Juan 17:1-26
17 Jesuseʼ ka tsʼoʼok u yaʼalik le baʼaloʼobaʼ, tu líiʼsaj u yich kaʼaneʼ ka tu yaʼalaj: «In Yuum, tsʼoʼok u kʼuchul u yorail; nojbeʼenkúunt a Paal utiaʼal xan ka u nojbeʼenkúuntech,
2 tumen jeʼex tsʼoʼok a tsʼáaik páajtalil tiʼ tu yóokʼol tuláakal máakeʼ, bey xan ka páajchajak u tsʼáaik kuxtal minaʼan u xuul tiʼ tuláakal le máaxoʼob ta kʼubajtiʼoʼ.
3 Lelaʼ letiʼe baʼax ku tsʼáaik kuxtal minaʼan u xuuloʼ: ka kʼuchuk u kʼaj óoltechoʼob, teech le u juntúuliliʼ jaajil Diosoʼ, bey xan ka u kʼaj óoltoʼob Jesucristo, le máax ta túuxtoʼ.
4 Teneʼ tsʼoʼok in nojbeʼenkúuntkech way Luʼumeʼ yéetel tsʼoʼok in beetik le meyaj ta kʼubéentajtenoʼ.
5 Beora túunaʼ, in Yuum, nojbeʼenkúunten ta tséel yéetel le nojbeʼenil yaanten kaʼach ta tséel táanil tiʼ u yantal yóokʼol kaaboʼ.
6 »Teneʼ tsʼoʼok in tsʼáaik kʼaj óoltbil a kʼaabaʼ tiʼ le máaxoʼob ta tsʼáajten way yóokʼol kaaboʼ. A tiaʼaloʼob kaʼachi, baʼaleʼ ta tsʼáajoʼobten, letiʼob xaneʼ tsʼoʼok u beetkoʼob le baʼax ka waʼalikoʼ.
7 Beoraaʼ tsʼoʼok u kʼuchul u yojéeltoʼobeʼ tuláakal le baʼaxoʼob ta tsʼáajtenoʼ tiʼ teech u taal;
8 tumen le baʼaxoʼob ta waʼalajtenoʼ teneʼ tsʼoʼok in waʼaliktiʼob, letiʼobeʼ tsʼoʼok u kʼamkoʼob yéetel tsʼoʼok u kʼuchul u yojéeltoʼobeʼ jach tu jaajil teen taaljaʼanen tʼaan ta kʼaabaʼ, yéetel tsʼoʼok u creertikoʼob teech túuxten.
9 Kin kʼáat óolal tu yoʼolaloʼob; maʼ táan in kʼáat óolal yoʼolal le yóokʼol kaaboʼ, baʼaxeʼ yoʼolal le máaxoʼob ta tsʼáajtenoʼ; tumen a tiaʼaloʼob,
10 tuláakal xan le baʼaloʼob yaantenoʼ a tiaʼaloʼob, yéetel tuláakal le baʼaloʼob yaantechoʼ in tiaʼaloʼob. Yéetel teneʼ tsʼoʼok in nojbeʼenkúuntaʼal ichiloʼob.
11 »Tsʼoʼoleʼ teneʼ minaʼanen way yóokʼol kaabeʼ, baʼaleʼ letiʼobeʼ way yanoʼob teʼ yóokʼol kaabaʼ, yéetel teneʼ táan in bin ta wiknal. In Kiliʼich Yuum, kanáantoʼob yoʼolal a kʼaabaʼ ta tsʼáajtenoʼ* utiaʼal ka pʼáatkoʼob juntúuliliʼob jeʼex toʼon juntúuliliʼoneʼ.
12 Le tiaʼanen kaʼach tu yéeteloʼoboʼ tin kanáantoʼob yoʼolal le a kʼaabaʼ ta tsʼáajtenoʼ; yéetel tsʼoʼok in kanáantkoʼob utiaʼal maʼ u xuʼulsaʼal tiʼ mix juntúuliʼ, baʼaleʼ chéen u paal le xuʼulsajiloʼ, utiaʼal ka béeychajak le baʼax ku yaʼalik le Kiliʼich Tsʼíiboʼ.
13 Baʼaleʼ beoraaʼ táan in taal ta wiknal, yéetel táan in waʼalik le baʼaloʼob teʼ yóokʼol kaabaʼ utiaʼal ka jach kiʼimakchajak u yóoloʼob jeʼel bix teneʼ.
14 Teneʼ tsʼoʼok in kaʼansiktiʼob le baʼax ka waʼalikoʼ, baʼaleʼ tsʼoʼok u pʼektaʼaloʼob tumen le yóokʼol kaaboʼ, tumen letiʼobeʼ maʼ yóokʼol kaabiloʼobiʼ jeʼex teen maʼ yóokʼol kaabileneʼ.
15 »Teneʼ kin kʼáatiktech, maʼ ka a jóoʼsoʼob tiʼ le yóokʼol kaaboʼ, baʼaxeʼ ka a kanáantoʼob tiʼ le j-Kʼasaʼanoʼ.*
16 Letiʼobeʼ maʼ yóokʼol kaabiloʼobiʼ jeʼex teen maʼ yóokʼol kaabileneʼ.
17 Kiliʼichkúuntoʼob* yoʼolal le jaajoʼ, a tʼaaneʼ letiʼ u jaajil.
18 Jeʼex teech ta túuxten way yóokʼol kaabeʼ, teen xaneʼ tsʼoʼok in túuxtikoʼob teʼ yóokʼol kaaboʼ.
19 Teneʼ kin kiliʼichkúuntkinba utiaʼal ka xiʼik utsil tiʼob yéetel utiaʼal ka kiliʼichkúuntaʼakoʼob yoʼolal le jaajoʼ.
20 »Teneʼ kin kʼáat óolal tiʼ teech, maʼ chéen yoʼolal le jeʼeloʼobaʼ, baʼaxeʼ tak tu yoʼolal le máaxoʼob ken u tsʼáa u fejoʼob tiʼ teen yoʼolal le baʼax kun kaʼansbiltiʼoboʼ;
21 beyoʼ tuláakloʼobeʼ yaan u pʼáatloʼob juntúuliliʼob, jeʼex techeʼ, in Yuum, junmúuchʼ yanilech tin wéetel yéetel teneʼ junmúuchʼ yanilen ta wéetel; jeʼex toʼoneʼ, letiʼob xaneʼ ka pʼáatkoʼob junmúuchʼ yaniloʼob t-éetel, beyoʼ le yóokʼol kaaboʼ yaan u creertik teech túuxten.
22 Tsʼoʼoleʼ tin nojbeʼenkúuntoʼob jeʼex úuchik a nojbeʼenkúuntkeneʼ, utiaʼal ka juntúuliliʼchajkoʼob jeʼex toʼon juntúuliliʼoneʼ.
23 Teneʼ junmúuchʼ yanilen tu yéeteloʼob, yéetel techeʼ junmúuchʼ yanilech tin wéetel, utiaʼal ka jach juntúuliliʼchajkoʼob; beyoʼ le yóokʼol kaaboʼ yaan u yojéeltik teech túuxten yéetel ta yaabiltoʼob jeʼex úuchik a yaabiltikeneʼ.
24 In Yuum, le máaxoʼob ta tsʼáajtenoʼ in kʼáat ka yanakoʼob xan tin wéetel teʼ tuʼux kin antaloʼ, utiaʼal ka u yiloʼob le nojbeʼenil tsʼoʼok a tsʼáaiktenoʼ, tumen ta yaabilten táanil tiʼ u síijil wíinik* way yóokʼol kaabeʼ.
25 In Yuum, techeʼ toj tuláakal baʼax ka beetik. U jaajileʼ le yóokʼol kaaboʼ maʼ kʼuchuk u kʼaj óoltechiʼ, baʼaleʼ teneʼ tsʼoʼok in kʼaj óoltikech, yéetel le jeʼeloʼobaʼ u yojloʼob teech túuxten.
26 Teneʼ tsʼoʼok in tsʼáaik u kʼaj óoltoʼob a kʼaabaʼ, yéetel yaan u seguer in tsʼáaik kʼaj óoltbil, utiaʼal ka u yeʼesoʼob yaabilaj jeʼex le yaabilaj ta weʼesajtenoʼ bey xan utiaʼal ka yanaken junmúuchʼ tu yéeteloʼob».
Notas
^ U kʼaabaʼ Jesuseʼ u kʼáat u yaʼal: «Jéeobaeʼ ku tsʼáaik salvación».
^ Wa: «Kʼaasilbaʼal».
^ Wa: «junpáaykuntoʼob a tiaʼal».
^ Teʼelaʼ táan u yúuchul tʼaan tiʼ u paalal Adán yéetel Eva.
