Juan 10:1-42
10 «Jach tu jaajil kin waʼalikteʼex: Le máax maʼ tu yokol tu jool u corral le tamanoʼob, baʼaxeʼ ku naʼakal yaanal tuʼux utiaʼal u yookleʼ, juntúul j-ookol yéetel juntúul máax ku tokik baʼaloʼob tiʼ máak.
2 Baʼaleʼ le máax ku yokol tu jool le corraloʼ letiʼe j-kanan tamanoʼ.
3 Tiʼ letiʼeʼ ku jeʼekʼabtaʼal le jool tumen le máax kanáantik le jooloʼ. Le tamanoʼob túunoʼ ku yuʼubikoʼob u juum u tʼaan. Le j-kanan tamanoʼ ku tʼankoʼob tu kʼaabaʼob yéetel ku jóoʼskoʼob teʼ corraloʼ.
4 Le ken tsʼoʼokok u jóoʼsik u yalakʼ tamanoʼobeʼ ku bin táanil, le tamanoʼob túunoʼ ku binoʼob tu paach tumen u kʼaj óoloʼob bix u juum u tʼaan.
5 Letiʼobeʼ maʼ kun binoʼob tu paach juntúul máax maʼ u kʼaj óoloʼobiʼ, baʼaxeʼ yaan u púutsʼloʼobtiʼ tumen maʼ u kʼaj óoloʼob bix u juum u tʼaan yaanal máakoʼobiʼ.»
6 Jesuseʼ tu tsikbaltajtiʼob le kettʼaanaʼ, baʼaleʼ letiʼobeʼ maʼ tu naʼatoʼob le baʼaxoʼob táan kaʼach u yaʼalaʼaltiʼoboʼ.
7 Le oʼolaleʼ Jesuseʼ tu yaʼalaj tu kaʼatéen: «Jach tu jaajil kin waʼalikteʼex: Teen le joonaj tuʼux ku yokol le tamanoʼoboʼ.
8 Teen le u jaajil j-kanan tamanoʼ, tuláakal le máaxoʼob tsʼoʼok u taaloʼob táan u yaʼalikoʼob letiʼob le u jaajil j-kanan tamanoʼ, chéen j-ookoloʼob yéetel ku tokikoʼob baʼaloʼob tiʼ máak. Baʼaleʼ le tamanoʼoboʼ maʼ tu yuʼuboʼob u tʼaanoʼobiʼ.
9 Teen le joonajoʼ; jeʼel máaxak ka okok teʼ joonajaʼ yaan u salvarkuba; yaan u yokol, yaan u jóokʼol yéetel yaan u kaxtik suʼuk utiaʼal u jaante.
10 Le j-ookoloʼ chéen ku taal utiaʼal ookol, utiaʼal kíimsaj yéetel utiaʼal xuʼulsaj. Teneʼ taalen utiaʼal ka yanakteʼex kuxtal yéetel utiaʼal ka yaʼabchajak u kʼiinil a kuxtaleʼex.
11 Teen le jach maʼalob j-kanan tamanoʼ; le jach maʼalob j-kanan tamanoʼ ku kʼubik u kuxtal* yoʼolal le tamanoʼoboʼ.
12 Baʼaleʼ le máax chéen ku boʼotaʼal utiaʼal ka u kanáant le tamanoʼoboʼ, tumen maʼ letiʼ u yuumiloʼob yéetel maʼ juntúul j-kanan tamaneʼ, ken u yil u taal le lobooʼ,* ku xúumpʼattik le tamanoʼoboʼ, ku púutsʼul —le lobooʼ ku kíimsik yaʼabiʼ yéetel ku kʼiʼitbesik u maasiloʼob—
13 tumen chéen boʼotbil u beetaʼal; baʼax u kʼáajtiʼ ka úuchuk wa baʼax tiʼ le tamanoʼoboʼ.
14 Teen le jach maʼalob j-kanan tamanoʼ, teneʼ in kʼaj óol in walakʼ tamanoʼob, letiʼobeʼ u kʼaj óolenoʼob xan
15 jeʼel bix le Taata u kʼaj óolenoʼ yéetel teneʼ in kʼaj óol le Taataoʼ. Teen túuneʼ kin kʼubik in kuxtal tu yoʼolal le tamanoʼoboʼ.
16 »Yaan xan ten uláakʼ tamanoʼob minaʼanoʼob teʼ corralaʼ, yaan xan in taaskoʼob, yéetel yaan u yuʼubikoʼob in tʼaan; yaan u pʼáatloʼob junmúuchʼ yéetel leloʼobaʼ, yáanal u kʼab juntúuliliʼ j-kanan taman.
17 Le oʼolal u yaabiltmen le Taataoʼ, tumen kin kʼubik in kuxtal utiaʼal ka tsʼaʼabakten tu kaʼatéen.
18 Mix máak u luʼsten, baʼaxeʼ tu juunal in wóol kin kʼubik. Tsʼaʼanten u páajtalil in kʼubik yéetel tsʼaʼanten u páajtalil in kaʼa kʼamik. Lelaʼ in Taata aʼalten ka in beete».
19 Le judíoʼoboʼ pʼáat tu kaʼatéen maʼ junpʼéeliliʼ bix u tuukuloʼob yoʼolal le baʼaxoʼob tu yaʼalaj Jesusoʼ.
20 Yaʼab tiʼ letiʼobeʼ káaj u yaʼalikoʼob: «Le máakaʼ okaʼan demonio tiʼ yéetel tsʼoʼok u chokotal u pool. ¿Baʼaxten ka wuʼuyikeʼex baʼax ku yaʼalik?».
21 Uláakʼ máakoʼobeʼ tu yaʼaloʼob: «Juntúul máak okaʼan demonio tiʼeʼ maʼatech u tʼaan beyaʼ. Tsʼoʼoleʼ juntúul demonioeʼ maʼ tu páajtal u tsʼáaik u sáasilil u yich le chʼóopoʼoboʼ, ¿máasaʼ?».
22 Teʼ kʼiinoʼob jeʼeloʼ tu kaajil Jerusaleneʼ táan kaʼach u kʼiinbesaʼal u kʼiinil úuchik u kʼuʼubul le templooʼ. Teʼ kʼiinoʼob jeʼeloʼ u kʼiiniloʼob keʼel,
23 yéetel Jesuseʼ táan kaʼach u máan teʼ templo ichil u columnaʼob Salomonoʼ.
24 Le judíoʼob túunoʼ tu baʼpachtoʼobeʼ ka joʼopʼ u kʼáatkoʼobtiʼ: «¿Tak baʼax kʼiin ken a waʼaltoʼon jach máaxech? Wa teech le Cristooʼ, juntaatsʼ ka a waʼaltoʼon».
25 Jesuseʼ tu yaʼalajtiʼob: «Tsʼoʼok in waʼalikteʼex, baʼaleʼ maʼ ta creertikeʼex. Le baʼaxoʼob kin beetik tu kʼaabaʼ in Taataoʼ ku jaajkúuntikoʼob jach máaxen.
26 Baʼaleʼ teʼexeʼ maʼ ta creertikeʼex tumen maʼ in walakʼ tamaneʼexiʼ.
27 In walakʼ tamanoʼobeʼ ku yuʼubikoʼob in tʼaan, teneʼ in kʼaj óoloʼob yéetel ku taaloʼob tin paach.
28 Teen túuneʼ yaan in tsʼáaik kuxtal minaʼan u xuul tiʼob, yéetel mix bikʼin kun xuʼulsbiltiʼob, tsʼoʼoleʼ mix máak kun tokikoʼob tin kʼab.
29 Le baʼax tsʼoʼok u tsʼáaikten in Taataoʼ maas nojoch tiʼ u maasil baʼaloʼoboʼ, yéetel mix máak ku páajtal u tokikoʼob tu kʼab le Taataoʼ.
30 Teen yéetel le Taataoʼ juntúuliliʼon».
31 Le judíoʼoboʼ tu kaʼa chʼaʼajoʼob tuunich utiaʼal u muruxtuntikoʼob.
32 Jesús túuneʼ tu yaʼalajtiʼob: «Yaʼab baʼaloʼob maʼalobtak ku taal tiʼ le Taata tin weʼesajteʼexoʼ. ¿Yoʼolal máakalmáak tiʼ le baʼaloʼob ken a muruxtunteneʼexaʼ?».
33 Ka núukaʼabtiʼ tumen le judíoʼoboʼ: «Maʼ tu yoʼolal junpʼéel baʼal maʼalob ken k-muruxtuntechiʼ, baʼaxeʼ tumen táan a pochʼik Dios, tumen techeʼ kex chéen wíinikecheʼ táan a taaskaba juntúul dios».
34 Jesuseʼ tu yaʼalajtiʼob: «¿Maʼ wa tsʼíibtaʼan teʼ Ley yaanteʼexoʼ: ‹Teneʼ tin waʼalaj: «Teʼexeʼ dioseʼex»›?
35 Dioseʼ tu yaʼalaj ‹diosoʼob› tak tiʼ le máaxoʼob kʼeʼeyoʼob teʼ Kiliʼich Tsʼíiboʼ, tsʼoʼoleʼ le Kiliʼich Tsʼíiboʼ maʼ tu páajtal u mixbaʼalkúuntaʼal.
36 ¿Baʼaxten túun ka waʼalikeʼex tiʼ teen, máax kiliʼichkúuntaʼanen yéetel túuxtaʼanen way yóokʼol kaab tumen le Taataoʼ: ‹Táan a pochʼik Dios›, tumen tin waʼalaj u Paalen Dios?
37 Wa maʼ tin beetik le baʼaxoʼob uts tu tʼaan in Taataoʼ maʼ a creertikeneʼex.
38 Baʼaleʼ wa kin beetkeʼ, kex maʼ a creertikeneʼexeʼ, creerteʼex le baʼaxoʼob kin beetkoʼ utiaʼal ka a wojéelteʼex yéetel ka pʼáatak ta tuukuleʼexeʼ, le Taataoʼ junmúuchʼ yanil tin wéetel, teen xaneʼ junmúuchʼ yanilen yéetel le Taataoʼ».
39 Le oʼolaleʼ le judíoʼoboʼ taakchaj u machkoʼob tu kaʼatéen; baʼaleʼ púutsʼtiʼob.
40 Jesuseʼ bin tuláakʼ u tséel le Jordanoʼ, le tuʼux káaj u tsʼáaik okjaʼ Juanoʼ, ka túun pʼáat teʼeloʼ.
41 Ka taal yaʼabkach máakoʼob tu yiknaleʼ ka joʼopʼ u yaʼalikoʼob: «U jaajileʼ, Juaneʼ maʼ tu beetaj mix junpʼéel milagroiʼ, baʼaleʼ jach jaaj tuláakal le baʼaxoʼob tu yaʼalaj yoʼolal le máakaʼ».
42 Teʼ túunoʼ yaʼabkach máakoʼob tu tsʼáaj u fejoʼob tiʼ Jesús.
Notas
^ Lit.: «alma». Ilaʼak Tipʼ. 7A.
^ Lelaʼ juntúul tsʼíitsʼik baʼalcheʼ ku kíimsik u yéet baʼalcheʼil; chíikaʼan tiʼ juntúul tsʼíitsʼik peekʼ.
