Juan 6:1-71
6 Ka tsʼoʼok u yaʼalik le baʼaloʼobaʼ, Jesuseʼ bin tuláakʼ u tséel u Kʼáaʼnáabil Galilea wa Tiberíades.
2 Baʼaleʼ seguernaj u bin yaʼabkach máakoʼob tu paach, tumen ku yilkoʼob kaʼach le milagroʼob ku beetik utiaʼal u tsʼakik le máaxoʼob kʼojaʼanoʼoboʼ.
3 Jesús túuneʼ naʼak tiʼ junpʼéel puʼuk yéetel u disipuloʼob; teʼeloʼ tiʼ kulajoʼobiʼ.
4 Teʼ kʼiinoʼob jeʼeloʼ tsʼoʼok u náatsʼal kaʼach le Pascuaoʼ, le kʼiinbesaj ku beetik le judíoʼoboʼ.
5 Le oʼolaleʼ ka tu líiʼsaj u yich Jesús yéetel ka tu yilaj táan u taal yaʼabkach máakoʼob tu yiknaleʼ, tu yaʼalaj tiʼ Felipe: «¿Tuʼux ken k-man waaj utiaʼal u jaant le máakoʼobaʼ?».
6 Baʼaleʼ lelaʼ táan kaʼach u yaʼaliktiʼ utiaʼal u túuntik u yóol, tumen Jesuseʼ u yojliliʼ yaan baʼax ken u beeteʼ.
7 Felipeeʼ tu núukajtiʼ: «Kex ka k-man doscientos denarios* waajeʼ, maʼ ken u tsʼáa utiaʼal ka u jaantoʼob kex chéen junpʼíit cada juntúuliʼ».
8 Juntúul tiʼ le disipuloʼob ku kʼaabaʼtik Andrés, u yíitsʼin* Simón Pedroeʼ, tu yaʼalajtiʼ:
9 «Jeʼel juntúul chan xiʼipal yaan cinco u waajil cebada tiʼaʼ bey xan kaʼatúul mejen kayoʼob. Baʼaleʼ leloʼobaʼ maʼ kun chúukpajal utiaʼal le bukaʼaj máakoʼobaʼ».
10 Jesús túuneʼ tu yaʼalaj: «Aʼaleʼex tiʼ le máakoʼob ka kulakoʼoboʼ». Tumen jach yaʼab suʼuk yaan teʼeloʼ, le máakoʼoboʼ kulajoʼobiʼ; tuláakloʼobeʼ kex cinco mil u túulaloʼob.
11 Jesús túuneʼ tu chʼaʼaj le waajoʼoboʼ; ka tsʼoʼok u tsʼáaik gracias tiʼ Dioseʼ, tu tʼoxaj tiʼ le máakoʼob kulukbaloʼoboʼ. Tu tʼoxajtiʼob xan le bukaʼaj mejen kay u kʼáat kaʼach u jaantoʼoboʼ.
12 Baʼaleʼ le ka tsʼoʼok u naʼajtaloʼobeʼ, tu yaʼalaj tiʼ u disipuloʼob: «Moleʼex le u xéexetʼal pʼáatoʼ utiaʼal maʼ u puʼulul mix baʼal».
13 Ka túun tu moloʼobeʼ chuʼup doce xaakoʼob yéetel u xéexetʼal le u cinco waajiloʼob cebadaoʼ; lelaʼ letiʼe tu yalabtaj ka tsʼoʼok u janal le máakoʼoboʼ.
14 Le máakoʼob túunoʼ, le ka tu yiloʼob le milagroʼob tu beetaj Jesusoʼ, káaj u yaʼalikoʼob: «Jach tu jaajileʼ, lelaʼ letiʼe profeta aʼalaʼan kun taal way yóokʼol kaabaʼ».
15 Le oʼolal Jesuseʼ, tumen u yojel jach taʼaytak u taal chʼaʼabil tumen le máakoʼob utiaʼal ka beetaʼak reyiloʼ, lukʼ teʼeloʼ ka bin tu kaʼatéen teʼ puʼukoʼ utiaʼal ka yanak tu juunal.
16 Ka áakʼabchajeʼ u disipuloʼobeʼ éemoʼob tu jáal le kʼáaʼnáaboʼ,
17 ka naʼakoʼob tiʼ junpʼéel barco, ka joʼopʼ u kʼáatmáanskoʼob le kʼáaʼnáaboʼ utiaʼal u binoʼob tu tojil Capernaum. Baʼaleʼ kex tsʼoʼok kaʼach u yáakʼabtaleʼ Jesuseʼ maʼ xiʼik tu yiknaloʼobiʼ.
18 Le kʼáaʼnáab xanoʼ káaj u woʼoltikuba tumen líikʼ junpʼéel kʼaʼamkach iikʼ.
19 Baʼaleʼ le disipuloʼoboʼ ka tsʼoʼok u náachtaloʼob kex cinco wa seis kilómetros yéetel le barcooʼ, tu yiloʼob táan u xíimbal Jesús yóokʼol le jaʼoʼ yéetel táan u náatsʼal tu yiknal le barcooʼ; letiʼob túuneʼ jach sajakchajoʼob.
20 Baʼaleʼ letiʼeʼ tu yaʼalajtiʼob: «¡Teen, maʼ a chʼaʼikeʼex saajkil!».
21 Letiʼob túuneʼ tu chaʼajoʼob ka naʼakak teʼ barcooʼ, le barco túunoʼ maʼ xáanchaj ka kʼuch teʼ kaaj tuʼux ku binoʼoboʼ.
22 Ka sáaschaj tuláakʼ kʼiineʼ, le yaʼabkach máakoʼob yanoʼob kaʼach tuláakʼ u tséel le kʼáaʼnáaboʼ tu yiloʼob minaʼan uláakʼ barco teʼeloʼ, baʼaxeʼ chéen junpʼéel chichan barco; u yojloʼob xaneʼ Jesuseʼ maʼ naʼak teʼ barco yéetel u disipuloʼoboʼ, baʼaxeʼ chéen tu juunaloʼob binoʼob.
23 Baʼaleʼ u barcoiloʼob Tiberíadeseʼ kʼuchoʼob naatsʼ teʼ tuʼux jaantaʼab le waaj tumen le máakoʼob ka tsʼoʼok u tsʼaʼabal gracias tiʼ Dios tumen Yuumtsiloʼ.
24 Le oʼolal túuneʼ, le yaʼabkach máakoʼoboʼ, le ka tu yiloʼob minaʼan Jesús mix u disipuloʼob teʼeloʼ, naʼakoʼob tu barcoʼobeʼ ka binoʼob Capernaum utiaʼal ka u kaxtoʼob Jesusiʼ.
25 Le ka tu yiloʼob tiʼ yaan Jesús tuláakʼ u tséel le kʼáaʼnáaboʼ, tu kʼáatoʼobtiʼ: «J-Kaʼansaj, ¿baʼax kʼiin ka kʼuchech wayeʼ?».
26 Jesuseʼ tu núukajtiʼob: «Jach tu jaajil kin waʼalikteʼex: Teʼexeʼ maʼ táan a kaxtikeneʼex yoʼolal le chíikulaloʼob tin beetoʼ, baʼaxeʼ tumen ta jaanteʼex le waajoʼoboʼ yéetel tumen naʼajchajeʼex.
27 Maʼ a meyajeʼex yoʼolal le janal ku kʼastaloʼ, baʼaxeʼ yoʼolal le janal maʼ tu kʼastal ku tsʼáaik kuxtal minaʼan u xuuloʼ, lelaʼ letiʼe baʼax ken u tsʼáateʼex u Paal máakoʼ; tumen Dios le Taataoʼ, tsʼoʼok u tsʼáaik u sello tu yóokʼol u Paal máak utiaʼal u yeʼesik ku kʼamik».
28 Ka túun tu kʼáatoʼobtiʼ: «¿Baʼax unaj k-beetik utiaʼal ka k-tsʼoʼokbes le meyaj ku yaʼalik Diosoʼ?».
29 Jesuseʼ tu núukajtiʼob: «Lelaʼ letiʼe meyaj ku yaʼalik Diosoʼ: ka a tsʼáa a fejeʼex tiʼ le máax tu túuxtoʼ».
30 Ka túun tu kʼáatoʼobtiʼ: «¿Baʼax chíikulal túun ken a weʼestoʼon utiaʼal ka k-creertech? ¿Baʼax chíikulal ken a beete?
31 K-úuchben láakʼtsiloʼobeʼ tu jaantoʼob maná teʼ desiertooʼ, jeʼel bix tsʼíibtaʼanilaʼ: ‹Letiʼeʼ u waajil kaʼan tu tsʼáaj u jaantoʼob›».
32 Jesús túuneʼ tu yaʼalajtiʼob: «Jach tu jaajil kin waʼalikteʼex: Moiseseʼ maʼ tu tsʼáajteʼex u waajil kaʼaniʼ, baʼaleʼ in Taataeʼ ku tsʼáaikteʼex le u jaajil waaj ku taal teʼ kaʼanoʼ.
33 Tumen le waaj ku tsʼáaik Diosoʼ letiʼe máax ku yéemel teʼ kaʼanoʼ yéetel ku tsʼáaik kuxtal tiʼ yóokʼol kaab».
34 Ka túun tu yaʼaloʼobtiʼ: «Yuumtsil, tsʼáatoʼon mantatsʼ le waajaʼ».
35 Jesuseʼ tu yaʼalajtiʼob: «Teen u waajil le kuxtaloʼ, le máax ku taal tin wiknaleʼ junpuliʼ maʼ kun wiʼijtal, le máax ku tsʼáaik u fe tiʼ teneʼ mix bikʼin kun ukʼajtal.
36 Baʼaleʼ teneʼ tsʼoʼok in waʼalikteʼex: Teʼexeʼ kex tsʼoʼok a wilkeneʼexeʼ maʼ ta creertikeneʼex.
37 Tuláakal le máaxoʼob ku tsʼáaikten le Taataoʼ yaan u taaloʼob tin wiknal, le máax xan kun taal tin wiknaleʼ junpuliʼ maʼ ken in tojolchʼinte.
38 Tumen tsʼoʼok in wéemel teʼ kaʼan utiaʼal in beet le baʼax u kʼáat le máax túuxtenoʼ, maʼ utiaʼal ka in beet baʼax in kʼáatiʼ.
39 Lelaʼ letiʼe baʼax u kʼáat le máax túuxtenoʼ: maʼ in satik mix juntúul tiʼ le máaxoʼob u tsʼaamajtenoʼ, baʼaxeʼ ka in kaʼa kuxkíint teʼ tu tsʼook kʼiinoʼ.
40 Tumen lelaʼ letiʼe baʼax u kʼáat in Taataoʼ: ka yanak kuxtal minaʼan u xuul tiʼ tuláakal le máax ku kʼamik le Paal yéetel ku tsʼáaik u fe tiʼ letiʼoʼ, teen túuneʼ yaan in kaʼa kuxkíintik teʼ tu tsʼook kʼiinoʼ».
41 Le oʼolaleʼ le judíoʼoboʼ káaj u x-mukul tʼaanoʼob tu contra úuchik u yaʼalik: «Teen le waaj éem teʼ kaʼanoʼ»,
42 ka joʼopʼ u yaʼalikoʼob: «¿Maʼ wa letiʼe Jesús u paal Joseaʼ? ¿Maʼ wa letiʼe máax k-kʼaj óoltmaj u taata yéetel u maamaoʼ? ¿Baʼaxten túun beoraaʼ táan u yaʼalik: ‹Teneʼ tsʼoʼok in wéemel teʼ kaʼanoʼ›?».
43 Jesús túuneʼ tu núukajtiʼob: «Xuʼuluk a x-mukul tʼaaneʼex ta baatsileʼex.
44 Mix máak jeʼel u páajtal u taal tin wiknal wa maʼ letiʼe Taata, le máax túuxten, natsʼikoʼ; teen túuneʼ yaan in kaʼa kuxkíintik teʼ tu tsʼook kʼiinoʼ.
45 Tsʼíibtaʼaniliʼ tumen le Profetaʼoboʼ: ‹Tuláakloʼobeʼ yaan u kaʼansaʼaloʼob tumen Jéeoba›. Tuláakal máax tsʼoʼok u yuʼubik baʼax ku yaʼalik le Taata yéetel tsʼoʼok u kaanbaleʼ, ku taal tin wiknal.
46 Lelaʼ maʼ u kʼáat u yaʼal wa yaan máax tsʼoʼok u yilik le Taataoʼ, baʼaxeʼ chéen le máax tiʼ Dios u taal tsʼoʼok u yilik le Taataoʼ.
47 Jach tu jaajil kin waʼalikteʼex: Le máax ku creertikeneʼ yaan kuxtal minaʼan u xuul tiʼ.
48 »Teen u waajil le kuxtaloʼ.
49 A úuchben láakʼtsileʼexeʼ tu jaantoʼob le maná teʼ desiertooʼ, baʼaleʼ kíimoʼob.
50 Lelaʼ letiʼe waaj ku yéemel teʼ kaʼanoʼ, utiaʼal ka jaantaʼak tumen jeʼel máaxakeʼ, yéetel beyoʼ maʼ u kíimil le máax kun jaantikoʼ.
51 Teen le kuxaʼan waaj éem teʼ kaʼanoʼ, le máax kun jaantik le waajaʼ yaan u kuxtal mantatsʼ; tsʼoʼoleʼ le waaj ken in tsʼáaoʼ letiʼe in bakʼel ken in tsʼáa yoʼolal u kuxtal le yóokʼol kaaboʼ».
52 Yoʼolal lelaʼ le judíoʼoboʼ káaj u baʼateltʼaanoʼob tu baatsiloʼob, yéetel joʼopʼ u yaʼalikoʼob: «Le máakaʼ, ¿bix jeʼel u páajtal u tsʼáaiktoʼon u bakʼel utiaʼal k-jaanteʼ?».
53 Jesús túuneʼ tu yaʼalajtiʼob: «Jach tu jaajil kin waʼalikteʼex: Wa maʼ ta jaantkeʼex u bakʼel u Paal máak yéetel wa maʼ ta wukʼikeʼex u kʼiʼikʼeleʼ, junpuliʼ minaʼanteʼex kuxtal.
54 Le máax ku jaantik in bakʼel yéetel ku yukʼik in kʼiʼikʼeleʼ yaan u yantal kuxtal minaʼan u xuul tiʼ, yéetel teneʼ yaan in kaʼa kuxkíintik teʼ tu tsʼook kʼiinoʼ;
55 tumen in bakʼeleʼ jach maʼalob utiaʼal jaantbil, yéetel in kʼiʼikʼeleʼ jach maʼalob utiaʼal ukʼbil.
56 Le máax ku jaantik in bakʼel yéetel ku yukʼik in kʼiʼikʼeleʼ, yaan u pʼáatal tin wéetel, teen xaneʼ yaan in pʼáatal tu yéetel.
57 Jeʼel bix tu túuxtilen le kuxaʼan Taataoʼ, yéetel teen kuxaʼanen tu yoʼolal le Taataoʼ, le máax xan ku jaantik in bakʼeleʼ, jach tu jaajil yaan u kuxtal tin woʼolal.
58 Lelaʼ letiʼe waaj éem teʼ kaʼanoʼ. Maʼ jeʼex le tu jaantaj le a úuchben láakʼtsileʼexoʼ, baʼaleʼ ka tsʼoʼokeʼ kíimoʼob. Le máax ku jaantik le waajaʼ yaan u kuxtal mantatsʼ».
59 Le baʼaloʼobaʼ tu kaajil Capernaum tu yaʼalaj, le táan kaʼach u kaʼansaj tu táan yaʼabkach máakoʼob u muchʼmubaʼoboʼ.
60 Le oʼolaleʼ yaʼab tiʼ u disipuloʼobeʼ, ka tu yuʼuboʼob lelaʼ, tu yaʼaloʼob: «Le kaʼansaj ku beetik le máakaʼ jach kʼaas u yuʼubaʼal, ¿máax jeʼel u páajtal u yuʼubikeʼ?».
61 Baʼaleʼ Jesuseʼ tu naʼataj táan u x-mukul tʼaan u disipuloʼob tu yoʼolal lelaʼ, ka tu yaʼalajtiʼob: «¿Ku beetik wa a tʼóochpajleʼex lelaʼ?
62 ¿Kux túun wa ka a wileʼex u naʼakal u Paal máak teʼ tuʼux yaan kaʼachoʼ?
63 U kiliʼich muukʼ Dioseʼ letiʼe baʼax ku tsʼáaik kuxtaloʼ, le bakʼoʼ mix baʼal u biilal. Le baʼaxoʼob tsʼoʼok in waʼalikteʼexoʼ tiʼ kiliʼich muukʼ u taaloʼob yéetel ku tsʼáaikoʼob kuxtal.
64 Baʼaleʼ yaan jujuntúul tiʼ teʼexeʼ maʼ tu creertik». Tumen desde tu káajbaleʼ Jesuseʼ u yojel kaʼach máaxoʼob le maʼatech u creertikoʼoboʼ, bey xan máax le kun traicionartikoʼ.
65 Le beetkeʼ tu yaʼalajtiʼob: «Le oʼolal tsʼoʼok in waʼalikteʼex: Mix máak jeʼel u páajtal u taal tin wiknal wa maʼ letiʼe Taata tsʼáaik u páajtalil tiʼoʼ».
66 Yoʼolal lelaʼ yaʼab tiʼ u disipuloʼobeʼ suunajoʼob tiʼ le baʼaxoʼob tu pʼatoʼob paachiloʼ, yéetel xuʼul u máanoʼob tu yéetel.
67 Le oʼolaleʼ Jesuseʼ tu yaʼalaj tiʼ le doce apostoloʼoboʼ: «Teʼexeʼ maʼ a kʼáateʼex bin xaniʼ, ¿máasaʼ?».
68 Simón Pedroeʼ tu núukajtiʼ: «Yuumtsil, ¿máax yiknal jeʼel k-bineʼ? Techeʼ ka kaʼansik baʼaloʼob ku bisik máak tiʼ kuxtal minaʼan u xuul;
69 toʼon xaneʼ tsʼoʼok k-creertikech, yéetel tsʼoʼok k-kʼuchul ojéelteʼ, teech le j-Kiliʼich túuxtaʼan tumen Diosoʼ».
70 Jesuseʼ tu yaʼalajtiʼob: «Teen yéeyeʼex ta doceileʼex, ¿máasaʼ? Baʼaleʼ juntúul tiʼ teʼexeʼ bey jeʼex le Kʼaasilbaʼaloʼ».*
71 U jaajileʼ letiʼeʼ táan kaʼach u tʼaan tiʼ Judas u paal Simón Iscariote; tumen Judaseʼ letiʼe máax kaʼach kun traicionartikoʼ, kex letiʼeʼ juntúul tiʼ le doce apostoloʼob kaʼachoʼ.
Notas
^ Ilaʼak u tsolajil Mt 20:2.
^ Le tʼaan ich griegooʼ maʼatech u yeʼesik wa maas nojoch Andrés tiʼ Pedro wa maas chichan.
^ Lit.: «Diablo», u kʼáat u yaʼaleʼ j-líiʼsaj tʼaan.
