Juan 11:1-57
11 Yaan kaʼach juntúul máak kʼojaʼan ku kʼaabaʼtik Lázaro. Letiʼeʼ tiʼ kajaʼan kaʼach Betaniaeʼ, teʼ chan kajtalil tuʼux kajaʼan xan María yéetel Marta u kiikoʼ.
2 Le Maríaaʼ letiʼe koʼolel tu jiʼaj kiʼibok aceite tiʼ Yuumtsil yéetel tu choʼaj u yook yéetel u tsoʼotsel u pooleʼ. Letiʼeʼ íitsʼintsil tiʼ Lázaro, le máax kʼojaʼanoʼ.
3 Le oʼolaleʼ le koʼoleloʼobaʼ tu túuxtoʼob aʼalbil tiʼ Jesús: «Yuumtsil, ¡ile!, le máax jach a yaabiltmeʼ kʼojaʼan».
4 Baʼaleʼ le ka tu yuʼubaj Jesús lelaʼ tu yaʼalaj: «Le kʼojaʼanilaʼ maʼ utiaʼal ka u kíimsiʼ, baʼaxeʼ utiaʼal ka tsʼaʼabak nojbeʼenil tiʼ Dios, utiaʼal beyoʼ ka nojbeʼenkúuntaʼak u Paal Dios tu yoʼolal lelaʼ».
5 Jesuseʼ u yaabiltmaj kaʼach Marta, María bey xan Lázaro.
6 Baʼaleʼ letiʼeʼ kex tu yojéeltaj kʼojaʼan Lázaroeʼ, pʼáat kaʼapʼéel kʼiin teʼ tuʼux yaan kaʼachoʼ.
7 Ka tsʼoʼokeʼ tu yaʼalaj tiʼ le disipuloʼoboʼ: «Koʼoneʼex Judea tu kaʼatéen».
8 Le disipuloʼoboʼ tu yaʼaloʼobtiʼ: «J-Kaʼansaj, maʼ sen úucheʼ óolak muruxtuntaʼakech tumen u kajnáaliloʼob Judea, ¿yaan wa túun a kaʼa biniʼ?».
9 Jesuseʼ tu núukaj: «Doce horas ku sáasilkunaj le kʼiinoʼ, ¿máasaʼ? Wa yaan máax ku máan tu sáasilil le kʼiinoʼ maʼ tu tʼóochpajal tiʼ mix baʼal, tumen ku yilik le sáasil yaan teʼ yóokʼol kaabaʼ.
10 Wa yaan máax ku máan de áakʼabeʼ, ku tʼóochpajal tumen minaʼan mix baʼal utiaʼal sáasilkuntik u beel».
11 Ka tsʼoʼok u yaʼalik le baʼaloʼobaʼ, tu yaʼalaj xan: «K-amigo Lázaroeʼ táan u wenel, baʼaleʼ teneʼ táan in bin teʼeloʼ utiaʼal ka in wajse».
12 Le disipuloʼob túunoʼ tu yaʼaloʼobtiʼ: «Yuumtsil, wa táan u weenleʼ jeʼel u yutstaleʼ».
13 Baʼaleʼ Jesuseʼ táan kaʼach u yaʼalik tsʼoʼok u kíimil Lázaro. Chéen baʼaleʼ letiʼobeʼ ku tuklikoʼob kaʼacheʼ táan u tʼaan tiʼ u wenel máak utiaʼal u jeʼelskuba.
14 Jesús túuneʼ juntaatsʼ úuchik u yaʼaliktiʼob: «Lázaroeʼ tsʼoʼok u kíimil,
15 baʼaleʼ ku kiʼimaktal in wóol ta woʼolaleʼex tumen minaʼanen kaʼach teʼeloʼ, utiaʼal ka creerteneʼex. Koʼoneʼex teʼ tuʼux yanoʼ».
16 Tomás túuneʼ, le ku yaʼalaʼal kaʼach Iich tiʼeʼ, tu yaʼalaj tiʼ u maasil disipuloʼob: «Koʼoneʼex túun xaniʼ, utiaʼal ka kíimkoʼon tu yéetel».
17 Ka kʼuch Jesuseʼ tsʼoʼok kanpʼéel kʼiinoʼob tsʼaʼabak Lázaro ichil le muknaloʼ.
18 Betaniaeʼ tiʼ yaan kaʼach naatsʼ Jerusaleneʼ, kex bey óoxpʼéel kilómetro tiʼeʼ.
19 Yaʼab judíoʼob binoʼob tu yiknal Marta yéetel María utiaʼal u líiʼskoʼob u yóoloʼob úuchik u kíimil Lázaro.
20 Marta túuneʼ ka tu yojéeltaj táan u taal Jesuseʼ jóokʼ u yile, baʼaleʼ Maríaeʼ pʼáat kutal ich naj.
21 Martaeʼ tu yaʼalaj tiʼ Jesús: «Yuumtsil, wa way yanech kaʼacheʼ, bejlaʼa maʼ tu kíimil in wíitsʼineʼ.
22 Kex beyoʼ beoraaʼ in wojel jeʼel baʼalak ka a kʼáat tiʼ Dioseʼ, Dioseʼ yaan u tsʼáaiktech».
23 Jesuseʼ tu yaʼalajtiʼ: «A wíitsʼineʼ yaan u líikʼil».
24 Martaeʼ tu yaʼalajtiʼ: «Teneʼ in wojel yaan u líikʼil ken kaʼa kuxkíintaʼak le kimenoʼob teʼ tu tsʼook kʼiinoʼ».
25 Jesuseʼ tu yaʼalajtiʼ: «Teen le kuxtaloʼ, bey xan le kaʼa kuxtaloʼ. Le máax ku tsʼáaik u fe tiʼ teneʼ, kex ka kíimkeʼ yaan u kaʼa kuxtal.
26 Tuláakal xan máax kuxaʼan yéetel ku tsʼáaik u fe tiʼ teneʼ, mix bikʼin kun kíimil. Techeʼ ¿ka creertik wa lelaʼ?».
27 Martaeʼ tu núukajtiʼ: «Kin creertik, Yuumtsil; teneʼ tsʼoʼok in creertik teech le Cristo u Paal Dios, le Máax aʼalaʼan kun taal way yóokʼol kaaboʼ».
28 Le ka tsʼoʼok u yaʼalik Marta lelaʼ, bineʼ ka tu tʼanaj María u yíitsʼin, ka tu yaʼalaj tu xikin: «Le j-Kaʼansajoʼ way yaneʼ yéetel táan u tʼankech».
29 Le ka tu yuʼubaj María lelaʼ, líikʼ tu séebaʼanileʼ ka joʼopʼ u bin teʼ tuʼux yaan Jesusoʼ.
30 Jesuseʼ maʼ okok kaʼach teʼ chan kajtaliloʼ, baʼaxeʼ láayliʼ tiʼ yaan kaʼach teʼ tuʼux ilaʼab tumen Martaoʼ.
31 Le oʼolaleʼ le judíoʼob yanoʼob kaʼach yéetel María ichil le naj le táan kaʼach u líiʼskoʼob u yóoloʼ, chéen ka tu yiloʼob u séeb líikʼil María yéetel u jóokʼol. Letiʼob túuneʼ binoʼob tu paach, tumen ku tuklikoʼob kaʼach táan u bin okʼol tu yiknal le muknaloʼ.
32 Ka kʼuch María tak teʼ tuʼux yaan Jesusoʼ, tu yileʼ, tu xóolkʼabtuba tu táaneʼ ka tu yaʼalajtiʼ: «Yuumtsil, wa way yanech kaʼacheʼ, bejlaʼa maʼ tu kíimil in sukuʼuneʼ».
33 Jesús túuneʼ ka tu yilaj táan u yokʼol María bey xan le judíoʼob taaloʼob tu yéeteloʼ, yaachaj u yóol u puksiʼikʼaleʼ, ka péeknaj u yóol;
34 ka tu yaʼalaj: «¿Tuʼux a tsʼaameʼex?». Letiʼobeʼ tu núukoʼobtiʼ: «Yuumtsil, koʼoten ka a wile».
35 Jesús túuneʼ káaj u yáalal u jaʼil u yich.
36 Le oʼolal le judíoʼoboʼ káaj u yaʼalikoʼob: «¡Ilawil bukaʼaj u yaabiltmil kaʼachi!».
37 Baʼaleʼ yaan tiʼ letiʼobeʼ tu yaʼaloʼob: «Le máak tu tsʼáaj u sáasilil u yich le máak chʼóopeʼ, ¿maʼ wa túun tu páajtal kaʼach u beetik wa baʼax utiaʼal maʼ u kíimil le máakaʼ?».
38 Jesús túuneʼ kaʼa yaachaj u yóol u puksiʼikʼal, tsʼoʼoleʼ ka bin teʼ tuʼux yaan le muknaloʼ. U jaajileʼ le muknalaʼ junpʼéel sajkab kaʼachi, yéetel nakkúuntaʼan junpʼéel tuunich tu jool.
39 Jesuseʼ tu yaʼalaj: «Luʼseʼex le tuunichoʼ». Baʼaleʼ Marta u kiik le animáasoʼ, tu yaʼalajtiʼ: «Yuumtsil, míin tsʼoʼok u káajal u yantal u book, tumen tsʼoʼok kanpʼéel kʼiin muʼukuk».
40 Jesuseʼ tu yaʼalajtiʼ: «¿Maʼ wa tin waʼalajtecheʼ, wa yaantech fejeʼ yaan a wilik u nojbeʼenil Dios?».
41 Ka túun luʼsaʼab le tuunichoʼ. Jesús túuneʼ tu líiʼsaj u yich kaʼaneʼ ka tu yaʼalaj: «In Yuum, kin tsʼáaiktech gracias tumen tsʼoʼok a wuʼuyik in oración.
42 U jaajileʼ, teneʼ in wojel mantatsʼ ka wuʼuyik in oracionoʼob; baʼaleʼ lelaʼ tin waʼalaj yoʼolal le yaʼabkach máakoʼob waʼalakbaloʼob tin baʼpachaʼ, utiaʼal ka u creertoʼob teech túuxtmilen».
43 Ka tsʼoʼok u yaʼalik le baʼaloʼobaʼ, tu kʼaʼam aʼalaj: «¡Lázaro, jóokʼen!».
44 Le máak kimen kaʼachoʼ, le ka jóokʼeʼ bakʼaʼan u yookoʼob bey xan u kʼaboʼob yéetel nookʼ; u yich xaneʼ bakʼaʼan yéetel junxéetʼ nookʼ. Jesús túuneʼ tu yaʼalaj tiʼ le máakoʼoboʼ: «Luʼseʼex le nookʼoʼob bakʼaʼantiʼoʼ, ka a chaʼex u bin».
45 Le oʼolaleʼ yaʼab tiʼ le judíoʼob binoʼob yéetel María yéetel tu yiloʼob le baʼax tu beetaj Jesusoʼ, tu tsʼáaj u fejoʼob tiʼ letiʼ.
46 Baʼaleʼ yaan tiʼ letiʼobeʼ binoʼob tu yiknal le fariseoʼoboʼ, ka joʼopʼ u yaʼalikoʼobtiʼob le baʼaxoʼob tu beetaj Jesusoʼ.
47 Le oʼolaleʼ u nuuktakil le sacerdoteʼob yéetel le fariseoʼoboʼ tu muchʼubaʼob yéetel u jueziloʼob le Sanedrinoʼ, ka joʼopʼ u yaʼalikoʼob: «¿Baʼax ken k-beete?, tumen le máakaʼ yaʼab milagroʼob ku beetik.
48 Wa k-pʼatik chéen beyoʼ, tuláakal máak ken u tsʼáa u fe tiʼ letiʼ; le romanoʼob túunoʼ yaan u taaloʼob yéetel yaan u luʼskoʼobtoʼon le páajtalil yaantoʼon yóokʼol le templooʼ bey xan yóokʼol le kaajaʼ».
49 Baʼaleʼ Caifás juntúul tiʼ letiʼobeʼ, u maas nojchil le sacerdoteʼob teʼ jaʼab jeʼeloʼ, tu yaʼalajtiʼob: «Teʼexeʼ maʼ a wojleʼex mix baʼaliʼ,
50 yéetel maʼ ta naʼatkeʼexeʼ maas maʼalob a tiaʼaleʼex ka kíimik juntúul máak yoʼolal le kaajaʼ ke ka xuʼulsaʼak tiʼ tuláakal le kaajaʼ».
51 Lelaʼ maʼ tu yaʼalaj chéen tu juunal u yóoliʼ, baʼaxeʼ tumen letiʼ u maas nojchil le sacerdoteʼob teʼ jaʼab jeʼeloʼ, tu profetizartaj yaniliʼ u kíimil Jesús tu yoʼolal le judíoʼoboʼ,
52 tsʼoʼoleʼ maʼ chéen tu yoʼolal le judíoʼoboʼ, baʼaxeʼ utiaʼal ka u muchʼkíint xan le u paalaloʼob Dios kʼiʼitpajaʼanoʼoboʼ.
53 Le oʼolaleʼ desde teʼ kʼiin jeʼeloʼ joʼopʼ u chʼaʼtuklikoʼob bix ken u kíimsiloʼob.
54 Jesús túuneʼ xuʼul u máan ichil le judíoʼob teʼ tuʼux chochoʼkiloʼ, baʼaxeʼ lukʼ teʼeloʼ ka bin táanxel luʼumil naatsʼ tiʼ le desiertooʼ, tiʼ junpʼéel kaaj ku kʼaabaʼtik Efraín; teʼeloʼ tiʼ pʼáat túun yéetel u disipuloʼobiʼ.
55 Teʼ kʼiinoʼob jeʼeloʼ, maʼ yaʼab u bin utiaʼal u kʼiinbesaʼal le Pascua tumen le judíoʼoboʼ; yaʼab máakoʼob túun tiʼ le luʼumil jeʼeloʼ binoʼob Jerusalén táanil tiʼ le Pascuaoʼ, utiaʼal u limpiokíintkubaʼob jeʼex u yaʼalik le Leyoʼ.
56 Le máakoʼob túunoʼ táan kaʼach u kaxtikoʼob Jesús yéetel táan kaʼach u yaʼalikoʼob tu baatsiloʼob le waʼalakbaloʼob teʼ templooʼ: «¿Baʼax ka tuklikeʼex? ¿Jach junpuliʼ wa maʼ kun taal tiʼ le kʼiinbesajaʼ?».
57 Baʼaleʼ u nuuktakil le sacerdoteʼob yéetel le fariseoʼoboʼ tsʼokaʼaniliʼ kaʼach u yaʼalikoʼobeʼ, wa yaan máax ku yojéeltik tuʼux yaneʼ ka u yaʼale, utiaʼal ka xiʼik chʼaʼabil.
