Lucas 5:1-39
5 Juntéenjeak waʼalakbal Jesús táan u kaʼansik baʼax ku yaʼalik Dios tu jáal u jaʼil Genesareteʼ, káaj u peʼepechʼaʼal tumen le yaʼabkach máakoʼob uʼuyik u tsikbaloʼ.
2 Letiʼeʼ tu yilaj kaʼapʼéel barcoʼob jeʼelsaʼan tu jáal le jaʼoʼ, baʼaleʼ le j-chuk kayoʼoboʼ minaʼanoʼobiʼ, letiʼobeʼ táan kaʼach u pʼoʼikoʼob u redoʼob.
3 Ka naʼak Jesús tiʼ junpʼéel tiʼ le barcoʼoboʼ, le utiaʼal kaʼach Simonoʼ, ka tu yaʼalajtiʼ ka u chan náachkunt junpʼíit le barco tiʼ u jáal le jaʼoʼ. Kulaj túun Jesuseʼ ka joʼopʼ u kaʼansik le yaʼabkach máakoʼob desde teʼ barcooʼ.
4 Ka tsʼoʼok u kaʼansajeʼ, tu yaʼalaj tiʼ Simón: «Bis le barco tak teʼ tuʼux taamoʼ, ka a puleʼex a redeʼexiʼ, utiaʼal ka chuuknakeʼex».
5 Baʼaleʼ Simoneʼ tu yaʼalaj: «J-Kaʼansaj, bul áakʼab meyajnajoʼon baʼaleʼ maʼ t-chukaj mix baʼaliʼ, baʼaleʼ tumen teech aʼalikeʼ nikaʼaj in pul le redoʼoboʼ».
6 Ka túun tu beetoʼob lelaʼ, yaʼabkach kay tu chukoʼobiʼ. Káaj tak u jáatal u redoʼob.
7 Ka tu béechʼkʼabtoʼob le u yéet meyajoʼob yanoʼob tuláakʼ barco utiaʼal ka taalak áantbiloʼoboʼ; letiʼobeʼ taaloʼobeʼ ka tu chupoʼob tu kaʼapʼéelal le barcoʼoboʼ, le barcoʼob túunaʼ káaj u búululoʼob.
8 Ka tu yilaj Simón Pedro lelaʼ xolaj tu táan Jesuseʼ ka tu yaʼalaj: «Yuumtsil, náachkuntaba tiʼ teen, tumen kʼeban wíiniken».
9 Lelaʼ tu yaʼalaj tumen letiʼ yéetel le uláakʼ máaxoʼob yanoʼoboʼ jach jaʼakʼ u yóoloʼob yoʼolal le yaʼabkach kay tu chukoʼoboʼ;
10 Santiago yéetel Juan, u paalaloʼob Zebedeo, u yéet meyajoʼob Simoneʼ jaʼakʼ xan u yóoloʼob. Baʼaleʼ Jesuseʼ tu yaʼalaj tiʼ Simón: «Maʼ a chʼaʼik saajkil. Desde bejlaʼeʼ yaan u káajal a chukik máakoʼob kuxaʼanoʼob».
11 Ka túun suunajoʼob yéetel le barcoʼob teʼ jáal jaʼoʼ, tu pʼatoʼob tuláakaleʼ, ka binoʼob tu paach Jesús.
12 Uláakʼ juntéen le tiaʼan kaʼach tiʼ junpʼéel tiʼ le kaajoʼoboʼ, taal juntúul máak tu yiknal chuup u wíinklil yéetel lepra, ka tu yilaj Jesuseʼ, tu xóolkʼabtuba táan u kʼáat óoltik tiʼ: «Yuumtsil, wa a kʼáateʼ jeʼel u páajtal a tsʼakikeneʼ».
13 Jesús túuneʼ tu tichʼaj u kʼabeʼ, ka tu péetsʼkʼabtaj táan u yaʼaliktiʼ: «In kʼáat. Utschajkech». Tu séebaʼanil lukʼ le lepra tiʼoʼ.
14 Jesuseʼ tu yaʼalaj tiʼ le máak maʼ u yaʼalik tiʼ mix máakoʼ. Tu yaʼalaj: «Xeen utiaʼal ka u yilech le sacerdoteoʼ, yéetel kʼub le siibal tu yaʼalaj Moisés unaj u tsʼaʼabal tu yoʼolal a toj óolaloʼ, utiaʼal ka u yojéeltoʼob tsʼoʼok a tsʼaʼakal».
15 Baʼaleʼ seguernaj u maas yaʼabtal tuʼux ku yúuchul tsikbal tu yoʼolal Jesús; yaʼabkach máakoʼob túuneʼ ku muchʼkubaʼob kaʼach u chʼenxikintoʼob bey xan utiaʼal ka tsʼaʼakakoʼob tiʼ u kʼojaʼaniloʼob.
16 Chéen baʼaleʼ Jesuseʼ suuk kaʼach u bin chéen tu juunal teʼ tuʼuxoʼob mix máak yanoʼ utiaʼal u orariʼ.
17 Tiʼ junpʼéel tiʼ le kʼiinoʼob táan u kaʼansajoʼ, jujuntúul fariseoʼob yéetel le máaxoʼob kaʼansik le Ley taaljaʼanoʼob tiʼ tuláakal u kaajiloʼob Galilea, Judea yéetel Jerusalenoʼ, tiʼ kulukbaloʼob xaniʼ; tiʼ Jesuseʼ tsʼaʼan kaʼach páajtalil tumen Jéeoba utiaʼal u tsʼakik le kʼojaʼanoʼoboʼ.
18 Tsʼoʼoleʼ, ¡ile!, jujuntúul máakoʼobeʼ táan kaʼach u biskoʼob yóokʼol junpʼéel camilla juntúul máak minaʼan u muukʼ u wíinklil, yéetel táan kaʼach u kaxtikoʼob bix jeʼel u yoksikoʼob utiaʼal ka u tsʼáaʼob tu táan Jesuseʼ.
19 Le oʼolaleʼ le ka tu yiloʼob maʼ tu páajtal u yoksikoʼob tumen jach yaʼabkach máakoʼob yaneʼ, naʼakoʼob tu yóokʼol le najoʼ, tu beetoʼob junpʼéel jooleʼ, ka tu yéemsoʼob le camilla chúumuk tiʼ le máaxoʼob yanoʼob tu táan Jesusoʼ.
20 Le ka tu yilaj le fe yaan tiʼ le máakoʼoboʼ, Jesuseʼ tu yaʼalaj: «Wíinik, tsʼoʼok u perdonartaʼal a kʼebanoʼob».
21 Le escribaʼob* yéetel le fariseoʼob túunoʼ káaj u tuklikoʼob: «¿Máax le máak ku kʼaakʼastʼaanaʼ? ¿Maʼ wa chéen Dios jeʼel u páajtal u perdonartik kʼebanoʼobeʼ?».
22 Baʼaleʼ tumen tu tsʼáaj cuenta Jesús baʼax ku tuklikoʼobeʼ, tu yaʼalajtiʼob: «¿Baʼax le ka waʼalikeʼex ichil a puksiʼikʼaleʼex beyoʼ?
23 ¿Baʼax maas maʼ talam yaʼalaʼaliʼ: ‹Tsʼoʼok u perdonartaʼal a kʼebanoʼob›, wa u yaʼalaʼal: ‹Líikʼen yéetel xíimbalnen›?
24 Baʼaleʼ utiaʼal ka a wojéelteʼex yaan autoridad tiʼ u Paal máak way Luʼum utiaʼal u perdonartik le kʼebanoʼoboʼ... —tu yaʼalaj tiʼ le máak minaʼan u muukʼ u wíinkliloʼ—: Kin waʼaliktech: Líikʼen, chʼaʼ a camillaeʼ ka xiʼikech ta wotoch».
25 Tu séebaʼanileʼ líikʼ tu táanoʼobeʼ ka tu chʼaʼaj le nuʼukul tuʼux chilikbal kaʼachoʼ ka bin tu yotoch táan u nojbeʼenkúuntik Dios.
26 Tuláakal túun le máaxoʼob yanoʼoboʼ sen jaʼakʼ u yóoloʼobeʼ ka joʼopʼ u nojbeʼenkúuntkoʼob Dios, yéetel jach sajakchajoʼobeʼ ka joʼopʼ u yaʼalikoʼob: «¡Baʼaloʼob jelaʼantak tsʼoʼok k-ilik bejlaʼeʼ!».
27 Ka tsʼoʼok túun u yúuchul le baʼaloʼobaʼ, Jesuseʼ jóokʼeʼ ka tu yilaj Leví, juntúul máak ku kʼam impuesto, kulukbal kaʼach teʼ kúuchil tuʼux ku boʼotaʼal le impuestoʼoboʼ, ka tu yaʼalajtiʼ: «Koʼoten tin paach».
28 Leví túuneʼ tu pʼataj tuláakal le baʼaloʼoboʼ, ka líikʼeʼ ka joʼopʼ u bin tu paach.
29 Leví xaneʼ tu beetaj junpʼéel nojoch kʼiinbesaj tu yotoch utiaʼal u kʼamik Jesús; teʼeloʼ tiʼ yaan xan yaʼabkach tiʼ le j-kʼam impuestoʼoboʼ bey xan uláakʼ máakoʼob kulukbaloʼob tu yéeteloʼob yiknal le mesaoʼ.
30 Le oʼolaleʼ le fariseoʼob yéetel u escribaʼoboʼ káaj u x-mukul tʼaanoʼob, yéetel káaj u yaʼalikoʼob tiʼ u disipuloʼob Jesús: «¿Baʼaxten teʼexeʼ ka jaanleʼex yéetel ka wukʼuleʼex yéetel le j-kʼam impuestoʼob bey xan yéetel le j-kʼeban máakoʼoboʼ?».
31 Jesuseʼ tu núukajtiʼob: «Máaxoʼob toj u yóoloʼobeʼ maʼ kʼaʼabéettiʼob juntúul doctoriʼ, baʼaleʼ le máaxoʼob kʼojaʼanoʼoboʼ kʼaʼabéettiʼob.
32 Teneʼ maʼ taalen in tʼan máaxoʼob toj u kuxtaloʼobiʼ, baʼaxeʼ taalen in tʼan j-kʼeban máakoʼob utiaʼal ka u kʼex u tuukuloʼob».
33 Letiʼobeʼ tu yaʼaloʼobtiʼ: «U disipuloʼob Juaneʼ mantatsʼ ku ayunaroʼob, yéetel ku sen kʼáat óolaloʼob tiʼ Dios, tsʼoʼoleʼ u disipuloʼob le fariseoʼoboʼ bey xan u beetkoʼoboʼ; baʼaleʼ a disipuloʼobeʼ ku jaanloʼob yéetel ku yukʼuloʼob».
34 Jesuseʼ tu yaʼalajtiʼob: «Teʼexeʼ maʼ tu páajtal a beetkeʼex u ayunar u amigoʼob le noviotsil le tiaʼan tu yiknaloʼoboʼ, ¿máasaʼ?
35 Baʼaleʼ u jaajileʼ, yaan u kʼuchul u kʼiinil u luʼsaʼal le noviotsil tiʼoboʼ; tiʼ túun ken ayunarnakoʼobiʼ».
36 Tsʼoʼoleʼ tu yaʼalaj xan tiʼob le kettʼaanaʼ: «Mix máak ku kʼosik junxéetʼ túumben nookʼ utiaʼal u pakʼakoktik junpʼéel úuchben nookʼ. Wa ku beetkeʼ le junxéetʼ túumbenoʼ ku láakal, tsʼoʼoleʼ le túumben nookʼoʼ maʼ maʼalob u yilaʼal yóokʼol le úuchben nookʼoʼ.
37 Mix máak xan ku tsʼáaik túumben vino tiʼ úuchben bolsaʼob de kʼéewel.* Wa ku beetkeʼ le bolsaʼoboʼ ku xíikloʼob yéetel ku wéekel le vinooʼ, le bolsaʼob túunoʼ ku kʼastaloʼob.
38 Baʼaleʼ le túumben vinooʼ kʼaʼabéet u tsʼaʼabal tiʼ túumben bolsaʼob de kʼéewel.
39 Mix máak u yukʼmaj úuchben vino jeʼel u yóotik u yukʼ le túumbenoʼ, tumen ku yaʼalik: ‹Maas jach kiʼ le úuchbenoʼ›».
