Juan 14:1-31
14 «Maʼ u péek u yóol a puksiʼikʼaleʼex. Tsʼáa a fejeʼex tiʼ Dios yéetel tsʼáa a fejeʼex xan tiʼ teen.
2 Tu yotoch in Taataeʼ yaʼab kúuchiloʼob yaan utiaʼal u pʼáatal máakiʼ.* Wa minaʼaneʼ jeʼel kaʼach in waʼalikteʼexeʼ, baʼaleʼ tumen yaneʼ táan in bin in preparart junpʼéel kúuchil utiaʼal a wantaleʼexiʼ.
3 Wa xan kin chʼaʼjoʼoltik in bin yéetel in preparartikteʼex junpʼéel kúuchileʼ, yaan in suut, yéetel teen ken in kʼameʼex teʼ najoʼ, beyoʼ le tuʼux kin antaloʼ tiʼ xan kan antaleʼexiʼ.
4 Le tuʼux kin binoʼ teʼexeʼ a kʼaj óoleʼex u bejil.»
5 Tomaseʼ tu yaʼalajtiʼ: «Yuumtsil, maʼ k-ojel tuʼux ka biniʼ. ¿Bix túun a waʼalik k-kʼaj óol u bejil?».
6 Jesuseʼ tu yaʼalajtiʼ: «Teen le bejoʼ, teen le jaajoʼ yéetel teen le kuxtaloʼ. Mix máak ku náatsʼal tu yiknal le Taata wa maʼ tin woʼolaloʼ.
7 Wa ka a kʼaj óolteneʼex kaʼacheʼ bejlaʼa tsʼoʼok xan a kʼaj óoltikeʼex in Taataeʼ; desde teʼ súutukaʼ a kʼaj óoleʼex yéetel tsʼoʼok a wilkeʼex».
8 Felipeeʼ tu yaʼalajtiʼ: «Yuumtsil, eʼestoʼon le Taataoʼ, yéetel leloʼ yaan».
9 Jesuseʼ tu yaʼalajtiʼ: «Felipe, tsʼoʼok u xáantal yanaken ta wéeteleʼex, ¿kex beyoʼ maʼ kʼuchkech a kʼaj óolteniʼ? Le máax tsʼoʼok u yilkeneʼ tsʼoʼok xan u yilik le Taataoʼ, ¿baʼaxten túun ka waʼalik: ‹Eʼestoʼon le Taataoʼ›?
10 ¿Maʼ wa ta creertik junmúuchʼ yanilen yéetel le Taataoʼ, yéetel le Taataoʼ junmúuchʼ yanil tin wéetel? Le baʼaxoʼob kin waʼalikteʼexoʼ maʼ chéen tu juunal in wóol kin waʼalikiʼ, baʼaxeʼ le Taata junmúuchʼ yanil tin wéeteloʼ táan u beetik le baʼaxoʼob u tukultmoʼ.
11 Creerteʼex junmúuchʼ yanilen yéetel le Taataoʼ, yéetel le Taataoʼ junmúuchʼ yanil tin wéetel; wa maʼ ta creertikeʼex yoʼolal le baʼax kin waʼalikoʼ, creerteʼex yoʼolal le baʼaxoʼob kin beetkoʼ.
12 Jach tu jaajil kin waʼalikteʼex: Le máax ku tsʼáaik u fe tiʼ teneʼ, yaan xan u beetik le meyajoʼob kin beetkoʼ; yéetel yaan u beetik maas nukuch meyajoʼob ke le jeʼeloʼobaʼ, tumen teneʼ táan in chʼaʼjoʼoltik in bin tu yiknal le Taataoʼ.
13 Jeʼel baʼaxak xan ka a kʼáateʼex tin kʼaabaʼeʼ, teneʼ yaan in beetik, beyoʼ yaan u nojbeʼenkúuntaʼal le Taata yoʼolal le Paaloʼ.
14 Wa ka kʼáatkeʼex wa baʼax tin kʼaabaʼeʼ, teneʼ yaan in beetik.
15 »Wa a yaabiltmeneʼexeʼ yaan a beetkeʼex le baʼaxoʼob kin waʼalikoʼ.
16 Teneʼ yaan in kʼáatik tiʼ le Taataoʼ, letiʼ túuneʼ yaan u túuxtikteʼex uláakʼ áantaj utiaʼal ka pʼáatak mantatsʼ ta wéeteleʼex;
17 lelaʼ letiʼe kiliʼich muukʼ ku kaʼansik u jaajiloʼ, le yóokʼol kaaboʼ maʼ tu páajtal u kʼamik tumen maʼ tu yilik yéetel mix u kʼaj óoliʼ. Teʼexeʼ a kʼaj óoleʼex tumen tiʼ yaan ta wéeteleʼexeʼ yéetel tiʼ yaan tiʼ teʼexeʼ.
18 Teneʼ maʼ ken in pʼateʼex ta juunaleʼex.* Yaan in suut ta wiknaleʼex.
19 Ichil junpʼíit kʼiin maaseʼ, le yóokʼol kaaboʼ maʼ ken u yilen tu kaʼatéen. Baʼaleʼ teʼexeʼ yaan a wilkeneʼex tumen teneʼ kuxaʼanen, yéetel teʼexeʼ yaan a kuxtaleʼex.
20 Ken kʼuchuk le kʼiin jeʼeloʼ, teʼexeʼ yaan a wojéeltikeʼex junmúuchʼ yanilen yéetel in Taata, yéetel teʼexeʼ junmúuchʼ yanileʼex tin wéetel, teen xaneʼ junmúuchʼ yanilen ta wéeteleʼex.
21 Le máax ku kʼamik yéetel ku beetik le baʼaxoʼob kin waʼalikoʼ letiʼe máax u yaabiltmenoʼ. Le máax u yaabiltmen xanoʼ yaan u yaabiltaʼal tumen in Taata, teen xaneʼ yaan in yaabiltik yéetel yaan in chaʼik u kʼaj óoltiken tubeel».
22 Ka aʼalaʼabtiʼ tumen Judas (maʼ Judas Iscarioteiʼ): «Yuumtsil, ¿baʼaxten ka waʼalik yaan a chaʼik k-kʼaj óoltikech tubeel, baʼaleʼ maʼ ken a chaʼa u kʼaj óoltikech le yóokʼol kaaboʼ?».
23 Jesús túuneʼ tu núukajtiʼ: «Wa yaan máax u yaabiltmeneʼ yaan u beetik baʼax kin waʼalik, yéetel yaan u yaabiltaʼal tumen in Taata. Toʼon túuneʼ yaan k-taal tu yiknal yéetel yaan k-pʼáatal kajtal tu yéetel.
24 Le máax maʼ u yaabiltmeneʼ maʼ tu beetik le baʼax kin waʼalikoʼ, tsʼoʼoleʼ le baʼaxoʼob ka wuʼuyikeʼex in waʼalikoʼ maʼ in tiaʼaliʼ, baʼaxeʼ utiaʼal le Taata máax túuxtenoʼ.
25 »Le tiaʼanen kaʼach ta wéeteleʼexoʼ, teneʼ tin waʼalajteʼex le baʼaloʼobaʼ.
26 Baʼaleʼ le kiliʼich muukʼ* ken u túuxt le Taata tin kʼaabaʼoʼ, letiʼ kun kaʼansikteʼex tuláakal baʼal yéetel letiʼ kun beetik u kʼaʼajalteʼex tuláakal le baʼaxoʼob tsʼoʼok in waʼalikteʼexoʼ.
27 Kin pʼatikteʼex le jeetsʼeliloʼ, kin tsʼáaikteʼex in jeetsʼelil. Maʼ tin tsʼáaikteʼex jeʼex u tsʼaʼabal tumen le yóokʼol kaaboʼ. Maʼ a chaʼikeʼex u péek u yóol a puksiʼikʼaleʼex mix u chʼaʼik saajkil.
28 Ta wuʼuyeʼex in waʼalikteʼex: Táan in bin, baʼaleʼ yaan in suut ta wiknaleʼex. Wa a yaabiltmeneʼexeʼ yaan u kiʼimaktal a wóoleʼex tumen táan in chʼaʼjoʼoltik in bin tu yiknal le Taataoʼ, tumen le Taataoʼ maas nojoch tiʼ teen.
29 Le oʼolaleʼ tsʼoʼok in waʼalikteʼex táanil tiʼ u yúuchul, beyoʼ ken úuchkeʼ yaan a creertikeʼex.
30 Desde beoraaʼ maʼ yaʼab baʼax ken in waʼalteʼexiʼ, tumen táan u taal u gobernanteil le yóokʼol kaaboʼ. Letiʼeʼ maʼ tu páajtal u tsʼáaiken yáanal u páajtalil,
31 baʼaleʼ utiaʼal ka u yojéelt le yóokʼol kaab in yaabiltmaj le Taataoʼ, jeʼex úuchik u yaʼalikten le Taata ka in beetoʼ bey xan in beetkoʼ. Líikʼeneʼex, koʼoneʼex yaanal tuʼux.
Notas
^ Wa: «kúuchiloʼob utiaʼal u kajtal máakiʼ».
^ Wa: «x-maʼ taatail».
^ Wa: «espíritu santo». Ilaʼak Tipʼ. 16.
