Lucas 18:1-43
18 Jesús túuneʼ tu yaʼalaj tiʼ u disipuloʼob junpʼéel kettʼaan utiaʼal u yeʼesiktiʼob baʼaxten kʼaʼabéet u oraroʼob mantatsʼ yéetel maʼ u xuʼulul u beetkoʼob,
2 tu yaʼalajtiʼob: «Tiʼ junpʼéel kaajeʼ yaan kaʼach juntúul juez maʼ u chʼaʼamaj saajkil tiʼ Diosiʼ yéetel maʼatech u yeʼesik tsiikil tiʼ mix máak.
3 Teʼ kaaj xanoʼ yaan kaʼach juntúul koʼolel kimen u yíichamiʼ, letiʼeʼ maʼ tu xuʼulul kaʼach u bin u yaʼal tiʼ le juezoʼ: ‹Ilawil ka beetaʼakten justicia yoʼolal le baʼax ku yaʼalik le máax takik in pooloʼ›.
4 Tu káajbaleʼ le juezoʼ maʼ tu yóotiʼ, baʼaleʼ ka tsʼoʼokeʼ tu yaʼalaj ichil u puksiʼikʼal: ‹Kex maʼ in chʼaʼamaj saajkil tiʼ Dios yéetel kex maʼatech in weʼesik tsiikil tiʼ mix máakeʼ,
5 tumen le koʼolel kimen u yíicham sáamsamal u taal u molestartenoʼ, yaan in wilik ka beetaʼak justicia tiʼ, utiaʼal maʼ u seguer u molestarken ka tak u náaks in wóol yéetel le baʼaxoʼob maʼ tu xuʼulul u kʼáatkoʼ›».
6 Yuumtsil túuneʼ tu yaʼalaj: «¡Uʼuyeʼex baʼax tu yaʼalaj le juez kex kʼasaʼan máakoʼ!
7 Le oʼolaleʼ, ¿Dioseʼ maʼ wa maas jeʼel u beetik justicia tiʼ le máaxoʼob u yéeymaj táan u kʼáat óolaloʼob tiʼ letiʼ bul kʼiin yéetel bul áakʼab kex letiʼ maʼatech u náakal u yóol tiʼ letiʼoboʼ?
8 Kin waʼalikteʼex: Letiʼeʼ tu séebaʼanil ken u yil ka beetaʼakteʼex justicia. Baʼaleʼ ken kʼuchuk u Paal máakeʼ, ¿jach wa tu jaajil yaan u kaxtik way Luʼum le fe beyaʼ?».
9 Tiʼ jujuntúul máakoʼob ku tuklikoʼob jach toj u kuxtaloʼob yéetel ku taaskoʼob bey mix baʼalil u maasil máakoʼobeʼ, tu yaʼalaj le kettʼaan tiʼobaʼ:
10 «Kaʼatúul máakoʼobeʼ binoʼob orar teʼ templooʼ, juntúuleʼ fariseo yéetel uláakʼ juntúuloʼ j-kʼam impuesto.
11 Le fariseooʼ waʼalajeʼ ka joʼopʼ u orar táan u yaʼalik lelaʼ: ‹In Dios, kin tsʼáaiktech gracias tumen maʼ beyen jeʼex le uláakʼ máakoʼob ku yookoloʼoboʼ, le maʼ toj u kuxtaloʼoboʼ, le ku lúubloʼob tiʼ adulteriooʼ,* mix tak jeʼex le j-kʼam impuestoaʼ.
12 Kin ayunar kaʼatéen tiʼ junpʼéel semana yéetel kin tsʼáaik u diezmoil tuláakal le baʼaxoʼob ku yantaltenoʼ›.
13 Baʼaleʼ le j-kʼam impuestooʼ náach pʼáat waʼatal yéetel maʼ u kʼáat mix tak u líiʼs u yich teʼ kaʼanoʼ, baʼaxeʼ táan kaʼach u loxik u tseem táan u yaʼalik: ‹In Dios, chʼaʼten óotsilil, tumen j-kʼeban máaken›.
14 Kin waʼalikteʼex: Le máakaʼ ka suunaj tu yotocheʼ ilaʼab maas jach toj u kuxtal tiʼ le uláakʼ juntúuloʼ, tumen tuláakal le máax ku nojbaʼalkúuntkubaeʼ yaan u mixbaʼalkúuntaʼal, baʼaleʼ le máax ku mixbaʼalkúuntkubaeʼ yaan u nojbaʼalkúuntaʼal».
15 Le máakoʼob túunoʼ káaj u taaskoʼob u mejen paalaloʼob tu yiknal Jesús utiaʼal ka u machoʼob, baʼaleʼ le disipuloʼoboʼ le ka tu yiloʼob lelaʼ káaj u kʼeykoʼob le máakoʼoboʼ.
16 Chéen baʼaleʼ Jesuseʼ tu tʼanaj le mejen paalaloʼob tu yiknaloʼ, ka tu yaʼalaj: «Chaʼex u taal le mejen paaloʼob tin wiknaloʼ, maʼ a kʼatikeʼex u beeloʼob. Tumen u Reino Dioseʼ utiaʼal máakoʼob jeʼex letiʼobeʼ.
17 Tu jaajil kin waʼalikteʼex: Le máax maʼ tu kʼamik u Reino Dios jeʼex u beetik juntúul chan paaleʼ, junpuliʼ maʼ kun ookliʼ».
18 Juntúul gobernanteeʼ tu kʼáataj tiʼ Jesús: «Utsul j-Kaʼansaj, ¿baʼax kʼaʼabéet in beetik utiaʼal in kʼamik kuxtal minaʼan u xuul?».
19 Jesuseʼ tu yaʼalajtiʼ: «¿Baʼaxten ka waʼalik utsen? Mix máak uts, chéen Dios.
20 Techeʼ a wojel baʼax ku yaʼalik le Leyoʼ: ‹Maʼ a lúubul tiʼ adulterio; maʼ a kíimsik máak; maʼ a wookol; maʼ a jaajkúuntik baʼax maʼ jaajiʼ; eʼes tsiikil tiʼ a taata yéetel tiʼ a maama›».
21 Letiʼ túuneʼ tu yaʼalaj: «Tuláakal lelaʼ desde tin chichnil kin beetik».
22 Le ka tu yuʼubaj Jesús lelaʼ, tu yaʼalajtiʼ: «Láayliʼ yaan junpʼéel baʼax ku bineltik a beetkeʼ: Kon tuláakal le baʼaxoʼob yaantechoʼ ka a tʼox tiʼ le óotsiloʼoboʼ, beyoʼ yaan u yantaltech ayikʼaliloʼob teʼ kaʼanoʼ; tsʼoʼoleʼ, koʼoten ka taalakech tin paach».
23 Le ka tu yuʼubaj lelaʼ, letiʼeʼ lúub u yóol tumen jach ayikʼal kaʼachi.
24 Paktaʼab tumen Jesuseʼ ka aʼalaʼabtiʼ: «¡Jach túun yaan u talamtal tiʼ le máaxoʼob yaan taakʼin tiʼob u yookloʼob tu Reino Diosoʼ!
25 U jaajileʼ maas séeb jeʼel u máan juntúul camello tu chan joolil junpʼéel u púutsʼil chuuyeʼ, ke ka okok juntúul ayikʼal máak tu Reino Dios».
26 Le máaxoʼob uʼuyoʼ tu yaʼaloʼob: «Wa beyoʼ, ¿máax túun jeʼel u páajtal u salvarkubaeʼ?».
27 Letiʼeʼ tu yaʼalaj: «Le baʼaxoʼob maʼ tu páajtal u beetik wíinikeʼ Dioseʼ jeʼel u páajtal u beetkeʼ».
28 Baʼaleʼ Pedroeʼ tu yaʼalaj: «¡Ile! Toʼoneʼ tsʼoʼok k-pʼatik tuláakal le baʼaxoʼob yaantoʼon kaʼachoʼ yéetel tsʼoʼok k-taal ta paach».
29 Letiʼeʼ tu yaʼalajtiʼob: «Tu jaajil kin waʼalikteʼex: Mix máak tsʼoʼok u pʼatik u yotoch, u yatan, u sukuʼunoʼob, u taataʼob wa u paalaloʼob tu yoʼolal u Reino Dios,
30 wa maʼ u kʼamik u maas yaʼabil teʼ kʼiinoʼobaʼ, yéetel teʼ túumben yóokʼol kaaboʼ,* kuxtal minaʼan u xuul».
31 Tsʼoʼoleʼ tu bisaj junpáayil le doce apostoloʼoboʼ ka tu yaʼalajtiʼob: «¡Ileʼex! Táan k-bin Jerusalén, yéetel yaan u béeychajal tuláakal le baʼax u tsʼíibtmaj le profetaʼob yoʼolal u Paal máakoʼ.
32 Yaan u kʼuʼubul tiʼ le máakoʼob maʼ judíoʼoboʼ, yaan u pʼaʼastaʼal, yaan u poʼopochʼaʼal yéetel yaan u túubaʼal;
33 ken tsʼoʼokok u jaʼajatsʼaʼaleʼ yaan u kíimsaʼal, baʼaleʼ tu yóoxpʼéel kʼiineʼ yaan u líiʼsaʼal».
34 Chéen baʼaleʼ letiʼobeʼ maʼ tu naʼatoʼob mix junpʼéel tiʼ le baʼaloʼobaʼ, tumen taʼakaʼabtiʼob, yéetel maʼ tu naʼatoʼob le baʼax tu yaʼaloʼ.
35 Le ka túun náatsʼ Jesús tu kaajil Jericoeʼ, tu jáal le bejoʼ tiʼ kulukbal kaʼach juntúul máak chʼóop ku kʼáat caridadiʼ.
36 Le máak túunaʼ tumen tu yuʼubaj táan u máan yaʼabkach máakoʼobeʼ, káaj u kʼáatik baʼax ku yúuchul.
37 Ka aʼalaʼabtiʼ: «¡Táan u máan Jesús Nazaretil!».
38 Letiʼ túuneʼ, káaj u kʼaʼam aʼalik: «¡Jesús, u Paal* David, chʼaʼten óotsilil!».
39 Le máaxoʼob ku binoʼob táaniloʼ káaj u sen aʼalikoʼobtiʼ ka u mak u chiʼ, baʼaleʼ letiʼeʼ káaj u maas kʼaʼam aʼalik: «¡U Paal David, chʼaʼten óotsilil!».
40 Jesús túuneʼ waʼalaji, ka tu yaʼalaj ka taasaʼak le máak tu yiknaloʼ. Le ka tsʼoʼok u náatsʼal le máak tu yiknaloʼ, Jesuseʼ tu kʼáatajtiʼ:
41 «¿Baʼax a kʼáat ka in beettech?». Letiʼeʼ tu yaʼalaj: «Yuumtsil, ka suunak u sáasilil in wich».
42 Jesús túuneʼ tu yaʼalajtiʼ: «Suunak u sáasilil a wich; yoʼolal a fejeʼ tsʼoʼok a wutstal».
43 Le máakoʼ tu séebaʼanil suunaj u sáasilil u yicheʼ ka joʼopʼ u bin tu paach Jesús táan u nojbeʼenkúuntik Dios. Tuláakal xan u kajnáaliloʼob le kaajoʼ, ka tu yiloʼob lelaʼ, tu kiʼikiʼtʼantoʼob Dios.
Notas
^ Lelaʼ letiʼ ken núupkʼebanchajak juntúul xiib wa juntúul koʼolel tsʼokaʼan u beel.
^ Ilaʼak Tipʼ. 16.
^ Ilaʼak u tsolajil Mt 1:1.
