Hechos 12:1-25
12 Teʼ kʼiinoʼob xan jeʼeloʼ, rey Herodeseʼ káaj u chʼaʼpachtik jujuntúul tiʼ le máaxoʼob yanoʼob teʼ múuchʼuliloʼ.
2 Letiʼeʼ yéetel espada tu kíimsaj Santiago, u sukuʼun* Juan.
3 Le ka tu yilaj jach utschaj tu tʼaan le judíoʼob úuchik u beetik leloʼ, tu túuxtaj xan machbil Pedro. (Lelaʼ úuch teʼ kʼiinoʼob táan u kʼiinbesaʼal le waajoʼob x-maʼ levadurailoʼ.)
4 Ka tsʼoʼok u beetik u maʼachal Pedroeʼ, tu beetaj xan u kʼaʼalal cárcel, ka tu kʼubaj tu kʼab kanjaats soldadoʼob de kantúul cada jaats utiaʼal ka u turnartubaʼob u kanáantoʼob, tumen u tukultmaj u jóoʼsik tu táan le kaaj ken tsʼoʼokok le Pascuaoʼ.
5 Pedro túuneʼ tiʼ kʼalaʼan kaʼach teʼ carceloʼ, baʼaleʼ le sukuʼunoʼob teʼ múuchʼuliloʼ táan kaʼach u oraroʼob tiʼ Dios tu yoʼolal yéetel tuláakal u puksiʼikʼaloʼob.
6 Le taʼaytak túun u jóoʼsaʼal tu táan le kaaj tumen Herodesoʼ, Pedroeʼ teʼ áakʼab jeʼeloʼ táan kaʼach u wenel kʼaxaʼan yéetel kaʼapʼéel cadena chúumuk tiʼ kaʼatúul soldadoʼob, tsʼoʼoleʼ yaan kaʼach soldadoʼob aktáan tiʼ le jool utiaʼal u kanáantkoʼob le carceloʼ.
7 Baʼaleʼ, ¡ile!, u ángel Jéeobaeʼ waʼalaji, ka juulnaj túun junpʼéel sáasil teʼ tuʼux yaan Pedro ichil le carceloʼ. Le ángel túunoʼ tu kʼolaj Pedro tu chʼalaʼatel utiaʼal u yajsik, tsʼoʼoleʼ ka tu yaʼalajtiʼ: «¡Líikʼen tu séebaʼanil!». Ka túun potsʼkʼaj le cadenaʼob ikil kʼaxaʼanil u kʼaboʼoboʼ.
8 Le ángel túunoʼ tu yaʼalajtiʼ: «Líiʼsaba, kʼax u táabil a xaanab». Letiʼeʼ bey tu beetiloʼ. Tu tsʼookeʼ le angeloʼ tu yaʼalajtiʼ: «Búukint le uláakʼ u yáal a nookʼoʼ ka taalakech tin paach».
9 Letiʼeʼ jóokʼi, ka joʼopʼ u bin tu paach, baʼaleʼ maʼ u yojel wa jach jaaj táan u yúuchul le baʼax ku beetik le angeloʼ. Tu tuklaj chéen táan kaʼach u máan tu yich le baʼax ku yúuchloʼ.
10 Le ka tsʼoʼok u máanoʼob teʼ tuʼux yaan le u yáax jaats soldadoʼob ku kananoʼoboʼ bey xan yiknal le u kaʼajaatsoʼ, kʼuchoʼob yiknal le joonaj de hierro tuʼux ku jóokʼol máak ichil le kaajoʼ, lelaʼ tu juunal jeʼepaj tu táanoʼob. Ka jóokʼoʼobeʼ, káaj u binoʼob tiʼ junpʼéel calle, teʼ túunoʼ le angeloʼ tu séebaʼanil lukʼ tu yiknal.
11 Le ka túun suunaj tu yóol Pedroeʼ, tu yaʼalaj: «Beoraaʼ in wojel jach tu jaajil Jéeoba túuxt u ángel utiaʼal u tokiken tu kʼab Herodes bey xan tiʼ le baʼax ku páaʼtik kaʼach le judíoʼob ka beetaʼaktenoʼ».
12 Le ka tsʼoʼok u tuukul Pedro tiʼ le baʼax úuchoʼ, bin tu yotoch María u maama Juan, le ku yaʼalaʼal xan Marcos tiʼoʼ; teʼeloʼ yaʼab máakoʼob u muchʼmubaʼobiʼ yéetel táan u oraroʼob.
13 Ka kʼoopnaj Pedro teʼ jool yaan tu yookbal le najoʼ, Rode, juntúul x-chʼúupal ku meyaj teʼ najoʼ, bin u yil máax le ku tʼaanoʼ.
14 Le ka tu kʼaj óoltaj u tʼaan Pedroeʼ, jach kiʼimakchaj u yóol, ka tsʼoʼokeʼ mix tu jeʼekʼabtaj le joonajoʼ, baʼaxeʼ bin áalkabil ich najeʼ ka tu yaʼalajtiʼob tiʼ waʼalakbal Pedro teʼ jooloʼ.
15 Letiʼobeʼ tu yaʼaloʼobtiʼ: «¡Tsʼoʼok u chokotal a pool!». Baʼaleʼ letiʼeʼ seguernaj u yaʼaliktiʼob jach jaaj Pedro le ku tʼaanoʼ. Letiʼob túuneʼ káaj u yaʼalikoʼob: «Jeʼeloʼ, míin u ángel».
16 Baʼaleʼ Pedroeʼ tiʼ pʼáat waʼatal táan u kʼoopiʼ. Le ka tu jeʼekʼabtoʼob le joonaj yéetel le ka tu yiloʼobeʼ, jach jaʼakʼ u yóoloʼob.
17 Baʼaleʼ letiʼeʼ tu beetaj u kʼab tiʼob utiaʼal ka xuʼuluk u tʼaanoʼob, ka tu jach tsolajtiʼob bix jóoʼsaʼabik tumen Jéeoba teʼ carceloʼ, ka tu yaʼalajtiʼob: «Tsikbalteʼex tiʼ Santiago yéetel tiʼ le u maasil sukuʼunoʼob le baʼaxoʼob tsʼoʼok u yúuchloʼ». Ka tsʼoʼok túun u yaʼalik leloʼ jóokʼeʼ, ka bin táanxel tuʼux.
18 Ka túun sáaschajeʼ, le soldadoʼoboʼ káaj u sen sakachtʼaanoʼob tumen maʼ u yojloʼob tuʼux tsʼoʼok Pedroiʼ.
19 Herodeseʼ máan u sen kaxte, baʼaleʼ tumen maʼ tu yileʼ káaj u kʼáatik u chiʼ le soldadoʼoboʼ, tsʼoʼoleʼ tu yaʼalaj ka tsʼaʼabak le castigo unaj u tsʼaʼabaltiʼoboʼ; ka tsʼoʼokeʼ lukʼ Judeaeʼ ka bin Cesarea, ka pʼáat tsʼeʼetsʼek kʼiinoʼobiʼ.
20 Herodeseʼ jach pʼujaʼan kaʼach tu contra u kaajil Tiro yéetel Sidón. U kajnáaliloʼob túuneʼ binoʼob yiknal le rey Herodes jeʼex tu múul chʼaʼtukultiloʼoboʼ; ka tsʼoʼok u yilkoʼob u lúubloʼob utsil tiʼ Blasto, le máax tsʼaʼan u kanáant u yotoch le reyoʼ, káaj u kʼáatkoʼob maʼ u yantal baʼatelil ichiloʼob, tumen u yoʼochoʼobeʼ tiʼ u taal tu luʼumil le reyoʼ.
21 Baʼaleʼ tiʼ junpʼéel kʼiin u muchʼmuba le kaajoʼ, Herodeseʼ tu búukintaj u jalaʼach nookʼeʼ ka kulaj teʼ tuʼux ku kutal le juezoʼ, ka joʼopʼ u tʼaan tu táanoʼob.
22 Le máakoʼob muchʼukbaloʼob túunoʼ káaj u kʼaʼam aʼalikoʼob: «¡Le máax ku tʼaanaʼ maʼ juntúul wíinikiʼ, juntúul dios!».
23 Jach teʼ súutuk jeʼeloʼ loobiltaʼab Herodes tumen u ángel Jéeoba, tumen maʼ tu tsʼáaj nojbeʼenil tiʼ Diosiʼ; letiʼ túuneʼ jaantaʼab tumen x-nookʼol, ka túun kíimi.
24 Baʼaleʼ u tʼaan Jéeobaeʼ seguernaj u sen tsikbaltaʼal yéetel u kʼiʼitpajal tuláakal tuʼux.
25 Bernabé yéetel Saulo túuneʼ, ka tsʼoʼok u beetkoʼob tuláakal le baʼax túuxtaʼab u beetoʼob tu kaajil Jerusalenoʼ, suunajoʼob Antioquía táan u biskoʼob Juan tu yéeteloʼob, le máax ku yaʼalaʼal xan Marcos tiʼoʼ.
Notas
^ Le tʼaan ich griegooʼ maʼatech u yeʼesik wa maas nojoch Santiago tiʼ Juan wa maas chichan.
