Juan 5:1-47
5 Le ka tsʼoʼok u yúuchul le baʼaloʼobaʼ, le judíoʼoboʼ tu beetoʼob junpʼéel kʼiinbesaj; Jesús túuneʼ bin Jerusalén.
2 Tu kaajil túun Jerusalén, naatsʼ tiʼ u joonajil le tamanoʼoboʼ, yaan kaʼach junpʼéel nojoch pila ku kʼaabaʼtik ich hebreoeʼ Betzata; tu baʼpacheʼ yaan kaʼach cinco u filasil columnaʼobiʼ.
3 Yiknal le columnaʼoboʼ yaan kaʼach yaʼab máakoʼob kʼojaʼanoʼob, chʼóopoʼob, móochoʼob yéetel yaan xan máakoʼob kimen u kʼaboʼob wa u yookoʼobiʼ.
4 * ——
5 Baʼaleʼ teʼeloʼ tiʼ yaan kaʼach juntúul máak tsʼoʼok treintiocho jaʼaboʼob kʼojaʼanchajak.
6 Jesuseʼ ka tu yilaj tiʼ chilikbal le máak yéetel le ka tu yojéeltaj úuch kʼojaʼanchajkeʼ, tu yaʼalajtiʼ: «¿A kʼáat wa utstal?».
7 Le máak kʼojaʼanoʼ tu núukajtiʼ: «Yuumtsil, mix máak áantken okol ichil le pila ken u woʼoltuba u jaʼiloʼ, le ken in wóot ookleʼ yaanal máax tsʼoʼok u jáan ookliʼ».
8 Jesuseʼ tu yaʼalajtiʼ: «Líikʼen, chʼaʼ a camillaeʼ ka xíimbalnakech».
9 Le máak túunoʼ tu séebaʼanil utschaji, ka tu chʼaʼaj u camillaeʼ ka joʼopʼ u xíimbal.
Baʼaleʼ le kʼiin jeʼeloʼ Sábado.
10 Le oʼolaleʼ, le judíoʼoboʼ káaj u yaʼalikoʼob tiʼ le máax tsʼaʼakoʼ: «Bejlaʼeʼ Sábado, maʼ uts a bisik le camillaoʼ».
11 Baʼaleʼ letiʼeʼ tu yaʼalajtiʼob: «Le máax tsʼakenoʼ letiʼ aʼalten: ‹Chʼaʼ a camillaeʼ ka xíimbalnakech›».
12 Ka tu kʼáatoʼobtiʼ: «¿Máax le máak aʼaltech: ‹Chʼaʼeʼ ka xíimbalnakech›?».
13 Baʼaleʼ le máak tsʼaʼakoʼ maʼ u yojel máax aʼaltiʼiʼ, tumen Jesuseʼ tsʼoʼok kaʼach u lukʼul tu yiknal, yéetel jach yaʼabkach máakoʼob yanoʼob teʼeloʼ.
14 Le ka tsʼoʼok u yúuchul le baʼaloʼobaʼ, Jesuseʼ tu yilaj le máak teʼ templooʼ ka tu yaʼalajtiʼ: «Ile, tsʼoʼok a wutstal. Maʼ a kʼebantal tu kaʼatéen, utiaʼal maʼ u yúuchultech junpʼéel baʼax maas yaj».
15 Le máak túunoʼ bineʼ ka tu yaʼalaj tiʼ le judíoʼoboʼ Jesús tsʼake.
16 Yoʼolal lelaʼ le judíoʼoboʼ káaj u chʼaʼpachtikoʼob Jesús, tumen tu kʼiinil Sábado ku beetik kaʼach le baʼaloʼobaʼ.
17 Baʼaleʼ Jesuseʼ tu yaʼalajtiʼob: «In Taataeʼ tak bejlaʼa táan u meyajeʼ, teen xaneʼ láayliʼ táan in meyajeʼ».
18 Yoʼolal lelaʼ, le judíoʼoboʼ maas taakchaj u kíimskoʼob, tumen ku yaʼalikoʼobeʼ maʼ chéen táan u mixbaʼalkúuntik le Sabadooʼ, baʼaxeʼ táan xan u yaʼalikeʼ Dioseʼ jach u Taata, yéetel beyoʼ táan kaʼach u ketkuba yéetel Dios.
19 Le oʼolal Jesuseʼ tu yaʼalajtiʼob: «Jach tu jaajil kin waʼalikteʼex: Le Paaloʼ maʼ tu páajtal u beetik mix junpʼéel baʼal chéen tu juunal u yóol, baʼaxeʼ chéen le baʼax ku yilik u beetik le Taataoʼ. Tumen jeʼel baʼaxak ka u beet le Taataoʼ, letiʼe baʼaxoʼob xan ku beetik le Paaloʼ.
20 Tumen le Taataoʼ u yaabiltmaj le Paaloʼ yéetel ku yeʼesiktiʼ tuláakal le baʼaxoʼob ku beetkoʼ, yaan xan u yeʼesiktiʼ baʼaloʼob maas nuuktak ke le jeʼelaʼ, utiaʼal ka jaʼakʼak a wóoleʼex.
21 Tumen jeʼex le Taata ku líiʼsik le kimenoʼob yéetel ku kaʼa kuxkíintikoʼoboʼ, le Paaloʼ ku kaʼa kuxkíintik xan le máaxoʼob u kʼáatoʼ.
22 Tumen le Taataoʼ maʼatech u juzgartik mix máak, baʼaxeʼ tsʼoʼok u kʼubéentik tiʼ le Paal ka u juzgart tuláakal máakoʼ,
23 utiaʼal beyoʼ ka eʼesaʼak tsiikil tiʼ le Paal tumen tuláakal máak jeʼex u yeʼesaʼal tsiikil tiʼ le Taataoʼ. Le máax maʼ tu yeʼesik tsiikil tiʼ le Paaloʼ maʼ tu yeʼesik xan tsiikil tiʼ le Taata, le máax túuxtoʼ.
24 Jach tu jaajil kin waʼalikteʼex: Le máax ku yuʼubik in tʼaan yéetel ku creertik le máax túuxtenoʼ yaan kuxtal minaʼan u xuul tiʼ, yéetel maʼ kun juzgartbil, baʼaxeʼ tsʼoʼok u tokikuba tiʼ le kíimiloʼ yéetel tsʼoʼok u máan teʼ kuxtaloʼ.
25 »Jach tu jaajil kin waʼalikteʼex: Táan u taal u kʼiinil, lelaʼ tsʼoʼok tak u kʼuchul, ken uʼuyaʼak u tʼaan u Paal Dios tumen le kimenoʼoboʼ, yaan u kuxtal le máaxoʼob tu yuʼuboʼob tʼaanoʼ.
26 Tumen jeʼex le Taata ku páajtal u tsʼáaik kuxtaloʼ, tsʼoʼok xan u tsʼáaik u páajtalil tiʼ le Paal u tsʼáaik kuxtaloʼ.
27 Yéetel tsʼoʼok u tsʼáaik u páajtalil tiʼ utiaʼal u juzgar, tumen letiʼeʼ u Paal máak.
28 Maʼ u jaʼakʼal a wóoleʼex yoʼolal lelaʼ, tumen yaan u kʼuchul u kʼiinileʼ, tuláakal le máaxoʼob yanoʼob ichil le muknaloʼoboʼ* yaan u yuʼubikoʼob u tʼaan
29 yéetel yaan u jóokʼloʼob; le máaxoʼob tu beetoʼob baʼaloʼob maʼalobtakeʼ yaan u líikʼloʼob utiaʼal ka kuxlakoʼob, baʼaleʼ le máaxoʼob tu beetoʼob baʼaloʼob jach kʼaastakeʼ yaan u líikʼloʼob utiaʼal ka juzgartaʼakoʼob.
30 Maʼ tu páajtal in beetik mix baʼal chéen tu juunal in wóol; kin juzgar yoʼolal le baʼax kin wuʼuyikoʼ, yéetel le bix in juzgaroʼ jach toj tumen maʼ tin beetik chéen baʼax in kʼáat, baʼaxeʼ kin wilik in beetik le baʼax u kʼáat le máax túuxtenoʼ.
31 »Wa chéen tin juunal kin jaajkúuntik máaxeneʼ, le baʼax kin waʼalikoʼ maʼ jaajiʼ.
32 Baʼaleʼ yaan uláakʼ máax jaajkúuntik máaxen, yéetel in wojleʼ le baʼaxoʼob ku yaʼalik tin woʼolaloʼ jach jaaj.
33 Teʼexeʼ yaan máaxoʼob tsʼoʼok a túuxtikeʼex tu yiknal Juan, letiʼ túuneʼ tsʼoʼok u yaʼalik u jaajil.
34 Baʼaleʼ teneʼ maʼ in kʼáat ka jaajkúuntaʼak tumen wíinik máaxeniʼ, baʼaleʼ tuláakal le baʼaloʼobaʼ kin waʼalik utiaʼal ka a salvartabaʼex.
35 Le máak jeʼeloʼ bey kaʼach junpʼéel lámpara ku tóochʼbal yéetel ku juul u sáasileʼ, teʼex xaneʼ ichil junpʼíit kʼiineʼ ta wóoteʼex antal yéetel nojoch kiʼimak óolal yáanal u sáasil.
36 Baʼaleʼ tiʼ teneʼ yaan junpʼéel baʼax maas nojoch ku jaajkúuntik máaxen, lelaʼ maas nojoch tiʼ Juan; tumen le baʼaxoʼob kʼubéentaʼanten tumen in Taata ka in beetoʼ, letiʼe baʼaxoʼob kin beetkoʼ, yéetel leloʼobaʼ ku jaajkúuntikoʼob letiʼe Taata túuxtmilenoʼ.
37 Tsʼoʼoleʼ le Taata, le máax túuxtenoʼ tsʼoʼok u jaajkúuntik máaxeniʼ. Teʼexeʼ mix juntéen a wuʼuyeʼex u tʼaan yéetel mix juntéen a wileʼex jach bix letiʼ;
38 yéetel u tʼaaneʼ maʼ tu pʼáatal ichil a puksiʼikʼaleʼex, tumen maʼ ta creertikeʼex le máax tu túuxtoʼ.
39 »Teʼexeʼ ka xakʼaltikeʼex le Kiliʼich Tsʼíiboʼoboʼ, tumen ka tuklikeʼexeʼ yoʼolal leloʼobaʼ yaan u yantalteʼex kuxtal minaʼan u xuul; tsʼoʼoleʼ le Kiliʼich Tsʼíiboʼoboʼ letiʼob jaajkúuntik máaxen.
40 Kex beyoʼ teʼexeʼ maʼ a kʼáateʼex taal tin wiknal utiaʼal ka yanakteʼex kuxtaliʼ.
41 Teneʼ maʼ tin kʼamik ka tsʼaʼabakten nojbeʼenil tumen le máakoʼoboʼ,
42 tsʼoʼoleʼ jach in wojel minaʼan u yaabilaj Dios ta puksiʼikʼaleʼex.
43 Teneʼ tsʼoʼok in taal tu kʼaabaʼ in Taata, baʼaleʼ teʼexeʼ maʼ ta kʼamkeneʼex; baʼaleʼ wa ka taalak juntúul máak chéen tu kʼaabaʼeʼ, teʼexeʼ jeʼel a kʼamkeʼexeʼ.
44 ¿Bix ken a creerteneʼex, wa teʼex ka kʼamkeʼex nojbeʼenil ta baatsileʼex yéetel maʼ ta kaxtikeʼex le nojbeʼenil ku taal tiʼ le juntúuliliʼ Diosoʼ?
45 Maʼ a tuklikeʼex wa yaan in takik a pooleʼex tu táan in Taata; tumen Moisés, le máax tiʼ a kʼubmaj a wóoleʼexoʼ, letiʼ takik a pooleʼex.
46 U jaajileʼ wa ka creertikeʼex Moiseseʼ jeʼel xan a creertikeneʼexeʼ, tumen letiʼeʼ tsʼíibnaj tin woʼolal.
47 Baʼaleʼ wa maʼ ta creertikeʼex le baʼaxoʼob tu tsʼíibtoʼ, ¿bix ken a creerteʼex le baʼaxoʼob kin waʼalikoʼ?».
Notas
^ Le tsʼíiboʼob ich griego Westcott yéetel Hort bey xan uláakʼ úuchben tsʼíiboʼob ku meyajoʼob utiaʼal u suʼutul le Kiliʼich Tsʼíiboʼob ich Griegooʼ, maʼatech u taaskoʼob le baʼax ku yaʼalik le versiculoaʼ.
^ Wa: «muknaloʼob beetaʼanoʼob utiaʼal u kʼaʼajsaʼal le kimenoʼoboʼ».
