Juan 7:53–8:59
Tsʼeʼetsʼek tiʼ le úuchben tsʼíiboʼob jach kʼamaʼan baʼax ku yaʼalikoʼoboʼ maʼatech u taaskoʼob le versículo 53 mix le yáax 11 versiculoʼob tiʼ le capítulo 8. Le versiculoʼobaʼ (kex maʼ jach juntakáaliliʼ bix u yaʼalaʼal ichil le jejeláas úuchben tsʼíiboʼob yéetel bibliaʼob ich griegooʼ), bey u yaʼalikoʼobaʼ:
53 Ka tsʼoʼok túuneʼ cada juntúuleʼ bin tu yotoch.
8 Baʼaleʼ Jesuseʼ bin tu Puʼukil le Olivoʼoboʼ.
2 Ka sáaschajeʼ bin tu kaʼatéen teʼ templooʼ; tuláakal u kajnáaliloʼob le kaajoʼ joʼopʼ u taaloʼob tu yiknal, letiʼ túuneʼ kulajeʼ ka joʼopʼ u kaʼanskoʼob.
3 Teʼ súutuk túunoʼ le escribaʼob* yéetel le fariseoʼoboʼ tu taasoʼob juntúul koʼolel chuʼuk núupchilikbal yéetel juntúul xiib maʼ u yíichamiʼ, ka tsʼoʼok u beetkoʼob u waʼatal chúumuk tiʼ letiʼobeʼ,
4 tu yaʼaloʼob tiʼ Jesús: «J-Kaʼansaj, le koʼolelaʼ chuʼuk núupchilikbal yéetel juntúul xiib maʼ u yíichamiʼ.
5 U Ley Moiseseʼ ku yaʼalik kʼaʼabéet k-muruxtuntik le koʼoleloʼob ku beetkoʼob junpʼéel baʼal beyaʼ. Techeʼ ¿baʼax ka waʼalik?».
6 Baʼaleʼ lelaʼ chéen táan kaʼach u yaʼalikoʼob utiaʼal u túuntkoʼob u yóol utiaʼal ka yanak baʼax oʼolal u takikoʼob u pool. Baʼaleʼ Jesuseʼ chinlajeʼ ka joʼopʼ u tsʼíib teʼ luʼum yéetel u yaal u kʼaboʼ.
7 Tumen seguernaj u kʼáatkoʼobtiʼeʼ, waʼalajeʼ ka tu yaʼalajtiʼob: «Le máax ichileʼex minaʼan u kʼebaneʼ letiʼ ka u yáax chʼin le koʼolel yéetel junpʼéel tuunichoʼ».
8 Jesús túuneʼ chinlaj tu kaʼatéeneʼ ka seguernaj u tsʼíib teʼ luʼumoʼ.
9 Baʼaleʼ le máaxoʼob tu yuʼuboʼob lelaʼ, káaj u jóokʼloʼob jujuntúulil, yáaxeʼ jóokʼ u nuuktakil le kaajoʼ, ka pʼáat Jesús tu juunal bey xan le koʼolel yaan kaʼach chúumuk tiʼ letiʼoboʼ.
10 Jesuseʼ waʼalajeʼ ka tu yaʼalaj: «Koʼolel, ¿tuʼux bin le máakoʼoboʼ? ¿Mix máak wa aʼal kʼaʼabéet a kíimsaʼal?».
11 Le koʼoleloʼ tu yaʼalaj: «Mix máak, Yuumtsil». Jesuseʼ tu yaʼalaj: «Teen xaneʼ maʼ tin waʼalik ka kíimsaʼakech. Xeen; desde bejlaʼeʼ maʼ a kaʼa kʼebantal».
12 Jesús túuneʼ tʼaanaj tu kaʼatéen táan u yaʼaliktiʼob: «Teen u sáasilil yóokʼol kaab. Le máax ku taal tin paacheʼ mix bikʼin kun máan ich éeʼjochʼeʼenil, baʼaxeʼ yaan u tiaʼalintik le sáasil ku tsʼáaik kuxtaloʼ».
13 Le fariseoʼob túunoʼ tu yaʼaloʼobtiʼ: «Techeʼ ta juunal ka jaajkúuntik máaxech; le beetkeʼ le baʼax ka waʼalik ta woʼolaloʼ maʼ jaajiʼ».
14 Jesuseʼ tu núukajtiʼob: «Kex tin juunal kin jaajkúuntik máaxeneʼ, le baʼax kin waʼalik tin woʼolaloʼ jach jaaj, tumen in wojel tuʼux taalen bey xan tuʼux kin bin. Baʼaleʼ teʼexeʼ maʼ a wojleʼex tuʼux taaleniʼ mix tuʼux kin biniʼ.
15 Teʼexeʼ ka juzgareʼex jeʼex u beetik chéen wíinikeʼ, teneʼ mix máak kin juzgartik.
16 Baʼaleʼ wa kin juzgareʼ teneʼ kin beetik jeʼex unajeʼ, tumen maʼ tin juunal yaneniʼ, baʼaxeʼ le Taata máax túuxtenoʼ tiʼ yaan tin wéeteleʼ.
17 Tsʼoʼoleʼ tak teʼ Ley tsʼaʼanteʼexoʼ ku yaʼalik: ‹Wa kaʼatúul máakoʼob jaajkúuntik junpʼéel wa baʼaxeʼ, le baʼax ku yaʼalikoʼoboʼ jach jaaj›.
18 Teneʼ kin jaajkúuntik máaxen, le Taata máax túuxtenoʼ ku jaajkúuntik xan máaxen».
19 Ka túun tu kʼáatoʼobtiʼ: «¿Tuʼux yaan a Taata?». Jesuseʼ tu núukaj: «Teʼexeʼ maʼ a kʼaj óoleneʼexiʼ yéetel maʼ a kʼaj óoleʼex xan in Taataiʼ, tumen wa a kʼaj óoleneʼexeʼ bejlaʼa kaʼach a kʼaj óoleʼex xan in Taataeʼ».
20 Tuláakal le baʼaloʼobaʼ tu yaʼalaj le táan u kaʼansaj teʼ templooʼ, le waʼalakbal teʼ tuʼux yaan u nuʼukulil tuʼux ku jalkʼesaʼal taakʼinoʼ. Baʼaleʼ mix máak mache, tumen maʼ kʼuchuk u yorailiʼ.
21 Ka túun tu yaʼalajtiʼob tu kaʼatéen: «Teneʼ táan in bin; teʼexeʼ yaan a máan a kaxteneʼex baʼaleʼ yaan a kíimleʼex ichil a kʼebaneʼex. Teʼ tuʼux kin binoʼ teʼexeʼ maʼ tu páajtal a taaleʼexiʼ».
22 Le oʼolaleʼ, le judíoʼoboʼ káaj u yaʼalikoʼob: «¿Máasaʼ maʼ táan u tuklik u kíimskubaiʼ? Tumen ku yaʼalik: ‹Teʼ tuʼux kin binoʼ teʼexeʼ maʼ tu páajtal a taaleʼexiʼ›».
23 Letiʼ túuneʼ tu yaʼalajtiʼob: «Teʼexeʼ teʼ kúuchiloʼob yaan kabal a taaleʼexoʼ, teneʼ teʼ kúuchiloʼob yanoʼob kaʼanal in taaloʼ. Teʼexeʼ yóokʼol kaabileʼex, teneʼ maʼ yóokʼol kaabileniʼ.
24 Le oʼolal tin waʼalajteʼex: Yaan a kíimleʼex ichil a kʼebaneʼex. Tumen wa maʼ ta creertikeʼex teen le máax aʼalaʼan kun taaloʼ, yaan a kíimleʼex ichil a kʼebaneʼex».
25 Le oʼolaleʼ, letiʼobeʼ tu kʼáatoʼobtiʼ: «¿Máaxechiʼ?». Jesuseʼ tu yaʼalajtiʼob: «¿Baʼax tiaʼal ku seguer in tʼaan ta wéeteleʼex?
26 Yaʼab baʼax yaan in waʼal ta woʼolaleʼex utiaʼal in juzgartikeʼex. U jaajileʼ le máax túuxtenoʼ mantatsʼ ku yaʼalik u jaajil. Le baʼaxoʼob xan tin wuʼuyaj u yaʼalikoʼ letiʼe baʼaxoʼob kin waʼalik way yóokʼol kaabaʼ».
27 Letiʼobeʼ maʼ tu naʼatoʼob wa táan kaʼach u tʼaan tiʼ le Taataoʼ.
28 Le oʼolaleʼ, Jesuseʼ tu yaʼalaj: «Ken a líiʼseʼex u Paal máak tiʼ junpʼéel cheʼeʼ, tiʼ ken a wojéelteʼex teen le máak jeʼeloʼ, yéetel maʼ tin beetik mix baʼal chéen tu juunal in wóol; baʼaxeʼ le baʼaloʼobaʼ kin waʼalik jeʼex u kaʼansmilten le Taataoʼ.
29 Tsʼoʼoleʼ le máax túuxtenoʼ tiʼ yaan tin wéeteleʼ; letiʼeʼ maʼ u pʼaten chéen tin juunaliʼ, tumen mantatsʼ kin beetik le baʼaxoʼob uts tu tʼaanoʼ».
30 Úuchik u yaʼalik le baʼaloʼobaʼ yaʼab máakoʼob tu tsʼáaj u fejoʼob tiʼ letiʼ.
31 Jesús túuneʼ seguernaj u yaʼalik tiʼ le judíoʼob tu tsʼáaj u fejoʼob tiʼ letiʼoʼ: «Wa ku pʼáatal ta puksiʼikʼaleʼex baʼax kin waʼalikeʼ, jach tu jaajil in disipuloʼex;
32 yaan a kʼaj óoltikeʼex le jaajoʼ, le jaaj túunoʼ yaan u jáalkʼabtikeʼex».
33 Letiʼobeʼ tu yaʼaloʼobtiʼ: «Toʼoneʼ u paalaloʼon Abrahán, tsʼoʼoleʼ mix juntéen palitsiltaʼakoʼon tumen mix máak. ¿Baʼaxten túun ka waʼalik: ‹Yaan a jáalkʼabtaʼaleʼex›?».
34 Jesuseʼ tu núukajtiʼob: «Jach tu jaajil kin waʼalikteʼex: Tuláakal máax ku kʼebantaleʼ palitsiltaʼan tumen le kʼebanoʼ.
35 Tsʼoʼoleʼ le palitsiloʼ maʼ mantatsʼ kun pʼáatal teʼ najoʼ, baʼaleʼ le paaloʼ mantatsʼ kun pʼáatliʼ.
36 Le oʼolaleʼ wa ka jáalkʼabtaʼaleʼex tumen le Paaloʼ, jach tu jaajil yaan a pʼáatleʼex jáalkʼabil.
37 Teneʼ in wojel u paalaleʼex Abrahán, baʼaleʼ a kʼáat a kíimseneʼex tumen maʼ tu pʼáatal ta puksiʼikʼaleʼex le baʼaxoʼob kin waʼalikoʼ.
38 Tuláakal le baʼaxoʼob tin wilaj le tiaʼanen kaʼach tu yiknal in Taataoʼ, letiʼe baʼaxoʼob xan kin kaʼansikoʼ; teʼex xaneʼ ka beetkeʼex le baʼaxoʼob tsʼoʼok u yaʼalaʼalteʼex tumen a taataʼexoʼ».
39 Letiʼobeʼ tu yaʼaloʼobtiʼ: «K-taataeʼ Abrahán». Jesuseʼ tu yaʼalajtiʼob: «Wa u paalaleʼex Abrahaneʼ beeteʼex le baʼaxoʼob tu beetaj Abrahanoʼ.
40 Baʼaleʼ beoraaʼ taak a kíimskeneʼex, kex tsʼoʼok in waʼalikteʼex le u jaajil tin kanaj tiʼ Diosoʼ. Abrahaneʼ maʼ tu beetaj le baʼax ka beetkeʼexoʼ.
41 Teʼexeʼ táan a beetkeʼex le baʼax ku beetik a taataʼexoʼ». Letiʼobeʼ tu yaʼaloʼobtiʼ: «Toʼoneʼ maʼ síijoʼon tiʼ núupkʼebaniʼ;* chéen juntúuliliʼ k-taata yaan, Dios».
42 Jesuseʼ tu yaʼalajtiʼob: «Wa tu jaajil Dios a Taataʼexeʼ, bejlaʼa kaʼach a yaabiltmeneʼexeʼ, tumen Dios túuxten, yéetel tu yoʼolaleʼ way yaneneʼ. Jach tu jaajil maʼ chéen tu juunal in wóol taaleniʼ, baʼaxeʼ Letiʼ túuxten.
43 ¿Baʼaxten teʼexeʼ maʼ a wojleʼex le baʼax kin waʼalikoʼ? Tumen maʼ a kʼáat a wuʼuyeʼex in tʼaaniʼ.
44 Teʼexeʼ tiʼ a taataʼex le Kʼaasilbaʼal* a taaleʼexoʼ, yéetel a kʼáat a beeteʼex le baʼaxoʼob uts tu tʼaan a taataʼexoʼ. Letiʼeʼ desde tu káajbaleʼ tu beetuba j-kíimsaj wíinik, maʼ pʼáat ichil le jaajoʼ, tumen le jaajoʼ minaʼan tu puksiʼikʼal. Le ken tuusnakeʼ ku beetik jeʼex suuk u beetkeʼ, tumen letiʼeʼ juntúul j-tuus yéetel letiʼ u taatail le tuusoʼ.
45 Teneʼ táan in waʼalikteʼex u jaajil, baʼaleʼ teʼexeʼ maʼ ta creertikeneʼex.
46 ¿Máax tiʼ teʼex jeʼel u yeʼesik wa yaan tiʼ baʼax kʼebanchajaʼaneneʼ? Wa táan in waʼalik u jaajileʼ, ¿baʼaxten maʼ ta creertikeneʼex?
47 Le máax tiʼ Dios u taaleʼ ku yuʼubik le baʼaxoʼob ku yaʼalik Diosoʼ. Le oʼolal maʼ ta wuʼuyikeʼex baʼax kin waʼalik, tumen maʼ tiʼ Dios a taaleʼexiʼ».
48 Le judíoʼob túunoʼ ka tu yuʼuboʼob lelaʼ, tu yaʼaloʼobtiʼ: «¿Maʼ wa le oʼolal k-aʼalik, techeʼ samaritanoech yéetel okaʼantech demonio?».
49 Jesuseʼ tu núukajtiʼob: «Teneʼ maʼ okaʼanten demonioiʼ, baʼaxeʼ teneʼ kin weʼesik tsiikil tiʼ in Taata, chéen baʼaleʼ teʼexeʼ maʼ ta weʼeskeʼexten tsiikil.
50 Teneʼ maʼ táan in kaxtik ka nojbeʼenkúuntaʼakeniʼ, baʼaleʼ yaan juntúul Máax u kʼáat u beet lelaʼ; letiʼeʼ juntúul Juez.
51 Jach tu jaajil kin waʼalikteʼex: Wa yaan máax ku beetik baʼax kin waʼalikeʼ, mix bikʼin kun kíimil».
52 Le judíoʼoboʼ tu yaʼaloʼobtiʼ: «Beora túunaʼ tsʼoʼok k-ilik jach tu jaajil okaʼantech demonio, tumen Abrahaneʼ kíimi bey xan le profetaʼoboʼ, baʼaleʼ techeʼ ka waʼalik: ‹Wa yaan máax ku beetik baʼax kin waʼalikeʼ, mix bikʼin kun kíimil›.
53 ¿Ka tuklik wa maas nojchech tiʼ k-taata Abrahán kíimoʼ? Si tak le profetaʼoboʼ kíimoʼob, ¿máax túun a taaskaba beyaʼ?».
54 Jesuseʼ tu núukaj: «Wa chéen tin juunal kin nojbeʼenkúuntkinbaeʼ, mix baʼal u biilal le nojbeʼeniloʼ. Baʼaleʼ in Taataeʼ letiʼe máax nojbeʼenkúuntkenoʼ, le máax ka waʼalikeʼex a Dioseʼexoʼ.
55 Chéen baʼaleʼ teʼexeʼ maʼ a kʼaj óoleʼexiʼ. Baʼaleʼ teneʼ in kʼaj óol, yéetel wa ka in waʼal maʼ in kʼaj óoleʼ yaan u pʼáatal chéen táan in tuus jeʼex teʼexeʼ. Baʼaxeʼ teneʼ jach tu jaajil in kʼaj óol yéetel kin beetik baʼax ku yaʼalik.
56 Abrahán a taataʼexeʼ jach yéetel kiʼimak óolal tu páaʼtaj u kʼuchul u kʼiinil in beetik le baʼaloʼobaʼ, tu yilaj túuneʼ ka kiʼimakchaj u yóol».
57 Ka túun aʼalaʼabtiʼ tumen le judíoʼoboʼ: «Mix cincuenta jaʼaboʼob yaantech, baʼaleʼ ¿ka waʼalik tsʼoʼok a wilik Abrahán?».
58 Jesuseʼ tu núukajtiʼob: «Jach tu jaajil kin waʼalikteʼex: Táanil tiʼ u síijil Abrahaneʼ, teneʼ tsʼokaʼaniliʼ in wantaleʼ».
59 Letiʼob túuneʼ tu chʼaʼajoʼob tuunich utiaʼal u chʼiʼinchʼinkoʼob Jesús; baʼaleʼ letiʼeʼ tu balubaeʼ ka jóokʼ teʼ templooʼ.
Notas
^ Máakoʼob jach u kʼaj óoloʼob le Leyoʼ.
^ Le tʼaanaʼ ku meyaj utiaʼal u yúuchul tʼaan tiʼ le jejeláas núupchitaloʼob ku bin tu contra u ley Diosoʼ. Ilaʼak Tipʼ. 4.
^ Lit.: «Diablo», u kʼáat u yaʼaleʼ j-líiʼsaj tʼaan.
