Hechos 2:1-47
2 Teʼ kʼiin túun táan u kʼiinbesaʼal le Pentecostesoʼ, tuláakal le disipuloʼoboʼ junmúuchʼ yaniloʼob kaʼach tiʼ junpʼéel kúuchil.
2 Chéen ka téek uʼuyaʼab u juum junpʼéel baʼal teʼ kaʼanoʼ, jach jeʼex u juum junpʼéel kʼaʼamkach iikʼeʼ, ka tu beetaj u yáambal tuláakal le naj tuʼux kulukbaloʼoboʼ.
3 Ka túun chíikpaj mejen aakʼoʼob tu yóokʼoloʼob beyoʼob kʼáakʼeʼ, ka tʼoʼox ichiloʼob; cada junpʼéeleʼ pʼáat tu yóokʼol cada juntúul tiʼ le máaxoʼob yanoʼoboʼ,
4 ka chuʼupoʼob yéetel kiliʼich muukʼ, ka túun káaj u tʼaanoʼob ich jejeláas tʼaanoʼob, jeʼel bix u tsʼaʼabal kaʼach páajtalil tiʼob tumen le kiliʼich muukʼoʼ.
5 Teʼ kʼiinoʼob jeʼeloʼ, tu kaajil Jerusaleneʼ yaan kaʼach judíoʼob jach u kʼubmaj u yóoloʼob u meyajtoʼob Dios; le máakoʼobaʼ tiʼ tuláakal u luʼumiloʼob yóokʼol kaab u taaloʼob.
6 Le ka túun uʼuyaʼab le kʼaʼamkach juumoʼ, le yaʼabkach máakoʼobaʼ taaloʼob teʼ tuʼux yaan le disipuloʼoboʼ ka jaʼakʼ u yóoloʼob, tumen tu yuʼuboʼob táan u tʼaan le disipuloʼob ichil le tʼaan ku beetik cada juntúul tiʼ letiʼoboʼ.
7 U jaajileʼ letiʼobeʼ jach jaʼakʼ u yóoloʼob, ka tu yaʼaloʼob: «Ileʼex, ¿maʼ wa galileail tuláakal le máakoʼob ku tʼaanoʼobaʼ?
8 ¿Bix u páajtal túun u tʼaanoʼob ichil le tʼaan t-kanaj cada juntúul tiʼ toʼon t-paaliloʼ?
9 Ichiloʼoneʼ yaan partiailoʼob, mediailoʼob, elamiloʼob, u kajnáaliloʼob Mesopotamia, Judea, Capadocia, Ponto, junxóotʼ u luʼumil Asia,
10 u kajnáaliloʼob Frigia, Panfilia, Egipto, junjaats tiʼ u kajnáaliloʼob Libia yaan tu tojil Cirene, romailoʼob chéen jáan taaljaʼanoʼob xíimbal, judíoʼob, bey xan máakoʼob tsʼoʼok u kʼamkoʼob u religión le judíoʼoboʼ,
11 cretailoʼob yéetel arabiailoʼob, tuláakloʼoneʼ t-uʼuyaj u tsikbaltaʼal le kiʼichkelem baʼaloʼob yaan yil yéetel Dios ichil le tʼaanoʼob k-beetkoʼ».
12 Jach tu jaajileʼ láaj jaʼakʼ u yóoloʼob yéetel pʼáat jaajap u chiʼob, táan u yaʼalikoʼob tu baatsiloʼob: «¿Baʼaxten ku páajtal u tʼaanoʼob beyaʼ?».
13 Baʼaleʼ uláakʼ máakoʼobeʼ káaj u yaʼalikoʼob baʼal tiʼob yéetel le tʼaanoʼobaʼ: «Le máakoʼobaʼ kalaʼanoʼob tumen u yukʼmoʼob chʼujuk vino».
14 Baʼaleʼ Pedroeʼ waʼalaj yéetel le uláakʼ once apostoloʼoboʼ ka tu kʼaʼam aʼalaj: «Xiibeʼex tiʼ u luʼumil Judea bey xan teʼex tuláakal u kajnáalileʼex Jerusalén, ojéelteʼex lelaʼ yéetel chʼenxikinteʼex maʼalob baʼax ken in waʼale.
15 Le máakoʼobaʼ maʼ kalaʼanoʼob jeʼex a waʼalikeʼexoʼ, tumen beoraaʼ tiʼ yanoʼon teʼ hora óoxpʼéeloʼ.*
16 Baʼaxeʼ táan u yúuchul le baʼax aʼalaʼan tumen profeta Joelaʼ:
17 ‹«Teʼ tu tsʼook kʼiinoʼoboʼ —ku yaʼalik Dios— yaan in wekik junpʼíit in kiliʼich muukʼ yóokʼol tuláakal u jejeláasil máakoʼob, u paalaloʼob túuneʼ, xiiboʼob yéetel koʼoleloʼobeʼ, yaan u profetizaroʼob, u táankelem paalaloʼobeʼ yaan chíikulaloʼob kun tsʼaabil u yiloʼob, yéetel u chʼijaʼan máakoʼobeʼ yaan baʼaloʼob kun tsʼaabil u wayakʼtoʼob;
18 tak tu yóokʼol in palitsiloʼob, xiiboʼob yéetel koʼoleloʼobeʼ, yaan in wekik junpʼíit in kiliʼich muukʼ teʼ kʼiinoʼob jeʼeloʼ, letiʼob túuneʼ yaan u profetizaroʼob.
19 Teʼ kaʼanoʼ yaan in tsʼáaik baʼaloʼob ken u beet u jaʼakʼal u yóol máak, yéetel teʼ Luʼumoʼ yaan in tsʼáaik chíikulaloʼob, kʼiʼikʼ, kʼáakʼ yéetel u wóowolal buutsʼ.
20 Le Kʼiinoʼ yaan u suʼutul éeʼjochʼeʼenil, yéetel le Lunaoʼ yaan u suʼutul kʼiʼikʼil táanil tiʼ u kʼuchul u nojoch yéetel u kiʼichkelem kʼiin Jéeoba.
21 Tuláakal máax túun ku chʼaʼchiʼitik u kʼaabaʼ Jéeobaeʼ yaan u salvartaʼal»›.
22 »Xiibeʼex tiʼ u luʼumil Israel, chʼenxikinteʼex le baʼax ken in waʼalteʼexaʼ: Jesús tiʼ u kaajil Nazareteʼ, juntúul xiib eʼesaʼabteʼex tumen Dios jach máax letiʼ; tumen yéetel u kʼab Jesuseʼ, Dioseʼ tu beetaj milagroʼob, baʼaloʼob ku beetik u jaʼakʼal u yóol máak bey xan chíikulaloʼob ta táaneʼex, jeʼex a wojlileʼexoʼ.
23 Dioseʼ, táanil tiʼ u yúuchleʼ u yojliliʼ yaan u maʼachal utiaʼal kíimsbil le xiibaʼ, lelaʼ bey úuchik u chʼaʼtuklik ka úuchkoʼ; teʼex túuneʼ ta beeteʼex u baʼajal tiʼ cheʼ tumen le kʼasaʼan máakoʼoboʼ, tsʼoʼoleʼ ka ta kíimseʼex.
24 Baʼaleʼ Dioseʼ tu kaʼa kuxkíintaj úuchik u tokik tu kʼab le kíimiloʼ, tumen maʼ unaj u pʼáatal kaʼach tu kʼab le kíimiloʼ.
25 Tumen Davideʼ tu yaʼalaj yoʼolal Jesús: ‹Mantatsʼ tiʼ yaan kaʼach Jéeoba tu táan in wicheʼ; tumen tiʼ yaan tin x-noʼoj kʼabeʼ mix bikʼin kin tíitbil.
26 Yoʼolal lelaʼ kiʼimakchaj u yóol in puksiʼikʼal, ka tʼaanajen yéetel kiʼimak óolal. Tsʼoʼoleʼ tak in wíinklileʼ yaan u jeʼelel le táan u páaʼtik u yáantaʼaloʼ;
27 tumen maʼ ken a pʼaten* teʼ Muknaloʼ,* yéetel maʼ ken a chaʼa u kʼastal u wíinklil le máax chúukaʼan u yaabilaj tiʼ techoʼ.
28 Techeʼ tsʼoʼok a tsʼáaik in kʼaj óolt u bejiloʼob le kuxtaloʼ, yaan xan a chupken yéetel kiʼimak óolal ken yanaken tu táan a wich›.
29 »Xiibeʼex, in láakʼeʼex, jach maʼalob in wilik in tʼankeʼex yéetel u jaajil in wóol yoʼolal David k-úuchben taata; letiʼeʼ kíimeʼ ka muʼuki, yéetel u muknaleʼ láayliʼ tiʼ yaan t-kaajal tak teʼ kʼiinoʼobaʼ.
30 Tumen profeta yéetel tumen Dios aʼaltiʼ jach tu jaajil yaan u kutal kaʼach juntúul tiʼ u chʼiʼibal tu tronoeʼ,
31 Davideʼ táanil tiʼ u yúuchleʼ tu yojéeltaj yaan u kaʼa kuxkíintaʼal le Cristooʼ, yéetel tʼaanaj tiʼ leloʼ; letiʼeʼ tu yaʼaleʼ Cristoeʼ mix xúumpʼattaʼab teʼ Muknaloʼ mix chaʼab u kʼastal u wíinkliliʼ.
32 Le Jesusaʼ Dios kaʼa kuxkíinte, lelaʼ tuláakloʼoneʼex k-ojel jach bey úuchikoʼ.
33 Le oʼolaleʼ tumen nojbeʼenkúuntaʼab le ka tsʼaʼab tu x-noʼoj kʼab Dios yéetel tumen tsʼaʼab kiliʼich muukʼ tiʼ tumen u Taata jeʼex aʼalaʼaniloʼ, letiʼeʼ tsʼoʼok u wekik le kiliʼich muukʼ t-óokʼol jeʼex a wilkeʼex yéetel a wuʼuyikeʼexaʼ.
34 U jaajileʼ Davideʼ maʼ naʼak kaʼaniʼ, baʼaxeʼ letiʼeʼ tu yaʼalaj: ‹Jéeobaeʼ tu yaʼalaj tiʼ in Yuumtsil: «Kulen tin x-noʼoj kʼab,
35 tak ken in tsʼáa máaxoʼob pʼekmilech bey kʼáancheʼ utiaʼal a wookoʼobeʼ»›.
36 Le oʼolaleʼ ojéeltaʼak tumen tuláakal u kajnáaliloʼob Israeleʼ, Dioseʼ jach tu jaajil tsʼoʼok u beetik Yuumtsilil yéetel Cristoil le Jesusaʼ, le máax ta bajeʼex tiʼ junpʼéel cheʼoʼ».
37 Le máakoʼob túunoʼ le ka tu yuʼuboʼob lelaʼ yaachaj u yóol u puksiʼikʼaloʼobeʼ ka tu kʼáatoʼob tiʼ Pedro bey xan tiʼ u chuukáan apostoloʼoboʼ: «Xiibeʼex, k-láakʼeʼex, ¿baʼax kʼaʼabéet k-beetik?».
38 Pedroeʼ tu yaʼalajtiʼob: «Kʼex a tuukuleʼex yéetel okjaʼanak cada juntúul tiʼ teʼex tu kʼaabaʼ Jesucristo utiaʼal ka perdonartaʼak a kʼebaneʼex, beyoʼ yaan a kʼamkeʼex le kiliʼich muukʼ ku síik Diosoʼ.
39 Tumen lelaʼ tiʼ teʼex aʼalaʼan u tsʼaʼabal, tiʼ a paalaleʼex, tiʼ le máaxoʼob náach yanoʼoboʼ, bey xan tiʼ tuláakal le máaxoʼob ken u tʼan Jéeoba k-Dios utiaʼal ka náatsʼkoʼob tu yiknaloʼ».
40 Pedroeʼ yéetel uláakʼ yaʼabkach tʼaanoʼobeʼ tu chúukaʼan tsolaj tuláakal le baʼaloʼobaʼ yéetel seguernaj u sen aʼaliktiʼob: «Náachkuntabaʼex utiaʼal maʼ a xuʼulsaʼaleʼex paʼteʼ yéetel le generación jach kʼaschajaʼan u kuxtalaʼ».
41 Le máaxoʼob túun tu tsʼáajoʼob ichil u puksiʼikʼaloʼob le baʼaxoʼob tu yaʼaloʼ okjaʼanajoʼob, teʼ kʼiin túunoʼ kex tres mil máakoʼob* kʼuch u beetubaʼob disipuloʼob.
42 Letiʼob túuneʼ maʼ xuʼul u kaanbaloʼob tiʼ le apostoloʼoboʼ, maʼ xuʼul u paklan áantkubaʼob yéetel le baʼaxoʼob yaantiʼoboʼ, mix u múul jaanloʼob yéetel u múul oraroʼob.
43 U jaajileʼ, káaj u yokol saajkil tiʼ tuláakal máak, tsʼoʼoleʼ yaʼab milagroʼob yéetel chíikulaloʼob ku yúuchul kaʼach yoʼolal le apostoloʼoboʼ.
44 Tuláakal le máaxoʼob kaʼach ku kʼuchul u beetubaʼob disipuloiloʼ, ku paklan áantkubaʼob yéetel le baʼaxoʼob yaantiʼoboʼ,
45 ka túun tu konoʼob u luʼumoʼob bey xan le uláakʼ baʼaxoʼob yaantiʼoboʼ, tsʼoʼoleʼ ka tu tʼoxoʼob u náajalil, jeʼex kʼaʼabéetchajik tiʼ cada juntúuleʼ.
46 Sáamsamal kaʼach ku binoʼob teʼ templo jeʼex u chʼaʼtukultmiloʼoboʼ, yéetel ku muchʼkubaʼob janal tu yotoch cada juntúul; letiʼobeʼ ku múul jaanloʼob kaʼach yéetel kiʼimak óolal bey xan yéetel tuláakal u puksiʼikʼaloʼob,
47 táan u kiʼikiʼtʼantkoʼob Dios yéetel táan u lúubloʼob utsil tiʼ le kaajoʼ. Le táan u beetkoʼob lelaʼ, Jéeobaeʼ sáamsamal táan kaʼach u natsʼik yiknal le disipuloʼob le máaxoʼob ku binoʼob tu bejil le salvacionoʼ.
Notas
^ Kex láas 9:00 jaʼatskab. Le hora kaʼachoʼ ku káajal u xoʼokol ken tíipʼik Kʼiin.
^ Lit.: «maʼ ken a pʼat in alma». Ilaʼak Tipʼ. 7A.
^ Lit.: «Hades». Ilaʼak Tipʼ. 8.
^ Lit.: «almaʼob». Ilaʼak Tipʼ. 7A.
