Lucas 13:1-35
13 Teʼ súutuk xan jeʼeloʼ jujuntúul máakoʼobeʼ tu tsikbaltoʼob tiʼ Jesús bix úuchik u kíimsaʼal jujuntúul galileailoʼob tumen Pilato, le táan kaʼach u kʼubkoʼob kíimsbil baʼalcheʼoboʼ.
2 Jesús túuneʼ tu yaʼalajtiʼob: «A tuklikeʼexeʼ le baʼax úuch tiʼ le galileailoʼobaʼ, ¿úuchtiʼob wa tumen maas j-kʼeban máakoʼob ke u maasil galileailoʼoboʼ?
3 Maʼ, maʼ beyiʼ, baʼaxeʼ wa maʼ ta kʼexik a tuukuleʼexeʼ, yaan xan a láaj xuʼulsaʼaleʼex.
4 Le dieciocho máakoʼob xan kíimoʼob le ka lúub u torreil Siloam tu yóokʼoloʼobeʼ, a tuklikeʼexeʼ le baʼax úuchtiʼoboʼ, ¿ku yeʼesik wa maas yaʼab u siʼipiloʼob ke tuláakal u kajnáaliloʼob Jerusalén?
5 Maʼ, maʼ beyiʼ, baʼaxeʼ wa maʼ ta kʼexik a tuukuleʼexeʼ, yaan xan a láaj xuʼulsaʼaleʼex jeʼex úuchik u xuʼulsaʼaltiʼoboʼ».
6 Tsʼoʼoleʼ tu yaʼalajtiʼob le kettʼaanaʼ: «Juntúul máakeʼ u pakʼmaj kaʼach junkúul higuera tu kúuchil u pakʼal uva, ka bin u yil wa yaan u yicheʼ mix junpʼéel tu kaxtiʼ.
7 Ka tu yaʼalaj tiʼ le máax meyajtik le kúuchiloʼ: ‹Ile, tsʼoʼok óoxpʼéel jaʼab káajak in taal in wil wa yaan u yich le higueraaʼ, baʼaleʼ mix junpʼéel u yich in wile. ¡Kúulchʼakte! Tumen wa maʼeʼ le luʼumoʼ maʼ tu páajtal u meyaj utiaʼal yaanal baʼal›.
8 Le máakoʼ tu yaʼalajtiʼ: ‹In tsʼuulil, chaʼa u pʼáatal xan teʼ jaʼabaʼ utiaʼal ka in péeks u luʼumil u baʼpach yéetel ka in tsʼáa u taʼ baʼalcheʼ tu chuun le higueraaʼ;
9 beyoʼ wa ku yichankil ken máanak kʼiineʼ, maʼalob, baʼaleʼ wa maʼ tu yichankileʼ ka chʼakik›».
10 Tiʼ junpʼéel u kʼiinil Sabadoeʼ Jesuseʼ táan kaʼach u kaʼansaj tiʼ junpʼéel sinagoga;
11 teʼeloʼ tiʼ yaan kaʼach juntúul koʼolel tsʼoʼok dieciocho jaʼaboʼob maʼachak yéetel beetaʼak u kʼojaʼantal tumen juntúul demonio; tsʼoʼoleʼ le koʼolelaʼ wuutsʼul u paach yéetel junpuliʼ maʼ tu páajtal u líikʼil.
12 Ka tu yilaj Jesús le koʼoleloʼ, tu yaʼalajtiʼ: «Koʼolel tsʼoʼok u luʼsaʼal le baʼax beetik a kʼojaʼantaloʼ».
13 Tsʼoʼoleʼ ka tu tsʼáaj u kʼab yóokʼol le koʼoleloʼ, letiʼ túuneʼ tu séebaʼanil toj waʼalaji, ka joʼopʼ u nojbeʼenkúuntik Dios.
14 Baʼaleʼ u nojchil le sinagogaoʼ tumen kʼuuxilnajaʼan úuchik u tsʼaʼakal le koʼolel tumen Jesús tu kʼiinil Sabadooʼ, káaj u yaʼalik tiʼ le yaʼabkach máakoʼoboʼ: «Seis kʼiinoʼob yaan utiaʼal u meyaj máak, teʼ kʼiinoʼob túunaʼ koʼoteneʼex utiaʼal ka tsʼaʼakakeʼex, baʼaleʼ maʼ a taaleʼex tu kʼiinil Sábado».
15 Yuumtsil Jesús túuneʼ tu núukajtiʼ, ka tu yaʼalaj: «J-kaʼapʼéel icheʼex, tu kʼiinil Sabadoeʼ, ¿maʼ wa cada juntúul tiʼ teʼexeʼ ku wachʼik u yalakʼ wakax wa u yalakʼ burro teʼ kúuchil tuʼux u kʼaxmaj utiaʼal ka u bis u yukʼ jaʼoʼ?
16 Le oʼolaleʼ, le koʼolel u hija Abrahán tsʼoʼok dieciocho jaʼaboʼob maʼachak tumen Satanasoʼ, ¿maʼ wa túun maʼalob úuchik u jáalkʼabtaʼal tu kʼiinil Sabadoiʼ?
17 Ka tsʼoʼok túun u yaʼalik le baʼaloʼobaʼ, tuláakal le máaxoʼob pʼekmiloʼ sen suʼlakchajoʼob, baʼaleʼ le yaʼabkach máakoʼoboʼ sen kiʼimakchaj u yóoloʼob yoʼolal tuláakal le nukuch baʼaloʼob tu beetoʼ.
18 Le oʼolaleʼ, Jesuseʼ seguernaj u yaʼaliktiʼob: «¿Tiʼ baʼax chíikaʼan u Reino Dios, wa yéetel baʼax ken in kete?
19 Chíikaʼan tiʼ junpʼéel u neekʼ mostaza* chʼaʼab tumen juntúul máak, ka tu pakʼaj tu parcela, le neekʼ túunaʼ káaj u nojochtal ka kʼuch tak u beetuba junpʼéel nojoch cheʼ, le chʼíichʼoʼob túunoʼ tu beetaj u kʼuʼob tu kʼaboʼob».
20 Jesuseʼ tu kaʼa aʼalaj: «¿Yéetel baʼax ken in ket u Reino Dios?
21 Bey jeʼex le levadura tu chʼaʼaj juntúul koʼolel utiaʼal u xaʼakʼtik yéetel diez kilos harina tak ka líikʼ tuláakal le juuchʼoʼ».
22 Tsʼoʼoleʼ le táan u bin Jerusalenoʼ, Jesuseʼ máan kajalkaaj bey xan tiʼ mejen kajtaliloʼob táan u kaʼansaj.
23 Juntúul máak túuneʼ tu kʼáatajtiʼ: «Yuumtsil, ¿junpʼíit wa le máakoʼob ken u salvartubaʼoboʼ?». Letiʼeʼ tu yaʼalajtiʼob:
24 «Beeteʼex tuláakal le ku páajtal utiaʼal a wookleʼex tiʼ le nuʼunutʼ joonajoʼ, tumen kin waʼalikteʼexeʼ yaʼabeʼ yaan u taaktal u yookloʼobiʼ, baʼaleʼ maʼ kun béeytal u beetkoʼob.
25 Tsʼoʼoleʼ wa u yuumil naj tsʼoʼok u líikʼil u chʼot le joonajoʼ, teʼexeʼ yaan a pʼáatleʼex waʼatal táankab yéetel yaan a kʼoopeʼex táan a waʼalikeʼex: ‹Yuumtsil, jeʼekʼabttoʼon joonaj›. Baʼaleʼ letiʼeʼ yaan u yaʼalikteʼex: ‹Maʼ in kʼaj óoleʼexiʼ›.
26 Teʼex túuneʼ yaan a waʼalikeʼex: ‹Si toʼoneʼ kulajoʼon janal yéetel ukʼul ta wéetel, tsʼoʼoleʼ kaʼansajnajech tu kóokoch bejiloʼob k-kaajal›.
27 Baʼaleʼ letiʼeʼ yaan u yaʼalikteʼex: ‹Maʼ in kʼaj óoleʼexiʼ. ¡Náachkuntabaʼex tiʼ teen, kʼasaʼan máakeʼex!›.
28 Teʼeloʼ tiʼ kan okʼoleʼexiʼ yéetel tiʼ ken a karachʼt a kojeʼex ken a wileʼex Abrahán, Isaak, Jacob yéetel le profetaʼob tu Reino Diosoʼ, baʼaleʼ teʼexeʼ jóoʼsaʼaneʼex táankab.
29 Tsʼoʼoleʼ yaan u taal yaʼab máakoʼob j-lakʼiniloʼob, j-chikʼiniloʼob, j-xamaniloʼob bey xan j-noojoliloʼob, yéetel yaan u kutaloʼob yiknal le mesa teʼ tu Reino Diosoʼ.
30 Tsʼoʼoleʼ, ¡ileʼex!, yaan tiʼ le máaxoʼob yanoʼob táaniloʼ yaan u pʼáatloʼob tu tsʼook, yéetel yaan tiʼ le yanoʼob tu tsʼookoʼ yaan u máanoʼob táanil».
31 Jach teʼ súutuk jeʼeloʼ jujuntúul fariseoʼobeʼ náatsʼoʼob yiknal Jesuseʼ ka tu yaʼaloʼobtiʼ: «Jóokʼen, xeen, tumen Herodeseʼ taak u kíimskech».
32 Jesuseʼ tu yaʼalajtiʼob: «Xeen a waʼaleʼex tiʼ le chʼomakoʼ:* ‹¡Ile! Bejlaʼeʼ táan in jóoʼsik demonioʼob tiʼ le máakoʼoboʼ yéetel táan in tsʼakikoʼob, bey xan sáamal, baʼaleʼ tu yóoxpʼéel kʼiineʼ yaan u tsʼoʼokol›.
33 Chéen baʼaleʼ, bejlaʼeʼ, sáamal, bey xan kaʼabejeʼ yaan in chʼaʼjoʼoltik in bin Jerusalén, tumen juntúul profetaeʼ maʼ unaj u kíimsaʼal paachil tiʼ Jerusaleniʼ.
34 Jerusalén, Jerusalén, teech ka kíimsik le profetaʼob yéetel ka muruxtuntik le máaxoʼob ku túuxtaʼaloʼob ta wiknaloʼ..., ¡jaytéen tin wóotaj in muchʼkíint a paalal jeʼex u muchʼkíintik u mejnil le x-nuk kaax yáanal u xiikʼoʼoboʼ, baʼaleʼ teʼexeʼ maʼ ta wóoteʼexiʼ!
35 ¡Ileʼex! A najileʼexeʼ yaan u xúumpʼattaʼal. Kin waʼalikteʼex: Junpuliʼ maʼ ken a kaʼa ileneʼex tak ken a waʼaleʼex: ‹¡Kiʼikiʼtʼantaʼak le máax ku taal tu kʼaabaʼ Jéeobaoʼ!›».
Notas
^ Ilaʼak Tipʼ. 16.
^ Lelaʼ junpʼéel clase baʼalcheʼ yaan kaʼach tu kaajil Israel, kʼaj óolaʼan jach mañoso.
