Juan 19:1-42
19 Teʼ súutuk túunoʼ Pilatoeʼ tu yaʼalaj ka jaʼajatsʼaʼak Jesús.
2 Le soldadoʼob túunoʼ tu jitʼoʼob junpʼéel corona yéetel kʼiʼixeʼ ka tu tsʼáajoʼob tu pool, tsʼoʼoleʼ ka tu tsʼáajoʼob u búukint junpʼéel morado nookʼ;
3 ka joʼopʼ u náatsʼloʼob tu yiknal táan u yaʼalikoʼobtiʼ: «¿Bix sáaschajik tiʼ u Rey le judíoʼoboʼ?». Tsʼoʼoleʼ tu xixiklajtoʼob.
4 Pilato túuneʼ jóokʼ tu kaʼatéeneʼ ka tu yaʼalaj tiʼ le judíoʼoboʼ: «¡Ileʼex! Táan in jóoʼsik ta wiknaleʼex utiaʼal ka a wojéelteʼexeʼ, teneʼ maʼ tin wilik wa yaan baʼax kʼaas u beetmaj».
5 Ka túun jóokʼ Jesuseʼ tsʼaʼan le corona de kʼiʼix tu pooloʼ yéetel u búukintmaj le morado nookʼoʼ. Ka túun aʼalaʼabtiʼob tumen Pilato: «¡Ileʼex! ¡Jeʼel le máakaʼ!».
6 Baʼaleʼ ka ilaʼab tumen u nuuktakil le sacerdoteʼob yéetel le j-kananoʼoboʼ, tu kʼaʼam aʼaloʼob: «¡Baʼajak tiʼ cheʼ! ¡Baʼajak tiʼ cheʼ!». Pilatoeʼ tu yaʼalajtiʼob: «Biseʼex teʼex ka a bajeʼex tiʼ cheʼ, tumen teneʼ minaʼan mix baʼal kʼaas kin wilik u beetmaj».
7 Le judíoʼoboʼ tu yaʼaloʼobtiʼ: «Tiʼ toʼoneʼ yaan junpʼéel ley ku yaʼalik unaj u kíimil, tumen letiʼeʼ tu yaʼaluba u paal Dios».
8 Ka tu yuʼubaj Pilato le baʼax ku yaʼalikoʼobaʼ, maas jach sajakchaji;
9 ka ook tu kaʼatéen teʼ palaciooʼ ka tu yaʼalaj tiʼ Jesús: «Techeʼ ¿tuʼux a taal?». Baʼaleʼ Jesuseʼ maʼ tu núukajtiʼiʼ.
10 Pilato túuneʼ tu yaʼalajtiʼ: «¿Maʼ ta núukik in tʼaan? ¿Maʼ wa a wojel yaanten autoridad utiaʼal in jáalkʼabtikech bey xan utiaʼal in bajkech tiʼ cheʼiʼ?».
11 Jesuseʼ tu núukajtiʼ: «Wa maʼ u tsʼaʼabaltech autoridad tumen Dioseʼ bejlaʼa maʼ tu páajtal kaʼach a beetik mix baʼal tin contraeʼ. Le oʼolaleʼ le máax kʼuben ta kʼaboʼ maas nojoch u kʼeban».
12 Yoʼolal lelaʼ Pilatoeʼ seguernaj u kaxtik bix jeʼel u jáalkʼabtikeʼ. Baʼaleʼ le judíoʼoboʼ tu kʼaʼam aʼaloʼob: «Wa ka jáalkʼabtik le máakaʼ maʼ u amigoech Cesariʼ. Tuláakal máax ku yaʼalikuba reyeʼ ku tʼaan tu contra César».
13 Le oʼolal Pilatoeʼ, ka tsʼoʼok u yuʼubik le baʼax tu yaʼaloʼob yéetel ka tsʼoʼok u jóoʼsik Jesuseʼ, kulaj teʼ tuʼux ku kutal le juezoʼ, tiʼ junpʼéel kúuchil ku kʼaabaʼtik Takʼbil Tuunich,* baʼaleʼ ich hebreoeʼ Gábata.
14 Lelaʼ úuch tu kʼiinil u líiʼskuba máak utiaʼal le Pascuaoʼ, bey teʼ hora seisoʼ.* Ka tu yaʼalaj tiʼ le judíoʼoboʼ: «¡Ileʼex! ¡A reyeʼex!».
15 Baʼaleʼ letiʼobeʼ tu kʼaʼam aʼaloʼob: «¡Kíimse! ¡Kíimse! ¡Baj tiʼ cheʼ!». Pilatoeʼ tu yaʼalajtiʼob: «¿A kʼáateʼex ka in baj a reyeʼex tiʼ junpʼéel cheʼ?». Le u nuuktakil le sacerdoteʼoboʼ tu núukoʼob: «Chéen juntúul rey yaantoʼon, chéen César».
16 Le oʼolaleʼ teʼ súutuk jeʼeloʼ Pilatoeʼ tu kʼubajtiʼob utiaʼal ka baʼajak tiʼ cheʼ.
Ka túun pʼaʼat Jesús tu kʼaboʼob.
17 Ka túun tu kuchaj Jesús u cheʼil u muʼyajeʼ* ka joʼopʼ u bin teʼ tuʼux ku kʼaabaʼtik u Kúuchil Baakel Pooloʼ, ich hebreoeʼ Gólgota;
18 teʼ túunoʼ tiʼ baʼaj teʼ cheʼoʼ. Tu yiknaleʼ chʼuykíintaʼab xan tiʼ cheʼ kaʼatúul máakoʼob, juntúuleʼ tiʼ junpʼéel tséel yéetel uláakʼ juntúuleʼ tiʼ uláakʼ tséel, baʼaleʼ Jesuseʼ pʼáat chúumuk tiʼ letiʼob.
19 Pilatoeʼ tu beetaj xan junpʼéel letreroeʼ ka tu tsʼáaj tu kaʼanlil u cheʼil le muʼyajoʼ. Teʼelaʼ tsʼíibtaʼan kaʼach: «Jesús Nazaretil u Rey le judíoʼoboʼ».
20 Yaʼab túun tiʼ le judíoʼoboʼ tu xokoʼob le letreroaʼ tumen le tuʼux baʼaj Jesús tiʼ cheʼoʼ naatsʼ yanil kaʼach tiʼ Jerusalén; tsʼoʼoleʼ lelaʼ tsʼíibtaʼan kaʼach ich hebreo, ich latín bey xan ich griego.
21 Baʼaleʼ u nuuktakil u sacerdoteʼob le judíoʼoboʼ káaj u yaʼalikoʼob tiʼ Pilato: «Maʼ a tsʼíibtik: ‹U Rey le judíoʼoboʼ›, baʼaxeʼ tsʼíibt: ‹Le máax tu yaʼalaj: «Teen u Rey le judíoʼoboʼ»›».
22 Pilatoeʼ tu yaʼalaj: «Le baʼax tin tsʼíibtoʼ tsʼoʼok in tsʼíibtik».
23 Le soldadoʼob túunoʼ ka tsʼoʼok u bajkoʼob Jesús teʼ cheʼoʼ tu chʼaʼajoʼob u nookʼeʼ ka tu jóoʼsoʼob kanjaats tiʼ, cada jaatseʼ utiaʼal juntúul soldado; tsʼoʼoleʼ tu chʼaʼajoʼob xan le u yáalal u nookʼoʼ. Baʼaleʼ lelaʼ minaʼan kaʼach u chuuyil tumen túulis beetaʼanil, desde tu kaʼanlil tak tu kabalil.
24 Ka túun tu yaʼaloʼob tu baatsiloʼob: «Maʼ k-jatikeʼex, baʼaxeʼ koʼoneʼex buul utiaʼal k-ilik tiʼ máax kun pʼáatal». Lelaʼ úuch utiaʼal ka béeychajak le baʼax ku yaʼalik le Kiliʼich Tsʼíibaʼ: «Tu tʼoxoʼob in nookʼ ichiloʼob, yéetel buulnajoʼob utiaʼal ka u yiloʼob tiʼ máax kun pʼáatal u yáalal in nookʼ». Le baʼaloʼobaʼ jach bey beetaʼabik tumen le soldadoʼoboʼ.
25 Tu yiknal u cheʼil u muʼyaj Jesuseʼ, tiʼ waʼalakbal u maamaiʼ, u yíitsʼin u maama, María u yatan Clopas bey xan María Magdalena.
26 Jesuseʼ ka túun tu yilaj u maama, bey xan le u disipulo jach u yaabiltmaj tiʼ waʼalakbal naatsʼoʼ, tu yaʼalaj tiʼ u maama: «Koʼolel, ¡ile! ¡Jeʼel a hijooʼ!».
27 Tsʼoʼoleʼ ka tu yaʼalaj tiʼ le disipulooʼ: «¡Ile! ¡Jeʼel a maamaoʼ!». Desde teʼ súutuk jeʼeloʼ le disipulooʼ tu kʼamaj María tu yotoch.
28 Ka tsʼoʼok lelaʼ, Jesuseʼ tu yilaj tsʼoʼok u béeykuntik tuláakal le baʼax aʼalaʼantiʼ ka u beetoʼ; utiaʼal xan ka béeychajak le baʼax u yaʼalmaj le Kiliʼich Tsʼíiboʼ tu yaʼalaj: «Ukʼajen».
29 Teʼ túunoʼ yaan junpʼéel nuʼukul chuup yéetel suʼutsʼ vinoiʼ. Juntúul máak waʼalakbal maʼ sen náacheʼ tu chʼaʼaj junpʼéel esponja póoʼchʼultaʼan yéetel vinoeʼ ka tu tsʼáaj tiʼ junpʼéel u sakʼabil hisopoeʼ ka tu natsʼaj tu chiʼ Jesús.
30 Ka tsʼoʼok u túuntik le suʼutsʼ vinooʼ, Jesuseʼ tu yaʼalaj: «¡Tsʼoʼok u béeychajal tuláakal!». Tu chinaj u pooleʼ, ka xuʼul u chʼaʼik u yiikʼ.
31 Lelaʼ úuch tu Kʼiinil u Líiʼskuba máak utiaʼal le Sabadooʼ; utiaʼal túun maʼ u pʼáatal le wíinkliloʼob tu cheʼil le muʼyaj tu kʼiinil Sabadooʼ (tumen jach nojoch kʼiin le Sábado jeʼeloʼ),* le judíoʼoboʼ tu kʼáatoʼob tiʼ Pilato ka kaʼachak u yook le máakoʼob tsʼaʼanoʼob teʼ cheʼoʼ yéetel ka éemsaʼak u wíinkliloʼob.
32 Ka túun taal le soldadoʼoboʼ ka tu kachoʼob u yook le yáax juntúuloʼ bey xan u yook le uláakʼ juntúul chʼuykíintaʼan tiʼ cheʼoʼ.
33 Baʼaleʼ ka náatsʼoʼob tu yiknal Jesuseʼ maʼ tu kachoʼob u yookiʼ tumen tu yiloʼob tsʼoʼok u kíimil.
34 Baʼaleʼ juntúul tiʼ le soldadoʼoboʼ tu lomaj u chʼalaʼatel Jesús yéetel junpʼéel lanza, ka túun jóokʼ jaʼ yéetel kʼiʼikʼiʼ.
35 Le máax il le baʼax úuchaʼ tsʼoʼok u tsikbaltik, yéetel le baʼax ku tsikbaltikoʼ jach jaaj. Le máakaʼ u yojel jach jaaj tuláakal le baʼaxoʼob ku yaʼalikoʼ, utiaʼal xan ka a creerteʼex.
36 Le baʼaloʼob xanaʼ úuch utiaʼal ka béeychajak le baʼax ku yaʼalik le Kiliʼich Tsʼíibaʼ: «Mix junpʼéel u baakel kun kachbil».
37 Bey xan le uláakʼ baʼax ku yaʼalik le Kiliʼich Tsʼíibaʼ: «Yaan u paktikoʼob le Máax tu táatsʼlomtoʼoboʼ».
38 Ka tsʼoʼok túun u yúuchul le baʼaloʼobaʼ José tiʼ u kaajil Arimatea, juntúul máak taʼakumbail úuchik u beetkuba disipulo tiʼ Jesús tumen sajak tiʼ le judíoʼoboʼ, tu kʼáataj tiʼ Pilato wa jeʼel u páajtal u bisik u wíinklil Jesuseʼ; Pilato túuneʼ tu chaʼaj u bisik, ka túun taal Joseeʼ ka tu bisaj u wíinklil Jesús.
39 Taal xan Nicodemo, le máax de áakʼab ka yáax bin u yil Jesuseʼ, ka tu taasaj junpʼéel bolsa mirra* yéetel kiʼibok bálsamo,* kex treinta kilos u aalil.
40 Letiʼob túuneʼ tu chʼaʼajoʼob u wíinklil Jesuseʼ ka tu bakʼoʼob yéetel le nookʼoʼob de lino tuʼux u paʼapakʼmoʼob le kiʼibok polvo yéetel le kiʼibok balsamooʼ, jeʼex suukil u beetik le judíoʼob utiaʼal u muʼukul máakoʼ.
41 Teʼ kúuchil xan tuʼux baʼaj tiʼ cheʼoʼ yaan kaʼach junpʼéel parcelaiʼ, teʼ parcela túunaʼ yaan kaʼach junpʼéel túumben muknal* tuʼux mix máak yáax tsʼaʼabkiʼ.
42 Tumen naatsʼ yanil le muknalaʼ tiʼ tu tsʼáajoʼob Jesusiʼ, tumen le judíoʼoboʼ táan kaʼach u líiʼskubaʼob utiaʼal u kʼiinbesajoʼob.
Notas
^ Lelaʼ u kʼáat u yaʼal junpʼéel kúuchil beetaʼan u pisoil yéetel tuunichoʼob.
^ Kex láas 12:00 chúumuk kʼiin. Le hora kaʼachoʼ ku káajal u xoʼokol ken tíipʼik Kʼiin.
^ Ilaʼak Tipʼ. 6.
^ U yáax kʼiinil u Kʼiinbesajil le Waajoʼob x-maʼ Levadurailoʼ ku yilaʼal bey junpʼéel Sabadoeʼ, kex jeʼel baʼalak kʼiin ka lúubkeʼ. Baʼaleʼ ken lúubuk jach tiʼ Sabadoeʼ, ku yilaʼal bey junpʼéel nojoch Sabadoeʼ.
^ Junpʼéel clase polvo jach kiʼibok.
^ Maʼ xaaneʼ, le baʼax tu bisoʼ Aquilaria agallocha, yaan horaeʼ ku yaʼalaʼal u cheʼil aloe tiʼ.
^ Wa: «muknal beetaʼan utiaʼal u kʼaʼajsaʼal le kimenoʼ».
