Juan 1:1-51
1 Úuchjeakil táanil tiʼ u beetaʼal tuláakal baʼaloʼobeʼ,* le Tʼaanoʼ yaniliʼeʼ, le Tʼaanoʼ tiʼ yaan kaʼach tu yiknal Dioseʼ, le Tʼaan xan kaʼachoʼ juntúul dios.*
2 Tu káajbaleʼ letiʼeʼ tiʼ yaan kaʼach tu yiknal Dioseʼ.
3 Tuláakal le baʼaloʼoboʼ beetaʼaboʼob yéetel u yáantaj le Tʼaanoʼ, mix junpʼéel baʼal beetaʼab wa maʼ yéetel u yáantajiʼ.
Le baʼax beetaʼab
4 yéetel u yáantajoʼ letiʼe kuxtaloʼ, le kuxtal kaʼachoʼ sáasil utiaʼal le máakoʼoboʼ.
5 Le sáasil xanoʼ táan u léembal ichil le éeʼjochʼeʼeniloʼ, baʼaleʼ le éeʼjochʼeʼeniloʼ maʼ u tup le sáasiloʼ.
6 Yanchaj túun juntúul máak túuxtaʼab utiaʼal ka tʼaanak tu kʼaabaʼ Dios, u kʼaabaʼeʼ Juan.
7 Letiʼeʼ taal u yaʼal u jaajil yoʼolal le sáasiloʼ, utiaʼal ka yanak u fe tuláakal máak yoʼolal le baʼax tu yaʼaloʼ.
8 Juaneʼ maʼ letiʼe sáasiloʼ, baʼaleʼ yaniliʼ kaʼach u yaʼalik u jaajil yoʼolal le sáasil jeʼeloʼ.
9 Le jaajil sáasil ku sáasilkuntik tuláakal máakoʼ, jach taʼaytak kaʼach u taal way yóokʼol kaabeʼ.
10 Letiʼeʼ tiʼ yaan kaʼach way yóokʼol kaabeʼ, baʼaleʼ maʼ kʼaj óoltaʼab tumen le máakoʼoboʼ, kex tumen yéetel u yáantaj beetaʼab yóokʼol kaab.
11 Letiʼeʼ taal tu kaajal, baʼaleʼ maʼ kʼaʼam tumen u yéet kaajaloʼobiʼ.
12 Baʼaleʼ tiʼ le bukaʼaj máaxoʼob kʼamoʼ tu tsʼáajtiʼob u páajtalil u kʼuchul u beetubaʼob u paalal Dios, tumen letiʼobeʼ tu tsʼáaj u fejoʼob tiʼ letiʼ.
13 Letiʼobeʼ maʼ síijoʼob tiʼ wíinikiʼ, mix síijoʼob chéen tumen bey tu yóotilak le máakoʼoboʼ, wa tumen bey tu yóotilak xiiboʼ, baʼaxeʼ tumen bey tu yóotilak Diosoʼ.
14 Le Tʼaan túunoʼ kʼuch u beetuba wíinikil* yéetel kajlaj ichiloʼon, t-ilaj u nojbeʼenil, junpʼéel nojbeʼenil jeʼex le ku tsʼáaik juntúul taatatsil tiʼ u juntúuliliʼ paaloʼ. Letiʼeʼ chuup kaʼach yéetel u nojoch utsil Dios yéetel mantatsʼ tu yaʼalaj u jaajil.
15 (Juaneʼ tu yaʼalaj u jaajil yoʼolal le Tʼaanoʼ, tu kʼaʼam aʼalaj: «Le máax ku taal paachil tiʼ tenoʼ tsʼoʼok u máan táanil tiʼ teen, tumen letiʼeʼ yaniliʼ táanil tiʼ in síijileʼ», lelaʼ jach letiʼ aʼale.)
16 Letiʼeʼ chuup kaʼach yéetel nojoch utsil bey xan yéetel jaajil, le oʼolaleʼ tuláakloʼon maʼ xuʼul k-kʼamik yaʼabkach utsiloʼobiʼ.
17 Tumen le Leyoʼ tsʼaʼab tu yoʼolal Moisés, le nojoch utsil yéetel le jaajiloʼ tsʼaʼab tu yoʼolal Jesucristo.
18 Dioseʼ mix juntéen ilaʼak tumen mix máak. Baʼaleʼ tsʼoʼok u tsoʼololtoʼon bix letiʼ tumen le juntúuliliʼ paaloʼ; le juntúuliliʼ paal xanoʼ juntúul dios yéetel tiʼ yaan tu yiknal le Taataoʼ.
19 Lelaʼ letiʼe baʼax tu yaʼalaj Juan le ka túuxtaʼab sacerdoteʼob yéetel levitaʼob tu yiknal tumen le judíoʼob yanoʼob kaʼach Jerusalenoʼ, letiʼobeʼ tu kʼáatoʼobtiʼ: «Techeʼ ¿máaxech beyaʼ?».
20 Letiʼeʼ tu yaʼalaj u jaajil, maʼ tuusnajiʼ, tu yaʼalaj: «Maʼ teen le Cristooʼ».
21 Letiʼobeʼ tu kʼáatoʼobtiʼ: «¿Máaxech túuniʼ? ¿Elíasech wa?». Ka tu núukaj: «Maʼ, maʼ Elíaseniʼ». «¿Teech wa le profeta aʼalaʼan kun taaloʼ?». Letiʼeʼ tu núukaj: «¡Maʼ, maʼ teeniʼ!».
22 Letiʼob túuneʼ tu kaʼa kʼáatoʼobtiʼ: «¿Máaxech túuniʼ?, aʼaltoʼon utiaʼal ka páajchajak k-aʼalik tiʼ le máaxoʼob túuxtoʼonoʼ. ¿Baʼax yaan a waʼal ta woʼolal?».
23 Letiʼeʼ tu yaʼalaj: «Teen le máax ku yawat teʼ desierto táan u yaʼalik: ‹Tojkíinteʼex u beel Jéeoba›,* jeʼel bix aʼalaʼabik tumen le profeta Isaíasoʼ».
24 Le máakoʼob túunaʼ letiʼe fariseoʼob túuxtoʼoboʼ.
25 Le oʼolaleʼ tu kʼáatoʼobtiʼ: «¿Baʼaxten túun ka tsʼaa okjaʼ wa maʼ teech le Cristooʼ, mix Elías, mix Le Profetaoʼ?».
26 Juaneʼ tu núukajtiʼob: «Teneʼ kin tsʼáaik okjaʼ yéetel jaʼ. Chéen baʼaleʼ chúumuk tiʼ teʼexeʼ tiʼ waʼalakbal juntúul máak maʼ a kʼaj óoleʼexiʼ,
27 letiʼe máax ku taal paachil tiʼ tenoʼ, baʼaleʼ teneʼ maʼ in náajaltmaj in wachʼik u táabil u xaanabiʼ».
28 Le baʼaloʼobaʼ úuch tu kaajil Betania,* tuláakʼ u tséel le Jordanoʼ, teʼ tuʼux ku tsʼaa okjaʼ kaʼach Juanoʼ.
29 Le ka sáaschaj tuláakʼ kʼiineʼ Juaneʼ tu yilaj táan u taal Jesús tu yiknal, ka túun tu yaʼalaj: «¡Ileʼex, u Taman Dios, le máax ku luʼsik u kʼeban le yóokʼol kaaboʼ!
30 Lelaʼ letiʼe máax oʼolal tin waʼalaj: Paachil tiʼ teneʼ táan u taal juntúul xiib tsʼoʼok u máan táanil tiʼ teen, tumen letiʼeʼ yaniliʼ táanil tiʼ in síijileʼ.
31 Mix teen in kʼaj óol kaʼachi, baʼaleʼ teneʼ taaljaʼanen tsʼaa okjaʼ yéetel jaʼ, utiaʼal ka tsʼaʼabak kʼaj óoltbil tiʼ u kajnáaliloʼob Israel».
32 Juan xaneʼ tu yaʼalaj: «Tin wilaj u yéemel le kiliʼich muukʼ bey juntúul paloma teʼ kaʼanoʼ, ka pʼáat tu yóokʼol.
33 Mix teen in kʼaj óol kaʼachi, baʼaleʼ le Máax túuxten tsʼaa okjaʼ yéetel jaʼoʼ, tu yaʼalajten: ‹Jeʼel máaxak ka a wil u taal le kiliʼich muukʼ tu yóokʼol yéetel ku pʼáatal tu yóokʼoloʼ, letiʼe máax ku tsʼaa okjaʼ yéetel kiliʼich muukʼoʼ›.*
34 Teneʼ tsʼoʼok in wilik yéetel jach tu jaajil táan in waʼalik letiʼeʼ u Paal Dios».
35 Ka sáaschaj tuláakʼ kʼiin, le waʼalakbal Juan tu kaʼatéen yéetel kaʼatúul u disipuloʼoboʼ,
36 tu yilaj táan u máan Jesús teʼeloʼ, ka tu yaʼalaj: «¡Ileʼex, u Taman Dios!».
37 Le kaʼatúul disipuloʼoboʼ, tu yuʼuboʼob baʼax tu yaʼalaj Juaneʼ ka binoʼob tu paach Jesús.
38 Jesús túuneʼ le ka tu sutuba yéetel le ka tu yilaj táan u binoʼob tu paacheʼ, tu yaʼalajtiʼob: «¿Baʼax ka kaxtikeʼex?». Letiʼobeʼ tu yaʼaloʼob: «Rabí (le tʼaanaʼ u kʼáat u yaʼal, j-Kaʼansaj), ¿tuʼux ka pʼáatal?».
39 Letiʼeʼ tu yaʼalajtiʼob: «Koʼoteneʼex ka a wileʼex». Letiʼob túuneʼ binoʼob, ka tu yiloʼob tuʼux táan u pʼáatal, ka pʼáatoʼob tu yiknal teʼ kʼiin jeʼeloʼ; lelaʼ úuch kex teʼ hora diezoʼ.*
40 Andrés, u yíitsʼin* Simón Pedroeʼ, juntúul tiʼ le kaʼatúul máaxoʼob tu yuʼuboʼob baʼax tu yaʼalaj Juan yéetel binoʼob tu paach Jesusoʼ.
41 Andreseʼ, yáaxeʼ tu kaxtaj Simón u sukuʼuneʼ, ka tu yaʼalajtiʼ: «Tsʼoʼok k-kaxtik le Mesíasoʼ» (lelaʼ u kʼáat u yaʼaleʼ Cristo).
42 Ka túun tu bisaj Simón tu yiknal Jesús. Le ka ilaʼab tumen Jesuseʼ aʼalaʼabtiʼ: «Techeʼ Simonech u paal Juan; techeʼ yaan a kʼaabaʼtaʼal Cefas» (lelaʼ u kʼáat u yaʼaleʼ Pedro).
43 Le ka sáaschaj tuláakʼ kʼiineʼ Jesuseʼ taakchaj u bin Galilea. Letiʼ túun ka tu yilaj Felipe, ka tu yaʼalajtiʼ: «Koʼoten tin paach».
44 Felipe xaneʼ sijnáal Betsaida, le kaaj tuʼux u taal xan Andrés yéetel Pedrooʼ.
45 Felipeeʼ tu kaxtaj Natanaeleʼ ka tu yaʼalajtiʼ: «Tsʼoʼok k-kaxtik le máak, le máax tiʼ tsʼíibnaj Moisés teʼ Leyoʼ bey xan le máax tiʼ tsʼíibnaj le Profetaʼoboʼ. Lelaʼ Jesús u paal José, le ku taal Nazaretoʼ».
46 Baʼaleʼ Natanaeleʼ tu yaʼalajtiʼ: «¿Jeʼel wa u yantal juntúul jach maʼalob máak tu kaajil Nazareteʼ?». Felipeeʼ tu yaʼalajtiʼ: «Koʼoten ka a wile».
47 Jesuseʼ tu yilaj táan u náatsʼal Natanael tu yiknaleʼ ka tu yaʼalaj: «Ileʼex, le máakaʼ juntúul israelita, juntúul máak jach tu jaajil maʼatech u tuus».
48 Natanaeleʼ tu yaʼalaj tiʼ Jesús: «¿Bix yanil a kʼaj óolen?». Jesús túuneʼ tu núukajtiʼ: «Teneʼ tin wilech táanil tiʼ u tʼankech Felipe, le kulukbalech kaʼach yáanal le higueraoʼ».
49 Natanaeleʼ tu yaʼalajtiʼ: «J-Kaʼansaj,* techeʼ u Paalech Dios, yéetel teech u Reyil Israel».
50 Jesús túuneʼ tu yaʼalajtiʼ: «¿Ka tsʼáaik a fe tiʼ teen tumen tin waʼalajtech tin wilech yáanal le higueraoʼ? Yaan a wilik baʼaloʼob maas nuuktak tiʼ le jeʼeloʼobaʼ».
51 Tsʼoʼoleʼ tu yaʼalaj xan tiʼ: «Tu jaajil kin waʼalikteʼex, yaan a wilkeʼex le kaʼan jeʼepajaʼanoʼ yéetel u angeloʼob Dios táan u naʼakloʼob yéetel táan u yéemloʼob tu yiknal u Paal máak».
Notas
^ Lit.: «Tu káajbal».
^ Ilaʼak Tipʼ. 3.
^ Lit.: «bakʼ».
^ Ilaʼak Tipʼ. 2.
^ Lelaʼ letiʼe Betania yaan tu lakʼinil le Jordanoʼ, maʼ letiʼe yaan naatsʼ tiʼ Jerusalenoʼ. Ilaʼak le mapa yaan teʼ yáax táan juʼunoʼ.
^ Wa: «espíritu santo». Ilaʼak Tipʼ. 16.
^ Kex láas 4:00 u chíinil Kʼiin. Le hora kaʼachoʼ ku káajal u xoʼokol ken tíipʼik Kʼiin.
^ Le tʼaan ich griegooʼ maʼatech u yeʼesik wa maas nojoch Andrés tiʼ Pedro wa maas chichan.
^ Lit.: «Rabí».
