Lucas 15:1-32
15 Bey túunoʼ, tuláakal le j-kʼam impuestoʼob yéetel le j-kʼeban máakoʼoboʼ seguernaj u náatsʼloʼob yiknal Jesús utiaʼal u yuʼuboʼob u tsikbal.
2 Le oʼolal le fariseoʼob yéetel le escribaʼoboʼ seguernaj u x-mukul tʼaanoʼob táan u yaʼalikoʼob: «Le máakaʼ ku kʼamik yéetel kiʼimak óolal le j-kʼeban máakoʼoboʼ yéetel ku janal tu yéeteloʼob».
3 Jesús túuneʼ tu yaʼalajtiʼob le kettʼaanaʼ:
4 «Wa juntúul ichileʼex yaan cien u túulul u yalakʼ taman, ku saʼatal juntúuleʼ, ¿maʼ wa tu pʼatik le noventinueve u túulal teʼ desierto utiaʼal ka xiʼik u kaxt le saatloʼ?
5 Ken u kaxteʼ, ku kiʼimaktal u yóol yéetel ku naʼaksik tu keléembal.
6 Tsʼoʼoleʼ ken kʼuchuk tu yotocheʼ, ku tʼanik u amigoʼob bey xan u vecinoʼobeʼ, ku yaʼaliktiʼob: ‹Kiʼimakchajak a wóoleʼex tin wéetel tumen tsʼoʼok in kaxtik le in walakʼ taman saatal kaʼachoʼ›.
7 Kin waʼalikteʼexeʼ maas yaan u yantal kiʼimak óolal teʼ kaʼan yoʼolal juntúul j-kʼeban máak ku kʼexik u tuukul ke yoʼolal noventinueve utsul máakoʼob maʼ kʼaʼabéet u kʼexik u tuukuloʼobiʼ.
8 »Tsʼoʼoleʼ wa juntúul koʼolel yaan diez u pʼéelal u taakʼinil dracma* tiʼ, ku satik junpʼéeleʼ, ¿maʼ wa ku tʼabik junpʼéel lámpara, ku míistik u yotoch yéetel ku xakʼaltik tubeel tak ken u kaxte?
9 Ken u kaxt túuneʼ, ku tʼanik u amigaʼob yéetel u vecinaʼob yéetel ku yaʼaliktiʼob: ‹Kiʼimakchajak a wóoleʼex tin wéetel tumen tsʼoʼok in kaxtik le junpʼéel u taakʼinil dracma tin sataj kaʼachoʼ›.
10 Bey xan kin waʼalikteʼexeʼ, u angeloʼob Dioseʼ ku kiʼimaktal u yóoloʼob ken u kʼex u tuukul juntúul j-kʼeban máak».
11 Ka tsʼoʼokeʼ tu yaʼalaj: «Juntúul máakeʼ yaan kaʼach kaʼatúul u paalal.
12 Le maas chichanoʼ tu yaʼalaj tiʼ u taata: ‹In yuum, tsʼáaten le bukaʼaj ken in tiaʼalint tiʼ le baʼaxoʼob yaantechoʼ›. Le taatatsil túunoʼ tu jatsajtiʼob le baʼaxoʼob yaantiʼoʼ.
13 Maʼ yaʼab kʼiinoʼob tiʼ leloʼ, le paal maas chichanoʼ tu molaj tuláakal le baʼaloʼob tsʼaʼabtiʼoʼ ka bin táanxel luʼumil tiʼ junpʼéel náanach kaaj, teʼ túunoʼ tu bisaj junpʼéel kʼaakʼas kuxtal, ka tu xuʼuxupaj le baʼaxoʼob tsʼaʼabtiʼoʼ.
14 Ka tsʼoʼok u láaj xupkeʼ, yanchaj junpʼéel jach nojoch wiʼijil tiʼ tuláakal le luʼumiloʼ, le xiʼipal túunoʼ káaj u máansik óotsilil.
15 Yoʼolal lelaʼ yanchaj tak u bin yiknal juntúul tiʼ u kajnáaliloʼob le luʼumoʼ, ka túun túuxtaʼab u kanáant kʼéekʼenoʼob tu kajtalil le máakoʼ.
16 Le xiʼipalaʼ ku taaktal kaʼach u jaantik u yoʼoch le kʼéekʼenoʼoboʼ; baʼaleʼ mix máak tsʼáaik baʼal u jaante.
17 »Ka kʼaʼaj u yiikʼeʼ tu yaʼalaj: ‹¡Bukaʼaj máakoʼob ku meyajoʼob yiknal in taataeʼ yaan yaʼab waaj utiaʼal u jaantoʼob, baʼaleʼ teneʼ táan in kíimil yéetel wiʼij wayeʼ!
18 Yaan in líikʼil utiaʼal ka xiʼiken tu yiknal in taata, yaan xan in waʼaliktiʼ: «In yuum, tsʼoʼok in kʼebantal tu contra Dios* yéetel ta contra.
19 Maʼ tin náajmatik u yaʼalaʼal a paalen. Beeten jeʼex juntúul tiʼ a j-meyajoʼobeʼ»›.
20 Letiʼ túuneʼ líikʼeʼ ka bin teʼ tuʼux yaan u taataoʼ. Desde náach u taaleʼ ilaʼab tumen u taataeʼ ka chʼaʼab óotsilil tiʼ; u taata túuneʼ bin áalkabileʼ, tu méekʼeʼ ka tu tsʼuʼutsʼaj.
21 Le xiʼipal túunoʼ tu yaʼalajtiʼ: ‹In yuum, tsʼoʼok in kʼebantal tu contra Dios yéetel ta contra. Maʼ tin náajmatik u yaʼalaʼal a paalen. Beeten jeʼex juntúul tiʼ a j-meyajoʼobeʼ›.
22 Baʼaleʼ le taatatsiloʼ tu yaʼalaj tiʼ u palitsiloʼob: ‹¡Séebkunteʼex!, jóoʼseʼex junpʼéel chowak nookʼ, u maas maʼalobil, ka a takeʼextiʼ, yéetel tsʼáaʼex junpʼéel anillo tu kʼab bey xan xanab tu yook.
23 Taaseʼex xan le chan wakax polokkíintaʼanoʼ, kíimseʼex ka k-jaanteʼex yéetel kiʼimakchajak k-óol.
24 Tumen le in paalaʼ kimen kaʼachi, baʼaleʼ kaʼa kuxlaji; saatal kaʼachi, baʼaleʼ kaxtaʼabi›. Ka túun káaj u kiʼimakkúuntik u yóoloʼob.
25 »Le u paal maas nojoch túunoʼ tiʼ yaan kaʼach ich kooleʼ; ka joʼopʼ u bin u náatsʼal tu yiknal le najoʼ, tu yuʼubaj táan u yúuchul paax yéetel óokʼot.
26 Ka tu tʼanaj juntúul tiʼ le máaxoʼob ku meyajoʼob teʼ najoʼ, ka tu kʼáatajtiʼ baʼax le ku beetaʼaloʼ.
27 Letiʼeʼ tu yaʼalajtiʼ: ‹A wíitsʼineʼ tsʼoʼok u suut, a taata túuneʼ tu kíimsaj le chan wakax polokkíintaʼanoʼ, tumen toj u yóol úuchik u suut a wíitsʼin›.
28 Baʼaleʼ letiʼeʼ pʼuʼuji yéetel maʼ tu yóotaj ookliʼ. Ka túun jóokʼ u taataeʼ, ka joʼopʼ u sen aʼaliktiʼ ka okok.
29 Letiʼeʼ tu yaʼalaj tiʼ u taata: ‹Teneʼ úuch káajak in meyajtikech bey juntúul palitsileʼ, yéetel mix juntéen pʼáat maʼ in beetik baʼax ka waʼalikten, baʼaleʼ techeʼ mix juntéen ta tsʼáajten juntúul táankelem chivo utiaʼal in jaant yéetel in amigoʼob.
30 Baʼaleʼ chéen pʼelak kʼuchik le a paal tu xuʼuxupaj* yéetel x-máanil koʼoleloʼob le baʼaxoʼob yaantechoʼ, ta kíimsaj u jaant le chan wakax polokkíintaʼanoʼ›.
31 Letiʼ túuneʼ tu yaʼalajtiʼ: ‹In paal, techeʼ mantatsʼ way yanech tin wiknaleʼ, yéetel tuláakal le baʼaxoʼob in tiaʼaloʼ a tiaʼal xan;
32 baʼaleʼ bejlaʼeʼ yanchaj baʼax oʼolal u kiʼimaktal k-óol, tumen le a wíitsʼinaʼ kimen kaʼachi baʼaleʼ kaʼa kuxlaji, saatal kaʼachi baʼaleʼ kaxtaʼabi›».
Notas
^ Junpʼéel dracmaeʼ óoliʼ u tojol u meeyjil junpʼéel kʼiin. Ilaʼak Tipʼ. 11.
^ Lit.: «kaʼan».
^ Lit.: «tu jaantaj».
