Hechos 6:1-15
6 Teʼ kʼiinoʼob túun táan u bin u maas yaʼabtal le disipuloʼoboʼ, le judíoʼob ku tʼaanoʼob ich griegooʼ káaj u tʼaanoʼob tu contra le judíoʼob ku tʼaanoʼob ich hebreooʼ, tumen le koʼoleloʼob kimen u yíichamoʼob yanoʼob ichiloʼoboʼ maʼatech u tsʼaʼabal kaʼach tiʼob le janal ku tʼoʼoxol sáamsamaloʼ.
2 Le doce apostoloʼob túunoʼ tu muchʼkíintoʼob tuláakal le disipuloʼoboʼ ka tu yaʼaloʼobtiʼob: «Maʼ maʼalob ka xuʼuluk k-kaʼansik baʼax ku yaʼalik Dios utiaʼal ka xiʼikoʼon k-tʼox janal teʼ mesaʼoboʼ.
3 Le oʼolaleʼ sukuʼuneʼex, kaxteʼex siete u túulal máakoʼob ichileʼex, máaxoʼob ku yúuchul maʼalob tʼaan tu yoʼolaloʼob, yaan u naʼatoʼob, yéetel chuupoʼob xan yéetel kiliʼich muukʼ, utiaʼal ka k-tsʼáa u beetoʼob le meyaj jach kʼaʼanaʼanaʼ;
4 baʼaleʼ toʼoneʼ yaan k-kʼubik k-óol orar yéetel k-kaʼansik le baʼax ku yaʼalik Diosoʼ».
5 Tuláakal le máaxoʼob muchʼukbaloʼoboʼ jach maʼalob tu yuʼubiloʼob le baʼax tu yaʼaloʼoboʼ, ka tu yéeyajoʼob Esteban, juntúul xiib nojoch u fe, chuup xan yéetel kiliʼich muukʼ; tu yéeyajoʼob xan Felipe, Prócoro, Nicanor, Timón, Parmenas bey xan Nicolás, juntúul máak Antioquía u taal tu kʼamaj u religión le judíoʼoboʼ.
6 Ka túun taasaʼaboʼob tu yiknal le apostoloʼoboʼ. Le apostoloʼob túunoʼ ka tsʼoʼok u oraroʼobeʼ tu tsʼáaj u kʼaboʼob tu yóokʼol le máakoʼobaʼ.
7 Tu yoʼolal lelaʼ káaj u maas kaʼansaʼal le baʼax ku yaʼalik Diosoʼ, yéetel seten yaʼabchaj le disipuloʼob tu kaajil Jerusalenoʼ; yaʼabkach sacerdoteʼob xaneʼ tu tsʼáaj u fejoʼob tiʼ le baʼax kaʼansaʼabtiʼoboʼ.
8 Teʼ kʼiinoʼoboʼ, Esteban juntúul máak jach ku lúubul utsil tiʼ Dios yéetel jach yaan páajtalil tiʼeʼ, ku beetik kaʼach chíikulaloʼob bey xan nukuch baʼaloʼob ku beetik u jaʼakʼal u yóol le máakoʼoboʼ.
9 Baʼaleʼ jujuntúul máakoʼob yanoʼob ichil le junmúuchʼ máakoʼob kʼaj óolaʼanoʼob bey u Sinagoga le Máaxoʼob Jáalkʼabtaʼanoʼoboʼ, jujuntúul tiʼ le cireneiloʼob yéetel le alejandríailoʼoboʼ bey xan jujuntúul tiʼ le ciliciailoʼob yéetel le asiailoʼoboʼ, líikʼoʼob utiaʼal u baʼateltʼaanoʼob yéetel Esteban.
10 Chéen baʼaleʼ maʼ páajchajoʼob tu contra le naʼat yéetel le kiliʼich muukʼ yaan kaʼach tiʼ Esteban utiaʼal u tʼaanoʼ.
11 Le máakoʼob túunaʼ binoʼob taʼakumbaileʼ ka tu yoksoʼob tu tuukul jujuntúul xiiboʼob ka u yaʼaloʼob lelaʼ: «Tsʼoʼok k-uʼuyik u yaʼalik poochʼiloʼob tu contra Moisés yéetel tu contra Dios».
12 Tu pʼuʼujsoʼob túun le kaajoʼ, u nuuktakil le kaajoʼ bey xan le escribaʼoboʼ, ka téek náatsʼoʼob tu yiknaleʼ ka tu cháach machtoʼob, ka túun tu bisoʼob teʼ Sanedrinoʼ.*
13 Tsʼoʼoleʼ ka tu taasoʼob máakoʼob utiaʼal ka tuusnakoʼob tu contra, táan u yaʼalikoʼob: «Le máakaʼ maʼ tu xuʼulul u yaʼalik baʼaloʼob tu contra le kiliʼich kúuchilaʼ bey xan tu contra le Leyoʼ.
14 Juntéenjeakeʼ, t-uʼuyaj u yaʼalikeʼ Jesús le Nazaretiloʼ yaan bin u nikik le kúuchilaʼ yéetel yaan bin u kʼexik le baʼaxoʼob suuk k-beetik jeʼex kaʼansaʼabiktoʼon tumen Moisesoʼ».
15 Tuláakal túun le máakoʼob kulukbaloʼob teʼ Sanedrinoʼ, le táan kaʼach u táaʼpaktikoʼob Estebanoʼ, tu yiloʼobeʼ u táan u yicheʼ bey u táan u yich juntúul angeleʼ.
Notas
^ Ilaʼak Tipʼ. 16.
