Juan 15:1-27
15 »Teen le u jaajil cheʼil uvaoʼ, in Taataeʼ letiʼe máax meyajtikoʼ.
2 Tuláakal le jéejekʼal yaan tiʼ teen maʼ tu yichankiloʼoboʼ, ku luʼsaʼal tumen in Taata, baʼaleʼ tiʼ tuláakal le jéejekʼal ku yichankiloʼoboʼ, in Taataeʼ ku luʼsláantik le u xéexetʼal maʼ pataloʼ utiaʼal ka maas yaʼabchajak u yich.
3 Yoʼolal le baʼax tin kaʼansajteʼexoʼ, tsʼoʼok u luʼsaʼalteʼex le baʼax maʼ patal yaanteʼex kaʼachoʼ.
4 Pʼáatkeʼex junmúuchʼ tin wéetel, teen xaneʼ yaan in pʼáatal junmúuchʼ ta wéeteleʼex. Jeʼex u kʼab le cheʼ maʼ tu páajtal u tsʼáaik ich chéen tu juunal wa maʼ taakʼal tiʼ u cheʼiloʼ, teʼex xaneʼ maʼ tu páajtal a tsʼáaikeʼex ich wa maʼ ta pʼáatleʼex junmúuchʼ tin wéetel.
5 Teen u cheʼil le uvaoʼ, teʼexeʼ u kʼaboʼob. Le máax ku pʼáatal junmúuchʼ tin wéetel, yéetel kin pʼáatal junmúuchʼ tu yéeteleʼ, letiʼeʼ yaʼab ich ken u tsʼáae; tumen wa maʼ junmúuchʼ yanileʼex tin wéeteleʼ, junpuliʼ maʼ tu páajtal a beetkeʼex mix baʼal.
6 Wa yaan máax maʼ tu pʼáatal junmúuchʼ tin wéeteleʼ yaan u píikchʼintaʼal jeʼex u beetaʼal tiʼ u kʼab le cheʼ maʼ pataloʼ; lelaʼ ku tijil. Tsʼoʼoleʼ le kʼaboʼob beyaʼ ku moʼolol yéetel ku píikchʼintaʼal ich kʼáakʼ utiaʼal ka tóokaʼakoʼob.
7 Wa ka pʼáatleʼex junmúuchʼ tin wéetel bey xan wa ku pʼáatal ta puksiʼikʼaleʼex le baʼaxoʼob kin waʼalikteʼexoʼ, kʼáateʼex le baʼax ka tsʼíiboltkeʼexoʼ, yaan u yúuchul jeʼex ta kʼáatileʼexoʼ.
8 In Taataeʼ ku nojbeʼenkúuntaʼal yoʼolal lelaʼ: ka seguernak a tsʼáaikeʼex yaʼab ich yéetel ka a weʼeseʼex jach in disipuloʼex.
9 Jeʼex u yaabiltmilen le Taata yéetel jeʼex in yaabiltmileʼexeʼ, teʼex xaneʼ pʼáatkeʼex ichil in yaabilaj.
10 Wa ka beetkeʼex le baʼaxoʼob kin waʼalikteʼexoʼ, yaan a pʼáatleʼex ichil in yaabilaj, jeʼex teen tsʼoʼok in beetik baʼax ku yaʼalik in Taata yéetel tsʼoʼok in pʼáatal ichil u yaabilajoʼ.
11 »Teneʼ tsʼoʼok in waʼalikteʼex le baʼaloʼobaʼ utiaʼal ka pʼáatak in kiʼimak óolal tiʼ teʼex, yéetel utiaʼal ka chúukaʼanchajak a kiʼimak óolaleʼex.
12 Lelaʼ letiʼe baʼax kin waʼalikteʼex ka a beeteʼexaʼ: ka a paklan yaabiltabaʼex jeʼex teen tsʼoʼok in yaabiltikeʼexoʼ.
13 Mix máak maas nojoch u yaabilaj tiʼ lelaʼ: ka u kʼub u kuxtal* máak tu yoʼolal u amigoʼob.
14 Teʼexeʼ in amigoʼex wa ka beetkeʼex baʼax kin waʼalikteʼex.
15 Beoraaʼ maʼ tin waʼalikteʼex palitsileʼex, tumen le palitsiloʼ maʼ u yojel baʼax ku beetik u tsʼuuliliʼ. Baʼaleʼ kin waʼalikteʼex in amigoʼex, tumen tuláakal le baʼaxoʼob tsʼoʼok u yaʼalikten in Taataoʼ, teneʼ tsʼoʼok xan in tsʼáaik a wojéelteʼex.
16 Maʼ teʼex yéeyeneʼexiʼ, baʼaxeʼ teen yéeyeʼex, teen xan aʼalteʼex ka xiʼikeʼex táanil yéetel maʼ u xuʼulul a tsʼáaikeʼex maʼalob ich ku pʼáatal tak tu xuul; beyoʼ jeʼel baʼalak ka a kʼáateʼex tiʼ le Taata tin kʼaabaʼoʼ, letiʼeʼ yaan u tsʼáaikteʼex.
17 »Lelaʼ letiʼe baʼax kin waʼalikteʼex utiaʼal ka a yaabiltabaʼex ta baatsileʼexaʼ.
18 Baʼaleʼ wa le yóokʼol kaab ku pʼektikeʼexoʼ, a wojleʼex teen tu yáax pʼekten táanil tiʼ u pʼektikeʼex.
19 Wa teʼex yóokʼol kaabileʼexeʼ le yóokʼol kaaboʼ jeʼel u yaabiltikeʼexeʼ tumen u tiaʼaleʼex. Baʼaleʼ teʼexeʼ maʼ yóokʼol kaabileʼexiʼ, tumen tsʼoʼok in yéeyikeʼex tiʼ le yóokʼol kaaboʼ, le oʼolaleʼ le yóokʼol kaaboʼ ku pʼektikeʼex.
20 Maʼ u tuʼubulteʼex le baʼax tsʼoʼok in waʼalikteʼexaʼ: Le palitsiloʼ maʼ maas nojoch tiʼ u tsʼuuliliʼ. Wa teen tsʼoʼok in chʼaʼpachtaʼal tumen le máakoʼoboʼ, teʼexeʼ yaan xan a chʼaʼpachtaʼaleʼex; wa letiʼob tsʼoʼok u beetkoʼob baʼax kin waʼalikeʼ, yaan xan u beetkoʼob baʼax ka waʼalikeʼex.
21 Baʼaleʼ tuláakal le baʼaloʼobaʼ yaan u beetkoʼob ta contraʼex tu yoʼolal in kʼaabaʼ, tumen letiʼobeʼ maʼ u kʼaj óoloʼob le máax túuxtenoʼ.
22 Wa maʼ in taal yéetel maʼ in tʼankoʼob kaʼacheʼ bejlaʼa minaʼan u kʼebanoʼobeʼ, baʼaleʼ beoraaʼ maʼ tu páajtal u yaʼalikoʼob wa maʼ kʼeban le baʼax ku beetkoʼoboʼ.
23 Le máax u pʼekmeneʼ u pʼekmaj xan in Taata.
24 Wa maʼ in beetik kaʼach ichiloʼob le baʼaloʼob mix juntéen beetaʼak tumen uláakʼ máakoʼ, bejlaʼa minaʼan kaʼach u kʼebanoʼobeʼ; baʼaleʼ beoraaʼ tsʼoʼok u yilkoʼob yéetel tsʼoʼok u pʼektikenoʼob yéetel tsʼoʼok xan u pʼektikoʼob in Taata.
25 Baʼaleʼ lelaʼ úuch utiaʼal ka béeychajak le baʼax tsʼíibtaʼan tu Leyoʼoboʼ: ‹Tu pʼektenoʼob tu yoʼolal mix baʼal›.
26 Ken kʼuchuk le kiliʼich muukʼ kun áantkeʼexoʼ yaan u jaajkúuntik máaxeniʼ; lelaʼ letiʼe kiliʼich muukʼ ku kaʼansik u jaajiloʼ, yéetel letiʼe baʼax ken in túuxteʼex ku taal tiʼ le Taataoʼ.
27 Teʼex xaneʼ yaan a jaajkúuntikeʼex máaxen, tumen teʼexeʼ tiʼ yaneʼex tin wéetel desde le ka joʼopʼ in kaʼansajoʼ.
Notas
^ Lit.: «alma». Ilaʼak Tipʼ. 7A.
