Lucas 22:1-71
22 Le maʼ yaʼab u bin utiaʼal u beetaʼal u Kʼiinbesajil le Waajoʼob x-maʼ Levadurailoʼ, le ku kʼaabaʼtik Pascuaoʼ,
2 u nuuktakil le sacerdoteʼob yéetel le escribaʼoboʼ táan kaʼach u kaxtikoʼob junpʼéel bix maas maʼalob jeʼel u kíimskoʼobeʼ, baʼaleʼ saajkoʼob kaʼach tiʼ le kaajoʼ.
3 Satanás túuneʼ ook tu puksiʼikʼal Judas, le máax ku kʼaabaʼtik Iscariote, juntúul kaʼach tiʼ le doce apostoloʼoboʼ.
4 Judas túuneʼ bin tʼaan yéetel u nuuktakil le sacerdoteʼob bey xan yéetel u nuuktakil le máaxoʼob kanáantik le templooʼ, ka tu tsikbaltaj tu yéeteloʼob bix maas maʼalob jeʼel u kʼubik Jesús tu kʼaboʼobeʼ.
5 Letiʼob túuneʼ jach kiʼimakchaj u yóoloʼob yéetel tu yaʼaloʼob jeʼel u tsʼáaikoʼob u taakʼinil plata tiʼeʼ.
6 Judaseʼ tu yaʼalaj maʼalob, ka túun káaj u kaxtik u súutukil utiaʼal u traicionartik Jesús le ken pʼáatak minaʼan le yaʼabkach máakoʼob tu yiknaloʼ.
7 Le ka kʼuch u kʼiinil u jaantaʼal le waajoʼob x-maʼ levadurailoʼ, u kʼiinil tuʼux ku kíimsaʼal u baʼalcheʼil le Pascuaoʼ,
8 Jesuseʼ tu túuxtaj Juan yéetel Pedro táan u yaʼaliktiʼob: «Xeeneʼex, ka a beeteʼex u jaanlil le Pascua utiaʼal k-jaanteʼexoʼ».
9 Letiʼobeʼ tu kʼáatoʼobtiʼ: «¿Tuʼux a kʼáat ka k-beete?».
10 Letiʼeʼ tu yaʼalajtiʼob: «¡Ileʼex! Ken ookkeʼex teʼ kaajoʼ, yaan a wilkeʼex juntúul máak táan u bisik junpʼéel pʼúul chuup yéetel jaʼ. Xeeneʼex tak teʼ naj tuʼux kun ookloʼ.
11 Teʼexeʼ yaan a waʼalikeʼex tiʼ u yuumil le najoʼ: ‹Le j-Kaʼansajoʼ tu túuxtoʼon k-aʼaltech: «¿Tuʼux yaan le cuarto utiaʼal uʼulaboʼob tuʼux jeʼel u páajtal in jaantik le Pascua yéetel in disipuloʼoboʼ?»›.
12 Letiʼ túuneʼ yaan u yeʼesikteʼex junpʼéel nuxiʼ cuarto yaan kaʼanal, tuʼux yaan tuláakal baʼax kʼaʼabéetiʼ. Tiʼ túun ka a beeteʼexiʼ».
13 Letiʼob túuneʼ binoʼobeʼ ka tu yiloʼob jach jeʼex úuchik u yaʼalaʼaltiʼoboʼ, ka tu beetoʼob u jaanlil le Pascuaoʼ.
14 Ka túun kʼuch u yorail le kʼiinbesajoʼ, letiʼeʼ kulaj yiknal le mesa yéetel u apostoloʼoboʼ,
15 ka tu yaʼalajtiʼob: «¡Bukaʼaj in tsʼíiboltmil in jaantik le Pascua ta wéeteleʼex táanil tiʼ in muʼyajoʼ!,
16 tumen kin waʼalikteʼex: Maʼ ken in jaant tu kaʼatéen tak ken béeychajak tuláakal baʼal tu Reino Dios».
17 Tsʼoʼoleʼ tu chʼaʼaj junpʼéel copaeʼ, tu tsʼáaj gracias tiʼ Dioseʼ ka tu yaʼalaj: «Chʼaʼex lelaʼ ka a máanseʼex ta baatsileʼex,
18 tumen kin waʼalikteʼex: Desde bejlaʼeʼ maʼ ken in wukʼ tu kaʼatéen u kʼaab le uvaoʼ tak ken kʼuchuk u Reino Dios».
19 Tu chʼaʼaj xan junpʼéel waajeʼ, tu tsʼáaj gracias tiʼ Dioseʼ ka tu xetʼaj, ka tu tsʼáajtiʼob táan u yaʼalik: «Lelaʼ u kʼáat u yaʼal in wíinklil kun kʼubbil ta woʼolaleʼex. Maʼ u xuʼulul a beetkeʼex lelaʼ utiaʼal a kʼaʼajsikeneʼex».
20 Bey xan tu beetaj yéetel le copa ka tsʼoʼok u jaanloʼoboʼ, ka tu yaʼalajtiʼob: «Le copaaʼ u kʼáat u yaʼal le túumben núuptʼaan ku beetaʼal yoʼolal in kʼiʼikʼel kun wekbil ta woʼolaleʼexoʼ.
21 »Baʼaleʼ, ¡ileʼex!, le máax kun traicionartikenoʼ u tsʼaamaj u kʼab naatsʼ tiʼ teen yóokʼol le mesaoʼ.
22 U Paal máakeʼ táan u bin jeʼel bix aʼalaʼaniloʼ; baʼaleʼ ¡óotsil le máax kun traicionartikoʼ!».
23 Le apostoloʼob túunoʼ káaj u kʼáatkoʼob tu baatsiloʼob jach máax ichiloʼob taʼaytak u traicionartik Jesús.
24 Baʼaleʼ káaj xan u baʼateltʼantikoʼob máax ichiloʼob ku tuklaʼal letiʼ u maas nojchil.
25 Baʼaleʼ letiʼeʼ tu yaʼalajtiʼob: «U reyiloʼob le kaajoʼoboʼ ku nojbaʼalkúuntkubaʼob yóokʼol le máakoʼoboʼ, yéetel le máaxoʼob yaan autoridad tiʼoboʼ ku nojbaʼalkúuntaʼaloʼob ikil u yaʼalaʼal jach ku beetkoʼob uts tiʼ le máakoʼoboʼ.
26 Baʼaleʼ teʼexeʼ maʼ a beetkabaʼex beyoʼ, baʼaxeʼ le máax maas nojoch ichileʼexoʼ u beetuba jeʼex le maas chichanoʼ, le máax xan ku beetik u nojchileʼ u meyajt u maasil.
27 Tumen, ¿máakalmáak u maas nojchil: le máax jáalik le janaloʼ wa le ku kutal jaanloʼ? ¿Maʼ wa letiʼe ku kutal jaanloʼ? Baʼaleʼ teneʼ tiʼ yanen chúumuk tiʼ teʼex jeʼex le máax ku jáalik a woʼocheʼexoʼ.
28 »Baʼaleʼ teʼexeʼ tsʼoʼok a pʼáatleʼex tin wiknal tak teʼ súutukiloʼob táan u túuntaʼal in wóoloʼ;
29 jeʼex in Taata tsʼoʼok u beetik junpʼéel núuptʼaan tin wéeteleʼ, teneʼ kin beetik xan junpʼéel núuptʼaan ta wéeteleʼex utiaʼal u tsʼaʼabalteʼex junpʼéel Reino,
30 utiaʼal ka kulakeʼex janal tin wéetel tin Reino yéetel ka kulakeʼex tiʼ tronoʼob utiaʼal ka a juzgarteʼex u doce chʼiʼibal Israel.
31 »Simón, Simón, ¡ile!, Satanaseʼ tsʼoʼok u kʼáatik ka chaʼabaktiʼ u sen tíitkeʼex jeʼex u beetaʼal tiʼ le trigooʼ.
32 Baʼaleʼ teneʼ tsʼoʼok in kʼáat óol ta woʼolal utiaʼal maʼ u saʼatal a fe; teech túuneʼ ken suunakecheʼ líiʼs u yóol a sukuʼunoʼob».
33 Simón túuneʼ tu yaʼalajtiʼ: «Yuumtsil, teneʼ jeʼel in wóotik bin ta wéetel teʼ carceloʼ wa tak teʼ kíimiloʼ».
34 Baʼaleʼ Jesuseʼ tu yaʼalajtiʼ: «Pedro, kin waʼaliktecheʼ bejlaʼeʼ maʼ kun kʼaay le tʼeel táanil tiʼ a waʼalik óoxtéen maʼ a kʼaj óoleniʼ».
35 Jesuseʼ tu yaʼalaj xan tiʼob: «Le ka tin waʼalajteʼex ka xiʼikeʼex yéetel maʼ a biskeʼex x-mukub,* mix sáabukaan, mix xanabeʼ, ¿máasaʼ mix baʼal tu bineltajteʼex?». Letiʼobeʼ tu yaʼaloʼob: «¡Jaaj, mix baʼal!».
36 Ka túun tu yaʼalajtiʼob: «Baʼaleʼ beoraaʼ, le máax yaan u x-mukubeʼ u chʼaʼe, yéetel u chʼaʼ xan u sáabukaan; le máax xan minaʼan u espadaeʼ u kon u nookʼ utiaʼal ka u man junpʼéeliʼ.
37 Tumen kin waʼalikteʼexeʼ, le baʼax tsʼíibtaʼanaʼ tiʼ teen kun béeychajal: ‹Letiʼeʼ ilaʼab bey juntúul kʼaakʼas máakeʼ›. Le baʼax tsʼíibtaʼan tin woʼolaloʼ táan u béeychajal».
38 Letiʼobeʼ tu yaʼaloʼob: «Yuumtsil, ¡ile!, teʼelaʼ yaan kaʼapʼéel espadaʼob. Letiʼeʼ tu núukaj: «Yaan yéetel leloʼ».
39 Ka jóokʼ túuneʼ, jeʼex suukileʼ bin tu Puʼukil le Olivoʼoboʼ; u disipuloʼob xaneʼ binoʼob tu paach.
40 Ka kʼuchoʼobeʼ tu yaʼalajtiʼob: «Orarneneʼex mantatsʼ utiaʼal maʼ u túuntaʼal a wóoleʼex».
41 Letiʼ túuneʼ náachchaj junpʼíit tiʼ letiʼobeʼ,* ka xolajeʼ ka joʼopʼ u orar
42 táan u yaʼalik: «In Yuum, wa a kʼáateʼ luʼsten le copaaʼ. Baʼaleʼ maʼ u beetaʼal baʼax in kʼáat, baʼaxeʼ beetaʼak baʼax a kʼáat».
43 Ka túun chíikpaj juntúul angeleʼ ka tu muʼukʼaʼankúuntaj u yóol Jesús.
44 Baʼaleʼ letiʼeʼ tumen jach chiʼichnakchajaʼan yéetel yaachajaʼan u yóoleʼ káaj u maas orar yéetel u jaajil u yóol; u kʼíilkab xaneʼ suunaj bey kʼiʼikʼ ku chʼáajal teʼ luʼumoʼ.
45 Ka tsʼoʼok u orareʼ suunaj yiknal u disipuloʼob, ka tu yilaj táan u múutsʼul u yichoʼob, tumen lubaʼan u muukʼoʼob yoʼolal yaayaj óolal;
46 ka túun tu yaʼalajtiʼob: «¿Baʼaxten ka weenleʼex? Líikʼeneʼex yéetel orarneneʼex mantatsʼ utiaʼal maʼ u túuntaʼal a wóoleʼex».
47 Le maʼ tsʼoʼokok u tʼaanoʼ, ¡ile!, taal yaʼabkach máakoʼob teʼeloʼ; táanil tiʼ letiʼobeʼ tiʼ ku taal kaʼach Judas, juntúul tiʼ le doce apostoloʼoboʼ, ka náatsʼ yiknal Jesús utiaʼal u tsʼuʼutsʼe.
48 Baʼaleʼ Jesuseʼ tu yaʼalajtiʼ: «Judas, ¿yéetel junpʼéel tsʼuʼutsʼ ka traicionartik u Paal máak?».
49 Le máaxoʼob yanoʼob tu baʼpach Jesusoʼ, ka tu yiloʼob baʼax kun úuchleʼ tu yaʼaloʼob: «Yuumtsil, ¿k-xíikchʼaktoʼob wa yéetel le espadaoʼ?».
50 Juntúul tiʼ letiʼobeʼ tu loobiltaj u palitsil le u maas nojchil le sacerdoteʼoboʼ ka tu kúulchʼaktaj u x-noʼoj xikin.
51 Baʼaleʼ Jesuseʼ tu yaʼalaj: «Tsʼoʼoki; lelaʼ tsʼoʼok u píitmáan». Ka tu péetsʼkʼabtaj u xikin le máakoʼ ka tu tsʼakaj.
52 Jesús túuneʼ tu yaʼalaj tiʼ u nuuktakil le sacerdoteʼoboʼ, tiʼ u nojchil le máaxoʼob kanáantik le templooʼ bey xan tiʼ u nuuktakil le kaaj taal u machoʼoboʼ: «¿Jóokʼeʼex yéetel espadaʼob bey xan yéetel cheʼob bey utiaʼal a taal a chukeʼex juntúul j-ookoleʼ?».
53 Le tiaʼanen kaʼach sáamsamal ta wéeteleʼex teʼ templooʼ, maʼ ta macheneʼexiʼ. Baʼaleʼ lelaʼ u súutukil utiaʼal a beetkeʼex, yéetel u súutukil utiaʼal u gobernar le éeʼjochʼeʼeniloʼ».
54 Letiʼob túuneʼ tu machoʼobeʼ ka tu bisoʼob tu yotoch u maas nojchil le sacerdoteʼoboʼ, baʼaleʼ Pedroeʼ káaj u bin chan náach tiʼ letiʼob.
55 Le ka tu tʼaboʼob kʼáakʼ chúumuk tiʼ u táankabil le naj yéetel le ka kulajoʼob tu baʼpachoʼ, Pedroeʼ tiʼ kulukbal kaʼach tu yéeteloʼobeʼ.
56 Baʼaleʼ juntúul tiʼ le x-chʼúupalaloʼob ku meyajoʼob teʼeloʼ, tumen tu yilaj tiʼ kulukbal Pedro yiknal le kʼáakʼ ku tóochʼbaloʼ, tu jach pakteʼ ka tu yaʼalaj: «Le máakaʼ tiʼ yaan xan kaʼach tu yéeteleʼ».
57 Baʼaleʼ Pedroeʼ tu yaʼalaj maʼ jaajiʼ: «Koʼolel, teneʼ maʼ in kʼaj óoliʼ».
58 Maʼ sáam tiʼ leloʼ ilaʼab tumen uláakʼ juntúul máakeʼ ka aʼalaʼabtiʼ: «Techeʼ juntúulech xan tiʼ letiʼobiʼ». Baʼaleʼ Pedroeʼ tu yaʼalaj: «Maʼ jaajiʼ, wíinik».
59 Ka tsʼoʼok u máan kex junpʼéel horaeʼ, uláakʼ juntúul máakeʼ káaj u sen kʼaʼam aʼalik: «¡U jaajileʼ le máakaʼ tiʼ yaan xan kaʼach tu yéeteleʼ, tumen letiʼeʼ galileail!».
60 Baʼaleʼ Pedroeʼ tu yaʼalaj: «Wíinik, maʼ in wojel baʼax ka waʼalikiʼ». Teʼ súutuk jeʼeloʼ, le maʼ tsʼoʼokok u tʼaan Pedrooʼ, kʼaaynaj juntúul tʼeel.
61 Yuumtsileʼ tu sutubaeʼ ka tu paktaj Pedro; ka túun kʼaʼaj tiʼ Pedro le baʼax aʼalaʼabtiʼ tumen Yuumtsilaʼ: «Táanil tiʼ u kʼaay juntúul tʼeel bejlaʼeʼ, óoxtéen ken a waʼal maʼ a kʼaj óoleniʼ».
62 Jóokʼ túun Pedro paachileʼ ka joʼopʼ u yokʼol yéetel yaayaj óolal.
63 Le máakoʼob túun kanáantik Jesusoʼ, káaj u sen pʼaʼastikoʼob yéetel u jatsʼkoʼob;
64 ku tsʼoʼokol kaʼach u pixkoʼob u yicheʼ, ku kʼáatkoʼobtiʼ: «Wa profetaecheʼ, aʼaltoʼon máax lajech».
65 Yéetel seguernaj u yaʼalikoʼob yaʼabkach baʼaloʼob utiaʼal u pochʼkoʼob.
66 Ka túun sáaschajeʼ tu muchʼuba u nuuktakil le kaaj, u nuuktakil le sacerdoteʼob yéetel le escribaʼoboʼ, ka tu bisoʼob Jesús utiaʼal ka juzgartaʼak teʼ Sanedrinoʼ,* ka tu yaʼaloʼob:
67 «Wa teech le Cristooʼ, aʼaltoʼon». Baʼaleʼ letiʼeʼ tu yaʼalajtiʼob: «Kex ka in waʼalteʼexeʼ, teʼexeʼ junpuliʼ maʼ ken a creerteʼex.
68 Tsʼoʼoleʼ wa ka in beetteʼex kʼáatchiʼobeʼ mix junpʼéel ken a núukeʼexiʼ.
69 Baʼaleʼ desde bejlaʼeʼ u Paal máakeʼ yaan u kutal tu x-noʼoj kʼab Dios, le máax yaan nojoch páajtalil tiʼoʼ».
70 Tuláakloʼobeʼ tu yaʼaloʼob: «Jeʼeloʼ, ¿teech wa túun le u Paal Diosoʼ?». Jesuseʼ tu yaʼalajtiʼob: «Teʼex aʼalik de ke teen».
71 Letiʼob túuneʼ tu yaʼaloʼob: «¿Baʼax biilal toʼon uláakʼ máakoʼob utiaʼal takik u pool? Tak toʼon tsʼoʼok k-uʼuyik le baʼax tu yaʼaloʼ».
Notas
^ Mejen bolsaʼob ku meyaj kaʼach utiaʼal u bisaʼal taakʼin, oro, plata, cobre wa uláakʼ baʼaloʼob.
^ Wa: «le bukaʼaj ku náachtal u chʼiin máak yéetel tuunichoʼ».
^ Ilaʼak Tipʼ. 16.
