Hechos 5:1-42
5 Baʼaleʼ juntúul xiib ku kʼaabaʼtik Ananíaseʼ, junmúuchʼ yéetel Safira u yataneʼ, tu konaj junxóotʼ u kʼaax.
2 Baʼaleʼ tu chʼaʼaj taʼakumbail junjaats tiʼ le taakʼinoʼ, lelaʼ ojéelaʼan xan kaʼach tumen u yatan. Letiʼ túuneʼ chéen junjaats tiʼ le taakʼin tu bisaj tiʼ le apostoloʼoboʼ.
3 Baʼaleʼ Pedroeʼ tu yaʼalajtiʼ: «Ananías, ¿baʼaxten ta chaʼaj tiʼ Satanás ka u beet a tusik le kiliʼich muukʼoʼ, yéetel a chʼaʼik taʼakumbail junjaats tiʼ u taakʼinil le kʼáax ta konoʼ?
4 Táanil tiʼ a konik le kʼáaxoʼ, ¿maʼ wa a tiaʼaliʼ? Le ka tsʼoʼok a konikoʼ ¿maʼ wa láayliʼ a tiaʼal xan le taakʼinoʼ? ¿Baʼaxten túun ta chʼaʼtuklaj ichil a puksiʼikʼal a beetik junpʼéel baʼal beyaʼ? Maʼ máakoʼob ta wóotaj a tusiʼ, baʼaxeʼ Dios».
5 Le ka tu yuʼubaj le tʼaanoʼobaʼ, Ananíaseʼ jochʼkʼajeʼ ka kíimi. Tuláakal túun le máaxoʼob tu yuʼuboʼob le baʼax úuchaʼ, tu sen chʼaʼajoʼob saajkil.
6 Baʼaleʼ le máakoʼob maas táankelemtakoʼ, líikʼoʼobeʼ ka tu báaʼkʼaxtoʼob yéetel nookʼ, tsʼoʼoleʼ tu jóoʼsoʼobeʼ ka tu mukoʼob.
7 Ka máan kex óoxpʼéel horaeʼ, ook u yatan, baʼaleʼ maʼ u yojel kaʼach baʼax tsʼoʼok u yúuchliʼ.
8 Pedroeʼ tu yaʼalajtiʼ: «Aʼalten, teʼex tu kaʼatúulaleʼexeʼ, ¿tanto wa úuchik a konkeʼex le kʼáaxoʼ?». Letiʼeʼ tu yaʼalaj: «Jaaj, tanto úuchik k-konik».
9 Pedro túuneʼ tu yaʼalajtiʼ: «¿Baʼaxten tu kaʼatúulaleʼex ta múul chʼaʼtukleʼex a túuntkeʼex u yóol u kiliʼich muukʼ Jéeoba? ¡Ile! Le máaxoʼob muk a wíichamoʼ tiʼ waʼalakbaloʼob teʼ joonajoʼ, letiʼob xan kun jóoʼskechoʼob».
10 Jach teʼ súutukoʼ, letiʼeʼ jochʼkʼaj tu niʼ u yook Pedroeʼ ka kíimi. Le ka ook le táankelem máakoʼoboʼ tu yiloʼobeʼ kimen, ka túun tu jóoʼsoʼobeʼ ka tu mukoʼob tu tséel u yíicham.
11 Le oʼolaleʼ tuláakal le máaxoʼob yanoʼob ichil le múuchʼuliloʼ bey xan tuláakal le máaxoʼob tu yuʼuboʼob u tsikbaltaʼal le baʼaloʼobaʼ jach sajakchajoʼob.
12 Tsʼoʼoleʼ yoʼolal u kʼab le apostoloʼoboʼ yaʼab chíikulaloʼob yéetel baʼaloʼob ku beetik u jaʼakʼal u yóol máak ku yúuchul kaʼach ichil le kaajoʼ; tuláakloʼob túuneʼ u múul chʼaʼtukultmoʼob kaʼach u muchʼkubaʼob teʼ tuʼux yaan u columnaʼob Salomonoʼ.
13 U jaajileʼ mix juntúul tiʼ u maasiloʼob ku táabal kaʼach u muchʼuba tu yéeteloʼoboʼ; baʼaleʼ u máakiloʼob le kaajoʼ jach maʼalob u tʼaanoʼob tu yoʼolal le disipuloʼoboʼ.
14 Tsʼoʼoleʼ maʼ chéen leloʼ, káaj u bin u maas yaʼabtal le máaxoʼob ku creertikoʼob Yuumtsiloʼ, yaʼabkach xiiboʼob yéetel koʼoleloʼob.
15 Le máakoʼob túunoʼ ku jóoʼskoʼob kaʼach le máaxoʼob kʼojaʼanoʼob teʼ noj bejoʼoboʼ yéetel ku chikúunskoʼob yóokʼol mejen camaʼob bey xan tiʼ camillaʼob, beyoʼ ken máanak Pedroeʼ kex chéen u yoochel ka kʼuchuk tu yóokʼol wa máax tiʼ letiʼob.
16 U kajnáaliloʼob xan le kaajoʼob yanoʼob tu baʼpach Jerusalenoʼ seguernaj u taaloʼob, u kuchmoʼob le máaxoʼob kʼojaʼanoʼob yéetel le máaxoʼob chʼaʼpachtaʼanoʼob tumen le demonioʼoboʼ; mix juntúul tiʼ letiʼob ku pʼáatal kaʼach wa maʼ u tsʼaʼakal.
17 Baʼaleʼ u maas nojchil le sacerdoteʼob yéetel tuláakal le máaxoʼob yanoʼob kaʼach tu yiknaloʼ, le máaxoʼob yanoʼob ichil u secta le saduceoʼoboʼ, tumen jach kʼuuxilnajaʼanoʼobeʼ* líikʼoʼob,
18 tu machoʼob le apostoloʼoboʼ ka tu yoksoʼob tu carcelil le kaajoʼ.
19 Baʼaleʼ teʼ áakʼaboʼ u ángel Jéeobaeʼ tu jeʼekʼabtaj u joonajiloʼob le carceloʼ, tu jóoʼsoʼobeʼ ka tu yaʼalajtiʼob:
20 «Xeeneʼex, waʼaleneʼex teʼ templooʼ, maʼ u xuʼulul xan a waʼalikeʼex tiʼ le máakoʼob tuláakal le baʼaxoʼob yaan yil yéetel le kuxtal kun antaloʼ».
21 Ka tsʼoʼok u yuʼubikoʼob lelaʼ, ookoʼob teʼ templo le tsʼoʼok u sáastaloʼ ka joʼopʼ u kaʼansajoʼob.
Le ka kʼuch túun u maas nojchil le sacerdoteʼob bey xan le máaxoʼob yanoʼob tu yiknaloʼ, tu muchʼoʼob le Sanedrinoʼ* bey xan tuláakal u nuuktakil u kaajil Israeleʼ, ka tu túuxtoʼob chʼaʼabil le apostoloʼob teʼ cárcel utiaʼal ka taasaʼakoʼob tu yiknaloʼoboʼ.
22 Baʼaleʼ le j-kananoʼoboʼ,* ka kʼuchoʼob teʼ carceloʼ maʼ tu yiloʼob le apostoloʼoboʼ. Le oʼolaleʼ suunajoʼobeʼ ka tu tsoloʼob baʼax tu yiloʼob
23 táan u yaʼalikoʼob: «Ka kʼuchoʼoneʼ le carceloʼ kʼaalal yéetel chʼotaʼan tubeel, tsʼoʼoleʼ tiʼ waʼalakbal le soldadoʼob kanáantik le jooloʼ, baʼaleʼ ka t-jeʼekʼabteʼ mix máak t-ilaj ichil».
24 U nojchil túun le máaxoʼob kanáantik le templooʼ bey xan u nuuktakil le sacerdoteʼoboʼ, le ka tu yuʼuboʼob le tʼaanoʼobaʼ káaj u tuklikoʼob baʼax uláakʼ kun úuchul tu yoʼolal lelaʼ.
25 Baʼaleʼ kʼuch juntúul máakeʼ ka tu yaʼalajtiʼob: «¡Ileʼex! Le xiiboʼob ta wokseʼex carceloʼ tiʼ waʼalakbaloʼob teʼ templo táan u kaʼanskoʼob le kaajoʼ».
26 U nojchil túun le j-kananoʼoboʼ bin yéetel u maasil j-kananoʼoboʼ ka tu taasoʼob, baʼaleʼ maʼ tu beetoʼob mix junpʼéel loob tiʼobiʼ tumen saajkoʼob ka muruxtuntaʼakoʼob tumen le kaajoʼ.
27 Ka túun taasaʼaboʼobeʼ ka beetaʼab u waʼataloʼob ichil le Sanedrinoʼ. U maas nojchil le sacerdoteʼoboʼ ka tsʼoʼok u beetik kʼáatchiʼob tiʼobeʼ,
28 tu yaʼalajtiʼob: «T-aʼalajteʼex ka xuʼuluk a kaʼansajeʼex tu kʼaabaʼ le máakaʼ, baʼaleʼ ¡ileʼex!, tsʼoʼok a chupkeʼex Jerusalén yéetel le baʼaloʼob ka kaʼanskeʼexoʼ; tsʼoʼoleʼ jach táan a wilkeʼex a tsʼáaikeʼex k-kuch u kʼebanil úuchik u kíimsaʼal le máakaʼ».
29 Pedro yéetel le uláakʼ apostoloʼoboʼ tu yaʼaloʼob: «Unaj k-uʼuyik u tʼaan Dios bey k-gobernanteeʼ, maʼ u tʼaan chéen máakoʼobiʼ.
30 U Diosil k-úuchben taataʼobeʼ tu kaʼa kuxkíintaj Jesús, le máax ta kíimseʼex le ka ta chʼuykíinteʼex teʼ cheʼoʼ.
31 Dioseʼ tu nojbeʼenkúuntaj le máak le ka tu tsʼáaj tu x-noʼoj kʼaboʼ, ka tu yéeyaj utiaʼal u salvartik u kaajal bey xan utiaʼal u tsʼáaik kuxtal tiʼob. Lelaʼ tu beetaj utiaʼal ka u kʼex u tuukul u kaajil Israel yéetel utiaʼal ka perdonartaʼak u kʼebanoʼob.
32 Toʼoneʼ k-jaajkúuntik bey úuchik le baʼaloʼobaʼ, bey xan u beetik le kiliʼich muukʼoʼ, lelaʼ letiʼe baʼax ku tsʼaʼabal tiʼ le máaxoʼob ku yilkoʼob Dios bey u gobernanteʼob yéetel ku yuʼubikoʼob u tʼaanoʼ».
33 Le ka tu yuʼuboʼob lelaʼ, sen pʼuʼujoʼobeʼ ka taakchaj u kíimskoʼob le apostoloʼoboʼ.
34 Baʼaleʼ waʼalaj juntúul máak yaan ichil le Sanedrinoʼ, juntúul fariseo ku kʼaabaʼtik Gamaliel, ku kaʼansik le Leyoʼ yéetel jach yaabiltaʼan tumen le kaajoʼ, ka tu yaʼalaj ka jóoʼsaʼak le apostoloʼob u chan súutukoʼ.
35 Ka túun tu yaʼalajtiʼob: «Xiibeʼex tiʼ u kaajil Israel, jach ilawileʼex wal le baʼax táan a tuklik a beetkeʼex yéetel le máakoʼobaʼ.
36 Tumen jeʼex le ka líikʼ Teudas úuchjeakil táan kaʼach u taaskuba nojbaʼalileʼ, yaʼab máakoʼob binoʼob tu paach, yaan kex cuatrocientos u túulal. Baʼaleʼ kíimsaʼabi, yéetel tuláakal le máaxoʼob uʼuyik u tʼaan kaʼachoʼ kʼiʼitbesaʼaboʼob, bey túun xuʼuliktiʼoboʼ.
37 Ka tsʼoʼokeʼ, teʼ kʼiin táan kaʼach u tsʼíibtaʼal u kʼaabaʼ le máakoʼoboʼ, líikʼ xan Judas le galileailoʼ, ka tu beetaj u bin le máakoʼob tu paachoʼ. Chéen baʼaleʼ le máakaʼ kíimi, tuláakal túun le máakoʼob uʼuyik u tʼaan kaʼachoʼ kʼiʼitbesaʼaboʼob tiʼ táanxel luʼumiloʼob.
38 Le oʼolaleʼ yoʼolal le baʼaloʼob táan u yúuchloʼob bejlaʼaʼ, kin waʼalikteʼex: Maʼ a woksikabaʼex yéetel le máakoʼobaʼ, pʼateʼexoʼob (tumen wa tiʼ wíinik u taal le baʼaxoʼob ku tuklik u beetkoʼobaʼ, yaan u xuʼulsaʼaltiʼob;
39 baʼaleʼ wa tiʼ Dios u taaleʼ, maʼ kun páajtal a xuʼulskeʼextiʼob); wa maʼeʼ, bik úuchuk wa táan a baʼateleʼex tu contra Dios».
40 Letiʼob túuneʼ tu yuʼuboʼob le baʼax tu yaʼalaj Gamalieloʼ, ka tu túuxtoʼob tʼanbil le apostoloʼoboʼ ka tu jaʼajatsʼoʼob, ka tsʼoʼokeʼ tu yaʼaloʼobtiʼob ka xuʼuluk u tʼaanoʼob tu yoʼolal u kʼaabaʼ Jesús, ka tu chaʼajoʼob u binoʼob.
41 Le apostoloʼob túunoʼ jóokʼoʼob tiʼ le Sanedrín jach kiʼimak u yóoloʼoboʼ, tumen Dioseʼ tu chaʼaj u mixbaʼalkúuntaʼaloʼob tu yoʼolal u kʼaabaʼ Jesús.
42 Sáamsamal túun teʼ templo yéetel joonaj joonajiloʼ, maʼ xuʼul u kaʼanskoʼob yéetel u kʼaʼaytikoʼob le maʼalob péektsil yaan yil yéetel Jesús, le Cristooʼ.
Notas
^ Wa: «celosochajaʼanoʼobeʼ».
^ Ilaʼak Tipʼ. 16.
^ Lelaʼ letiʼe máakoʼob ku pʼáatloʼob kaʼach kanan tu temploil Jerusalenoʼ.
