Hechos 9:1-43
9 Baʼaleʼ Sauloeʼ tumen láayliʼ taak u beetik loob yéetel u kíimsik u disipuloʼob Yuumtsileʼ, bin tu yiknal u maas nojchil le sacerdoteʼoboʼ
2 ka tu kʼáataj cartaʼob utiaʼal ka u bis teʼ sinagogaʼob yaan Damascooʼ utiaʼal ka páajchajak u machik yéetel u taasik kʼalbil tu kaajil Jerusalén jeʼel máaxak ka u yojéelt tiʼ yaan ichil Le Bejoʼ,* xiiboʼob yéetel koʼoleloʼob.
3 Le táan túun u bin Saulo yéetel le ka joʼopʼ u náatsʼal tu kaajil Damascooʼ téek léembalnaj tu baʼpach junpʼéel sáasil teʼ kaʼan u taaloʼ;
4 letiʼeʼ lúub luʼumeʼ ka tu yuʼubaj junpʼéel tʼaan táan u yaʼaliktiʼ: «Saulo, Saulo, ¿baʼaxten táan a chʼaʼpachtiken?».
5 Sauloeʼ tu yaʼalaj: «¿Máaxech, Yuumtsil?». Ka núukaʼabtiʼ: «Teen Jesús, le máax ka chʼaʼpachtikoʼ.
6 Baʼaleʼ líikʼen ka ookkech teʼ kaajoʼ, teʼeloʼ tiʼ kun aʼalbiltech baʼax kʼaʼabéet a beetkiʼ».
7 Le u yéet binoʼob Saulo túunoʼ, tiʼ waʼalakbaʼaloʼob kaʼachiʼ baʼaleʼ maʼ tu páajtal u tʼaanoʼob; u jaajileʼ táan kaʼach u yuʼubikoʼob u juum junpʼéel tʼaan, baʼaleʼ mix máak tu yiloʼobiʼ.
8 Saulo túuneʼ líikʼi, tsʼoʼoleʼ kex u pʼilmaj u yicheʼ maʼ tu páajtal kaʼach u yilik mix baʼal. Ka túun maʼach tu kʼabeʼ ka bisaʼab Damasco.
9 Ichil óoxpʼéel kʼiineʼ maʼ páajchaj u yilik mix baʼaliʼ, maʼ jaaniʼ mix tu yukʼaj mix baʼaliʼ.
10 Tu kaajil Damascoeʼ yaan kaʼach juntúul disipulo ku kʼaabaʼtik Ananías, letiʼeʼ máan tu yich táan u tʼaʼanal tumen Yuumtsil: «¡Ananías!». Letiʼeʼ tu núukaj: «Way yaneneʼ, Yuumtsil».
11 Yuumtsil túuneʼ tu yaʼalajtiʼ: «Líikʼen, xeen teʼ bej ku kʼaabaʼtik Toj Bejoʼ, ken kʼuchkech tu yotoch Judaseʼ kaxt juntúul máak sijnáal tu kaajil Tarso ku kʼaabaʼtik Saulo. Tumen, ¡ile!, letiʼeʼ táan u orar;
12 yéetel tsʼaʼab u yil táan u yokol juntúul máak ku kʼaabaʼtik Ananías teʼ tuʼux yanoʼ yéetel táan u tsʼáaik u kʼaboʼob tu yóokʼol utiaʼal ka suunak u sáasilil u yich».
13 Baʼaleʼ Ananíaseʼ tu yaʼalaj: «Yuumtsil, yaʼab baʼaloʼob tsʼoʼok in wuʼuyik u yaʼalaʼal tu yoʼolal le máakoʼ, bey xan bukaʼaj baʼaloʼob kʼaastak tu beetaj tiʼ le máaxoʼob kiliʼichoʼob yanoʼob tu kaajil Jerusalenoʼ.
14 Wayeʼ tsʼaʼan páajtalil tiʼ tumen u nuuktakil le sacerdoteʼob utiaʼal ka u kʼal cárcel le máaxoʼob ku chʼaʼchiʼitkoʼob a kʼaabaʼoʼ».
15 Baʼaleʼ Yuumtsileʼ tu yaʼalajtiʼ: «Káajs a bin, tumen letiʼeʼ bey junpʼéel nuʼukul in yéeymaj utiaʼal ka u bis in kʼaabaʼ teʼ táanxel luʼumiloʼoboʼ, tu táan reyoʼob bey xan tu táan u paalaloʼob Israel.
16 Tumen yaan in jach eʼesiktiʼ bukaʼaj baʼaloʼob ken u muʼyajt yoʼolal in kʼaabaʼ».
17 Ananías túuneʼ bini, ook teʼ najoʼ ka tu tsʼáaj u kʼab yóokʼol Saulo táan u yaʼalik: «Saulo, in sukuʼun, Yuumtsil Jesús le máax tu chíikbesuba tiʼ teech teʼ bej tuʼux taalechoʼ, letiʼ túuxten utiaʼal ka suunak u sáasilil a wich bey xan utiaʼal ka chuʼupkech yéetel kiliʼich muukʼ».
18 Tu séebaʼanil túuneʼ tu yich Sauloeʼ júut baʼaloʼob bey u sóol kayeʼ, ka suunaj u sáasil; ka tsʼoʼokeʼ líikʼeʼ ka tsʼaʼab u yokjaʼ.
19 Tsʼoʼoleʼ jaaneʼ ka yanchaj u muukʼ.
Pʼáat wa jaypʼéel kʼiinoʼob yiknal le disipuloʼob yaan kaʼach Damascooʼ,
20 tu séebaʼanil xaneʼ bin teʼ sinagogaʼoboʼ ka joʼopʼ u kʼaʼaytik baʼaloʼob yaan yil yéetel Jesús, táan u yaʼalikeʼ le Máakaʼ u Paal Dios.
21 Baʼaleʼ tuláakal le máaxoʼob uʼuyik le baʼax ku yaʼalikoʼ, ku jaʼakʼal u yóoloʼob, yéetel ku yaʼalikoʼob: «Le máakaʼ, ¿maʼ wa letiʼe máax xuʼulsik kaʼach tiʼ le máaxoʼob yanoʼob Jerusalén ku chʼaʼchiʼitkoʼob le kʼaabaʼaʼ, yéetel taaljaʼan xan wayeʼ utiaʼal ka u kʼax u bisoʼob tu táan u nuuktakil le sacerdoteʼoboʼ?».
22 Baʼaleʼ Sauloeʼ seguernaj u maas yantal páajtalil tiʼ, yéetel ku beetik kaʼach u jaʼakʼal u yóol yéetel u kaʼapʼéelchajal u tuukul le judíoʼob kajaʼanoʼob Damasco ikil u yeʼesiktiʼobeʼ le máakaʼ jach tu jaajil letiʼ le Cristooʼ.
23 Ka túun máan wa jaypʼéel kʼiinoʼobeʼ, le judíoʼoboʼ káaj u tuklikoʼob bix ken u kíimsiloʼob.
24 Saulo túuneʼ tu yojéeltaj le baʼax tsʼoʼok u chʼaʼtuklikoʼob tu contraoʼ. Letiʼob xaneʼ bul kʼiin yéetel bul áakʼab ku kanáantkoʼob kaʼach u joonajil le kaaj utiaʼal u yilkoʼob u kíimskoʼoboʼ.
25 De áakʼab túuneʼ le disipuloʼoboʼ tu tsʼáajoʼob Saulo ichil junpʼéel xúuxak, ka tu jalkʼesoʼob tiʼ junpʼéel jool yaan tu baʼpakʼil le kaaj utiaʼal ka u jóoʼsoʼoboʼ.
26 Ka kʼuch Jerusaleneʼ letiʼeʼ tu yilaj u kaxtik le disipuloʼoboʼ, baʼaleʼ letiʼobeʼ láaj sajakchajoʼobtiʼ, tumen maʼ tu creertikoʼob kaʼach wa juntúul disipulo.
27 Baʼaleʼ Bernabeeʼ taal u yáante, ka túun tu bisaj tu yiknal le apostoloʼoboʼ, ka tu jach tsolajtiʼob bix úuchik u chíikbeskuba Yuumtsil tiʼ Saulo teʼ bejoʼ, bix úuchik u tʼaʼanal yéetel bix úuchik u kʼaʼaytik le maʼalob péektsil yéetel x-maʼ saajkilil tu kaajil Damascooʼ.
28 Letiʼ túuneʼ pʼáat tu yiknaloʼob tu kaajil Jerusalén táan u beetik le baʼax suukaʼan u beetik sáamsamaloʼ, yéetel táan u kʼaʼaytik u kʼaabaʼ Yuumtsil yéetel x-maʼ saajkilil;
29 tsʼoʼoleʼ táan kaʼach u tʼaan yéetel u baʼateltʼaan yéetel le judíoʼob ku tʼaanoʼob ich griegooʼ. Baʼaleʼ le máakoʼobaʼ tu yóotaj u kíimsoʼob.
30 Ka tu tsʼáaj cuenta le sukuʼunoʼob baʼax taak u beetaʼal tiʼ Saulooʼ tu bisoʼob Cesarea, tsʼoʼoleʼ ka tu túuxtoʼob tu kaajil Tarso.
31 Ka tsʼoʼokeʼ tuláakal túun le u múuchʼulil le disipuloʼob yanoʼob tiʼ tuláakal Judea, Galilea yéetel Samariaoʼ, yanchaj jeetsʼelil tiʼob tumen táan kaʼach u líiʼsaʼal u yóoloʼob; tsʼoʼoleʼ tumen u chʼaʼamoʼob saajkilil tiʼ Jéeoba yéetel tumen ku chaʼik u muʼukʼaʼankúuntaʼal u yóoloʼob tumen le kiliʼich muukʼoʼ, seguernaj u maas yaʼabtaloʼob.
32 Pedro túuneʼ, tumen táan kaʼach u máan tuláakal tuʼuxeʼ, bin xan yiknal le máaxoʼob kiliʼichoʼob kajaʼanoʼob Lidaoʼ.
33 Teʼeloʼ tu yilaj juntúul máak ku kʼaabaʼtik Eneas, tsʼoʼok ocho jaʼaboʼob pʼáatak maʼ tu páajtal u líikʼil tu cama tumen minaʼan u muukʼ u wíinklil.
34 Pedro túuneʼ tu yaʼalajtiʼ: «Eneas, Jesucristo tsʼakikech. Líikʼen, jutsʼ a cama». Letiʼ túuneʼ líikʼ tu séebaʼanil.
35 Le baʼax úuchaʼ ilaʼab tumen tuláakal u kajnáaliloʼob Lida bey xan tumen u kajnáaliloʼob u táax luʼumil Sarón; le máakoʼob túunaʼ tu beetubaʼob u disipuloʼob Yuumtsil.
36 Baʼaleʼ tu kaajil Jopeeʼ yaan kaʼach juntúul disipula ku kʼaabaʼtik Tabita, lelaʼ u kʼáat u yaʼaleʼ Dorcas. Letiʼeʼ jach suuk kaʼach u beetik baʼaloʼob maʼalobtak bey xan u yáantik le óotsiloʼoboʼ.
37 Baʼaleʼ teʼ kʼiinoʼob jeʼeloʼ kʼojaʼanchajeʼ ka kíimi. Ka tsʼoʼok u yisíinsaʼal túuneʼ bisaʼab teʼ cuarto yaan kaʼanaloʼ.
38 Baʼaleʼ tumen u kaajil Lida naatsʼ yanil tiʼ Jopeeʼ, le ka tu yuʼubaj le disipuloʼob tiʼ yaan Pedro teʼ kaaj jeʼeloʼ, tu túuxtoʼob kaʼatúul xiiboʼob utiaʼal ka u yaʼaloʼobtiʼ: «Beet uts a taal tu séebaʼanil teʼ tuʼux yanoʼonaʼ».
39 Pedro túuneʼ líikʼeʼ ka bin tu yéeteloʼob. Le ka kʼucheʼ bisaʼab teʼ cuarto yaan kaʼanaloʼ; tuláakal túun le koʼoleloʼob kimen u yíichamoʼoboʼ taaloʼob tu yiknal táan u yokʼoloʼob yéetel táan u yeʼeskoʼob tuláakal le nookʼoʼob tu chuyaj Dorcas le tiaʼan kaʼach tu yéeteloʼoboʼ.
40 Baʼaleʼ Pedroeʼ ka tsʼoʼok u beetik u jóokʼol tuláakloʼobeʼ, xolajeʼ ka tu beetaj junpʼéel oración. Tsʼoʼoleʼ tu sutuba tu tojil u wíinklil Tabitaeʼ ka tu yaʼalaj: «Tabita, ¡líikʼen!». Tabita túuneʼ tu pʼilaj u yich, ka tu yilaj Pedroeʼ ka kulaji.
41 Pedroeʼ tu tichʼaj u kʼab tiʼ Tabitaeʼ ka tu líiʼsaj, tsʼoʼoleʼ ka tu tʼanaj le máaxoʼob kiliʼichoʼob, tuʼux táakaʼan le koʼoleloʼob kimen u yíichamoʼoboʼ ka tu yeʼesajtiʼob kuxaʼan Tabita.
42 Lelaʼ ojéeltaʼab tiʼ tuláakal u kaajil Jope, yéetel yaʼab máakoʼob tu beetubaʼob u disipuloʼob Yuumtsil.
43 Pedroeʼ jach yaʼab kʼiinoʼob pʼáat tu kaajil Jope tu yotoch Simón, juntúul máak bon kʼéewel ku beetik.
Notas
^ Lelaʼ u kʼáat u yaʼaleʼ u kuxtal máak jeʼex tu kaʼansaj yéetel tu beetaj Cristoeʼ.
