Lucas 20:1-47
20 Juntéenjeak tiaʼan Jesús teʼ templo táan u kaʼansik le máakoʼob yéetel táan u tsikbaltik le maʼalob péektsiloʼ, náatsʼ u nuuktakil le sacerdoteʼoboʼ bey xan le escribaʼob junmúuchʼ yéetel u nuuktakil le kaajoʼ,
2 ka tu yaʼaloʼobtiʼ: «Aʼaltoʼon bix u páajtal a beetik le baʼaloʼobaʼ wa máax tsʼáatech u páajtalil a beetkoʼob».
3 Jesuseʼ tu núukajtiʼob: «Teen xaneʼ yaan in beetikteʼex junpʼéel kʼáatchiʼ. Núukeʼexten:
4 ¿Máax tsʼáa páajtalil tiʼ Juan utiaʼal u tsʼáaik okjaʼ, Dios* wa le máakoʼoboʼ?».
5 Letiʼob túuneʼ káaj u tuklikoʼob tu baatsiloʼob táan u yaʼalikoʼob: «Wa k-aʼalik: ‹Dioseʼ›, letiʼeʼ yaan u yaʼalik: ‹¿Baʼaxten maʼ ta creerteʼexiʼ?›.
6 Baʼaleʼ wa k-aʼalik: ‹Le máakoʼoboʼ›, tuláakal le kaajoʼ yaan u muruxtuntikoʼon, tumen oksaʼan tu tuukuloʼobeʼ Juaneʼ juntúul profeta kaʼachi».
7 Ka túun tu yaʼaloʼob maʼ u yojloʼobiʼ.
8 Jesús túuneʼ tu yaʼalajtiʼob: «Teen xaneʼ maʼ táan in waʼalikteʼex bix u páajtal in beetik le baʼaloʼobaʼ».
9 Ka túun káaj u tsikbaltik tiʼ le máakoʼob le kettʼaanaʼ: «Juntúul máakeʼ tu beetaj u pakʼal uva ka tu tsʼáaj alquilartbil tiʼ uláakʼ máakoʼob utiaʼal u meyajtoʼob, tsʼoʼoleʼ ka jóokʼ viaje táanxel luʼumil. Teʼeloʼ pʼáat yaʼabkach kʼiinoʼobiʼ.
10 Baʼaleʼ ka kʼuch u kʼiinileʼ tu túuxtaj juntúul palitsil yiknal le máaxoʼob meyajtikoʼ utiaʼal ka tsʼaʼabaktiʼ junjaats u yich le paakʼaloʼ. Le máakoʼob túunoʼ, ka tsʼoʼok u sen jatsʼkoʼobeʼ tu chaʼajoʼob u bin yéetel maʼ tu tsʼáajoʼob mix baʼal tiʼiʼ.
11 Baʼaleʼ le u yuumil le paakʼaloʼ tu kaʼa túuxtaj uláakʼ juntúul palitsil. Le palitsil xanaʼ jaʼajatsʼaʼabi, poʼopochʼaʼabi, tsʼoʼoleʼ ka tojolchʼintaʼabi yéetel maʼ tsʼaʼab mix baʼal tiʼiʼ.
12 Kex beyoʼ tu túuxtaj uláakʼ juntúul palitsil tu yiknaloʼob, u yóoxtúuloʼ; le máakoʼoboʼ tu loobiltoʼob xan le palitsilaʼ, tsʼoʼoleʼ ka tu xáakchʼintoʼob.
13 Ka túun tu yaʼalaj u yuumil le paakʼaloʼ: «¿Baʼax túun ken in beete? Yaan in túuxtik in paal, le máax in yaabiltmoʼ. Maʼ xaaneʼ jeʼel u yeʼeskoʼob tsiikil tiʼeʼ.
14 Le máaxoʼob meyajtik le paakʼaloʼ, ka tu yiloʼobeʼ káaj u yaʼalikoʼob tu baatsiloʼob: ‹Lelaʼ letiʼe máax kun tiaʼalintik le herenciaoʼ; koʼoneʼex kíimsik utiaʼal ka pʼáataktoʼon le herenciaoʼ›.
15 Ka tsʼoʼokeʼ tu jóoʼsoʼob paachil tiʼ le pakʼal uvaoʼ ka tu kíimsoʼob. ¿Baʼax túun kun beetbiltiʼob tumen u yuumil le paakʼaloʼ?
16 Letiʼeʼ ken taalakeʼ yaan u kíimsik le máakoʼobaʼ yéetel yaan u tsʼáaik le paakʼal tiʼ uláakʼ máakoʼob utiaʼal ka u meyajtoʼoboʼ».
Le máakoʼoboʼ ka tu yuʼuboʼob lelaʼ tu yaʼaloʼob: «¡Mix bikʼin ka úuchuk baʼal beyoʼ!».
17 Baʼaleʼ letiʼeʼ tu paktoʼobeʼ ka tu yaʼalajtiʼob: «¿Baʼax túun u kʼáat u yaʼal le baʼax tsʼíibtaʼanaʼ: ‹Le tuunich maʼ óotaʼab chʼaʼabil tumen le máaxoʼob beet le najoʼ letiʼe nojoch tuunich yéeyaʼab utiaʼal u chuunpakʼiloʼ›?
18 Tuláakal le máax kun lúubul yóokʼol le tuunichaʼ yaan u xeʼexetʼaʼal. Tu yóokʼol xan jeʼel máaxak ka lúubuk le tuunichaʼ yaan u yaʼachʼal».
19 Le escribaʼob yéetel u nuuktakil le sacerdoteʼob túunoʼ tu yóotoʼob u machoʼob Jesús teʼ súutuk jeʼeloʼ, baʼaleʼ sajakchajoʼob tiʼ le kaajoʼ, tumen tu tsʼáajoʼob cuentaeʼ tiʼ letiʼob ku tuukul kaʼach ka tu yaʼalaj le kettʼaanaʼ.
20 Ka tsʼoʼok u jach ilkoʼob baʼax ku beetkeʼ, tu contratartoʼob taʼakumbail jujuntúul máakoʼob, tsʼoʼoleʼ ka tu túuxtoʼob utiaʼal ka u taasubaʼob bey utsul máakoʼobeʼ, bey xan utiaʼal ka u beetoʼob u yaʼalik wa baʼax Jesús ka u tsʼáa tuʼux u takikoʼob u pool, bey túunoʼ ka u kʼuboʼob tiʼ le gobiernooʼ yéetel tu kʼab le gobernadoroʼ.*
21 Le máakoʼob túunaʼ tu kʼáatoʼobtiʼ táan u yaʼalikoʼob: «J-Kaʼansaj, k-ojel ka waʼalik u jaajil, maʼalob a kaʼansaj yéetel ka kʼamik tuláakal máak, tsʼoʼoleʼ ka kaʼansik u jaajil yoʼolal u bejil Dios:
22 ¿Maʼalob wa ka k-boʼot impuesto tiʼ César, wa maʼ?».
23 Baʼaleʼ Jesuseʼ tumen tu tsʼáaj cuenta chéen taak u túuntaʼal u yóoleʼ, tu yaʼalajtiʼob:
24 «Eʼeseʼexten junpʼéel denario.* ¿Máax ku chíikpajal teʼelaʼ yéetel máax kʼaabaʼ tsʼíibtaʼaniʼ?». Letiʼobeʼ tu núukoʼob: «César».
25 Letiʼeʼ tu yaʼalajtiʼob: «Jeʼeloʼ, boʼoteʼex túun tiʼ César le baʼaxoʼob utiaʼal Cesaroʼ, baʼaleʼ tiʼ Dioseʼ boʼoteʼex le baʼaxoʼob utiaʼal Diosoʼ».
26 Le máakoʼob túunoʼ maʼ páajchaj u beetkoʼob u yantal baʼax oʼolal u takikoʼob u pool Jesús yoʼolal le baʼax tu yaʼaloʼ, baʼaleʼ tumen jach jaʼakʼ u yóoloʼob yoʼolal le baʼax tu núukajoʼ, letiʼobeʼ maʼ tu yaʼaloʼob mix baʼaliʼ.
27 Chéen baʼaleʼ jujuntúul tiʼ le saduceoʼoboʼ —le máaxoʼob ku yaʼalikoʼob maʼ kun kaʼa kuxkíintbil le kimenoʼoboʼ— náatsʼoʼob tu yiknaleʼ ka tu kʼáatoʼobtiʼ
28 táan u yaʼalikoʼob: «J-Kaʼansaj, Moiseseʼ tu tsʼíibtajtoʼon: ‹Wa u sukuʼun juntúul máak ku kíimil táanil tiʼ u yantal u paalal u yataneʼ, le máakaʼ kʼaʼabéet u tsʼoʼokol u beel yéetel le atantsil utiaʼal ka yanak u chʼiʼibal u sukuʼunoʼ›.
29 Yanchaj túun siete sukuʼuntsiloʼob; le yáaxoʼ tsʼoʼok u beel, baʼaleʼ kíim táanil tiʼ u yantal u paalal.
30 Bey xan úuchik tiʼ le u kaʼatúuloʼ;
31 le u yóoxtúuloʼ tsʼoʼok u beel xan tu yéetel. Tuláakal túun le siete sukuʼuntsiloʼoboʼ bey xan tu beetiloʼoboʼ, yéetel kíimoʼob táanil tiʼ u yantal u paalaloʼob.
32 Tu tsʼookeʼ kíim xan le koʼoleloʼ.
33 Le ken kaʼa kuxkíintaʼakoʼobeʼ, ¿máakalmáak tiʼ letiʼob kun pʼáatal yéetel le koʼoleloʼ? Tumen tu sieteil tsʼoʼok u beeloʼob tu yéetel».
34 Jesuseʼ tu yaʼalajtiʼob: «U paalal le yóokʼol kaabaʼ* ku tsʼoʼokol u beeloʼob,
35 baʼaleʼ le máaxoʼob ku náajmatkoʼob le túumben yóokʼol kaab yéetel ku náajmatkoʼob u kaʼa kuxkíintaʼaloʼoboʼ, maʼ kun tsʼoʼokol u beeloʼob teʼ kʼiinoʼob jeʼeloʼ.
36 Tsʼoʼoleʼ maʼ xan kun kíimloʼob, tumen beyoʼob jeʼex le angeloʼoboʼ; letiʼob xaneʼ u paalaloʼob Dios tumen kaʼa kuxkíintaʼaboʼob.*
37 Baʼaleʼ tiʼ u kaʼa kuxkíintaʼal le kimenoʼoboʼ tak Moisés bey tu yeʼesil teʼ tu tsikbalil le chan cheʼ ku tóochʼbal u kʼáakʼileʼ; teʼeloʼ tu yaʼaleʼ Jéeobaeʼ ‹u Dios Abrahán, u Dios Isaak yéetel u Dios Jacob›.
38 Letiʼeʼ maʼ u Dios kimenoʼobiʼ, baʼaxeʼ u Dios máaxoʼob kuxaʼanoʼob, tumen utiaʼal letiʼeʼ tuláakal le máakoʼobaʼ kuxaʼanoʼob».
39 Le ka tu yuʼuboʼob lelaʼ, jujuntúul escribaʼobeʼ tu yaʼaloʼobtiʼ: «J-Kaʼansaj, jach maʼalob le baʼax ta waʼaloʼ».
40 Tumen mix juntúul tiʼ letiʼob táab u beet uláakʼ kʼáatchiʼ tiʼ Jesusiʼ.
41 Ka túun tu yaʼalajtiʼob: «¿Baʼaxten túun le máakoʼoboʼ ku yaʼalikoʼobeʼ le Cristooʼ u paal David?
42 Tumen tak Davideʼ tu libroil Salmoseʼ ku yaʼalik: ‹Jéeobaeʼ tu yaʼalaj tiʼ in Yuumtsil: «Kulen tin x-noʼoj kʼab,
43 tak ken in tsʼáa máaxoʼob pʼekmilech bey kʼáancheʼ utiaʼal a wookoʼobeʼ»›.
44 Teʼelaʼ Davideʼ ku yaʼalik Yuumtsil tiʼ, le oʼolaleʼ, ¿bix túun u páajtal u yaʼalaʼal u paal?».
45 Tsʼoʼoleʼ le táan u yuʼubaʼal u tsikbal tumen tuláakal le kaajoʼ, Jesuseʼ tu yaʼalaj tiʼ le disipuloʼoboʼ:
46 «Kanáantabaʼex tiʼ le escribaʼob, máaxoʼob uts tu tʼaan u máanoʼob yéetel u chowak nookʼoʼob, u yutsultʼantaʼaloʼob teʼ kʼíiwikoʼoboʼ, u kutaloʼob teʼ sillaʼob yanoʼob táanil teʼ sinagogaʼoboʼ bey xan u kutaloʼob janal teʼ kúuchiloʼob maas maʼalobtakoʼ.
47 Ku tokikoʼob xan le baʼaxoʼob yaan tiʼ le koʼoleloʼob kimen u yíichamoʼoboʼ yéetel ku xáantal táan u beetkoʼob u oracionoʼob chéen utiaʼal ka ilaʼakoʼob. Letiʼobeʼ maas yaj bix kun juzgartbiloʼob».
Notas
^ Lit.: «kaʼan».
^ Lit.: «u páajtalil le gobernadoroʼ».
^ Ilaʼak u tsolajil Mt 20:2.
^ Ilaʼak Tipʼ. 16.
^ Wa: «u paalal le kaʼa kuxtaloʼ».
