Hechos 4:1-37
4 Le táan túun u tʼaan Pedro yéetel Juan tu táan le máakoʼoboʼ, taal u nuuktakil le sacerdoteʼoboʼ, taal u nojchil le máaxoʼob ku kanáantkoʼob le templooʼ bey xan le saduceoʼoboʼ.
2 Letiʼobeʼ kʼuuxchajaʼanoʼob tumen le kaʼatúul máakoʼobaʼ táan kaʼach u kaʼanskoʼob yéetel táan u kʼaʼaytikoʼob tiʼ le máakoʼob kaʼa kuxkíintaʼab Jesusoʼ.
3 Ka tsʼoʼokeʼ maʼachoʼobeʼ ka bisaʼaboʼob kʼalbil tak ka sáaschaji, tumen teʼ súutukoʼ táan kaʼach u yáakʼabtal.
4 Baʼaleʼ yaʼab tiʼ le máaxoʼob chʼenxikint le baʼaxoʼob tu tsikbaltoʼoboʼ tu creertoʼob, tuláakloʼobeʼ yaan kex cinco mil u túulal xiiboʼob.
5 Ka sáaschaj túuneʼ, tu kaajil Jerusaleneʼ tu muchʼuba u gobernanteʼob le judíoʼoboʼ, u nuuktakil le kaajoʼ bey xan le escribaʼoboʼ*
6 (bey xan Anás u nojchil le sacerdoteʼoboʼ, Caifás, Juan, Alejandro yéetel tuláakal u láakʼtsiloʼob u nojchil le sacerdoteʼoboʼ),
7 ka túun tu tsʼáajoʼob Pedro yéetel Juan chúumuk tiʼ letiʼobeʼ, ka joʼopʼ u kʼáatkoʼobtiʼob: «¿Máax tsʼáateʼex u páajtalil a beetkeʼex lelaʼ? ¿Tu yoʼolal máax kʼaabaʼ ta beeteʼex?».
8 Pedro túuneʼ chuʼup yéetel kiliʼich muukʼeʼ ka tu yaʼalajtiʼob:
«Teʼex ka gobernartikeʼex le kaajoʼ, bey xan teʼex u nuuktakil le kaajaʼ,
9 wa táan k-juzgartaʼal bejlaʼa úuchik k-beetik junpʼéel baʼal maʼalob yoʼolal juntúul máak kʼojaʼan, yéetel wa taak u yojéeltaʼal máax tsʼáa u páajtalil u yutstaleʼ,
10 ojéelteʼex yéetel ojéeltaʼak tumen tuláakal u kajnáaliloʼob Israeleʼ, tu kʼaabaʼ Jesucristo le Nazaretiloʼ, le máax ta bajeʼex tiʼ cheʼ baʼaleʼ kaʼa kuxkíintaʼab tumen Diosoʼ, tu yoʼolal letiʼ waʼalakbal ta táaneʼex le máak tsʼoʼok u yutstalaʼ.
11 Jesuseʼ letiʼ ‹le tuunich ta taaseʼex bey mix baʼaliloʼ, teʼex máaxeʼex beetik le najoʼ, baʼaleʼ le nojoch tuunichaʼ tsʼoʼok u tsʼaʼabal utiaʼal u chuunpakʼil le najoʼ›.
12 Tsʼoʼoleʼ minaʼan salvación tu yoʼolal uláakʼ máak, tumen way Luʼumeʼ maʼ tsʼaʼan uláakʼ kʼaabaʼ ichil le máakoʼob utiaʼal ka páajchajak k-salvartaʼal tu yoʼolaloʼ».
13 Le máakoʼob túunoʼ, le ka tu yiloʼob yéetel u jaajil u yóol ku tʼaan Pedro yéetel Juan, bey xan le ka tu yiloʼob chéen óotsil máakoʼob maʼ xooknajaʼanoʼobeʼ, jaʼakʼ u yóoloʼob. Ka túun tu tsʼáajoʼob cuentaeʼ, letiʼe máakoʼob suuk kaʼach u máanoʼob yéetel Jesusoʼ.
14 Tsʼoʼoleʼ tumen táan kaʼach u yilkoʼob tiʼ waʼalakbal tu yiknaloʼob le máak tsʼaʼakoʼ, maʼ tu kaxtoʼob baʼal u yaʼaloʼobiʼ.
15 Ka tu yaʼaloʼobtiʼob ka jóokʼkoʼob tiʼ le Sanedrinoʼ,* ka joʼopʼ u tsikbaltikoʼob tu baatsiloʼob baʼax ken u beetoʼob,
16 táan u yaʼalikoʼob: «¿Baʼax ken k-beet yéetel le máakoʼobaʼ? Tumen u jaajileʼ, junpʼéel nojoch chíikulal tsʼoʼok u yúuchul tu yoʼolaloʼob, lelaʼ tsʼoʼok u yilaʼal tumen tuláakal u kajnáaliloʼob Jerusalén; tsʼoʼoleʼ maʼ tu páajtal k-aʼalik wa maʼ jaajiʼ.
17 Baʼaleʼ utiaʼal maʼ u maas tsikbaltaʼal ichil le kaajoʼ, koʼoneʼex sajakkúuntkoʼob yéetel koʼoneʼex aʼaliktiʼob maʼ u kaʼanskoʼob mix máak tu kʼaabaʼ Jesús».
18 Ka tsʼoʼokeʼ, tʼaʼanoʼobeʼ ka aʼalaʼabtiʼob mix tuʼux ka kaʼansajnakoʼob, mix ka u yaʼaloʼob wa baʼax tu yoʼolal u kʼaabaʼ Jesús.
19 Baʼaleʼ Pedro yéetel Juaneʼ tu yaʼaloʼobtiʼob: «Wa maʼalob tu táan Dios ka k-uʼuy a tʼaaneʼex maʼ ka k-uʼuy u tʼaan Dioseʼ, teʼex a wojleʼex.
20 Baʼaleʼ toʼoneʼ maʼ tu páajtal u jáawal k-tʼaan tiʼ le baʼaxoʼob tsʼoʼok k-ilik yéetel tsʼoʼok k-uʼuyikoʼ».
21 Ka tsʼoʼok túun u kaʼa sajakkúuntkoʼobeʼ, tu chaʼajoʼob u binoʼob tumen maʼ tu kaxtoʼob baʼax oʼolal u castigartikoʼobiʼ. Lelaʼ tu beetoʼob xan yoʼolal le kaajoʼ, tumen tuláakloʼobeʼ táan kaʼach u nojbeʼenkúuntkoʼob Dios yoʼolal le baʼax úuchoʼ,
22 tumen le máak tsʼaʼak yéetel le milagrooʼ yaan maas tiʼ cuarenta jaʼaboʼob tiʼ.
23 Ka tsʼoʼok u jáalkʼabtaʼaloʼobeʼ, binoʼob yiknal u maasil disipuloʼoboʼ ka tu tsikbaltoʼob baʼax aʼalaʼabtiʼob tumen u nuuktakil le sacerdoteʼob yéetel u nuuktakil le kaajoʼ.
24 Le ka tu yuʼuboʼob lelaʼ, múul orarnajoʼob yéetel junpʼéeliliʼ tuukul táan u yaʼalikoʼob tiʼ Dios:
«Nojoch Jalaʼach, teech Máax beetmil kaʼan, Luʼum, kʼáaʼnáab bey xan tuláakal le baʼaloʼob yanoʼob ichiloʼ,
25 tu yoʼolal kiliʼich muukʼ tʼaanajech yéetel u chiʼ a palitsil David, k-úuchben taata le ka tu yaʼalaj: ‹¿Baʼaxten yéetel pʼuʼujulil tsʼoʼok u líikʼil le kaajoʼoboʼ, yéetel baʼaxten u kajnáaliloʼob le luʼumiloʼoboʼ chéen kunel baʼaloʼob tsʼoʼok u tuklikoʼob?
26 U reyiloʼob yóokʼol kaabeʼ tsʼoʼok u líikʼloʼob, le gobernanteʼob xanoʼ tsʼoʼok u muchʼkubaʼob utiaʼal u binoʼob tu contra Jéeoba yéetel tu contra le máax u yéeymajoʼ›.
27 U jaajileʼ Herodes yéetel Poncio Pilato, junmúuchʼ yéetel u máakiloʼob táanxel luʼumiloʼob bey xan yéetel u kajnáaliloʼob Israeleʼ, muchʼkíintaʼaboʼob teʼ kaajaʼ utiaʼal u binoʼob tu contra a kiliʼich palitsil Jesús, le máax ta yéeyajoʼ,*
28 utiaʼal ka u beetoʼob le baʼax ta chʼaʼtuklaj yéetel a páajtalil ka úuchuk jeʼex ta wóotilakoʼ.
29 Beora túunaʼ Jéeoba, chʼenxikint le baʼaxoʼob ku yaʼalikoʼob utiaʼal u sajakkúuntkoʼonoʼoboʼ, yéetel tsʼáa u páajtalil tiʼ a palitsiloʼob utiaʼal maʼ u chʼaʼikoʼob saajkil u kaʼansoʼob le baʼax ka waʼalikoʼ,
30 lelaʼ beet le táan a tichʼik a kʼab utiaʼal a tsʼakik máakoʼob, bey xan le táan u beetaʼal milagroʼob yéetel baʼaloʼob ku beetik u jaʼakʼal u yóol máak tu yoʼolal u kʼaabaʼ a kiliʼich palitsil Jesusoʼ».
31 Ka tsʼoʼok u kʼáat óolaloʼob tiʼ Dioseʼ, le kúuchil tuʼux yanoʼoboʼ tíitaʼabi, tuláakloʼob túuneʼ chuʼupoʼob yéetel kiliʼich muukʼeʼ ka joʼopʼ u kaʼanskoʼob x-maʼ saajkilil le baʼax ku yaʼalik Diosoʼ.
32 Tsʼoʼoleʼ tuláakal le máaxoʼob u muchʼmubaʼob tu beetubaʼob disipuloiloʼ, yaan kaʼach tiʼob junpʼéeliliʼ tuukul yéetel junpʼéeliliʼ puksiʼikʼal; mix juntúul tiʼ letiʼob xan ku yaʼalik kaʼach wa chéen letiʼ tiaʼalintik le baʼaxoʼob yaantiʼoʼ, baʼaxeʼ tiʼ tuláakal kaʼach ku meyaj le baʼaxoʼob yaantiʼoboʼ.
33 Le apostoloʼob xanoʼ tu chúukaʼan kʼaʼaytoʼob yéetel tuláakal u yóoloʼob le úuchik u kaʼa kuxkíintaʼal Yuumtsil Jesusoʼ; tsʼoʼoleʼ Dioseʼ ku yeʼesik kaʼach u nojoch utsil tiʼ tuláakloʼob.
34 U jaajileʼ mix máak ichiloʼob ku bineltik kaʼach wa baʼax tiʼ, tumen tuláakal le máaxoʼob yaan u kʼaaxoʼob wa u najiloʼobeʼ, ku konkoʼob yéetel ku taaskoʼob kaʼach u tojol le baʼaxoʼob ku konkoʼoboʼ,
35 tsʼoʼoleʼ ku kʼubkoʼob kaʼach tu kʼab le apostoloʼoboʼ. Ken tsʼoʼokok túuneʼ ku tʼoʼoxol tiʼ cada juntúul jeʼel bix ku kʼaʼabéettaleʼ.
36 Le oʼolal túun José, juntúul levita sijnáal Chipre, le máax tsʼaʼab u kʼaabaʼt Bernabé tumen le apostoloʼoboʼ (le kʼaabaʼaʼ u kʼáat u yaʼal u Paal Líiʼsaj óol),
37 tu konaj le terreno yaan kaʼach tiʼoʼ ka tu taasaj le u taakʼinil úuchik u konikoʼ ka tu kʼubaj tu kʼab le apostoloʼoboʼ.
Notas
^ Máakoʼob jach u kʼaj óoloʼob le Leyoʼ.
^ Ilaʼak Tipʼ. 16.
^ Le tʼaan ku meyaj teʼelaʼ, ich griegoeʼ u kʼáat u yaʼaleʼ u yalaʼal aceite tu pool máak utiaʼal u yéeyaʼal.
