Hechos 19:1-41
19 Le táan u yúuchul le baʼaloʼobaʼ yéetel le tiaʼan Apolos tu kaajil Corintooʼ, Pabloeʼ máan teʼ bej yaan náach tiʼ le kʼáaʼnáaboʼ ka éem tu kaajil Éfeso; teʼeloʼ tu yilaj wa jaytúul disipuloʼobiʼ,
2 ka tu yaʼalajtiʼob: «¿Ta kʼameʼex wa kiliʼich muukʼ le ka ta beetabaʼex disipuloil tiʼ Jesusoʼ?». Letiʼobeʼ tu núukoʼob: «¡Si mix juntéen k-uʼuy u yaʼalaʼal wa yaan bey xan wa minaʼan kiliʼich muukʼ!».
3 Letiʼeʼ tu yaʼalaj: «¿Baʼax okjaʼil túun tsʼaʼabteʼex?». Letiʼobeʼ tu núukoʼob: «Le okjaʼ ku tsʼáaik Juanoʼ».
4 Pabloeʼ tu yaʼalaj: «Juaneʼ tu tsʼáaj le okjaʼ ku yeʼesik tsʼoʼok u kʼexik u tuukul máakoʼ, lelaʼ tu beetaj táan kaʼach u yaʼalik tiʼ le kaaj ka u creertoʼob le máax kun taal kaʼach paachil tiʼ letiʼoʼ, lelaʼ Jesús».
5 Le ka tu yuʼuboʼob lelaʼ, le disipuloʼoboʼ okjaʼanajoʼob tu kʼaabaʼ Yuumtsil Jesús.
6 Le ka túun tu tsʼáaj u kʼab Pablo tu yóokʼoloʼobeʼ taal le kiliʼich muukʼ tu yóokʼoloʼoboʼ, ka joʼopʼ u tʼaanoʼob ich jejeláas tʼaanoʼob bey xan u profetizaroʼob.
7 Tuláakloʼobeʼ kex doce u túulal xiiboʼob.
8 Ichil óoxpʼéel mesoʼobeʼ Pabloeʼ ook teʼ sinagogaoʼ ka joʼopʼ u kaʼansaj yéetel x-maʼ saajkilil, táan u máansik tsoltʼaanoʼob yéetel táan u yilik u yoksik tu tuukul le máakoʼob baʼaloʼob yaan yil yéetel u Reino Diosoʼ.
9 Baʼaleʼ jujuntúul tiʼ letiʼobeʼ maʼ xuʼul u chichkúuntik u puksiʼikʼaloʼob utiaʼal maʼ u creertikoʼobiʼ, yéetel maʼ xuʼul u tʼaanoʼob kʼaas yoʼolal Le Bej* tu táan le máakoʼob u muchʼmubaʼoboʼ, le oʼolal Pabloeʼ lukʼ tu yiknaloʼobeʼ ka tu luʼsaj xan le disipuloʼob ichiloʼoboʼ, yéetel sáamsamal kaʼach ku máansik tsoltʼaanoʼob tu escuelail Tirano, teʼ tuʼux ku muchʼkuba le máakoʼoboʼ.
10 Pabloeʼ kaʼapʼéel jaʼaboʼob kaʼansajnaj teʼ escuelaaʼ; tuláakal túun le máaxoʼob kajaʼanoʼob tu luʼumil Asiaoʼ, judíoʼob yéetel griegoʼobeʼ, tu yuʼuboʼob u tsikbaltaʼal u tʼaan Dios.
11 Dioseʼ yéetel u kʼab Pabloeʼ seguernaj u beetik nukuch baʼaloʼob ku beetik u jaʼakʼal u yóol máak,
12 le oʼolal tak le pañueloʼob yéetel le nookʼoʼob tsʼoʼok u meyaj tiʼ Pablooʼ ku bisaʼal kaʼach tiʼ le máaxoʼob táan u muʼyajoʼoboʼ, letiʼob túuneʼ ku xuʼulul u muʼyajoʼob, ku jóokʼol xan le demonioʼob okaʼantiʼoboʼ.
13 Baʼaleʼ jujuntúul tiʼ le judíoʼob ku máanoʼob kajalkaaj ku jóoʼskoʼob demonioʼoboʼ, tu yóotoʼob xan u chʼaʼchiʼitoʼob u kʼaabaʼ Yuumtsil Jesús utiaʼal ka u jóoʼsoʼob le demonioʼob okaʼan tiʼ le máakoʼoboʼ, táan kaʼach u yaʼalikoʼob: «Lelaʼ kin waʼalikteʼex tu kʼaabaʼ Jesús le máax ku kʼaʼaytaʼal tumen Pablooʼ».
14 Yaan túun kaʼach siete máakoʼob beetik lelaʼ, leloʼobaʼ u paalal Esceva, juntúul tiʼ u nuuktakil u sacerdoteil le judíoʼoboʼ.
15 Baʼaleʼ le demoniooʼ tu yaʼalajtiʼob: «In kʼaj óol Jesús yéetel in wojel xan máax Pablo, baʼaleʼ teʼexeʼ, ¿máaxeʼexiʼ?».
16 Le máak túun okaʼan demonio tiʼoʼ tu puluba tu yóokʼoloʼobeʼ, ka tu machaj yéetel tu paʼaj u muukʼ cada juntúul tiʼ letiʼob, letiʼob túuneʼ púutsʼoʼob teʼ najoʼ x-maʼ nookʼil yéetel loobiltaʼanoʼob.
17 Lelaʼ kʼuch ojéeltbil tumen tuláakal, tumen le judíoʼob bey xan tumen le griegoʼob kajaʼanoʼob Éfesooʼ, ka túun jach sajakchajoʼob; tsʼoʼoleʼ seguernaj u nojbeʼenkúuntaʼal u kʼaabaʼ Yuumtsil Jesús.
18 Yaʼab túun tiʼ le máaxoʼob tu beetubaʼob disipuloil tiʼ Jesusoʼ, taaloʼobeʼ ka tu tsʼáajoʼob ojéeltbil tu táan u maasil le baʼaxoʼob ku beetkoʼob kaʼachoʼ.
19 Tsʼoʼoleʼ yaʼab tiʼ le máaxoʼob ku beetik kaʼach u j-meeniloʼoboʼ tu muchʼkíintaj u libroʼobeʼ ka tu tóokoʼob tu táan tuláakal. Ka joʼopʼ u jóoʼskoʼob u cuentail bajux u tojol tuláakaleʼ, ka tu yiloʼobeʼ u tojoleʼ cincuenta mil u taakʼinil plata.
20 Bey túunoʼ u tʼaan Jéeobaeʼ tumen jach nojoch u páajtalileʼ seguernaj u kʼiʼitpajal yéetel u maas yantal u muukʼ.
21 Ka tsʼoʼok túun u yúuchul tuláakal le baʼaloʼobaʼ Pabloeʼ tu chʼaʼtuklaj u bin Jerusalén ken tsʼoʼokok u máan tu luʼumil Macedonia yéetel tu luʼumil Acaya. Letiʼeʼ tu yaʼalaj: «Ken kʼuchken teʼeloʼ yaan xan in bin Roma».
22 Ka túun tu túuxtaj tu kaajil Macedonia kaʼatúul tiʼ le máaxoʼob áantkoʼ, Timoteo yéetel Erasto, baʼaleʼ letiʼeʼ pʼáat wa jaypʼéel kʼiinoʼob tu luʼumil Asia.
23 Teʼ kʼiinoʼob xan jeʼeloʼ yanchaj junpʼéel nojoch woʼochʼlantáambal yoʼolal Le Bejoʼ.
24 Lelaʼ úuchi tumen Demetrio, juntúul platero ku beetik mejen temploʼob de plata chíikaʼanoʼob tiʼ u templo Ártemiseʼ, jach yaʼab náajal ku pʼatik kaʼach tiʼ le máaxoʼob meyajtik le plataoʼ;
25 letiʼ túuneʼ tu muchʼaj le máakoʼobaʼ bey xan le ku meyajtikoʼob baʼaloʼob jeʼex lelaʼ, ka tu yaʼalajtiʼob: «Xiibeʼex, teʼexeʼ a wojleʼexeʼ k-ayikʼalileʼ tiʼ le meyaj u taalaʼ.
26 Teʼex xaneʼ tsʼoʼok a wilkeʼex yéetel tsʼoʼok a wuʼuyikeʼexeʼ, maʼ chéen Éfesoiʼ, baʼaxeʼ óoliʼ tiʼ tuláakal u luʼumil Asiaeʼ, le Pabloaʼ tsʼoʼok u kʼexik baʼax ku creertik yaʼabkach máakoʼob yéetel tsʼoʼok u yoksik tu tuukuloʼobeʼ le diosoʼob beetaʼan yéetel u kʼab máakoʼ maʼ bin jach diosoʼobiʼ.
27 Tsʼoʼoleʼ saajken, maʼ chéen ka joʼopʼok u yúuchul tʼaan kʼaas tiʼ le meyaj k-beetkoʼ, baʼaxeʼ ka mixbaʼalkúuntaʼak u templo le nojoch diosa Ártemisoʼ, bey xan ka xuʼuluk u adorartaʼal u kiʼichpanil tiʼ tuláakal u luʼumil Asia bey xan tiʼ tuláakal yóokʼol kaab».
28 Le ka tu yuʼuboʼob lelaʼ, le máakoʼoboʼ sen pʼuʼujoʼob ka joʼopʼ u yaawtoʼob, táan u yaʼalikoʼob: «¡Sen nojoch Ártemis, u diosa le efesoiloʼoboʼ!».
29 U kajnáaliloʼob túun le kaajoʼ sen xaʼakʼpaj u tuukuloʼobeʼ ka téek ookoʼob teʼ teatro jeʼex tu múuchʼ tukultiloʼoboʼ, ka túun tu jíiltaj u bisoʼob Gayo yéetel Aristarco; letiʼobeʼ u yéet máanoʼob kaʼach Pablo, yéetel Macedonia u taaloʼob.
30 Baʼaleʼ Pabloeʼ u kʼáat kaʼach u yoksuba ichil le máakoʼoboʼ, chéen baʼaleʼ le disipuloʼoboʼ maʼ tu chaʼajoʼobtiʼiʼ.
31 Tak jujuntúul tiʼ le máaxoʼob nuʼuktik le kʼiinbesajoʼob yéetel le báaxaloʼoboʼ, máaxoʼob ku biskubaʼob tu yéeteloʼ, tu túuxtoʼob máakoʼob tu yiknaleʼ ka joʼopʼ u sen aʼalikoʼobtiʼ maʼ u yokol teʼ teatrooʼ tumen jeʼel u tsʼáaik u kuxtal tu táan kíimileʼ.
32 U jaajileʼ yaan tiʼ le máakoʼob u muchʼmubaʼoboʼ táan kaʼach u yawtikoʼob junpʼéel baʼal, uláakʼoʼobeʼ yaanal baʼal, tumen láaj xaʼakʼpajaʼan u tuukuloʼob; tsʼoʼoleʼ u maas yaʼabil tiʼ letiʼobeʼ maʼ u yojloʼob kaʼach baʼax oʼolal u muchʼmubaʼobiʼ.
33 Tuláakloʼob túuneʼ tu jóoʼsoʼob Alejandro ichil le yaʼabkach máakoʼoboʼ, baʼaleʼ le judíoʼoboʼ táan kaʼach u lelenchʼintikoʼob; Alejandro túuneʼ tu beetaj u kʼab tiʼob tumen u kʼáat kaʼach tʼaan tu táan le kaajoʼ.
34 Baʼaleʼ le ka tu tsʼáajoʼob cuenta judío le máakaʼ, tuláakloʼobeʼ ichil kaʼapʼéel hora tu kʼaʼam aʼaloʼob lelaʼ: «¡Sen nojoch Ártemis, u diosa le efesoiloʼoboʼ!».
35 U jalaʼachil le kaajoʼ ka tsʼoʼok túun u yilik u jetsʼkúuntik u yóol le yaʼabkach máakoʼoboʼ, tu yaʼalaj: «Xiibeʼex tiʼ u kaajil Éfeso, jach u jaajileʼ ¿yaan wa máax jeʼel u yaʼalik wa maʼ u kaajil Éfeso kanáantik u templo le nojoch Ártemisoʼ bey xan le imagen lúub teʼ kaʼanoʼ?
36 Le oʼolaleʼ tumen mix máak jeʼel u páajtal u yaʼalik wa maʼ jaaj le baʼaloʼobaʼ, teʼexeʼ unaj a jetsʼkúuntikabaʼex yéetel maʼ unaj a jáan líikʼil a beeteʼex wa baʼaxiʼ.
37 Tumen le máakoʼob tsʼoʼok a taaskeʼex wayeʼ, maʼatech u yoklikoʼob le temploʼoboʼ mix tech u tʼaanoʼob kʼaas tu contra le k-diosa Ártemisaʼ.
38 Le oʼolaleʼ Demetrio bey xan le máaxoʼob ku meyajtikoʼob plata u muchʼmubaʼob tu yéeteloʼ, wa yaan baʼax u yaʼaloʼob tu contra wa máaxeʼ, yaan u kʼiinil u muchʼkuba u jueziloʼob le kaajoʼ, tsʼoʼoleʼ yaan xan gobernadoroʼob;* jeʼel u páajtal u binoʼob u paklan tak u pooloʼobeʼ.
39 Baʼaleʼ wa yaanal baʼal a kʼáateʼexeʼ, unaj u chʼaʼtuklaʼal tiʼ junpʼéel muchʼtáambal jeʼex u yaʼalik le leyoʼ.
40 Tumen u jaajileʼ yoʼolal le baʼax úuch bejlaʼaʼ jeʼel u taʼakal k-pooleʼ yéetel jeʼel u yaʼalaʼal táan k-líikʼil tu contra le gobiernooʼ, tumen minaʼan mix baʼal jeʼel u páajtal k-aʼalik utiaʼal k-eʼesik baʼax oʼolal yanchaj le woʼochʼlantáambalaʼ».
41 Ka tsʼoʼok túun u yaʼalik le baʼaloʼobaʼ, tu yaʼalaj tiʼ le máakoʼob u muchʼmubaʼob ka lukʼkoʼob teʼeloʼ.
