Juan 16:1-33
16 »Tsʼoʼok in waʼalikteʼex le baʼaloʼobaʼ utiaʼal maʼ u beetaʼal a tʼóochpajleʼex.
2 Yaan a tojolchʼintaʼaleʼex teʼ sinagogaoʼ. Yaan tak u kʼuchul u kʼiinileʼ, tuláakal máax kun kíimskeʼexeʼ yaan u tuklik táan u beetik junpʼéel baʼax maʼalob tu táan Dios.
3 Baʼaleʼ letiʼobeʼ yaan u beetkoʼob le baʼaloʼobaʼ tumen mix le Taata kʼuchuk u kʼaj óoltoʼoboʼ mix teen kʼuchuk u kʼaj óoltenoʼob.
4 Chéen baʼaleʼ tsʼoʼok in waʼalikteʼex le baʼaloʼobaʼ, utiaʼal beyoʼ ken kʼuchuk u kʼiinil u yúuchloʼobeʼ, ka kʼaʼajakteʼex in waʼalmajteʼex yaan u yúuchloʼob.
»Baʼaleʼ le baʼaloʼobaʼ maʼ tin waʼalajteʼex tu káajbaliʼ tumen tiʼ yanen kaʼach ta wéeteleʼexeʼ.
5 Beoraaʼ teneʼ táan in bin tu yiknal le máax túuxtenoʼ, baʼaleʼ mix juntúul tiʼ teʼex ku kʼáatikten: ‹¿Tuʼux ka bin?›.
6 Baʼaleʼ tumen tsʼoʼok in waʼalikteʼex le baʼaloʼobaʼ tsʼoʼok u chuʼupul a puksiʼikʼaleʼex yéetel yaayaj óolal.
7 Baʼaleʼ kin waʼalikteʼex u jaajil: Teneʼ táan in bin utiaʼal a wutsileʼex. Tumen wa maʼ in bineʼ, le kiliʼich muukʼ kun áantkeʼexoʼ junpuliʼ maʼ kun taal ta wiknaleʼex; baʼaleʼ wa kin bineʼ yaan in túuxtikteʼex.
8 Le ken kʼuchkeʼ yaan u yeʼesik tiʼ tuláakal máak baʼax jach tu jaajil le kʼebanoʼ, le justiciaoʼ yéetel le juicio ken u taas Diosoʼ:
9 yáaxeʼ tu yoʼolal le kʼebanoʼ, tumen letiʼobeʼ maʼ táan u tsʼáaik u fejoʼob tiʼ teniʼ;
10 tsʼoʼoleʼ tu yoʼolal le justiciaoʼ, tumen táan in bin tu yiknal le Taataoʼ yéetel teʼexeʼ maʼ ken a kaʼa ileneʼex;
11 bey xan tu yoʼolal le juicio ken u taas Diosoʼ, tumen u gobernanteil le yóokʼol kaabaʼ tsʼoʼok u juzgartaʼal.
12 »Yaʼab baʼaloʼob ku bineltik in waʼalikteʼex, baʼaleʼ maʼ tu páajtal a naʼatkeʼex beoraaʼ.
13 Baʼaleʼ ken taalak le kiliʼich muukʼ ku tsʼáaik kʼaj óoltbil u jaajiloʼ, yaan u yáantkeʼex a kʼaj óolteʼex tuláakal u jaajil, tumen maʼ chéen tu juunal u yóol kun tʼaaniʼ, baʼaxeʼ yaan u yaʼalikteʼex le baʼaxoʼob ku yuʼubikoʼ, yéetel yaan u tsʼáaik a wojéelteʼex le baʼaxoʼob ku taal u kʼiiniloʼ.
14 Letiʼeʼ yaan u nojbeʼenkúuntken, tumen teen ken in tsʼáatiʼ baʼax ken u kaʼansteʼex, letiʼ túuneʼ yaan u tsolikteʼex.
15 Tuláakal le baʼaxoʼob u yojel in Taataoʼ, tsʼoʼok u yaʼalikten. Le oʼolal tin waʼalajteʼexeʼ, tuláakal le baʼaxoʼob ken u tsolteʼex le kiliʼich muukʼ ku kaʼansik u jaajiloʼ, teen ken in waʼaltiʼ.
16 Ichil junpʼíit kʼiineʼ maʼ ken a wileneʼex, baʼaleʼ maʼ kun xáantaleʼ yaan a kaʼa ilkeneʼex».
17 Le oʼolaleʼ, yaan tiʼ u disipuloʼobeʼ tu yaʼaloʼob tu baatsiloʼob: «¿Baʼax u kʼáat u yaʼal le baʼax ku yaʼaliktoʼonaʼ: ‹Ichil junpʼíit kʼiineʼ maʼ ken a wileneʼex, baʼaleʼ maʼ kun xáantaleʼ yaan a kaʼa ilkeneʼex›, yéetel ‹tumen táan in bin tu yiknal le Taataoʼ›?».
18 Le beetik tu yaʼaloʼob: «¿Baʼax u kʼáat u yaʼal le ‹junpʼíit kʼiin› ku yaʼalikoʼ? Maʼ k-ojel tiʼ baʼax ku tʼaaniʼ».
19 Jesuseʼ tumen tu naʼataj taak u kʼáatkoʼobtiʼeʼ tu yaʼalajtiʼob: «¿Táan wa a kʼáatkeʼex ta baatsileʼex baʼax u kʼáat u yaʼal le baʼax tin waʼalajteʼexaʼ: Ichil junpʼíit kʼiineʼ maʼ ken a wileneʼex, baʼaleʼ maʼ kun xáantaleʼ yaan a kaʼa ilkeneʼex?
20 Jach tu jaajil kin waʼalikteʼex: Teʼexeʼ yaan a wokʼoleʼex yéetel yaan a wáakameʼex, baʼaleʼ le yóokʼol kaaboʼ yaan u kiʼimaktal u yóol; teʼexeʼ yaan u yaatal a wóoleʼex, baʼaleʼ a yaj óolaleʼexeʼ yaan u suʼutul kiʼimak óolalil.
21 Juntúul koʼoleleʼ, le ken kʼuchuk u kʼiinil u síijil u chaambaleʼ, ku sen muʼyaj; baʼaleʼ ken tsʼoʼokok u síijsikeʼ, ku tuʼubultiʼ le bukaʼaj muʼyajnajikoʼ, tumen kiʼimak u yóol tsʼoʼok u síijil juntúul chan xiʼipal way yóokʼol kaabeʼ.
22 Teʼex xaneʼ, yaachajaʼan a wóoleʼex beoraaʼ; baʼaleʼ yaan in kaʼa ilkeʼex yéetel yaan u kiʼimaktal u yóol a puksiʼikʼaleʼex; le kiʼimak óolalaʼ mix máak kun luʼsikteʼex.
23 Teʼ kʼiin jeʼeloʼ mix junpʼéel kʼáatchiʼ ken a beeteʼexten. Jach tu jaajil kin waʼalikteʼex: Wa ka kʼáatkeʼex wa baʼax tiʼ le Taataoʼ letiʼeʼ yaan u tsʼáaikteʼex tin kʼaabaʼ.
24 Tak beoraaʼ teʼexeʼ mix baʼal a kʼáateʼex tin kʼaabaʼ. Kʼáateʼex utiaʼal ka tsʼaʼabakteʼex, beyoʼ yaan u chúukpajal a kiʼimak óolaleʼex.
25 »Tuláakal le baʼaloʼobaʼ, tsʼoʼok in kaʼansikteʼex yéetel kettʼaanoʼob. Baʼaleʼ táan u taal u kʼiinil tuʼux maʼ ken in kaʼanseʼex yéetel kettʼaanoʼob, baʼaxeʼ tʼáalkab ken in kaʼansilteʼex baʼaloʼob yaan yil yéetel le Taataoʼ.
26 Teʼ kʼiin jeʼeloʼ teʼexeʼ yaan baʼax ken a kʼáateʼex tiʼ le Taata tin kʼaabaʼoʼ, yéetel maʼ kun kʼaʼabéettal in tʼaan ta woʼolaleʼex tu táan le Taataoʼ.
27 Tumen le Taataoʼ u yaabiltmeʼex úuchik a yaabiltikeneʼex yéetel úuchik a creertikeʼex taalen tʼaan tu kʼaabaʼ le Taataoʼ.
28 Lukʼen tu yiknal le Taataoʼ ka taalen way yóokʼol kaabeʼ. Baʼaleʼ beoraaʼ táan in pʼatik le yóokʼol kaaboʼ yéetel táan in chʼaʼjoʼoltik in bin tu yiknal le Taataoʼ».
29 U disipuloʼobeʼ tu yaʼaloʼob: «¡Ta wilik!, beoraaʼ tʼáalkab a tsolik, maʼ táan u meyajtech kettʼaanoʼobiʼ.
30 Beoraaʼ tsʼoʼok k-ilik a wojel tuláakal le baʼaloʼoboʼ, yéetel maʼ kʼaʼabéet u kʼáataʼaltech mix baʼaliʼ, le oʼolal k-creertik tiʼ Dios a taal».
31 Jesuseʼ tu yaʼalajtiʼob: «¿Ka creertikeʼex beoraaʼ?
32 ¡Ileʼex! Yaan u taal u kʼiinil, u jaajileʼ tsʼoʼok u kʼuchul, tuʼux yaan a kʼiʼitbesaʼaleʼex yéetel yaan a suuteʼex ta wotocheʼex, yéetel yaan a pʼatkeneʼex tin juunal; baʼaleʼ maʼ tin juunal yaneniʼ, tumen le Taataoʼ tiʼ yaan tin wéeteleʼ.
33 Teneʼ tsʼoʼok in waʼalikteʼex le baʼaloʼobaʼ utiaʼal ka yanakteʼex jeetsʼelil tin woʼolal. Teʼ yóokʼol kaabaʼ teʼexeʼ táan a muʼyajeʼex, baʼaleʼ ¡líikʼik a wóoleʼex!, teneʼ tsʼoʼok in tsʼáanchaʼatik yóokʼol kaab».
