Lucas 21:1-38
21 Jesús túuneʼ ka tu líiʼsaj u yicheʼ tu yilaj bix u jalkʼesaʼal taakʼin tumen le ayikʼal máakoʼob teʼ tu nuʼukuliloʼob le taakʼin ku siʼibiloʼ.
2 Teʼeloʼ tu yilaj xan juntúul koʼolel óotsil yéetel kimen u yíicham, letiʼeʼ táan kaʼach u jalkʼesik kaʼapʼéel mejen taakʼin jach junpʼíit u tojoloʼobiʼ.
3 Jesús túuneʼ tu yaʼalaj: «Tu jaajil kin waʼalikteʼex: Le koʼolel kimen u yíichamaʼ, kex óotsileʼ, maas yaʼab taakʼin tu tsʼáaj ke le tu jalkʼesaj tuláakal le u maasil máakoʼoboʼ.
4 Tumen tuláakal le máakoʼobaʼ tu tsʼáajoʼob chéen le bukaʼaj tu yalabtajtiʼoboʼ, baʼaleʼ le koʼolelaʼ ichil u yóotsilileʼ tu jalkʼesaj tuláakal le bukaʼaj yaantiʼ utiaʼal u kuxtaloʼ».
5 Sáam túun tiʼ leloʼ, le táan u tʼaan jujuntúul máakoʼob tiʼ bix jatsʼutskíintaʼanil le templo yéetel jatsʼuts tuunichoʼob bey xan yéetel le baʼaloʼob síiʼan utiaʼal Diosoʼ,
6 Jesuseʼ tu yaʼalaj: «Tuláakal le baʼaxoʼob ka wilkeʼexaʼ, yaan u kʼuchul u kʼiinil maʼ kun pʼatbil tuunich yóokʼol tuunich, tuláakal yaan u niʼikil».
7 Letiʼob túuneʼ tu kʼáatoʼobtiʼ: «J-Kaʼansaj, ¿jach baʼax kʼiin ken úuchuk le baʼaloʼobaʼ, yéetel baʼax chíikulal ken u yeʼes nukaʼaj úuchul tuláakal le baʼaloʼobaʼ?».
8 Jesuseʼ tu yaʼalaj: «Kanáantabaʼex utiaʼal maʼ a tuʼusleʼex, tumen yaʼab máakoʼob kun taaloʼob tin kʼaabaʼ táan u yaʼalikoʼob: ‹Teen le Cristooʼ›, yéetel: ‹Tsʼoʼok u náatsʼal le kʼiin aʼalaʼanoʼ›. Maʼ a bineʼex tu paachoʼob.
9 Tsʼoʼoleʼ, ken a wuʼuyeʼex táan u yúuchul baʼateltáambaloʼob yéetel woʼochʼlantáambaloʼobeʼ, maʼ a sajaktaleʼex. Tumen le baʼaloʼobaʼ táanil yaan u yúuchloʼob, baʼaleʼ le u xuuloʼ maʼ tu séebaʼanil kun taaliʼ».
10 Jesús túuneʼ tu yaʼalaj xan tiʼob: «Junpʼéel kaajeʼ yaan u líikʼil tu contra uláakʼ kaaj, yéetel junpʼéel reinoeʼ yaan u líikʼil tu contra uláakʼ reino;
11 yaan u sen tíitkuba le luʼumoʼ, yaan u yantal pakʼbeʼen kʼojaʼaniloʼob yéetel nukuch wiʼijiloʼob tiʼ jejeláas tuʼuxoʼob; yaan xan u yúuchul baʼaloʼob ken u beet u sen jaʼakʼal u yóol máak, yéetel yaan u yantal nukuch chíikulaloʼob teʼ kaʼanoʼ.
12 »Baʼaleʼ táanil tiʼ u yúuchul tuláakal le baʼaloʼobaʼ, yaan a chʼaʼpachtaʼaleʼex yéetel yaan a maʼachleʼex utiaʼal ka kʼuʼubkeʼex teʼ sinagogaʼoboʼ bey xan teʼ carceloʼoboʼ. Yaan xan a bisaʼaleʼex tu táan reyoʼob yéetel gobernadoroʼob yoʼolal in kʼaabaʼ.
13 Lelaʼ yaan u tsʼáaik tuʼux a waʼalikeʼex baʼax ka creertikeʼex.
14 Le oʼolaleʼ chʼaʼtukleʼex ichil a puksiʼikʼaleʼex maʼ ken a ensayarteʼex táanil baʼax ken a waʼaleʼex utiaʼal a defenderkabaʼex,
15 tumen teneʼ yaan in tsʼáaikteʼex naʼatil bey xan baʼax ken a waʼaleʼex,* beyoʼ tuláakal le máaxoʼob pʼekmileʼexoʼ maʼ kun páajtal u yaʼalikoʼob wa maʼ jaaj baʼax ka waʼalikeʼexiʼ, mix kun páajtal u baʼateltʼaanoʼob ta wéeteleʼex.
16 Tsʼoʼoleʼ yaan tak a kʼuʼubleʼex tumen a taataʼex, a sukuʼuneʼex, a láakʼtsileʼex yéetel tumen a amigoʼex, yéetel jujuntúul tiʼ teʼexeʼ yaan a kíimsaʼaleʼex;
17 yaan xan a pʼektaʼaleʼex tumen tuláakal máak yoʼolal in kʼaabaʼ.
18 Kex beyoʼ, mix junkúul u tsoʼotsel a pooleʼex kun júutul.
19 Wa ku chúukpajal a wóoleʼexeʼ yaan a salvartik a kuxtaleʼex.*
20 »Tsʼoʼoleʼ ken a wileʼex jelekbal le soldadoʼob tu baʼpach Jerusalenoʼ, ojéelteʼex tsʼoʼok u náatsʼal u kʼiinil u xuʼulsaʼaltiʼ.
21 Le máaxoʼob túun yanoʼob Judeaoʼ, púutsʼkoʼob utiaʼal ka xiʼikoʼob teʼ puʼukoʼoboʼ, le máaxoʼob yanoʼob chúumuk Jerusaleneʼ, lukʼkoʼobiʼ, yéetel le máaxoʼob yanoʼob tu jáal le kaajoʼ, maʼ u yookloʼobiʼ;
22 tumen leloʼobaʼ u kʼiiniloʼob u beetaʼal justicia, utiaʼal ka béeychajak tuláakal le baʼaxoʼob tsʼíibtaʼanoʼ.
23 ¡Óotsil le koʼoleloʼob embarazadaʼoboʼ bey xan le táan u tsʼaa chuʼuchoʼob teʼ kʼiinoʼob jeʼeloʼ! Tumen yaan u yantal nojoch muʼyajil yóokʼol le luʼumaʼ, yéetel Dioseʼ yaan u castigartik le kaajaʼ;
24 yaan u kíimsaʼaloʼob yéetel espada yéetel yaan kun bisbil utiaʼal palitsiltbil tiʼ tuláakal le kaajoʼoboʼ; Jerusaleneʼ yaan u pepeʼchaʼataʼal tumen le kaajoʼoboʼ tak ken tsʼoʼokok le kʼiinoʼob tsʼaʼan tiʼ le kaajoʼoboʼ.
25 »Yaan xan u yantal chíikulaloʼob tiʼ le Kʼiin yéetel le Lunaoʼ bey xan tiʼ le estrellaʼoboʼ, tsʼoʼoleʼ u kajnáaliloʼob le kaajoʼoboʼ yaan u muʼyajoʼob, tumen ikil u juum yéetel u pʼuʼujul le kʼáaʼnáaboʼ maʼ ken u yojéeltoʼob bix jeʼel u púutsʼloʼobeʼ.
26 Le máakoʼoboʼ yaan u desmayaroʼob tumen jach saajkoʼob yoʼolal le baʼaloʼob ku yilkoʼob ku taal u kʼiinil u yúuchul way Luʼumeʼ, tumen tak le baʼaloʼob yanoʼob teʼ kaʼan yaan u muukʼoʼoboʼ yaan u tíitaʼaloʼob.
27 Letiʼ túun ken ilaʼak u taal u Paal máak ichil junpʼéel múuyal yéetel páajtalil bey xan yéetel nojoch nojbeʼenil.
28 Baʼaleʼ ken káajak u yúuchul le baʼaloʼobaʼ toj waʼaleneʼex yéetel líiʼs a pooleʼex, tumen tsʼoʼok u náatsʼal u kʼiinil a jáalkʼabtaʼaleʼex».
29 Ka tsʼoʼokeʼ tu yaʼalajtiʼob junpʼéel kettʼaan: «Ileʼex le higuera yéetel le u maasil cheʼoboʼ.
30 Ken a wileʼex táan u loolankiloʼobeʼ, teʼexeʼ a wojleʼex tsʼoʼok u náatsʼal u kʼiinil u yichankiloʼob.*
31 Bey túun xanoʼ, ken a wileʼex u yúuchul le baʼaloʼobaʼ ojéelteʼexeʼ naatsʼ yanik u Reino Dios.
32 Tu jaajil kin waʼalikteʼex: Le generacionaʼ jach junpuliʼ maʼ kun máan wa maʼ yáaxeʼ yaan u yúuchul tuláakal le baʼaloʼobaʼ.
33 Maas jeʼel u xuʼulul tiʼ le kaʼan yéetel tiʼ le Luʼumoʼ ke ka pʼáatak maʼ u béeytal le baʼaxoʼob tsʼoʼok in waʼalikoʼ.
34 »Baʼaleʼ jach kanáantabaʼex utiaʼal maʼ u sen chuʼupul a puksiʼikʼaleʼex ikil u píitmáan a jaanleʼex, ikil u píitmáan a wukʼuleʼex, bey xan yoʼolal u chiʼichnakiloʼob le kuxtalaʼ, utiaʼal maʼ u beetik u jaʼakʼal a wóoleʼex ken téek taalak le kʼiin ta wóokʼoleʼex ichil u chan súutuk
35 bey junpʼéel léecheʼ. Tumen lelaʼ yaan u taal yóokʼol tuláakal u kajnáaliloʼob yóokʼol kaab.
36 Le oʼolaleʼ maʼ a weenleʼex; kʼáat óolneneʼex tuláakal súutukil, utiaʼal ka béeyak a púutsʼleʼex tiʼ tuláakal le baʼaxoʼob aʼalaʼan kun úuchlaʼ, bey xan utiaʼal ka pʼáatkeʼex waʼatal tu táan u Paal máak».
37 De kʼiin túuneʼ Jesuseʼ ku kaʼansaj kaʼach teʼ templooʼ, baʼaleʼ de áakʼabeʼ ku jóokʼoleʼ, ku bin pʼáatal teʼ puʼuk ku kʼaabaʼtik u Puʼukil le Olivoʼoboʼ.
38 Jaʼatskab túuneʼ tuláakal u kajnáaliloʼob le kaajoʼ ku binoʼob kaʼach teʼ templo utiaʼal ka u yuʼuboʼob u tsikbaloʼ.
