Marcos 13:1-37
13 Le táan u jóokʼol teʼ templooʼ, juntúul tiʼ u disipuloʼobeʼ tu yaʼalajtiʼ: «J-Kaʼansaj, ¡ilawil le tuunichoʼob yéetel u pakʼiloʼob le nukuch najoʼobaʼ!».
2 Baʼaleʼ Jesuseʼ tu yaʼalajtiʼ: «¿Táan wa a wilik le nukuch pakʼoʼobaʼ? Junpuliʼ maʼ kun pʼatbil mix junpʼéel tuunich tu yóokʼol uláakʼ tuunich. Tuláakal yaan u niʼikil».
3 Le kulukbal Jesús teʼ tu Puʼukil le Olivoʼob tu tojil le templooʼ, Pedro, Santiago, Juan yéetel Andreseʼ tu natsʼubaʼob tu yiknaleʼ, ka joʼopʼ u x-mukul kʼáatkoʼobtiʼ:
4 «Aʼaltoʼon: ¿Baʼax kʼiin ken úuchuk le baʼaloʼobaʼ, yéetel baʼax chíikulal ken u yeʼes nukaʼaj xuʼulul tiʼ tuláakal le baʼaloʼobaʼ?».
5 Jesús túuneʼ káaj u yaʼaliktiʼob: «Kanáantabaʼex utiaʼal maʼ a tuʼusleʼex tumen mix máak.
6 Yaʼab máakoʼob kun taaloʼob tin kʼaabaʼ táan u yaʼalikoʼob: ‹Teen le Cristooʼ›, yéetel yaʼab máax ken u tusoʼob.
7 Tsʼoʼoleʼ, ken a wuʼuyeʼex táan u yúuchul baʼateltáambaloʼob wayeʼ bey xan teʼ náachiloʼ, maʼ a sajaktaleʼex; le baʼaloʼobaʼ yaan u yúuchloʼob, baʼaleʼ maʼ u xuuliʼ.
8 »Tumen junpʼéel kaajeʼ yaan u líikʼil tu contra uláakʼ kaaj, junpʼéel reinoeʼ yaan u líikʼil tu contra uláakʼ reino; jejeláas tuʼux ken u tíituba le luʼumoʼ, yéetel yaan u pʼáatal minaʼan baʼal jaantbil. Leloʼobaʼ chéen u káajbal le yaayaj baʼaloʼob kun muʼyajtbiloʼ.
9 »Baʼaleʼ teʼexeʼ kanáantabaʼex; yaan a kʼuʼubleʼex tiʼ u jueziloʼob le kaajoʼ, yaan a jaʼajatsʼaʼaleʼex teʼ sinagogaʼoboʼ, yaan a waʼataleʼex tu táan gobernadoroʼob yéetel reyoʼob tin woʼolal, lelaʼ yaan u yúuchul utiaʼal ka a tsʼáaʼex u yojéeltoʼob baʼax ka creertikeʼex.
10 Tiʼ tuláakal le kaajoʼob xanoʼ yáaxeʼ kʼaʼabéet u kʼaʼaytaʼal le maʼalob péektsiloʼ.
11 Baʼaleʼ le táan a bisaʼaleʼex kʼubbiloʼ, maʼ a chiʼichnaktaleʼex tu yoʼolal baʼax ken a waʼaleʼex; le baʼax kun tsʼaabil ta tuukuleʼex teʼ súutuk jeʼeloʼ, letiʼe baʼax unaj a waʼalikeʼexoʼ, tumen maʼ teʼex le ka tʼaaneʼexoʼ, baʼaxeʼ letiʼe kiliʼich muukʼoʼ.*
12 Tsʼoʼoleʼ, le sukuʼuntsiloʼ yaan u kʼubik u yíitsʼin utiaʼal kíimsbil, le taatatsiloʼ yaan u kʼubik u paal, le paalaloʼoboʼ yaan u líikʼloʼob tu contra u taataʼob yéetel yaan u beetkoʼob u kíimsaʼaloʼob.
13 Teʼex túuneʼ yaan a chʼaʼpʼektaʼaleʼex tumen tuláakal máak tu yoʼolal in kʼaabaʼ. Baʼaleʼ le máax kun chúukpajal u yóol tak tu xuuleʼ letiʼ bíin u salvartuba.
14 »Chéen baʼaleʼ, ken a wileʼex le pʼekbeʼen baʼal ku xuʼulsaj waʼalakbal tuʼux maʼ unajeʼ (le máax xokik lelaʼ meyajnak u tuukul utiaʼal u naʼatik), le máaxoʼob yanoʼob Judeaoʼ púutsʼkoʼob utiaʼal ka xiʼikoʼob teʼ puʼukoʼoboʼ.
15 Le máax yaan yóoʼ najeʼ maʼ u yéemel mix u yokol u jóoʼs mix baʼal ichil u yotoch;
16 le máax bijaʼan ich kooleʼ maʼ u suut u chʼaʼ u nookʼ tu pʼatoʼ.
17 ¡Óotsil le koʼoleloʼob embarazadaʼoboʼ bey xan le táan u tsʼaa chuʼuchoʼob teʼ kʼiinoʼob jeʼeloʼ!
18 Maʼ u xuʼulul a kʼáatkeʼex ich oración maʼ u kʼaʼabéettal a púutsʼleʼex tu kʼiinil keʼelil,
19 tumen le kʼiinoʼob jeʼeloʼ u kʼiiniloʼob muʼyajil; desde ka beetaʼab tuláakal baʼal tumen Dios tak bejlaʼeʼ mix juntéen úuchuk junpʼéel muʼyajil beyoʼ yéetel mix bikʼin kun kaʼa úuchul.
20 U jaajileʼ, wa maʼ u kóomkintaʼal kaʼach le kʼiinoʼob tumen Jéeobaoʼ, mix máak* jeʼel u salvarkubaeʼ. Baʼaleʼ tu yoʼolal le máaxoʼob u yéeymajoʼ, letiʼeʼ tsʼoʼok u kóomkintik le kʼiinoʼoboʼ.
21 »Le oʼolaleʼ, wa yaan máax ku yaʼalik xan teʼex: ‹¡Ileʼex! Way yaan le Cristooʼ›, wa, ‹¡Ileʼex! Tiʼ yaan teʼeloʼ›, maʼ a creertikeʼex.
22 Tumen yaan u yantal máakoʼob ken u yaʼalubaʼob Cristoʼob yéetel máakoʼob ken u yaʼalubaʼob profetaʼob; letiʼobeʼ yaan u beetkoʼob nukuch chíikulaloʼob bey xan milagroʼob utiaʼal u tuskoʼob máak, wa ku páajtaleʼ, tak le máaxoʼob yéeyaʼanoʼoboʼ.
23 Teʼex túuneʼ maʼ u náayal a wóoleʼex; tuláakal lelaʼ tsʼoʼok in waʼalikteʼex táanil tiʼ u yúuchul.
24 »Teʼ kʼiinoʼob jeʼeloʼ, ken tsʼoʼokok le muʼyajiloʼ, yaan u yéeʼjochʼeʼental le Kʼiinoʼ, le Lunaoʼ maʼ kun sáasiltal,
25 le estrellaʼoboʼ yaan u lúubloʼob tiʼ le kaʼanoʼ, tak le baʼaloʼob yanoʼob teʼ kaʼan yaan u muukʼoʼoboʼ yaan u tíitaʼaloʼob.
26 Teʼ kʼiin túun jeʼeloʼ yaan u yilkoʼob táan u taal u Paal máak teʼ múuyaloʼob yéetel nojoch páajtalil bey xan yéetel nojbeʼenil.
27 Letiʼ túuneʼ yaan u túuxtik le angeloʼob utiaʼal ka u muchʼkíintoʼob le máaxoʼob u yéeymaj desde tu kantiʼitsil le yóokʼol kaaboʼ,* desde tu yáax tiʼitsil le Luʼumoʼ tak tu tsʼook tiʼitsil le kaʼanoʼ.
28 »Kaneʼex tiʼ le higuera lelaʼ: Le ken tíipʼik u kʼuʼukʼ yéetel ken jóokʼok u leʼobeʼ, teʼexeʼ a wojleʼex tsʼoʼok u náatsʼal u kʼiinil u yichankil le cheʼoboʼ.
29 Bey túun xanoʼ ken a wileʼex u yúuchul le baʼaloʼobaʼ, ojéelteʼexeʼ u Paal máakeʼ tsʼoʼok u náatsʼal, tiʼ yaan teʼ joonajoʼ.
30 Tu jaajil kin waʼalikteʼexeʼ, le generacionaʼ junpuliʼ maʼ kun máan táanil tiʼ u yúuchul tuláakal le baʼaloʼobaʼ.
31 Maas jeʼel u xuʼulul tiʼ le kaʼan yéetel tiʼ le Luʼumoʼ ke ka pʼáatak maʼ u béeytal le baʼaxoʼob tsʼoʼok in waʼalikoʼ.
32 »Baʼaleʼ u kʼiinil yéetel u yoraileʼ, mix máak u yojel, mix le angeloʼob yanoʼob teʼ kaʼanoʼ, mix le Paaloʼ, chéen le Taataoʼ.
33 Maʼ u xuʼulul a paakateʼex yéetel maʼ a weenleʼex, tumen maʼ a wojleʼex baʼax kʼiin ken kʼuchuk le kʼiin aʼalaʼanoʼ.
34 Lelaʼ bey jeʼex juntúul máak ku bin táanxel luʼumileʼ; táanil tiʼ u bineʼ tu kʼubéentaj u yotoch tiʼ u palitsiloʼob, tiʼ cada juntúuleʼ tu tsʼáaj meyaj u beete, tu yaʼalaj xan tiʼ le j-kanan joonaj maʼ u náayal u yóoloʼ.
35 Le oʼolaleʼ, maʼ u náayal a wóoleʼex, tumen maʼ a wojleʼex baʼax kʼiin ken taalak u Yuumil le najoʼ, wa ken tsʼoʼokok u tʼúubul Kʼiin, wa chúumuk áakʼab, wa ken kʼaaynak le tʼeeloʼ, wa le táan u taal u sáastaloʼ.*
36 Beyoʼ, ken téek kʼuchkeʼ maʼ u yilik wa táan a weenleʼex.
37 Baʼaleʼ le baʼax kin waʼalikteʼexaʼ tiʼ tuláakal xan kin waʼalik: Maʼ a weenleʼex».
Notas
^ Wa: «espíritu santooʼ». Ilaʼak Tipʼ. 16.
^ Lit.: «mix junpʼéel bakʼ».
^ Ilaʼak Tipʼ. 16.
^ Le romanoʼob yéetel le griegoʼoboʼ ku jatskoʼob le áakʼab beyaʼ: «ken tsʼoʼokok u tʼúubul Kʼiin», u yáakʼabtal tak láas 9:00 áakʼab; «chúumuk áakʼab», láas 9:00 tak chúumuk áakʼab; «u kʼaay tʼeel», chúumuk áakʼab tak láas 3:00 u sáastal; «u taal u sáastal», láas 3:00 tak u tíipʼil Kʼiin.
