Juan 13:1-38
13 Táanil tiʼ u kʼiinbesajil le Pascuaoʼ, Jesuseʼ u yojliliʼ tsʼoʼok u kʼuchul u kʼiinil u lukʼul way yóokʼol kaab utiaʼal u bin tu yiknal le Taataoʼ, le oʼolaleʼ tu yaabiltaj u disipuloʼob yanoʼob way yóokʼol kaabaʼ, letiʼeʼ tu yaabiltoʼob tak tu xuul.
2 Le táan u cenaroʼoboʼ, le Kʼaasilbaʼaloʼ* tsʼokaʼaniliʼ u yoksik tu puksiʼikʼal Judas Iscariote u paal Simón ka u traicionart Jesús.
3 Jesús túuneʼ tumen u yojel tsʼoʼok u kʼuʼubul tuláakal baʼal tu kʼab tumen le Taataoʼ, yéetel tumen tiʼ Dios taaljaʼan yéetel tu yiknal Dios ku bineʼ,
4 líikʼ teʼ mesaoʼ ka tu tsʼáaj juntséelil u yáal u nookʼ. Tu chʼaʼaj xan junpʼéel toallaeʼ ka tu jéepʼkʼaxtaj u nakʼ tu yéetel.
5 Ka tsʼoʼok u beetik lelaʼ tu láalaj jaʼ tiʼ junpʼéel palanganaeʼ ka joʼopʼ u pʼoʼik u yook le disipuloʼoboʼ yéetel u choʼik u jaʼil u yookoʼob yéetel le toalla ikil u jéepʼkʼaxtmil u nakʼoʼ.
6 Ka náatsʼ tu yiknal Simón Pedro; Pedro túuneʼ tu yaʼalajtiʼ: «Yuumtsil, bix ken in chaʼa a pʼoʼik in wook».
7 Jesuseʼ tu núukajtiʼ: «Le baʼax kin beetkaʼ, techeʼ maʼ ta naʼatik beoraaʼ, baʼaleʼ yaan u kʼuchul u kʼiinil a naʼatik».
8 Pedroeʼ tu yaʼalajtiʼ: «Techeʼ jach junpuliʼ maʼ ken a pʼoʼ in wook». Jesuseʼ tu yaʼalajtiʼ: «Wa maʼ tin pʼoʼik a wookeʼ, techeʼ maʼ táakpajaʼanech ichil le máaxoʼob in tiaʼaloʼoboʼ».
9 Simón Pedroeʼ tu yaʼalajtiʼ: «Yuumtsil, maʼ chéen in wookiʼ, baʼaxeʼ tak in kʼaboʼob yéetel in pool».
10 Jesús túuneʼ tu yaʼalajtiʼ: «Le máax tsʼoʼok u yichkíileʼ chéen u yook kʼaʼabéet u pʼoʼik tumen limpio tuláakal u wíinklil. Teʼexeʼ limpioʼex, baʼaleʼ maʼ tuláakleʼexiʼ».
11 Letiʼeʼ tumen u yojel máax le traicionartikoʼ, tu yaʼalaj: «Maʼ tuláakleʼex limpioʼexiʼ».
12 Ka tsʼoʼok túun u pʼoʼik u yook u disipuloʼob, u kaʼa takik le u yáal u nookʼoʼ yéetel u kaʼa kutal tu yiknal le mesaoʼ, tu yaʼalajtiʼob: «¿Ka naʼatkeʼex wa baʼaxten tin beetaj lelaʼ?
13 Teʼexeʼ ka waʼalikeʼexten ‹j-Kaʼansaj› yéetel ‹Yuumtsil›, jach jaaj baʼax ka waʼalikeʼex, tumen j-Kaʼansajen yéetel Yuumtsilen.
14 Le oʼolaleʼ wa teen kex Yuumtsilen yéetel j-Kaʼansajen tsʼoʼok in pʼoʼik a wookeʼexeʼ, teʼex xaneʼ unaj a pʼoʼik a wookeʼex ta baatsileʼex.
15 Tumen teneʼ tsʼoʼok in weʼesikteʼex bix unaj a beetkeʼex; jeʼex tsʼoʼok in weʼesikteʼexoʼ, teʼex xaneʼ bey unaj a beetkeʼexoʼ.
16 Jach tu jaajil kin waʼalikteʼex: Le palitsiloʼ maʼ maas nojoch tiʼ u tsʼuuliliʼ, le máax ku túuxtaʼal xanoʼ maʼ maas nojoch tiʼ le máax túuxtikoʼ.
17 Beora tsʼoʼok a wojéeltikeʼex le baʼaloʼobaʼ, kiʼimak a wóoleʼex wa ka beetkeʼex.
18 Teneʼ maʼ táan in tʼaan tiʼ tuláakleʼexiʼ; teneʼ in kʼaj óol le máaxoʼob tsʼoʼok in yéeyikoʼ. Baʼaleʼ lelaʼ yaan u yúuchul utiaʼal ka béeychajak le baʼax ku yaʼalik le Kiliʼich Tsʼíiboʼ: ‹Le máax ku jaantik kaʼach in woʼoch waajeʼ, tsʼoʼok u sutkuba tin contra›.*
19 Desde beoraaʼ kin waʼalikteʼex táanil tiʼ u yúuchul, beyoʼ ken úuchkeʼ yaan a creertikeʼexeʼ teen.
20 Jach tu jaajil kin waʼalikteʼex: Le máax ku kʼamik jeʼel máaxak ka in túuxteʼ, ku kʼamken xan. Le máax ku kʼamkeneʼ ku kʼamik xan le máax túuxtenoʼ».
21 Ka tsʼoʼok u yaʼalik le baʼaloʼobaʼ, Jesuseʼ yaachaj u yóol u puksiʼikʼaleʼ ka tu yaʼalajtiʼob juntaatsʼ: «Jach tu jaajil kin waʼalikteʼex: Juntúul tiʼ teʼexeʼ yaan u traicionartiken».
22 Le disipuloʼoboʼ káaj u paklan paktikubaʼob jakʼaʼan u yóoloʼob tumen maʼ u yojloʼob kaʼach tiʼ máax ku tʼaan Jesusiʼ.
23 Tu tséel Jesuseʼ tiʼ kulukbal kaʼach juntúul tiʼ u disipuloʼobiʼ, lelaʼ jach yaabiltaʼan tumen Jesús.
24 Simón Pedroeʼ tu béechʼ joʼoltaj le disipuloaʼ ka tu yaʼalajtiʼ: «Aʼaltoʼon tiʼ máax ku tʼaan».
25 Le disipulo túunaʼ tu maas takʼuba tiʼ Jesuseʼ ka tu kʼáatajtiʼ: «Yuumtsil, ¿máax le ka waʼalikoʼ?».
26 Jesús túuneʼ tu núukaj: «Letiʼe máax tiʼ ken in tsʼáa le junxéetʼ waaj ken in chʼuloʼ». Ka tsʼoʼok túun u chʼulik le waajoʼ, tu chʼaʼajeʼ ka tu tsʼáaj tiʼ Judas u paal Simón Iscariote.
27 Judas túuneʼ le ka tsʼoʼok u chʼaʼik le junxéetʼ waajoʼ, ook Satanás tiʼ. Ka túun aʼalaʼabtiʼ tumen Jesús: «Le baʼax ka beetkoʼ, beet tu séebaʼanil».
28 Baʼaleʼ mix juntúul tiʼ le máaxoʼob kulukbaloʼob tu yiknal le mesa u yojloʼob kaʼach baʼaxten aʼalaʼabtiʼ leloʼ.
29 Yaan tak jujuntúul ichiloʼobeʼ tu tukloʼobeʼ, tumen Judas chʼaʼamil u cajail le taakʼinoʼ, Jesuseʼ táan kaʼach u yaʼaliktiʼ: «Man le baʼaxoʼob kʼaʼabéettoʼon utiaʼal le kʼiinbesajoʼ», wa táan kaʼach u yaʼaliktiʼ ka u tsʼáa wa bajux tiʼ le óotsiloʼoboʼ.
30 Ka tsʼoʼok túun u tsʼaʼabal le junxéetʼ waaj tiʼoʼ, jóokʼ tu séebaʼanil. Ka úuch lelaʼ tsʼoʼok kaʼach u yáakʼabtal.
31 Ka tsʼoʼok túun u jóokʼol Judaseʼ, Jesuseʼ tu yaʼalaj: «Beoraaʼ ku nojbeʼenkúuntaʼal u Paal máak, Dios xaneʼ ku nojbeʼenkúuntaʼal tu yoʼolal.
32 Dioseʼ yaan xan u nojbeʼenkúuntik, yéetel Dioseʼ yaan u nojbeʼenkúuntaʼal tu séebaʼanil tumen u Paal máak.
33 In mejen paalaleʼex, chéen junpʼíit kʼiin maas kin pʼáatal ta wéeteleʼex. Teʼexeʼ yaan a máan a kaxteneʼex, baʼaleʼ jeʼex tin waʼalaj tiʼ le judíoʼoboʼ: ‹Teʼ tuʼux kin binoʼ teʼexeʼ maʼ tu páajtal a taaleʼexiʼ›, lelaʼ letiʼe baʼax xan kin waʼalikteʼex beoraaʼ.
34 Teneʼ kin tsʼáaikteʼex junpʼéel túumben mandamiento: ka a yaabiltabaʼex ta baatsileʼex. Jeʼel bix tsʼoʼok in yaabiltikeʼexoʼ, teʼex xaneʼ bey unaj a yaabiltikabaʼex ta baatsileʼexoʼ.
35 Wa ka yaabiltikabaʼex ta baatsileʼexeʼ tuláakal máak ken u yojéelteʼ teʼexeʼ in disipuloʼex».
36 Simón Pedroeʼ tu kʼáatajtiʼ: «Yuumtsil, ¿tuʼux ka bin?». Jesuseʼ tu núukaj: «Teʼ tuʼux kin binoʼ, techeʼ maʼ tu páajtal a taal tin paach beoraaʼ, baʼaleʼ ken tsʼoʼokkeʼ yaan a taaliʼ».
37 Pedroeʼ tu yaʼalajtiʼ: «Yuumtsil, ¿baʼaxten maʼ tu páajtal in taal ta paach beoraaʼ? Teneʼ yaan in kʼubik in kuxtal* ta woʼolal».
38 Jesuseʼ tu yaʼalaj: «¿Yaan a kʼubik a kuxtal tin woʼolal? Jach tu jaajil kin waʼaliktech: Junpuliʼ maʼ kun kʼaay le tʼeel táanil tiʼ a waʼalik óoxtéen maʼ a kʼaj óoleniʼ».
Notas
^ Lit.: «Diablo», u kʼáat u yaʼaleʼ j-líiʼsaj tʼaan.
^ Lit.: «tsʼoʼok u líiʼsik u tuunkuy tin contra».
^ Lit.: «alma». Ilaʼak Tipʼ. 7A.
