Juan 3:1-36
3 Yanchaj túun juntúul fariseo ku kʼaabaʼtik Nicodemo, letiʼeʼ juntúul u gobernanteil le judíoʼoboʼ.
2 Junpʼéel áakʼab túuneʼ letiʼeʼ bin tu yiknal Jesuseʼ, ka tu yaʼalajtiʼ: «J-Kaʼansaj, k-ojleʼ techeʼ juntúul j-kaʼansajech túuxtaʼanech tumen Dios; tumen mix máak jeʼel u páajtal u beetik le milagroʼob jeʼex le ka beetik wa minaʼan Dios tu yéeteloʼ».
3 Jesuseʼ tu yaʼalajtiʼ: «Jach tu jaajil kin waʼaliktech: Wa maʼ tu síijil máak tu kaʼatéeneʼ,* maʼ tu páajtal u yilik u Reino Dios».
4 Nicodemoeʼ tu kʼáatajtiʼ: «¿Bix jeʼel u páajtal u síijil máak wa tsʼoʼok u chʼíijleʼ? Maʼ tu páajtal u yokol tu kaʼatéen tu jobnel u maama utiaʼal ka síijik, ¿máasaʼ?».
5 Jesús túuneʼ tu núukajtiʼ: «Jach tu jaajil kin waʼaliktech: Wa maʼ tu síijil máak tiʼ jaʼ yéetel tiʼ kiliʼich muukʼeʼ, maʼ tu páajtal u yokol máak tu Reino Dios.
6 Le máax sijnáal tiʼ wíinikeʼ, wíinik; le máax sijnáal tiʼ kiliʼich muukʼeʼ, juntúul u paal Dios.
7 Maʼ u jaʼakʼal a wóol yoʼolal le baʼax tin waʼalajtechaʼ: Teʼexeʼ unaj a síijleʼex tu kaʼatéen.
8 Le iikʼoʼ ku suʼusutkuba jeʼel tuʼuxak u kʼáateʼ yéetel ka wuʼuyik u xóob, baʼaleʼ maʼ a wojel tuʼux u taaliʼ mix tuʼux ku biniʼ. Bey u yúuchul xan yéetel tuláakal le máaxoʼob ku síijloʼob tiʼ kiliʼich muukʼoʼ».
9 Nicodemoeʼ tu kʼáatajtiʼ: «¿Bix jeʼel u páajtal u yúuchul le baʼaloʼobaʼ?».
10 Jesús túuneʼ tu yaʼalaj utiaʼal u núukiktiʼ: «Techeʼ ¿juntúul j-kaʼansajech tiʼ u kaajil Israel, baʼaleʼ maʼ a wojel le baʼaloʼobaʼ?
11 Jach tu jaajil kin waʼaliktech: Toʼoneʼ k-tʼaan tiʼ baʼaxoʼob k-ojel yéetel k-aʼalik le baʼaxoʼob tsʼoʼok k-ilkoʼ, baʼaleʼ teʼexeʼ maʼatech a creertikeʼex le baʼaxoʼob k-aʼalikoʼ.
12 Wa maʼ ta creertikeʼex le luʼumkabil baʼaloʼob tin waʼalajteʼexoʼ, ¿bix jeʼel a creertikeʼex le kaʼanilbeʼen baʼaloʼob wa ka in waʼalteʼexoʼ?
13 Tsʼoʼoleʼ mix máak naʼakak teʼ kaʼanoʼ, baʼaxeʼ chéen le máax tsʼoʼok u yéemel teʼ kaʼanoʼ, u Paal máak.
14 Jeʼex úuchik u líiʼsaʼal kaʼanal le kaan tumen Moisés teʼ desiertooʼ, bey xan kun líiʼsbil kaʼanal u Paal máak,
15 utiaʼal ka yanak kuxtal minaʼan u xuul tiʼ tuláakal le máaxoʼob ken u creertoʼoboʼ.
16 »Dioseʼ tumen jach u yaabiltmaj yóokʼol kaabeʼ tu tsʼáaj u juntúuliliʼ Paal, utiaʼal beyoʼ maʼ u xuʼulsaʼal tiʼ le máaxoʼob ken u tsʼáa u fejoʼob tiʼ letiʼoʼ, baʼaxeʼ ka yanaktiʼob kuxtal minaʼan u xuul.
17 Tumen Dioseʼ maʼ tu túuxtaj u Paal way yóokʼol kaab utiaʼal ka u juzgart yóokʼol kaabiʼ, baʼaxeʼ utiaʼal ka salvartaʼak yóokʼol kaab tu yoʼolal letiʼ.
18 Le máax ku tsʼáaik u fe tiʼ letiʼeʼ maʼ kun juzgartbil. Le máax minaʼan u fejeʼ tsʼoʼok u juzgartaʼal, tumen maʼ tu tsʼáaj u fe tiʼ u kʼaabaʼ u juntúuliliʼ Paal Diosiʼ.
19 Lelaʼ letiʼe baʼax meyajnaj utiaʼal u juzgartaʼal wíinikoʼoboʼ: le sáasiloʼ tsʼoʼok u taal way yóokʼol kaabeʼ, baʼaleʼ le máakoʼoboʼ maʼ tu yaabiltoʼob le sáasiloʼ, baʼaxeʼ tu yaabiltoʼob le éeʼjochʼeʼeniloʼ, tumen le baʼaxoʼob ku beetkoʼob kaʼachoʼ láaj kʼaastak.
20 Tumen máax ku beetik baʼaloʼob kʼaastakeʼ u pʼekmaj le sáasiloʼ yéetel maʼ tu taal tuʼux yaan le sáasiloʼ, utiaʼal maʼ u chíikpajal wa kʼaas le baʼaxoʼob ku beetkoʼ.
21 Baʼaleʼ máax ku beetik baʼaloʼob maʼalobtakeʼ ku taal tuʼux yaan le sáasiloʼ, utiaʼal ka chíikpajak táan u beetik baʼaloʼob maʼalobtak jeʼex uts tu tʼaan Dioseʼ».
22 Ka tsʼoʼok u yúuchul le baʼaloʼobaʼ, Jesús yéetel u disipuloʼobeʼ binoʼob tu mejen kaajiloʼob Judea; teʼ túunoʼ Jesuseʼ pʼáat wa jaypʼéel kʼiinoʼob tu yéeteloʼobiʼ, yéetel táan kaʼach u tsʼaa okjaʼ.
23 Baʼaleʼ Juaneʼ táan kaʼach u tsʼaa okjaʼ tu kaajil Enón naatsʼ tiʼ u kaajil Salim, tumen teʼeloʼ yaan kaʼach yaʼab jaʼiʼ; le máakoʼob túunoʼ seguernaj u taaloʼob utiaʼal ka tsʼaʼabak u yokjaʼob;
24 tumen teʼ kʼiinoʼob jeʼeloʼ Juaneʼ maʼ kʼaʼalak carceliʼ.
25 U disipuloʼob Juan túuneʼ káaj u baʼateltʼaanoʼob yéetel juntúul judío yoʼolal le u pʼáatal máak limpioil tu táan Diosoʼ.
26 Ka túun taaloʼob tu yiknal Juaneʼ ka tu yaʼaloʼobtiʼ: «J-Kaʼansaj, le máak yaan kaʼach ta wéetel teʼ tuláakʼ u tséel le Jordanoʼ, le máax tiʼ tʼaanajecheʼ, ile, táan u tsʼaa okjaʼ; tsʼoʼoleʼ tuláakal le máakoʼoboʼ táan u binoʼob tu yiknal».
27 Juaneʼ tu yaʼalaj: «Máakeʼ maʼ tu páajtal u yantal mix baʼal tiʼ, wa maʼ Dios tsʼaamiltiʼiʼ.
28 Tak teʼexeʼ a wuʼuymeʼex in waʼalik: Maʼ teen le Cristooʼ, chéen túuxtaʼaben táanil tiʼ letiʼ.
29 Le máax ku tsʼoʼokol u beel yéetel le noviatsiloʼ letiʼe noviotsiloʼ. Baʼaleʼ u amigo le noviotsiloʼ, wa tiʼ waʼalakbal yéetel ku yuʼubik baʼax ku yaʼalik le noviotsiloʼ, ku sen kiʼimaktal u yóol tu yoʼolal. Le oʼolaleʼ teneʼ jach táaj kiʼimak in wóol.
30 Letiʼeʼ yaan u seguer u yaʼabtal u disipuloʼob, baʼaleʼ teneʼ yaan u seguer u pʼíittal in disipuloʼob».
31 Le máax ku taal kaʼanaleʼ tiʼ yaan yóokʼol u maasileʼ. Le máax Luʼum u taaleʼ, luʼumkabil, yéetel ku tʼaan tiʼ le baʼaloʼob yaan way Luʼumeʼ. Le máax kaʼan u taaleʼ tiʼ yaan yóokʼol u maasileʼ,
32 yéetel ku tʼaan tiʼ le baʼaxoʼob tsʼoʼok u yilik yéetel tsʼoʼok u yuʼubikoʼ, baʼaleʼ mix máak creertik baʼax ku yaʼalik.
33 Le máax tsʼoʼok u creertik baʼax ku yaʼalik Jesuseʼ tsʼoʼok u yilik jach jaaj* lelaʼ: Dioseʼ mantatsʼ ku yaʼalik u jaajil.
34 Tumen Cristo, le máax túuxtaʼan tumen Diosoʼ, ku tʼaan tiʼ le baʼaxoʼob ku yaʼalik Diosoʼ, tumen Dioseʼ maʼ chéen junpʼíit kiliʼich muukʼ ku tsʼáaikiʼ.
35 Le Taatatsiloʼ u yaabiltmaj le Paaloʼ, yéetel tsʼoʼok u kʼubik tuláakal baʼal tu kʼab.
36 Le máax ku tsʼáaik u fe tiʼ le Paaloʼ yaan u yantal kuxtal minaʼan u xuul tiʼ, le máax maʼ tu yuʼubik u tʼaan le Paaloʼ maʼ ken u yil le kuxtaloʼ, baʼaxeʼ u pʼujaʼanil Dios kun pʼáatal tu yóokʼol.
