutuk xan jeʼeloʼ, ¡ileʼex!, tu jool le naj tuʼux yanoʼonoʼ tiʼ waʼalakbal óoxtúul xiiboʼobiʼ, tumen túuxtaʼaboʼob desde tu kaajil Cesarea utiaʼal ka taalakoʼob tin wiknal.
12 Le kiliʼich muukʼ túunoʼ tu yaʼalajten ka xiʼiken tu yéeteloʼob, bey xan maʼ u kaʼapʼéelchajal in tuukul. Baʼaleʼ le seis u túulal sukuʼunoʼobaʼ binoʼob xan tin wéetel, ka túun ookoʼon tu yotoch le máakoʼ.
13 »Le máak túunoʼ tu tsikbaltajtoʼon bix úuchik u yilik tiʼ waʼalakbal le ángel tu yotochoʼ yéetel táan kaʼach u yaʼaliktiʼ: ‹Túuxt xiiboʼob tu kaajil Jope utiaʼal ka u tʼanoʼob Simón le máax xan ku yaʼalaʼal Pedro tiʼoʼ,
14 letiʼ túuneʼ yaan u tsikbaltiktech baʼaxoʼob kun áantkech utiaʼal a salvartikaba teech bey xan tuláakal a wotoch›.
15 Baʼaleʼ le ka káaj in tʼaaneʼ le kiliʼich muukʼoʼ lúub tu yóokʼoloʼob jeʼex úuchik u lúubul t-óokʼol tu káajbaleʼ.
16 Ka túun kʼaʼajten le baʼax tu yaʼalaj Yuumtsil jeʼex suukil u yaʼalik kaʼacheʼ: ‹Juaneʼ yéetel jaʼ tu tsʼáaj okjaʼ, baʼaleʼ teʼexeʼ yaan u tsʼaʼabal a wokjaʼex yéetel kiliʼich muukʼ›.
17 Le oʼolaleʼ wa Dios tsʼoʼok u tsʼáaiktiʼob le baʼax xan tu síiaj tiʼ toʼon, máaxoʼon tsʼoʼok k-creertik Yuumtsil Jesucristoeʼ, ¿máaxen túun teen utiaʼal ka in kʼat u beel Dios?».
18 Ka túun tu yuʼuboʼobeʼ xuʼul u baʼateltʼaanoʼob, ka tu nojbeʼenkúuntoʼob Dios táan u yaʼalikoʼob: «¡Jaaj bakáan, Dioseʼ tsʼoʼok u tsʼáaik u páajtalil tiʼ le máakoʼob maʼ judíoʼob utiaʼal ka u kʼex u tuukuloʼob yéetel utiaʼal ka yanaktiʼob le kuxtaloʼ!».
19 Le oʼolaleʼ le máaxoʼob kʼiʼitbesaʼaboʼob yoʼolal le chʼaʼpachtajil káaj le ka kíimsaʼab Estebanoʼ, binoʼob Fenicia, Chipre yéetel Antioquía, baʼaleʼ maʼ kʼaʼaytajnajoʼob tiʼ mix máakiʼ, baʼaxeʼ chéen tiʼ le judíoʼoboʼ.
20 Baʼaleʼ ichiloʼobeʼ yanchaj jujuntúul xiiboʼob Chipre yéetel Cirene u taaloʼob; letiʼobeʼ binoʼob Antioquía ka joʼopʼ u kʼaʼaytikoʼob u maʼalob péektsilil Yuumtsil Jesucristo tiʼ le máaxoʼob ku tʼaanoʼob ich griegooʼ.
21 Tsʼoʼoleʼ Jéeobaeʼ tiʼ yaan kaʼach tu yéeteloʼobeʼ, yéetel le yaʼabkach máakoʼob tu creertoʼoboʼ tu beetubaʼob disipuloil tiʼ Yuumtsil.
22 Le baʼax táan kaʼach u beetkoʼobaʼ kʼuch ojéeltbil teʼ múuchʼulil yaan Jerusalenoʼ, le sukuʼunoʼob túunoʼ tu túuxtoʼob Bernabé tak tu kaajil Antioquía.
23 Ka túun kʼuch Bernabé yéetel ka tu yilaj u nojoch utsil Dioseʼ, kiʼimakchaj u yóol, ka joʼopʼ u líiʼsik u yóol tuláakal le sukuʼunoʼob utiaʼal ka u chʼaʼtukult ichil u puksiʼikʼaloʼob maʼ u xuʼulul u chúukpajal u yóoloʼob tiʼ Yuumtsiloʼ;
24 lelaʼ tu beetaj tumen letiʼeʼ juntúul máak uts, tsʼoʼoleʼ chuup yéetel kiliʼich muukʼ yéetel nojoch u fe. Yaʼab uláakʼ máakoʼob xaneʼ tu creertoʼob Yuumtsil.
25 Ka túun bin Bernabé tu kaajil Tarso utiaʼal ka sen máanak u kaxt tuʼux yaan Saulo.
26 Ka tsʼoʼok túun u kaxtikeʼ tu bisaj Antioquía. Bey túunoʼ ichil junpʼéel túulis jaʼabeʼ, letiʼobeʼ tu muchʼubaʼob yéetel le sukuʼunoʼob yanoʼob teʼ múuchʼuliloʼ ka túun tu kaʼansoʼob junmúuchʼ yaʼabkach máakoʼob. Tsʼoʼoleʼ teʼ kaajaʼ, tiʼ yáax aʼalaʼab cristianoʼob tiʼ le disipuloʼoboʼ, lelaʼ úuch yáanal u nuʼuktaj Dios.
27 Teʼ kʼiinoʼob túunoʼ jujuntúul profetaʼob lukʼoʼob Jerusaleneʼ binoʼob Antioquía.
28 Juntúul tiʼ letiʼob ku kʼaabaʼtik Ágaboeʼ, líikʼeʼ ka nuʼuktaʼab tumen le kiliʼich muukʼ utiaʼal ka u yaʼal jach taʼaytak u yantal junpʼéel nojoch wiʼijil tiʼ tuláakal yóokʼol kaab; lelaʼ úuch tu kʼiiniloʼob Claudio.
29 Le disipuloʼob túunoʼ tu chʼaʼtuklaj u túuxtikoʼob junpʼéel áantaj tiʼ le sukuʼunoʼob kajaʼanoʼob Judeaoʼ, cada juntúuleʼ tu tsʼáaj le bukaʼaj páajchaj u tsʼáaikeʼ;
30 utiaʼal túun u túuxtikoʼobeʼ tu kʼuboʼob tu kʼab Bernabé yéetel Saulo utiaʼal ka u bisoʼob tiʼ le ancianoʼoboʼ.
Notas
^ Ilaʼak Tipʼ. 16.
