Juan 21:1-25
21 Ka tsʼoʼok u yaʼalik le baʼaloʼobaʼ, Jesuseʼ tu kaʼa chíikbesuba tiʼ u disipuloʼob tu jáal u kʼáaʼnáabil Tiberíades. Bey úuchik u chíikbeskubaaʼ:
2 U muchʼmuba kaʼach Simón Pedro, Tomás le máax ku yaʼalaʼal kaʼach Iich tiʼeʼ, Natanael le máax sijnáal tu kaajil Caná tu luʼumil Galilea, u paalal Zebedeo yéetel uláakʼ kaʼatúul disipuloʼob.
3 Simón Pedro túuneʼ tu yaʼalajtiʼob: «Nikaʼaj chuk kay». Letiʼobeʼ tu yaʼaloʼobtiʼ: «Jeʼel k-bin xan ta wéeteleʼ». Jóokʼoʼob túuneʼ ka naʼakoʼob teʼ barcooʼ, baʼaleʼ mix baʼal tu chukoʼob teʼ áakʼab jeʼeloʼ.
4 Baʼaleʼ, le jach táan u taal u sáastaloʼ, Jesuseʼ tu chíikbesuba waʼalakbal tu jáal le jaʼoʼ, chéen baʼaleʼ le disipuloʼoboʼ maʼ tu kʼaj óoltoʼob wa Jesusiʼ.
5 Jesús túuneʼ tu kʼáatajtiʼob: «Mejen paalaleʼex, ¿máasaʼ minaʼan mix baʼal a jaanteʼex?». Letiʼobeʼ tu núukoʼob: «¡Minaʼan!».
6 Letiʼeʼ tu yaʼalajtiʼob: «Jáaychʼint u redil a chuk kayeʼex tu x-noʼoj le barcooʼ, utiaʼal ka chuuknakeʼex». Ka túun tu jáaychʼintoʼob, baʼaleʼ pʼáat maʼ tu páajtal u jóoʼskoʼob tumen jach táaj chuup yéetel kayoʼob.
7 Le oʼolaleʼ le disipulo jach yaabiltaʼan tumen Yuumtsiloʼ, tu yaʼalaj tiʼ Pedro: «¡Letiʼe Yuumtsiloʼ!». Simón Pedro túuneʼ le ka tu yuʼubaj u yaʼalaʼal letiʼe Yuumtsiloʼ tu takaj u nookʼ, tumen óoliʼ x-maʼ nookʼil yanil kaʼachi, ka tu píikchʼintuba ichil le kʼáaʼnáaboʼ.
8 Baʼaleʼ le uláakʼ disipuloʼoboʼ taaloʼob yéetel le barco táan u jíiltikoʼob le red chuup yéetel le kayoʼoboʼ, tumen maʼ náach yaniloʼob tiʼ u jáal le jaʼoʼ, kex cien metros.
9 Baʼaleʼ ka éemoʼob tiʼ le barco tu jáal le jaʼoʼ, tu yiloʼob yaan chúuk tʼabaʼaniʼ, yéetel tsʼaʼan kayoʼob tu yóokʼol, bey xan waaj.
10 Jesuseʼ tu yaʼalajtiʼob: «Taaseʼex wa jaytúul tiʼ le kayoʼob táant a chukikeʼexoʼ».
11 Simón Pedro túuneʼ naʼak teʼ barcooʼ, ka tu jóoʼsaj jáal jaʼ le red chuup yéetel nukuch kayoʼoboʼ, leloʼobaʼ ciento cincuentitrés u túulaloʼob. Baʼaleʼ kex jach yaʼaboʼobeʼ maʼ jatkʼaj le redoʼ.
12 Jesuseʼ tu yaʼalajtiʼob: «Koʼoteneʼex ukʼul». Baʼaleʼ mix juntúul tiʼ le disipuloʼob taakchaj u kʼáatkoʼobtiʼ: «¿Máaxechiʼ?», tumen u yojloʼob kaʼach letiʼ le Yuumtsiloʼ.
13 Náatsʼ túun Jesuseʼ ka tu chʼaʼaj le waajoʼ ka tu tsʼáajtiʼob, bey xan tu beetil yéetel le kayoʼ.
14 Lelaʼ letiʼ u yóoxtéen úuchik u chíikbeskuba Jesús tiʼ u disipuloʼob, le tsʼokaʼaniliʼ u líiʼsaʼal ichil le kimenoʼoboʼ.
15 Le ka tsʼoʼok u yukʼuloʼobeʼ, Jesuseʼ tu yaʼalaj tiʼ Simón Pedro: «Simón u paal Juan, ¿maas wa a yaabiltmen tiʼ le baʼaloʼobaʼ?». Letiʼeʼ tu núukajtiʼ: «Beyoʼ Yuumtsil, techeʼ a wojel in yaabiltmech». Jesuseʼ tu yaʼalajtiʼ: «Tséent in walakʼ tamanoʼob».
16 Jesuseʼ tu kaʼa kʼáatajtiʼ: «Simón u paal Juan, ¿a yaabiltmen wa?». Letiʼeʼ tu núukajtiʼ: «Beyoʼ Yuumtsil, techeʼ a wojel in yaabiltmech». Jesuseʼ tu yaʼalajtiʼ: «Kanáant in mejen alakʼ tamanoʼob».
17 Jesuseʼ tu yóoxtéen tu kʼáatajtiʼ: «Simón u paal Juan, ¿a yaabiltmen wa?». Pedroeʼ okʼomchaj u yóol tumen tsʼoʼok óoxtéen u kʼáataʼaltiʼ tumen Jesús: «¿A yaabiltmen wa?». Le oʼolal tu yaʼalajtiʼ: «Yuumtsil, techeʼ tuláakal baʼal a wojel; techeʼ jach a wojel in yaabiltmech». Jesús túuneʼ tu yaʼalajtiʼ: «Tséent in mejen alakʼ tamanoʼob.
18 Jach tu jaajil kin waʼaliktech: Kaʼach maas táankelmecheʼ, ta juunal ka takik a nookʼ yéetel ka bin jeʼel tuʼuxak a kʼáateʼ. Baʼaleʼ ken chʼíijkecheʼ yaan a tichʼik a kʼaboʼob yéetel yaanal máax kun takiktech a nookʼ,* yéetel yaan u kuchkech utiaʼal u bisech tuʼux maʼ a kʼáatiʼ».
19 Lelaʼ tu yaʼalaj utiaʼal u yeʼesik bix kun kíimil Pedro utiaʼal u nojbeʼenkúuntik Dios. Ka tsʼoʼok u yaʼalik le baʼaloʼobaʼ, tu yaʼalajtiʼ: «Maʼ u xuʼulul a taal tin paach».
20 Ka tu sutuba Pedroeʼ tu yilaj le disipulo jach yaabiltaʼan tumen Jesusoʼ, táan u taal tu paachoʼob, lelaʼ letiʼe disipulo tu jach natsʼuba tu yiknal Jesús le táan u cenaroʼob utiaʼal u kʼáatiktiʼeʼ: «Yuumtsil, ¿máax le kun traicionartikechoʼ?».
21 Pedro túuneʼ le ka tu yilaj le disipuloaʼ, tu kʼáataj tiʼ Jesús: «Yuumtsil, ¿kux túun lelaʼ, baʼax ken u beete?».
22 Jesuseʼ tu núukajtiʼ: «Wa in kʼáat ka pʼáatak tak ken suunakeneʼ, techeʼ ¿baʼax yanech a wiliʼ? Techeʼ maʼ u xuʼulul a taal tin paach».
23 Le oʼolaleʼ ichil le sukuʼunoʼoboʼ joʼopʼ u yaʼalaʼaleʼ, le disipuloaʼ maʼ kun kíimil, baʼaleʼ Jesuseʼ maʼ tu yaʼalaj wa maʼ kun kíimiliʼ, baʼaxeʼ tu yaʼalaj: «Wa in kʼáat ka pʼáatak tak ken suunakeneʼ, techeʼ ¿baʼax yanech a wiliʼ?».
24 Lelaʼ letiʼe disipulo jaajkúuntik yéetel tsʼíibtik le baʼaloʼobaʼ, yéetel k-ojleʼ le baʼax ku yaʼalikoʼ jach jaaj.
25 U jaajileʼ jach yaʼab uláakʼ baʼaloʼob tu beetaj Jesús. Wa ka kʼuchuk tsʼíibtbil tuláakal jach jeʼex úuchik u beetkoʼ, in tuklikeʼ mix tu túulisil yóokʼol kaab jeʼel u yantal tuʼux u tsʼaʼabal tuláakal le rolloʼob kun tsʼíibtbiloʼ.
Notas
^ Lit.: «jíichʼkʼaxkech».
