Lucas 16:1-31
16 Jesús túuneʼ tu yaʼalaj xan tiʼ u disipuloʼob: «Juntúul ayikʼal máakeʼ yaan kaʼach juntúul máak kanáantik u ayikʼalil; le palitsil túunaʼ taʼak u pool, tumen chéen bey u xuʼuxupik le baʼaxoʼob yaan tiʼ u tsʼuuliloʼ.
2 Tʼaʼan tumen le tsʼuuloʼ ka aʼalaʼabtiʼ: ‹¿Baʼax le kin wuʼuyik u yaʼalaʼal ta woʼolalaʼ? Kʼub cuenta tiʼ bix tsʼoʼok a meyajtik le baʼaxoʼob yaantenoʼ, tumen maʼ tu páajtal u seguer a meyaj tin wotoch›.
3 Le j-kanan ayikʼalil túunoʼ káaj u tuklik lelaʼ: ‹¿Baʼax túun ken in beet bey tumen in tsʼuulil yaan u luʼsikten in meyajtik le baʼaxoʼob yaantiʼoʼ? Minaʼanten u muukʼil utiaʼal in páanik luʼum, tsʼoʼoleʼ suʼlaken in kʼáat caridad.
4 ¡Áan! In wojel baʼax ken in beete, beyoʼ ken luʼsaʼakten le meyajoʼ, yaan u yantal máaxoʼob jeʼel u kʼamkenoʼob tu yotochoʼobeʼ›.
5 Ka túun káaj u tʼanik a jujuntúulil le máaxoʼob pʼaxmil u tsʼuuliloʼ, ka tu yaʼalaj tiʼ le yáax juntúuloʼ: ‹¿Bukaʼaj a pʼaxmaj tiʼ in tsʼuulil?›.
6 Letiʼeʼ tu yaʼalaj: ‹Dos mil doscientos litros* u aceiteil oliva›. Le palitsiloʼ tu yaʼalajtiʼ: ‹Chʼaʼ tu kaʼatéen le u juʼunil a pʼaaxoʼ yéetel kulen a jáan tsʼíibt mil cien litrosiʼ›.
7 Tsʼoʼoleʼ ka tu yaʼalaj tiʼ le uláakʼ juntúuloʼ: ‹Kux túun teech, ¿bajux a pʼaxmaj?›. Letiʼeʼ tu yaʼalaj: ‹Cien costaloʼob* trigo›. Le palitsiloʼ tu yaʼalajtiʼ: ‹Chʼaʼ tu kaʼatéen le u juʼunil a pʼaaxoʼ, ka a tsʼíibt ochenta costaloʼobiʼ›.
8 U tsʼuulil túunoʼ tu yaʼalaj jach maʼalob baʼax tu beetaj le j-kanan ayikʼaliloʼ, tumen kex kʼasaʼan máakeʼ tu yeʼesaj jach yaan u naʼat yoʼolal le baʼax tu beetoʼ; tumen u paalal le yóokʼol kaabaʼ* yoʼolal bix u tratartikoʼob u yéet kʼiiniloʼobeʼ ku chíikpajal maas yaan u naʼatoʼob ke u paalaloʼob le sáasiloʼ.
9 »Kin waʼalik xan teʼex: Meyajnakteʼex le ayikʼaliloʼob yaan teʼ yóokʼol kaab utiaʼal a beetkeʼex amigoʼoboʼ, beyoʼ ken pʼáatak minaʼanteʼex le ayikʼaliloʼobaʼ, ka kʼaʼamkeʼex teʼ kúuchiloʼob mix bikʼin kun xuʼulultiʼoboʼ.
10 Le máax chúukaʼan u yóol tiʼ baʼaloʼob mejentakeʼ chúukaʼan u yóol xan tiʼ nukuch baʼaloʼob, le máax maʼ chúukaʼan u yóol tiʼ baʼaloʼob mejentakeʼ, maʼ chúukaʼan u yóol xan tiʼ nukuch baʼaloʼobiʼ.
11 Le oʼolaleʼ wa teʼex maʼ ta weʼeskeʼex chúukaʼan a wóoleʼex tiʼ le ayikʼaliloʼob yaan teʼ yóokʼol kaabaʼ, ¿máax túun kun kʼubéentikteʼex le maas maʼalob ayikʼaliloʼoboʼ?
12 Tsʼoʼoleʼ wa maʼ ta weʼeskeʼex chúukaʼan a wóoleʼex tiʼ le baʼaloʼob maʼ a tiaʼaleʼexoʼ, ¿máax túun kun tsʼáaikteʼex le baʼax a tiaʼaleʼexoʼ?
13 Mix juntúul j-kʼoos ku páajtal u meyajtik kaʼatúul tsʼuuloʼob bey palitsileʼ, tumen yaan u pʼektik le juntúuloʼ yéetel yaan u yaabiltik le uláakʼ juntúuloʼ, wa yaan u suuktal yiknal juntúuliʼ yéetel yaan u náachtal tiʼ le uláakʼ juntúuloʼ. Le oʼolaleʼ maʼ tu páajtal a beetkabaʼex palitsil tiʼ Dios bey xan palitsil tiʼ le ayikʼaliloʼoboʼ».
14 Le fariseoʼob túun jach uts tu yichoʼob taakʼinoʼ, táan kaʼach u yuʼubikoʼob tuláakal le baʼaloʼobaʼ, yéetel táan kaʼach u yutsʼik u niʼob tiʼ.
15 Le oʼolaleʼ, letiʼeʼ tu yaʼalajtiʼob: «Teʼexeʼ ka waʼalikeʼex tu táan u maasil jach maʼalob máakeʼex, baʼaleʼ Dioseʼ u kʼaj óol a puksiʼikʼaleʼex, tumen baʼax jach nojbaʼal tu táan wíinikeʼ pʼekbeʼen tu táan Dios.
16 »Le Ley yéetel le Profetaʼoboʼ xuʼul u profetizaroʼob tu kʼiinil Juan. Desde túun teʼ kʼiin jeʼeloʼ, káaj u tsikbaltaʼal u Reino Dios bey maʼalob péektsileʼ, lelaʼ tuláakal máak jach táan u yilik u tiaʼalintik.
17 U jaajileʼ maas jeʼel u xuʼulul tiʼ le kaʼan yéetel tiʼ le Luʼumoʼ, ke ka pʼáatak maʼ u béeytal junpʼéel u chan letrail le Leyoʼ.
18 »Tuláakal máax ku divorciarkuba tiʼ u yatan yéetel ku tsʼoʼokol u beel yéetel yaanaleʼ ku lúubul tiʼ adulterio,* le máax ku tsʼoʼokol u beel yéetel juntúul koʼolel u divorciarmuba tiʼ u yíichameʼ ku lúubul xan tiʼ adulterio.
19 »Yaan kaʼach juntúul ayikʼal máak ku búukintik morado* nookʼ de lino, yéetel sáamsamaleʼ ku kiʼimakkúuntik u yóol yéetel maʼalob baʼaloʼob.
20 Baʼaleʼ tu jool u yotocheʼ suuk kaʼach u pʼaʼatal juntúul máak ku kʼáatik caridad, u kʼaabaʼeʼ Lázaro; letiʼeʼ llagado kaʼach u wíinklil,
21 yéetel ku tsʼíiboltik kaʼach u jaantik u pʼúupʼuyal le baʼaxoʼob ku lúubul yáanal u mesa le ayikʼal máakoʼ. Tsʼoʼoleʼ tak le peekʼoʼob ku náatsʼloʼob kaʼach u léetsʼoʼob le u yajiloʼoboʼ.
22 Ka máan kʼiineʼ, le máak ku kʼáat caridadoʼ kíimi, ka bisaʼab tumen le angeloʼob tu tséel* Abrahanoʼ.
»Le ayikʼal máak xanoʼ kíimeʼ ka muʼuki.
23 Le ayikʼal máak túunoʼ le tiaʼan teʼ Muknal* táan u sen muʼyajoʼ, tu líiʼsaj u yicheʼ ka tu yilaj desde náachil Abrahán bey xan Lázaro tu yiknal.
24 Le ayikʼal máak túunoʼ tʼaanajeʼ ka tu yaʼalaj: ‹Abrahán, in Yuum, chʼaʼten óotsilil yéetel túuxt Lázaro u chʼul u punta u yáal u kʼab utiaʼal ka u síiskunt in waakʼ, tumen táan in sen muʼyaj ichil le kʼáakʼ ku sen tóochʼbalaʼ›.
25 Baʼaleʼ Abrahaneʼ tu yaʼalaj: ‹In paal, kʼaʼajaktecheʼ le kuxaʼanechoʼ ta kʼamaj yaʼab baʼaloʼob maʼalobtak, baʼaleʼ Lázaroeʼ chéen muʼyajiloʼob tu kʼamaj. Chéen baʼaleʼ beoraaʼ letiʼeʼ kiʼimak u yóol tin wiknal, baʼaleʼ techeʼ táan a muʼyaj.
26 Tsʼoʼoleʼ maʼ chéen leloʼ, beoraaʼ tsʼoʼok u tsʼaʼabal junpʼéel taamkach chʼeʼen chúumuk tiʼ toʼoneʼex, le oʼolal le máaxoʼob yanoʼob wayeʼ yéetel u kʼáatoʼob bin ta wiknaleʼexeʼ, maʼ tu páajtal u beetkoʼob, yéetel le máaxoʼob yanoʼob teʼeloʼ maʼ tu páajtal u taaloʼob wayeʼ›.
27 Le máak túunoʼ tu yaʼalaj: ‹Wa beyoʼ, in Yuum, kin kʼáatiktech ka a túuxt Lázaro tu yotoch in taata,
28 tumen yaan cinco u túulul in sukuʼunoʼob, utiaʼal ka u tsoltiʼob tubeel baʼax unaj u beetkoʼob, utiaʼal beyoʼ maʼ u yookloʼob xan teʼ tu kúuchilil muʼyajaʼ›.
29 Baʼaleʼ Abrahaneʼ tu yaʼalaj: ‹Si tiʼ yaan Moisés yéetel le Profetaʼob tu yiknaloʼoboʼ; u yuʼuboʼob le baʼax ku yaʼalikoʼoboʼ›.
30 Le máak túunoʼ tu yaʼalaj: ‹Beyoʼ, in Yuum Abrahán, baʼaleʼ wa ka líikʼik juntúul tiʼ le kimenoʼob utiaʼal ka xiʼik tu yiknaloʼobeʼ, jach jeʼel u kʼexik u tuukuloʼobeʼ›.
31 Baʼaleʼ letiʼeʼ tu yaʼalajtiʼ: ‹Wa maʼ tu yuʼubikoʼob Moisés mix le Profetaʼoboʼ, kex ka líikʼik juntúul wa máax ichil le kimenoʼoboʼ láayliʼ maʼ ken u chaʼob u kʼeʼexel u tuukuloʼobeʼ›».
Notas
^ Lit.: «100 batos». Junpʼéel bato kaʼacheʼ kex 22 litros.
^ Junpʼéel costaleʼ ku bisik kaʼach 170 kilos.
^ Ilaʼak Tipʼ. 16.
^ Lelaʼ letiʼ ken núupkʼebanchajak juntúul xiib wa juntúul koʼolel tsʼokaʼan u beel.
^ Lit.: «púrpura». Le coloraʼ yaan yil yéetel ayikʼalil, tsikbeʼenil yéetel jalaʼachil.
^ Lit.: «tu tseem Abrahán»; lelaʼ u kʼáat u yaʼaleʼ jach yaabiltaʼan.
^ Lit.: «Hades». Ilaʼak Tipʼ. 8.
