Lucas 24:1-53
24 Baʼaleʼ jach jaʼatskab tu yáax kʼiinil le semanaoʼ, le koʼoleloʼoboʼ binoʼob u bisoʼob teʼ muknal le kiʼibok xíiwoʼob tu xaʼakʼtoʼoboʼ.
2 Baʼaleʼ ka kʼuchoʼobeʼ tu yiloʼob luʼsaʼan le tuunich yaan kaʼach tu jool le muknaloʼ.
3 Le ka ookoʼobeʼ maʼ tu yiloʼob u wíinklil Yuumtsil Jesusiʼ.
4 Teʼ súutuk jach péeknajaʼan u yóoloʼob yoʼolal le baʼax úuchoʼ, téek chíikpaj kaʼatúul máakoʼob táan u léembal u nookʼoʼob waʼalakbaloʼob tu yiknaloʼob.
5 Le koʼoleloʼobaʼ jach sajakchajoʼobeʼ ka tu chinaj u yichoʼob. Le máakoʼob túunoʼ tu yaʼaloʼobtiʼob: «¿Baʼaxten ka kaxtikeʼex ichil le kimenoʼob le Máax kuxaʼanoʼ?
6 [Minaʼan wayeʼ, tumen tsʼoʼok u líiʼsaʼal.]* Kʼaʼajakteʼex le baʼax tu yaʼalajteʼex le tiaʼan kaʼach Galileaoʼ.
7 Letiʼeʼ tu yaʼaleʼ u Paal máakeʼ yaan u kʼuʼubul tu kʼab le j-kʼeban máakoʼoboʼ yéetel yaan u baʼajal tiʼ cheʼ, baʼaleʼ tu yóoxpʼéel kʼiineʼ yaan u líiʼsaʼal».
8 Ka túun kʼaʼaj tiʼ le koʼoleloʼob le baʼaxoʼob u yaʼalmaj Jesusoʼ;
9 ka jóokʼoʼob tiʼ le muknaloʼ ka bin u tsikbaltoʼob tiʼ le once apostoloʼob tuláakal le baʼaloʼobaʼ bey xan tiʼ u maasil disipuloʼoboʼ.
10 Le koʼoleloʼobaʼ María Magdalena, Juana yéetel María u maama Santiago. Le u maasil koʼoleloʼob yanoʼob kaʼach tu yéeteloʼoboʼ tu tsikbaltoʼob xan tiʼ le apostoloʼob le baʼax úuchoʼ.
11 Baʼaleʼ letiʼobeʼ maʼ tu creertoʼob le baʼax tu yaʼalaj le koʼoleloʼobaʼ, tumen utiaʼaloʼobeʼ bey junpʼéel baʼal maʼ tu páajtal u yúuchleʼ.
12 [Baʼaleʼ Pedroeʼ líikʼeʼ ka bin áalkabil yiknal le muknaloʼ, ka chʼeenebnaj ichileʼ chéen le nookʼoʼob ikil toʼobik Jesús tu yiloʼ. Le ka lukʼeʼ jach jakʼaʼan u yóol yoʼolal le baʼax tsʼoʼok u yúuchloʼ.]*
13 Teʼ kʼiin jeʼeloʼ, kaʼatúul tiʼ letiʼobeʼ táan u binoʼob tiʼ junpʼéel chan kajtalil ku kʼaabaʼtik Emaús, lelaʼ kex once kilómetros yanil kaʼach tiʼ Jerusalén.
14 Letiʼobeʼ táan kaʼach u tsikbaltikoʼob tu baatsiloʼob tuláakal le baʼaxoʼob tsʼoʼok u yúuchloʼ.
15 Le táan kaʼach u bin u tsikbaloʼoboʼ, náatsʼ Jesuseʼ ka joʼopʼ u xíimbal tu yéeteloʼob,
16 baʼaleʼ maʼ páajchaj u kʼaj óoltikoʼobiʼ.
17 Letiʼeʼ tu yaʼalajtiʼob: «¿Baʼax le ka bin a tsikbaltikeʼex ta baatsileʼexaʼ?». Letiʼob túuneʼ waʼalajoʼob; tu yichoʼobeʼ chíikaʼan lubaʼan u yóoloʼob.
18 Le disipulo ku kʼaabaʼtik Cleopasoʼ tu núukajtiʼ: «¿Chéen wa jáan taaljaʼanech kajtal Jerusalén yéetel náach kajaʼanech tiʼ u maasil, le oʼolal maʼ a wojel baʼaxoʼob tsʼoʼok u yúuchul Jerusalén teʼ kʼiinoʼobaʼ?».
19 Jesús túuneʼ tu yaʼalajtiʼob: «¿Baʼaxoʼob túun?». Letiʼobeʼ tu yaʼaloʼobtiʼ: «Le baʼaxoʼob yaan yil yéetel Jesús, le nazaretiloʼ; le máax tu yeʼesaj tu táan Dios yéetel tu táan le máakoʼob juntúul nojoch profeta yoʼolal le nukuch baʼaloʼob tu beetaj yéetel tu yaʼaloʼ.
20 Letiʼeʼ kʼuʼub tumen u nuuktakil le sacerdoteʼob yéetel le gobernadoroʼob utiaʼal ka kíimsaʼak yéetel ka baʼajak tiʼ cheʼ.
21 Toʼoneʼ t-tukleʼ letiʼe máax yéeyaʼan utiaʼal u salvartik kaʼach u kaajil Israeloʼ, baʼaleʼ bejlaʼeʼ tsʼoʼok óoxpʼéel kʼiin úuchuk tuláakal le baʼaloʼobaʼ.
22 Tsʼoʼoleʼ jujuntúul koʼoleloʼob yaan xan ichiloʼoneʼ tu beetoʼob u jaʼakʼal k-óol tumen jach jaʼatskabeʼ binoʼob yiknal le muknaloʼ,
23 baʼaleʼ maʼ tu yiloʼob u wíinklil Jesusiʼ, ka taaloʼobeʼ tu yaʼaloʼob yaan angeloʼob tu chíikbesubatiʼob táan u yaʼalikoʼob kuxaʼan bin Jesús.
24 Tsʼoʼoleʼ jujuntúul xan tiʼ le máaxoʼob yanoʼob t-éeteloʼ binoʼob yiknal le muknaloʼ, ka tu yiloʼob tuláakal jach jeʼex aʼalaʼabiktiʼob tumen le koʼoleloʼoboʼ, baʼaleʼ maʼ tu yiloʼob Jesusiʼ».
25 Ka túun tu yaʼalajtiʼob: «Máakeʼex minaʼan a naʼateʼex, ¿baʼaxten a puksiʼikʼaleʼexeʼ xaan u creertik tuláakal le baʼaxoʼob tu yaʼalaj le profetaʼoboʼ?
26 ¿Maʼ wa kʼaʼabéet kaʼach u muʼyajtik Cristo le baʼaloʼobaʼ bey xan u kʼamik le nojbeʼenil u náajaltmoʼ?».
27 Ka túun káaj u tsoliktiʼob tuláakal le baʼaxoʼob ku yaʼalik le Kiliʼich Tsʼíiboʼob tu yoʼolaloʼ; káaj yéetel le baʼaxoʼob tu tsʼíibtaj Moisés yéetel le profetaʼoboʼ.
28 Le ka náatsʼoʼob túun teʼ chan kajtalil tuʼux ku binoʼoboʼ, Jesuseʼ tu beetaj bey maas náach ku bineʼ.
29 Baʼaleʼ letiʼobeʼ tu sen aʼaloʼobtiʼ ka pʼáatak: «Pʼáatkech t-éetel tumen tsʼoʼok u chíinil Kʼiin, taʼaytak u yáakʼabtal». Letiʼ túuneʼ ook teʼ najoʼ ka pʼáat tu yéeteloʼob.
30 Ka kulaj janal tu yéeteloʼobeʼ tu chʼaʼaj le waajoʼ, tu beetaj junpʼéel oración, tsʼoʼoleʼ tu xetʼajeʼ ka tu tʼoxajtiʼob.
31 Letiʼ túun ka tu kʼaj óoltoʼob yéetel ka tu tsʼáajoʼob cuenta máax letiʼ, baʼaleʼ saʼat tu táan u yichoʼob.
32 Letiʼob túuneʼ káaj u yaʼalikoʼob tu baatsiloʼob: «¿Maʼ wa t-uʼuyaj bey táan u yelel k-puksiʼikʼal le táan u taal u tsikbal t-éetel teʼ bejoʼ, le táan u tsoliktoʼon jach baʼax ku yaʼalik tuláakal le Kiliʼich Tsʼíiboʼoboʼ?».
33 Teʼ súutuk jeʼeloʼ, líikʼoʼobeʼ ka suunajoʼob Jerusalén; teʼeloʼ tu yiloʼob le once apostoloʼob muchʼukbaloʼob yéetel uláakʼ disipuloʼoboʼ
34 ka aʼalaʼabtiʼob: «¡Le Yuumtsiloʼ jach tu jaajil tsʼoʼok u líiʼsaʼal yéetel tsʼoʼok u chíikbeskuba tiʼ Simón!».
35 Le kaʼatúul disipuloʼob túunoʼ tu tsikbaltoʼob xan le baʼax úuch le táan u binoʼob teʼ bejoʼ, bey xan bix úuchik u kʼaj óoltikoʼob Jesús le táan u xetʼik le waajoʼ.
36 Le táan u tʼaanoʼob tiʼ le baʼaloʼobaʼ, letiʼeʼ waʼalaj chúumuk tiʼ letiʼobeʼ [ka tu yaʼalajtiʼob: «Yanakteʼex jeetsʼelil».]*
37 Letiʼob túuneʼ péeknaj u yóoloʼob yéetel sajakchajoʼob, ka tu tukloʼob juntúul jaʼasaj óol le ku yilkoʼoboʼ.
38 Le oʼolal tu yaʼalajtiʼob: «¿Baʼaxten ku péek a wóoleʼex yéetel ku kaʼapʼéelchajal u yóol a puksiʼikʼaleʼex?
39 Ileʼex in kʼaboʼob yéetel in wookoʼob, ka a wileʼex jach tu jaajil teen; macheneʼexiʼ ka a wileʼex, tumen juntúul jaʼasaj óoleʼ minaʼan u bakʼel mix u baakel, jeʼex a wilkeʼex yaan tiʼ tenaʼ».
40 [Le ka tu yaʼalaj lelaʼ tu yeʼesajtiʼob u kʼaboʼob yéetel u yookoʼob.]*
41 Baʼaleʼ letiʼobeʼ tumen jach kiʼimak u yóoloʼob yéetel jakʼaʼan u yóoloʼobeʼ, láayliʼ maʼ tu páajtal u creertikoʼobeʼ. Le oʼolaleʼ Jesuseʼ tu yaʼalajtiʼob: «¿Yaan wa teʼex baʼal jaantbil wayeʼ?».
42 Ka tsʼaʼab junxéetʼ kʼáaʼtbil kay tiʼ;
43 letiʼ túuneʼ tu chʼaʼajeʼ ka tu jaantaj tu táan u yichoʼob.
44 Ka tsʼoʼokeʼ tu yaʼalajtiʼob: «Leloʼobaʼ letiʼe baʼaxoʼob tin waʼalajteʼex le tiaʼanen kaʼach ta wéeteleʼexoʼ; tin waʼalajteʼex yaan u béeytal tuláakal le baʼaxoʼob ku yaʼalaʼal tin woʼolal tu Ley Moisés, tu tsʼíib le profetaʼoboʼ bey xan teʼ Salmosoʼ».
45 Ka túun tu jeʼekʼabtaj u tuukuloʼob utiaʼal ka u naʼatoʼob baʼax u kʼáat u yaʼal le Kiliʼich Tsʼíiboʼoboʼ,
46 ka tu yaʼalajtiʼob: «Bey tsʼíibtaʼaniloʼ, le Cristooʼ yaniliʼ u muʼyaj yéetel yaniliʼ u líiʼsaʼal ichil le kimenoʼob tu yóoxpʼéel kʼiinoʼ,
47 yéetel tu kʼaabaʼeʼ yaan u kʼaʼaytaʼal ka u kʼex u tuukul u kajnáaliloʼob tuláakal le kaajoʼob utiaʼal ka perdonartaʼakoʼoboʼ. Lelaʼ yaan u káajal desde Jerusalén.
48 Teʼexeʼ yaan a beetik a j-jaajkunajileʼex tiʼ le baʼaloʼobaʼ.
49 Tsʼoʼoleʼ, ¡ileʼex!, yaan in túuxtik ta wóokʼoleʼex le baʼax u yaʼalmaj u tsʼáaik in Taataoʼ, baʼaleʼ teʼexeʼ pʼáateneʼex tu kaajil Jerusalén tak ken a kʼameʼex le páajtalil ku taal tiʼ le kaʼanoʼ».
50 Tsʼoʼoleʼ bisaʼaboʼob tak tu kaajil Betania tumen Jesús; teʼeloʼ letiʼeʼ tu líiʼsaj u kʼaboʼobeʼ ka tu kʼáataj tiʼ Dios ka xiʼik utsil tiʼob.
51 Le táan u beetik lelaʼ luʼsaʼab ichiloʼobeʼ ka joʼopʼ u bisaʼal kaʼan.
52 Letiʼobeʼ xolajoʼob utiaʼal u yeʼeskoʼob tsiikil tiʼ; ka tsʼoʼokeʼ suunajoʼob Jerusalén jach kiʼimak u yóoloʼob.
53 Letiʼob túuneʼ mantatsʼ kaʼach ku binoʼob u kiʼikiʼtʼantoʼob Dios teʼ templooʼ.
Notas
^ Jujunpʼéel úuchben tsʼíiboʼobeʼ ku taaskoʼob le tʼaanoʼobaʼ, baʼaleʼ yaan úuchben tsʼíiboʼob jach kʼamaʼan baʼax ku yaʼalikoʼobeʼ, maʼatech u taaskoʼob.
^ Ilaʼak u tsolajil Lu 24:6.
^ Ilaʼak u tsolajil Lu 24:6.
^ Ilaʼak u tsolajil Lu 24:6.
