Juan 18:1-40
18 Ka tsʼoʼok u yaʼalik Jesús le baʼaloʼobaʼ, jóokʼ yéetel u disipuloʼobeʼ ka binoʼob tuláakʼ u tséel u táax luʼumil Cedrón,* tuʼux yaan kaʼach junpʼéel parcela; letiʼ yéetel u disipuloʼob túuneʼ ookoʼobiʼ.
2 Baʼaleʼ Judas, le máax kun traicionartik kaʼachoʼ, u kʼaj óol xan le kúuchiloʼ, tumen teʼeloʼ jach suuk kaʼach u muchʼkuba Jesús yéetel u disipuloʼobiʼ.
3 Judas túuneʼ jóokʼ yéetel u jiliʼ soldadoʼob bey xan yéetel le j-kananoʼob* túuxtaʼanoʼob tumen u nuuktakil le sacerdoteʼob yéetel le fariseoʼoboʼ; letiʼob túuneʼ ka kʼuchoʼob teʼeloʼ u chʼaʼamoʼob tajcheʼob tʼabaʼantak, lamparaʼob yéetel u nuʼukulil u baʼateloʼob.
4 Jesús túuneʼ, tumen u yojel tuláakal le baʼaxoʼob kun úuchultiʼoʼ, jóokʼ tu táanoʼobeʼ ka tu kʼáatajtiʼob: «¿Máax ka kaxtikeʼex?».
5 Letiʼobeʼ tu núukoʼobtiʼ: «Táan k-kaxtik Jesús le Nazaretiloʼ». Letiʼeʼ tu yaʼalajtiʼob: «Teen le máax ka kaxtikeʼexoʼ». Judas, le máax kun traicionartikoʼ, tiʼ yaan xan kaʼach tu yéeteloʼobeʼ.
6 Baʼaleʼ le ka aʼalaʼabtiʼob tumen Jesús: «Teen le máax ka kaxtikeʼexoʼ», letiʼobeʼ suunajoʼob kukulpaachileʼ ka lúuboʼob luʼum.
7 Le oʼolaleʼ tu kaʼa kʼáatajtiʼob: «¿Máax ka kaxtikeʼex?». Letiʼobeʼ tu yaʼaloʼob: «Táan k-kaxtik Jesús le Nazaretiloʼ».
8 Jesuseʼ tu yaʼalaj: «Teen, tsʼoʼok in waʼalikteʼex. Le oʼolaleʼ wa teen ka kaxtikeneʼexeʼ, chaʼex u bin leloʼobaʼ»;
9 lelaʼ tu yaʼalaj utiaʼal ka béeychajak le baʼax u yaʼalmaʼ: «Tiʼ le máaxoʼob ta tsʼáajtenoʼ mix juntúul tiʼ letiʼob in satiʼ».
10 Pedro túun, máax yaan kaʼach junpʼéel espada tiʼeʼ, tu jíilpayteʼ ka tu loobiltaj u palitsil le u maas nojchil le sacerdoteʼoboʼ, tu kúulchʼaktaj u x-noʼoj xikin. U kʼaabaʼ le palitsilaʼ Malco.
11 Baʼaleʼ Jesuseʼ tu yaʼalaj tiʼ Pedro: «Oks le espada tu piixoʼ. Le copa tu tsʼáajten le Taataoʼ, ¿maʼ wa unaj in wukʼikiʼ?».
12 Le soldadoʼob túun yéetel le comandanteoʼ* bey xan le j-kananoʼob túuxtaʼanoʼob tumen le judíoʼoboʼ, tu machoʼob Jesuseʼ ka tu kʼaxoʼob;
13 ka túun tu bisoʼob, yáaxeʼ tu yiknal Anás, tumen letiʼeʼ u suegro Caifás, yéetel Caifás kaʼach u maas nojchil le sacerdoteʼob teʼ jaʼab jeʼeloʼ.
14 Tsʼoʼoleʼ Caifás aʼal tiʼ le judíoʼob maas maʼalob utiaʼaloʼob ka kíimik juntúul máak utiaʼal u yutsil le kaajoʼ.
15 Simón Pedro túuneʼ —bey xan uláakʼ juntúul disipuloeʼ— táan kaʼach u bin tu paach Jesús. Le uláakʼ juntúul disipulooʼ kʼaj óolaʼan kaʼach tumen u maas nojchil le sacerdoteʼoboʼ, le oʼolal ook junmúuchʼ yéetel Jesús tu táankabil u yotoch u maas nojchil le sacerdoteʼoboʼ.
16 Baʼaleʼ Pedroeʼ pʼáat waʼatal teʼ jooloʼ. Le oʼolaleʼ le uláakʼ juntúul disipulooʼ, le máax kʼaj óolaʼan tumen u maas nojchil le sacerdoteʼoboʼ, jóokʼeʼ ka tʼaanaj yéetel le koʼolel kanáantik le jooloʼ, ka túun tu yoksaj Pedro.
17 Le koʼolel ku meyaj teʼeloʼ, le máax kanáantik le jooloʼ, tu yaʼalaj tiʼ Pedro: «¿Máasaʼ techeʼ u disipuloech xan le máakaʼ?». Letiʼeʼ tu núukaj: «Maʼ, maʼ u disipuloeniʼ».
18 Le palitsiloʼob túun yéetel le j-kananoʼob waʼalakbaloʼob teʼeloʼ, tu tʼaboʼob chúuk utiaʼal u kʼíichoʼob tumen jach keʼel. Pedro xaneʼ tiʼ waʼalakbal tu yéeteloʼobeʼ, yéetel táan kaʼach u kʼíich.
19 Le táan u yúuchul le baʼaloʼobaʼ, u nojchil le sacerdoteʼoboʼ tu kʼáataj u yuʼub tiʼ Jesús baʼaloʼob yaan yil yéetel u disipuloʼob bey xan yéetel le baʼax ku kaʼansikoʼ.
20 Jesuseʼ tu yaʼalajtiʼ: «Teneʼ tʼaanajen tu táan tuláakal máak. Mantatsʼ kaʼansajnajen tiʼ junpʼéel sinagoga bey xan teʼ templo tuʼux ku muchʼkuba tuláakal le judíoʼoboʼ; mix baʼal tin waʼalaj taʼakumbail.
21 ¿Baʼaxten tiʼ teen ka kʼáatik? Kʼáat tiʼ le máaxoʼob uʼuy le baʼaxoʼob tin tsikbaltoʼ. ¡Ile! Letiʼobeʼ u yojloʼob le baʼax tin waʼaloʼ».
22 Ka tsʼoʼok u yaʼalik le baʼaloʼobaʼ, juntúul tiʼ le j-kananoʼob waʼalakbal naatsʼoʼ, tu xíiklajtaj Jesuseʼ ka tu yaʼalaj: «¿Bey a núukik le baʼax ku kʼáatiktech u nojchil le sacerdoteʼoboʼ?».
23 Jesuseʼ tu núukajtiʼ: «Wa kʼaas baʼax tin waʼaleʼ, eʼes baʼaxten kʼaas. Baʼaleʼ wa maʼalobeʼ, ¿baʼaxten túun ka lajken?».
24 Anás túuneʼ tu túuxtaj Jesús kʼaxaʼan tu yiknal Caifás, u maas nojchil le sacerdoteʼoboʼ.
25 Simón Pedroeʼ tiʼ waʼalakbal xaniʼ, táan kaʼach u kʼíich. Ka túun aʼalaʼabtiʼ: «¿Máasaʼ techeʼ u disipuloech xan le máakaʼ?». Letiʼeʼ tu yaʼalaj: «Maʼ, maʼ u disipuloeniʼ».
26 Juntúul tiʼ u palitsiloʼob u maas nojchil le sacerdoteʼoboʼ, tumen u láakʼtsil le máax kúulchʼaktaʼab u xikin tumen Pedrooʼ, tu yaʼalaj: «¿Máasaʼ teech le tin wilech teʼ parcela yéetel le máakoʼ?».
27 Baʼaleʼ Pedroeʼ tu kaʼa aʼalaj maʼ jaajiʼ. Teʼ súutuk jeʼeloʼ, kʼaaynaj juntúul tʼeel.
28 Ka túun tu jóoʼsoʼob Jesús tu yotoch Caifaseʼ ka tu bisoʼob tu palacio le gobernadoroʼ. Teʼ súutuk jeʼeloʼ jach táant u sáastaleʼ. Baʼaleʼ letiʼobeʼ maʼ ookoʼob tu palacio le gobernadoroʼ utiaʼal maʼ u yéekʼtaloʼob, utiaʼal beyoʼ ka páajchajak u jaantkoʼob le Pascuaoʼ.
29 Le oʼolaleʼ, jóokʼ Pilato teʼ tuʼux yanoʼoboʼ ka tu kʼáatajtiʼob: «¿Baʼax takpoolil yaanteʼex tu contra le máakaʼ?».
30 Letiʼob túuneʼ tu núukoʼobtiʼ: «Wa maʼ kʼasaʼan máakeʼ bejlaʼa maʼatan k-kʼubik kaʼach ta kʼabeʼ».
31 Pilato túuneʼ tu yaʼalajtiʼob: «Biseʼex teʼex utiaʼal ka a juzgarteʼex jeʼex u yaʼalik le ley yaanteʼexoʼ». Ka aʼalaʼabtiʼ tumen le judíoʼoboʼ: «Toʼoneʼ maʼ tu chaʼabaltoʼon k-kíimsik mix máak».
32 Lelaʼ úuch utiaʼal ka béeychajak le baʼax u yaʼalmaj Jesús utiaʼal u yeʼesik baʼax claseil kíimil taʼaytak u yantaltiʼoʼ.
33 Pilato túuneʼ ook tu kaʼatéen teʼ palaciooʼ, tu tʼanaj Jesuseʼ, ka tu kʼáatajtiʼ: «¿Teech wa u Rey le judíoʼoboʼ?».
34 Jesuseʼ tu núukajtiʼ: «¿Tu juunal wa a wóol ka kʼáatikten lelaʼ, wa uláakʼ máakoʼob aʼaltech le jeʼel tin woʼolalaʼ?».
35 Pilatoeʼ tu núukaj: «¿Judíoen wa? A wéet kaajaloʼob yéetel u nuuktakil le sacerdoteʼob kʼubech tin kʼaboʼ. ¿Baʼax ta beetaj?».
36 Jesuseʼ tu núukaj: «In reinoeʼ maʼ yóokʼol kaabiliʼ. Wa yóokʼol kaabil in reinoeʼ, le máaxoʼob meyajtikenoʼ tsʼoʼok kaʼach u baʼateloʼob utiaʼal maʼ in kʼuʼubul tu kʼab le judíoʼoboʼ. Baʼaleʼ jeʼex tsʼoʼok in waʼalikoʼ, in reinoeʼ maʼ tiʼ le yóokʼol kaab u taalaʼ».
37 Ka túun aʼalaʼabtiʼ tumen Pilato: «Jeʼeloʼ ¿reyech wa túun?». Jesuseʼ tu núukajtiʼ: «Tak teech aʼalik reyen. Teneʼ yoʼolal le jeʼel síijenaʼ yéetel yoʼolal le jeʼel taalen way yóokʼol kaabaʼ: utiaʼal in tʼaan tu yoʼolal le jaajoʼ. Tuláakal máax uts tu tʼaan u yuʼubik le jaajoʼ ku yuʼubik in tʼaan».
38 Pilatoeʼ tu yaʼalajtiʼ: «¿Baʼax le jaajoʼ?».
Ka tsʼoʼok u yaʼalik lelaʼ, jóokʼ tu kaʼatéen teʼ tuʼux yaan le judíoʼoboʼ ka tu yaʼalajtiʼob: «Teneʼ maʼ tin wilik wa yaan baʼax kʼaas u beetmaj le máakaʼ.
39 Tsʼoʼoleʼ jeʼex suukileʼ, yaan máax kin jáalkʼabtikteʼex tu kʼiinil le Pascuaoʼ. ¿A kʼáateʼex wa ka in jáalkʼabt tiʼ teʼex u Rey le judíoʼoboʼ?».
40 Ka túun awatnajoʼob tu kaʼatéen táan u yaʼalikoʼob: «¡Maʼ, maʼ letiʼ k-kʼáatiʼ, baʼaxeʼ Barrabás!». Baʼaleʼ Barrabás kaʼacheʼ juntúul j-ookol.
Notas
^ Lelaʼ junpʼéel tuʼux ku yáalkab jaʼ kaʼach tu kʼiinil keʼelil.
^ Lelaʼ letiʼe máakoʼob ku pʼáatloʼob kaʼach kanan tu temploil Jerusalenoʼ.
^ Gr.: kilíarkos, juntúul máak tsʼaʼan u nuʼukt 1,000 soldadoʼob.
