Lucas 4:1-44
4 Jesús túuneʼ, lukʼ teʼ Jordán chuup yéetel kiliʼich muukʼoʼ,* ka bisaʼab jejeláas tuʼuxoʼob tumen le kiliʼich muukʼ teʼ desierto
2 ichil cuarenta kʼiinoʼoboʼ; teʼ túunoʼ túuntaʼab u yóol tumen le Kʼaasilbaʼaloʼ.* Tsʼoʼoleʼ teʼ kʼiinoʼoboʼ maʼ tu jaantaj mix baʼaliʼ, le oʼolal ka tsʼoʼok le cuarenta kʼiinoʼoboʼ, wiʼijchaji.
3 Ka túun aʼalaʼabtiʼ tumen le Kʼaasilbaʼaloʼ: «Wa u paalech Dioseʼ, aʼal ka suunak waajil le tuunichaʼ».
4 Baʼaleʼ Jesuseʼ tu núukajtiʼ: «Le Kiliʼich Tsʼíiboʼ ku yaʼalik: ‹Maʼ chéen yéetel waaj unaj u kuxtal wíinikiʼ›».
5 Ka túun tu bisaj Jesús tiʼ junpʼéel kaʼanal kúuchil, yéetel ichil u chan súutukeʼ tu yeʼesajtiʼ tuláakal u reinoiloʼob yóokʼol kaab.
6 Le Kʼaasilbaʼal túunoʼ tu yaʼalajtiʼ: «Yaan in tsʼáaiktech páajtalil yóokʼol tuláakal le baʼaloʼobaʼ bey xan u nojbeʼeniloʼob tumen in tiaʼaloʼob, yéetel tiʼ jeʼel máaxak in kʼáateʼ, kin tsʼáaik.
7 Le oʼolaleʼ wa teech ka xoltal tin táan utiaʼal a adorarten kex chéen juntéeneʼ, yaan a láaj tiaʼalintik le baʼaloʼobaʼ».
8 Jesús túuneʼ tu yaʼalajtiʼ: «Le Kiliʼich Tsʼíiboʼ ku yaʼalik: ‹Jéeoba a Dios unaj a adorartik, yéetel chéen letiʼ kʼaʼabéet a meyajtik›».
9 Le Kʼaasilbaʼal xanoʼ tu bisaj Jesús Jerusaleneʼ, ka tu naʼaksaj tu maas kaʼanlil u baʼpakʼiloʼob le templooʼ, ka tu yaʼalajtiʼ: «Wa u paalech Dioseʼ pulaba kabal desde wayeʼ,
10 tumen le Kiliʼich Tsʼíiboʼ ku yaʼalik: ‹Yaan u yaʼalik tiʼ u angeloʼob ka u kanáantechoʼob,
11 letiʼob túuneʼ yaan u chʼúuykechoʼob yéetel u kʼaboʼob utiaʼal maʼ a kʼolik a wook tiʼ mix junpʼéel tuunich›».
12 Jesuseʼ tu núukajtiʼ: «Le Kiliʼich Tsʼíiboʼ ku yaʼalik: ‹Maʼ unaj a túuntik u yóol Jéeoba a Diosiʼ›».
13 Le Kʼaasilbaʼaloʼ ka tsʼoʼok túun u túuntik u yóol Jesuseʼ, lukʼ tu yiknal utiaʼal u páaʼtik uláakʼ súutukil maas maʼalob utiaʼal u kaʼa túuntik u yóol.
14 Jesuseʼ chuup yéetel kiliʼich muukʼ ka suunaj Galilea. Tiʼ tuláakal le mejen kajtaliloʼob yanoʼob naatsʼoʼ káaj u sen úuchul maʼalob tʼaan tu yoʼolal.
15 Ku kaʼansaj xan tu sinagogaʼob, yéetel tuláakal máak ku tʼaan maʼalob tu yoʼolal.
16 Jesús túuneʼ bin Nazaret, le kaaj tuʼux líiʼsaʼaboʼ. Jeʼex suukil u beetik tu kʼiinil Sabadoeʼ, ook teʼ sinagogaoʼ ka waʼalaj xook.
17 Ka túun tsʼaʼabtiʼ le rollo tsʼíibtaʼan tumen profeta Isaíasoʼ, tu chóolajeʼ ka tu kaxtaj tuʼux tsʼíibtaʼan le tʼaanoʼobaʼ:
18 «U kiliʼich muukʼ Jéeobaeʼ tiʼ yaan tin wóokʼoleʼ, tumen Dioseʼ tu yéeyajen utiaʼal in tsikbaltik maʼalob péektsil tiʼ le óotsiloʼoboʼ. Tu túuxten utiaʼal in kʼaʼaytik yaan u jáalkʼabtaʼal le máaxoʼob bisaʼanoʼob kʼalbiloʼ yéetel yaan u kaʼa tsʼaʼabal u sáasilil u yich le máaxoʼob chʼóopoʼoboʼ; tu túuxten xan utiaʼal in jáalkʼabtik le máaxoʼob loobiltaʼanoʼoboʼ
19 bey xan utiaʼal in kʼaʼaytik u jaʼabil u kaʼa kʼaʼamal máak tumen Jéeoba».
20 Ka tsʼoʼokeʼ Jesuseʼ tu kotsʼaj le rollooʼ ka tu tsʼáaj tiʼ le máax ku yáantaj teʼ sinagogaoʼ, tsʼoʼoleʼ ka kulaji; tuláakal le máakoʼob yanoʼoboʼ pʼáat chéen táan u paktikoʼob Jesús.
21 Letiʼ túuneʼ tʼaanajeʼ ka tu yaʼalajtiʼob: «Bejlaʼeʼ táan u béeychajal le tsʼíib táant a wuʼuyikeʼexaʼ».
22 Tuláakal le máakoʼoboʼ ku tʼaanoʼob maʼalob tu yoʼolal, yéetel ku jaʼakʼal u yóoloʼob ken u yuʼuboʼob le jatsʼuts tʼaanoʼob ku jóokʼol tu chiʼoʼ, yéetel ku yaʼalikoʼob: «¿Máasaʼ le máakaʼ u paal José?».
23 Ka túun tu yaʼalajtiʼob: «Jach in tuklikeʼ yaan a waʼalikeʼexten le kettʼaanaʼ: ‹Doctor, tsʼakaba ta juunal; le baʼaxoʼob t-uʼuyaj ta beetaj Capernaumoʼ, beetoʼob xan way ta kaajaleʼ›».
24 Baʼaleʼ letiʼeʼ tu yaʼalaj: «Tu jaajil kin waʼalikteʼexeʼ mix juntúul profeta ku kʼaʼamal maʼalob tu kaajal.
25 Tu jaajil kin waʼalik xan teʼex: Tu kʼiiniloʼob Elías le ka xuʼul u kʼáaxal jaʼ ichil óoxpʼéel jaʼaboʼob yéetel seis meses, le ka yanchaj junpʼéel jach nojoch wiʼijil tiʼ tuláakal yóokʼol kaaboʼ, yaʼab koʼoleloʼob kimen u yíichamoʼob yanoʼob kaʼach tu kaajil Israel.
26 Kex beyoʼ, Elíaseʼ maʼ túuxtaʼab yiknal mix juntúul tiʼ le koʼoleloʼobaʼ, baʼaxeʼ chéen tu yiknal le koʼolel kimen u yíicham yaan tu kaajil Sarepta tu luʼumil Sidonoʼ.
27 Bey xan tu kʼiiniloʼob profeta Eliseoeʼ, tu kaajil Israeleʼ yaan kaʼach yaʼab máakoʼob kʼojaʼanoʼob tiʼ lepraiʼ; kex beyoʼ maʼ tsʼaʼak mix juntúul tiʼ letiʼobiʼ, chéen Naamán, le máax kajaʼan Siriaoʼ».
28 Tuláakal túun le máaxoʼob yanoʼob teʼ sinagoga yéetel tu yuʼuboʼob le baʼaxoʼob tu yaʼaloʼ jach pʼuʼujoʼob;
29 ka líikʼoʼobeʼ ka tu séeb jóoʼsoʼob teʼ kaajoʼ, ka tu bisoʼob tu maas kaʼanlil le puʼuk tuʼux beetaʼan u kaajaloʼoboʼ, utiaʼal ka u léenchʼintoʼobiʼ.
30 Baʼaleʼ Jesuseʼ kʼáatmáan chúumuk tiʼ letiʼobeʼ ka tu chʼaʼjoʼoltaj u bin.
31 Ka túun kʼuch tu kaajil Capernaum tiʼ u luʼumil Galilea. Teʼeloʼ tu kaʼansaj le máakoʼob tu kʼiiniloʼob Sabadooʼ;
32 letiʼobeʼ jaʼakʼ u yóoloʼob yoʼolal bix u kaʼansaj tumen ku tʼaan yéetel páajtalil.
33 Teʼ sinagoga túunoʼ yaan kaʼach juntúul máak okaʼan juntúul demonio tiʼ, letiʼeʼ tu kʼaʼam awtaj:
34 «¡Jay! ¿Baʼax yaan k-il ta wéetel, Jesús Nazaretil? ¿Taalech wa a xuʼulsoʼon? Teneʼ jach in wojel máaxech, teech le j-Kiliʼich túuxtaʼan tumen Diosoʼ».
35 Baʼaleʼ Jesuseʼ tu kʼeyaj táan u yaʼaliktiʼ: «Mak a chiʼ, jóokʼen tiʼ le máakoʼ». Le demoniooʼ ka tsʼoʼok túun u beetik u lúubul le máak chúumuk tiʼ letiʼoboʼ, ka jóokʼi, baʼaleʼ mix baʼal tu beetaj tiʼ le máakoʼ.
36 Tu yoʼolal lelaʼ, tuláakloʼob pʼáat jaajap u chiʼob, ka joʼopʼ u yaʼalikoʼob tu baatsiloʼob: «¿Baʼax clase tʼaanil ku beetik le máakaʼ, tumen yéetel autoridad bey xan yéetel páajtalil ku yaʼalik tiʼ le demonioʼob ka jóokʼkoʼob tiʼ le máakoʼoboʼ, letiʼob túuneʼ ku jóokʼloʼob?».
37 Bey túunoʼ tuláakal tuʼux tiʼ u luʼumil Galilea ku tsikbaltaʼal kaʼach le baʼaxoʼob ku beetik Jesusoʼ.
38 Ka tsʼoʼok u lukʼul teʼ sinagogaoʼ, ook tu yotoch Simón. Baʼaleʼ u suegra Simoneʼ,* jach táan u muʼyaj tumen táan u sen chokwil, ka sen kʼáataʼabtiʼ ka u yáante.
39 Ka túun náatsʼ Jesús tu yiknaleʼ ka tu beetaj u síistal u chokwil. Tu séebaʼanileʼ le koʼoleloʼ líikʼeʼ ka joʼopʼ u beetik u yoʼochoʼob.
40 Baʼaleʼ ka joʼopʼ u tʼúubul kʼiineʼ, tuláakal le máakoʼob yaan máax kʼojaʼan tiʼobeʼ tu bisoʼob yiknal Jesús. Letiʼ túuneʼ tu tsʼáaj u kʼab tu yóokʼol cada juntúuleʼ ka tu tsʼakoʼob.
41 Tiʼ yaʼab máakoʼob xan jóokʼ demonioʼob táan u yawatoʼob yéetel táan u yaʼalikoʼob: «Techeʼ u Paalech Dios». Baʼaleʼ letiʼeʼ tu kʼeyoʼob utiaʼal maʼ u yaʼalikoʼob mix baʼal, tumen le demonioʼoboʼ u yojloʼob letiʼ le Cristooʼ.
42 Ka sáaschaj túuneʼ jóokʼeʼ ka bin tiʼ junpʼéel tuʼux mix máak yaniʼ. Baʼaleʼ le yaʼabkach máakoʼoboʼ káaj u máan u kaxtoʼob tak ka kʼuchoʼob teʼ tuʼux binoʼ, yéetel káaj u yilkoʼob baʼax jeʼel u beetkoʼob utiaʼal maʼ u lukʼul tu yiknaloʼobeʼ.
43 Letiʼ túuneʼ tu yaʼalajtiʼob: «Kʼaʼabéet xan in kʼaʼaytik u maʼalob péektsilil u Reino Dios tiʼ uláakʼ kaajoʼob, tumen le beetik túuxtaʼaben».
44 Le oʼolaleʼ, káaj u bin táan u kʼaʼaytaj teʼ sinagogaʼob yaan Judeaoʼ.
Notas
^ Wa: «espíritu santooʼ». Ilaʼak Tipʼ. 16.
^ Lit.: «Diablo», u kʼáat u yaʼaleʼ j-líiʼsaj tʼaan.
^ Lelaʼ uláakʼ kʼaabaʼ ku tsʼaʼabal tiʼ apóstol Pedro.
