Lucas 14:1-35
14 Juntéenjeak tu kʼiinil Sabadoeʼ, Jesuseʼ ook janal tu yotoch juntúul tiʼ u gobernanteiloʼob le fariseoʼoboʼ. Le fariseoʼob túunoʼ káaj u sen ilkoʼob baʼax ku beetik.
2 ¡Ile! Aktáan tiʼ letiʼeʼ tiʼ yaan kaʼach juntúul máak kʼojaʼan tiʼ hidropesía.*
3 Jesús túuneʼ tʼaanajeʼ ka joʼopʼ u yaʼalik tiʼ le fariseoʼoboʼ yéetel tiʼ le máaxoʼob jach u kʼaj óoloʼob le Leyoʼ: «¿Maʼalob wa ka tsʼaʼakak máak tu kʼiinil Sábado, wa maʼ?».
4 Baʼaleʼ mix máak aʼal mix baʼal. Jesús túuneʼ tu machaj le máakoʼ ka tu tsʼakaj, tsʼoʼoleʼ ka tu yaʼalajtiʼ ka xiʼik.
5 Jesús túuneʼ tu yaʼalajtiʼob: «¿Máax ichileʼex wa ka lúubuk juntúul u paal wa juntúul u waakax ich chʼeʼen tu kʼiinil Sábado maʼ ken u jóoʼs tu séebaʼanil?».
6 Baʼaleʼ letiʼobeʼ mix baʼal páajchaj u núukikoʼob yoʼolal le baʼaloʼobaʼ.
7 Jesús túuneʼ ka tu tsʼáaj cuenta bix u yéeyaʼal le maas maʼalob kúuchiloʼob tumen le máaxoʼob invitartaʼanoʼoboʼ, tu yaʼalajtiʼob le kettʼaanaʼ:
8 «Ken u invitartech juntúul máak tiʼ u kʼiinbesajil junpʼéel tsʼoʼokol beeleʼ, maʼ a bin kutal tiʼ le maas maʼalob kúuchiloʼ, tumen maʼ xaaneʼ letiʼeʼ u invitartmaj xan juntúul máak maas kʼaj óolaʼan tiʼ teech;
9 tsʼoʼoleʼ wa ku taal ta wiknal le máax invitarteʼexoʼ yéetel ku yaʼaliktech: ‹Líikʼen utiaʼal ka kulak le máakaʼ›, teech túuneʼ yéetel suʼlakil kan lukʼul teʼeloʼ utiaʼal ka xiʼikech teʼ kúuchil yaan maas paachiloʼ.
10 Baʼaleʼ le ken invitartaʼakecheʼ xeen kutal teʼ kúuchil yaan maas paachiloʼ, tumen beyoʼ ken taalak le máax invitartechoʼ yaan u yaʼaliktech: ‹Amigo, máankech way táanileʼ›. Bey túunoʼ yaan a nojbaʼalkúuntaʼal tu táan tuláakal le máaxoʼob invitartaʼanoʼob xanoʼ.
11 Tumen le máax ku nojbaʼalkúuntkubaeʼ yaan u mixbaʼalkúuntaʼal, baʼaleʼ le máax ku mixbaʼalkúuntkubaeʼ yaan u nojbaʼalkúuntaʼal».
12 Ka tsʼoʼokeʼ Jesuseʼ tu yaʼalaj xan tiʼ le máax invitartoʼ: «Le ken a beet junpʼéel janal wa junpʼéel cenaeʼ, maʼ a invitartik a amigoʼob, a sukuʼunoʼob, a láakʼtsiloʼob mix le a vecinoʼob ayikʼaloʼoboʼ. Tumen maʼ xaaneʼ tuláakʼ kʼiineʼ letiʼobeʼ yaan xan u invitartikechoʼob, lelaʼ bey ka u boʼotoʼobtech le baʼax ta beetoʼ.
13 Baʼaleʼ ken a beet junpʼéel kʼiinbesajeʼ invitart le óotsiloʼoboʼ, le móochoʼoboʼ bey xan le chʼóopoʼoboʼ;
14 beyoʼ yaan u kiʼimaktal a wóol, tumen tiʼ letiʼobeʼ minaʼan u modoil u boʼotkoʼobtech. Baʼaleʼ yaan u boʼotaʼaltech le ken kaʼa kuxkíintaʼak le máaxoʼob toj u kuxtaloʼoboʼ.
15 Juntúul tiʼ le máaxoʼob xan invitartaʼanoʼoboʼ, le ka tu yuʼubaj le baʼaloʼobaʼ, tu yaʼalaj tiʼ Jesús: «Kiʼimak u yóol le máax kun jaantik waaj tu Reino Diosoʼ».
16 Jesús túuneʼ tu yaʼalajtiʼ: «Juntúul máakeʼ le ka tu beetaj junpʼéel nojoch cenaeʼ tu invitartaj yaʼab máakoʼob.
17 Le ka kʼuch u yorail le cenaoʼ tu túuxtaj u palitsil u yaʼal tiʼ le máaxoʼob invitartaʼanoʼoboʼ: ‹Koʼoteneʼex tumen tsʼoʼok u listokíintaʼal tuláakal le baʼaloʼoboʼ›.
18 Baʼaleʼ cada juntúul tiʼ letiʼobeʼ káaj u kaxtik baʼal u yaʼaloʼob utiaʼal maʼ u binoʼobiʼ. Le yáaxoʼ tu yaʼalajtiʼ: ‹Tin manaj junpʼéel kool yéetel kʼaʼabéet in bin in wile; kin kʼáatiktech ka a disculparten›.
19 Uláakʼeʼ tu yaʼalaj xan: ‹Tin manaj diez wakaxoʼob* utiaʼal u bukʼlaʼal luʼum yéetel kʼaʼabéet in bin in wil wa maʼalob u meyajoʼob; kin kʼáatiktech ka a disculparten›.
20 Uláakʼeʼ tu yaʼalaj xan: ‹Táant u tsʼoʼokol in beeleʼ, le oʼolal maʼ tu páajtal in bin›.
21 Le palitsil túunoʼ suunaj yiknal u tsʼuulileʼ, ka tu láaj tsolajtiʼ le baʼax aʼalaʼabtiʼoʼ. U yuumil le naj túunoʼ jach pʼuʼujeʼ ka tu yaʼalaj tiʼ u palitsil: ‹Xeen tu séebaʼanil teʼ noj bejoʼoboʼ bey xan tu nuʼunutʼ bejiloʼob le kaajoʼ ka a taas le óotsiloʼoboʼ, le chʼóopoʼoboʼ bey xan le móochoʼoboʼ›.
22 Chéen pʼelak tsʼoʼokik u beetkeʼ, le palitsiloʼ tu yaʼalaj: ‹In tsʼuulil, le baʼax ta waʼaloʼ tsʼoʼok u beetaʼal, baʼaleʼ láayliʼ yaan lugar pʼaatleʼ›.
23 Le tsʼuul túunoʼ tu yaʼalaj tiʼ u palitsiloʼ: ‹Xeen teʼ bejoʼoboʼ bey xan teʼ tuʼuxoʼob maʼ yaʼab u máan máakoʼ, yéetel beet u yookloʼob utiaʼal ka chuʼupuk in wotoch.
24 Tumen kin waʼalikteʼex: Tiʼ le xiiboʼob tin yáax invitartoʼ mix juntúul ken u túunt le cena tin beetoʼ›».
25 Le táan u bin Jesusoʼ, yaʼabkach máakoʼob xan ku binoʼob tu yéetel; letiʼeʼ tu sutubaeʼ ka tu yaʼalajtiʼob:
26 «Le máax ku taal tin wiknal, baʼaleʼ maʼ tu pʼektik u taata, u maama, u yatan, u paalal, u sukuʼunoʼob, u kiikoʼob wa tak u kuxtaleʼ,* maʼ tu páajtal u beetkuba in disipulo.
27 Le máax maʼ tu kuchik u cheʼil u muʼyaj* utiaʼal ka taalak tin paacheʼ, maʼ tu páajtal u beetkuba in disipulo.
28 Tukulteʼex lelaʼ: ¿Máax ichileʼex wa u kʼáat u beet junpʼéel torreeʼ maʼ tu kutal táanil u tukult bukaʼaj ken u tojolttiʼ, ka u yil wa jeʼel u chúukpajal u tojol tiʼ utiaʼal u tsʼoʼoksikeʼ?
29 Wa maʼ tu beetik lelaʼ, maʼ xaaneʼ chéen u chuunpakʼil ken u tsʼáae, baʼaleʼ maʼ kun páajtal u tsʼoʼoksik; tuláakal túun le máaxoʼob kun ilkoʼ, yaan u káajal u pʼaʼastikoʼob,
30 táan u yaʼalikoʼob: ‹Le máakaʼ tu káajsaj le torreoʼ, baʼaleʼ maʼ páajchaj u tsʼoʼoksikiʼ›.
31 Tsʼoʼoleʼ wa juntúul rey yaan diez mil u soldadoʼob ku bin baʼateʼel tu contra juntúul rey yaan veinte mil u soldadoʼobeʼ, ¿maʼ wa tu kutal tsikbal táanil yéetel le máaxoʼob áantkoʼ utiaʼal ka u yil wa jeʼel u ganartik le baʼateloʼ bey xan wa maʼatan?
32 U jaajileʼ, wa ku yilik maʼ tu páajtaleʼ, mientras náach yaan le uláakʼ reyoʼ, letiʼeʼ ku túuxtik junmúuchʼ máakoʼob utiaʼal ka tʼaanakoʼob tu yéetel, bey xan ka u yaʼaloʼobtiʼ maʼ u kʼáatoʼob baʼateliʼ.
33 Le oʼolal jach tu jaajil kin waʼaliktech: mix juntúul tiʼ teʼex jeʼel u páajtal u beetkuba in disipulo wa maʼ tu pʼatik tuláakal le baʼaloʼob yaantiʼoʼ.
34 »U jaajileʼ, le taʼaboʼ jach maʼalob. Baʼaleʼ wa ku saʼatal u chʼóochʼileʼ, ¿baʼax yéetel ken a suteʼex u chʼóochʼil?
35 Maʼ patal mix utiaʼal le luʼumoʼ mix utiaʼal ka xaʼakʼtaʼak yéetel u taʼ le baʼalcheʼoboʼ. Le oʼolal ku puʼulul táankab. Le máax yaan u xikin utiaʼal u yuʼubik tʼaaneʼ, u yuʼub lelaʼ».
Notas
^ Wa: «edema», lelaʼ junpʼéel kʼojaʼanil ku beetik u chuʼupul u wíinklil máak yéetel jaʼ.
^ Lit.: «cinco pares wakax».
^ Wa: «almaeʼ». Gr.: sikjé. Ilaʼak Tipʼ. 7A.
^ Ilaʼak Tipʼ. 6.
