Hechos 3:1-26
3 Junpʼéel kʼiin táan u bin Pedro yéetel Juan teʼ templo utiaʼal le oración ku beetaʼal teʼ hora nueveoʼ,*
2 táan xan u bisaʼal juntúul máak móoch u yook desde ka síiji. Le máakaʼ sáamsamal kaʼach u bisaʼal teʼ templooʼ yéetel ku pʼaʼatal naatsʼ tiʼ le jool ku kʼaabaʼtik Kiʼichkelem Joonajoʼ, utiaʼal ka u kʼáat caridad tiʼ le máaxoʼob ku yookloʼob teʼ templooʼ.
3 Le máakaʼ ka tu yilaj jach nukaʼaj okol Pedro yéetel Juan teʼ templooʼ, káaj u kʼáatiktiʼob u caridad.
4 Baʼaleʼ táaʼpaktaʼab tumen Pedro yéetel Juaneʼ, ka aʼalaʼabtiʼ tumen Pedro: «Paktoʼoniʼ».
5 Le máak túunaʼ tu táaʼpaktoʼob táan u páaʼtik u tsʼaʼabal wa baʼax tiʼ.
6 Baʼaleʼ Pedroeʼ tu yaʼalajtiʼ: «Minaʼanten plata mix oro, baʼaxeʼ kin tsʼáaiktech le baʼax yaantenaʼ: ¡Tu kʼaabaʼ Jesucristo le Nazaretiloʼ, líikʼen, xíimbalnen!».
7 Ka túun tu machaj le máak tu x-noʼoj kʼaboʼ ka tu líiʼsaj. Le máak túunoʼ tu séebaʼanil yanchaj u muukʼ u yook bey xan u kaal u yook,
8 síitʼnajeʼ ka waʼalaji, ka joʼopʼ u xíimbal. Ka túun ook tu yéeteloʼob teʼ templooʼ táan u xíimbal, táan u síitʼ yéetel táan u kiʼikiʼtʼantik Dios.
9 Tuláakal le máakoʼoboʼ tu yiloʼob táan u xíimbal yéetel táan u kiʼikiʼtʼantik Dios.
10 Ka tu tsʼáajoʼob cuentaeʼ letiʼe máak suuk kaʼach u kutal u kʼáat caridad teʼ templooʼ, teʼ jool ku kʼaabaʼtik Kiʼichkelem Joonajoʼ; ka jach jaʼakʼ u yóoloʼob yéetel jach kiʼimakchaj u yóoloʼob yoʼolal le baʼax tsʼoʼok u yúuchloʼ.
11 Le máakoʼ maʼ tu jáalkʼabtik kaʼach Pedro yéetel Juan. Tuláakal túun le máakoʼoboʼ, tumen jach táaj kiʼimak u yóoloʼobeʼ, tu muchʼubaʼob tu yiknaloʼob teʼ kúuchil ku kʼaabaʼtik u columnaʼob Salomonoʼ.
12 Ka tu yilaj Pedro lelaʼ tu yaʼalaj tiʼ le máakoʼoboʼ: «Xiibeʼex tiʼ u luʼumil Israel, ¿baʼaxten ku jaʼakʼal a wóoleʼex tu yoʼolal lelaʼ? ¿Baʼaxten ka táaʼpaktikoʼoneʼex bey tiʼ toʼon taal u páajtalil k-beetik lelaʼ? ¿Ka tuklikeʼex wa chéen tumen k-jach tsʼaamaj k-óol meyajt Dios le oʼolal t-beetaj u xíimbal le máakaʼ?
13 U Dios Abrahán, Isaak yéetel Jacob, u Dios k-úuchben láakʼtsiloʼobeʼ, tsʼoʼok u nojbeʼenkúuntik Jesús u Palitsil, le máax ta kʼubeʼex yéetel ta pʼekteʼex tu táan Pilato le ka tu yaʼalaj u kʼáat kaʼach u jáalkʼabtoʼ.
14 U jaajileʼ ta pʼekteʼex le máax kiliʼich yéetel utsoʼ, yéetel ta sen kʼáateʼex ka jáalkʼabtaʼakteʼex juntúul xiib ku kíimsaj wíinik,
15 baʼaleʼ ta kíimseʼex le Máax yéeyaʼan utiaʼal u tsʼáaik le kuxtaloʼ. Chéen baʼaleʼ tsʼoʼok u líiʼsaʼal tumen Dios ichil le kimenoʼoboʼ, yéetel toʼoneʼ k-ojel jach jaaj bey úuchikoʼ.
16 Le oʼolaleʼ yoʼolal u kʼaabaʼ yéetel yoʼolal k-fe tiʼ u kʼaabaʼ Jesuseʼ, le máak a kʼaj óoleʼex yéetel ka wilkeʼexaʼ, tsʼoʼok u yantal u muukʼ; yéetel yoʼolal xan k-fe tiʼ Jesuseʼ, tsʼoʼok u jach tojtal u yóol le máak jeʼex a wilkeʼexaʼ.
17 Beoraaʼ, in láakʼeʼex, in wojel ta beeteʼex leloʼ tumen maʼ a wojleʼex baʼax ka beetkeʼexiʼ, jeʼex xan tu beetil le máaxoʼob gobernartikeʼexoʼ.
18 Baʼaleʼ yéetel lelaʼ Dioseʼ tsʼoʼok u béeykuntik le baʼaxoʼob tu yaʼalaj úuchjeakil tiʼ le profetaʼob ka u kʼaʼaytoʼoboʼ: u Cristoeʼ yaniliʼ u muʼyajeʼ.
19 »Kʼex a tuukuleʼex yéetel utskíint a kuxtaleʼex utiaʼal ka perdonartaʼak* a kʼebaneʼex, utiaʼal ka taalak u kʼiinil u kaʼa tsʼaʼabal a muukʼeʼex tumen Jéeoba, lelaʼ jach letiʼ kun beetik,
20 utiaʼal xan ka u túuxt le Cristooʼ, le máax yéeyaʼaniliʼ a tiaʼaleʼexoʼ, Jesús,
21 le máax kʼaʼabéetchaj u pʼáatal kaʼan tak ken utskíintaʼak tuláakal baʼal jeʼex tu yaʼalil Dios yéetel u chiʼ u kiliʼich profetaʼob úuchjeakiloʼ.
22 Tsʼoʼoleʼ tak Moiseseʼ tu yaʼalaj: ‹Jéeoba Dioseʼ, ichil a sukuʼuneʼexeʼ yaan u líiʼsik tiʼ teʼex juntúul profeta chíikaʼan tiʼ teen. Teʼexeʼ kʼaʼabéet a chʼenxikintikeʼex tuláakal le baʼaxoʼob ken u yaʼalteʼexoʼ.
23 U jaajileʼ jeʼel máaxak* maʼ tu yuʼubik u tʼaan le Profetaaʼ, yaan u xuʼulsaʼaltiʼ junpuliʼ ichil le kaajoʼ›.
24 Tsʼoʼoleʼ desde profeta Samuel bey xan le u maasil yanchajoʼoboʼ, tuláakal le profetaʼob tsʼoʼok u tʼaanoʼoboʼ, tsʼoʼok xan u jach tsʼáaikoʼob ojéeltbil le baʼax kun úuchul teʼ kʼiinoʼobaʼ.
25 Teʼexeʼ u paalaleʼex le profetaʼoboʼ yéetel tiʼ teʼex pʼaʼat le núuptʼaan tu beetaj Dios yéetel a úuchben taataʼex le ka tu yaʼalaj tiʼ Abrahán: ‹Tu yoʼolal a chʼiʼibaleʼ yaan u kiʼikiʼtʼantaʼal tuláakal le familiaʼob yanoʼob way Luʼumeʼ›.
26 Dioseʼ, ka tsʼoʼok u líiʼsik u Palitsileʼ, yáax ta wiknaleʼex tu túuxtaj utiaʼal ka u kiʼikiʼtʼanteʼex ikil u náachkuntkeʼex tiʼ le baʼaloʼob kʼaastak ka beetkeʼexoʼ.»
Notas
^ Kex láas 3:00 u chíinil Kʼiin. Le hora kaʼachoʼ ku káajal u xoʼokol ken tíipʼik Kʼiin.
^ Lit.: «utiaʼal ka tuʼupuk».
^ Lit.: «alma». Ilaʼak Tipʼ. 7A.
