Mateo 12:1-50
12 Tiʼ junpʼéel u kʼiinil Sabadoeʼ Jesuseʼ máan teʼ tuʼux pakʼaʼan trigooʼ. U disipuloʼobeʼ wiʼijchajoʼobeʼ, ka joʼopʼ u tʼokikoʼob u yiʼij le trigooʼ ka joʼopʼ u jaantkoʼob.
2 Le ka tu yilaj le fariseoʼob lelaʼ, tu yaʼaloʼobtiʼ: «¡Ile! A disipuloʼobeʼ táan u beetkoʼob le baʼax maʼ uts u beetaʼal tu kʼiinil Sabadooʼ».
3 Letiʼeʼ tu yaʼalajtiʼob: «¿Maʼ wa a xokmeʼex le baʼax tu beetaj David yéetel le máaxoʼob ku máanoʼob tu yéetel le ka wiʼijchajoʼoboʼ?
4 ¿Maʼ wa ook tu najil Dios ka tu jaantoʼob xan le waaj kʼubaʼan, kex maʼ unaj u jaantkoʼoboʼ? ¿Maʼ wa lelaʼ chéen le sacerdoteʼob unaj u jaantkoʼoboʼ?
5 ¿Maʼ wa a xokmeʼex xan teʼ Ley tuʼux ku yaʼalikeʼ le sacerdoteʼoboʼ ku meyajoʼob teʼ templo tak tu kʼiinil Sábado, yéetel lelaʼ maʼ kʼeban u yilaʼaliʼ?
6 Baʼaleʼ kin waʼalikteʼexeʼ le máax yaan wayeʼ maas nojoch tiʼ le templooʼ.
7 Wa ka a naʼateʼex kaʼach baʼax u kʼáat u yaʼal lelaʼ: ‹In kʼáat ka a chʼaʼex óotsilil, maʼ ka a kʼubeʼex kíimsbil baʼalcheʼobiʼ›, bejlaʼa maʼ táan a waʼalikeʼex kʼaas baʼax ku beetik le máaxoʼob minaʼan u siʼipiloʼobaʼ.
8 Tumen u Paal máakeʼ letiʼ u Yuumtsilil le Sabadooʼ».
9 Le ka lukʼ Jesús teʼeloʼ, ook tiʼ junpʼéel sinagoga;
10 teʼeloʼ tu yilaj juntúul máak tikin junpʼéel u kʼab. Utiaʼal túun u kaxtikoʼob baʼax oʼolal u takikoʼob u pooleʼ, tu kʼáatoʼobtiʼ: «¿Maʼalob wa ka tsʼaʼakak máak tu kʼiinil Sábado?».
11 Jesuseʼ tu yaʼalajtiʼob: «Wa juntúul tiʼ teʼex chéen juntúul u yalakʼ taman yaan, baʼaleʼ ku lúubul ichil junpʼéel jool tu kʼiinil Sabadoeʼ, ¿máasaʼ jeʼel u bin u jóoʼseʼ?
12 Wa beyoʼ, ¿maʼ wa maas nojoch u tojol juntúul máak tiʼ juntúul tamaniʼ? Le oʼolaleʼ, maʼalob ka beetaʼak baʼax uts tu kʼiinil Sábado».
13 Ka túun tu yaʼalaj tiʼ le máakoʼ: «Tichʼ a kʼab». Letiʼeʼ tu tichʼeʼ ka utschaji, pʼáat maʼalobil jeʼex le uláakʼ u kʼaboʼ.
14 Baʼaleʼ le fariseoʼoboʼ jóokʼoʼobeʼ ka joʼopʼ u múuchʼ tuklikoʼob bix jeʼel u páajtal u kíimskoʼobeʼ.
15 Le ka tu yojéeltaj Jesús leloʼ, lukʼ teʼeloʼ. Yaʼab máakoʼob xan binoʼob tu paach ka tu láaj tsʼakaj le máaxoʼob kʼojaʼanoʼoboʼ,
16 baʼaleʼ tu jach kʼubéentajtiʼob maʼ u yaʼalikoʼob máax letiʼ,
17 utiaʼal ka béeychajak le baʼax tu yaʼalaj le profeta Isaíasaʼ:
18 «¡Ile! ¡Lelaʼ in palitsil, le máax in yéeymajoʼ, máax in yaabiltmaj, tu yoʼolal máax kiʼimakchaj in wóol!* Yaan in tsʼáaik in kiliʼich muukʼ tu yóokʼol, yéetel yaan u yeʼesik tiʼ le kaajoʼob jach bix u justicia Diosoʼ.
19 Maʼ bíin baʼateltʼaanakiʼ, maʼ bíin awatnakiʼ; mix bíin uʼuyaʼak u tʼaan teʼ kóokoch bejoʼoboʼ.
20 Maʼ bíin u kach mix junpʼéel sakʼab oopʼoliʼ, maʼ xan bíin u tup mix junpʼéel meecha ku butsʼilankiliʼ tak ken u yutskíint tuláakal baʼal kʼaschajaʼan.
21 U jaajileʼ le kaajoʼoboʼ yaan u kʼubik u yóoloʼob tiʼ u kʼaabaʼ.»
22 Taasaʼab túun tu yiknal juntúul máak chʼóop yéetel toot, okaʼan demonio tiʼ; ka tu tsʼakaj. Le máak túunoʼ páajchaj u tʼaan bey xan u paakat.
23 Le yaʼabkach máakoʼoboʼ jach jaʼakʼ u yóoloʼob, ka joʼopʼ u yaʼalikoʼob: «Le máakaʼ, ¿letiʼe wa u Paal* Davidaʼ?».
24 Le ka tu yuʼuboʼob lelaʼ, le fariseoʼoboʼ tu yaʼaloʼob: «Le máakaʼ ku jóoʼsik le demonioʼob chéen yéetel le páajtalil tsʼaʼantiʼ tumen Beelzebub, u nojchil le demonioʼoboʼ».
25 Jesuseʼ tumen u yojel baʼax ku tuklikoʼobeʼ, tu yaʼalajtiʼob: «Tuláakal reino ku paklan baʼateʼel u kajnáaliloʼobeʼ, yaan u xuʼulultiʼ, yéetel tuláakal kaaj wa naj ku paklan baʼateʼel le máaxoʼob yanoʼob ichiloʼ, yaan u bin kʼaasil tiʼ.
26 Bey túun xanoʼ wa Satanás ku tojolchʼintik Satanaseʼ, tu juunal ku baʼateʼel tu contra. ¿Bix túun jeʼel u pʼáatal waʼatal u reinoeʼ?
27 Tsʼoʼoleʼ, wa yéetel u páajtalil Beelzebub kin jóoʼsik le demonioʼoboʼ, ¿máax túun tsʼáaik páajtalil tiʼ a disipuloʼex utiaʼal u jóoʼskoʼob xan le demonioʼoboʼ? Le beetkeʼ a disipuloʼex kun eʼesik maʼ maʼalob le baʼax ka waʼalikeʼexoʼ.
28 Baʼaleʼ wa yéetel u kiliʼich muukʼ Dios kin jóoʼsik le demonioʼoboʼ, leloʼ ku yeʼesikeʼ tsʼoʼok u kʼuchul u Reino Dios ta wiknaleʼex kex maʼ a tsʼáaʼex cuentaiʼ.
29 Wa juntúul máak u kʼáat u yokolt le baʼaxoʼob yaan tu yotoch juntúul máak muʼukʼaʼaneʼ, ¿maʼ wa táanil unaj u kʼaxik le máak muʼukʼaʼanoʼ? Chéen bey túun jeʼel u páajtal u tokiktiʼ le baʼaxoʼob yaan tu yotochoʼ.
30 Le máax minaʼan tin wéeteleʼ, tin contra yaan; le máax maʼ tu molik wa baʼax tin wéeteleʼ, ku kʼiʼitbesik.
31 »Le oʼolaleʼ kin waʼalikteʼex: Tuláakal kʼeban yéetel poochʼileʼ yaan u perdonartaʼal tiʼ máak, baʼaleʼ le poochʼil ku beetaʼal tu contra le kiliʼich muukʼoʼ maʼ kun perdonartbil.
32 Jeʼex wa ka tʼaanak wa máax tu contra u Paal máakeʼ, yaan u perdonartaʼal tiʼ, baʼaleʼ jeʼel máaxak ka tʼaanak tu contra le kiliʼich muukʼoʼ junpuliʼ maʼ kun perdonartbil, mix teʼ yóokʼol kaabaʼ* mix teʼ túumben yóokʼol kaab ku taaloʼ.
33 »Teʼexeʼ jeʼel u páajtal a beetkabaʼex jeʼex junkúul maʼalob cheʼ ku tsʼáaik maʼalob icheʼ, wa jeʼex junkúul cheʼ maʼ patal ku tsʼáaik ich maʼ pataleʼ, tumen yoʼolal u yicheʼ ku kʼaj óoltaʼal le cheʼoʼ.
34 U chʼiʼibaleʼex kaan, ¿bix jeʼel u páajtal a waʼalikeʼex baʼaloʼob maʼalobtak wa kʼaakʼas máakeʼexeʼ? Tumen tu chiʼ máak ku jóokʼol tuláakal baʼax yaan tu puksiʼikʼal.
35 Juntúul máak utseʼ ku yeʼesik le maʼalob baʼaloʼob u líiʼsmoʼ; baʼaleʼ juntúul máak kʼasaʼaneʼ ku yeʼesik le kʼaakʼas baʼaloʼob u líiʼsmoʼ.
36 Kin waʼalikteʼexeʼ jeʼel baʼalak kʼaas ka aʼalaʼak tumen le máakoʼoboʼ, tu Kʼiinil le Juiciooʼ yaan u juzgartaʼaloʼob tu yoʼolal leloʼ;
37 tumen tu yoʼolal le baʼaxoʼob ka waʼalikoʼ yaan u yaʼalaʼal utsech, yéetel tu yoʼolal le baʼaxoʼob ka waʼalikoʼ yaan u yaʼalaʼal kʼasaʼanech».
38 Utiaʼal túun u núukikoʼob u tʼaan Jesuseʼ, jujuntúul escribaʼob yéetel fariseoʼobeʼ tu yaʼaloʼobtiʼ: «J-Kaʼansaj, k-kʼáat ka a beet junpʼéel chíikulal utiaʼal k-ile».
39 Letiʼ túuneʼ tu núukajtiʼob: «Junpʼéel generación kʼasaʼan yéetel ku traicionartik Dioseʼ maʼ tu xuʼulul u kaxtik junpʼéel chíikulal, baʼaleʼ maʼ kun eʼesbil mix junpʼéel chíikulal tiʼ, chéen u chíikulal Jonás le profetaoʼ.
40 Tumen jeʼel bix Jonás pʼáat ichil u nakʼ le nuxiʼ kay óoxpʼéel kʼiin yéetel óoxpʼéel áakʼabeʼ, bey xan u Paal máakeʼ óoxpʼéel kʼiin yéetel óoxpʼéel áakʼab kun yantal yáanal luʼum.
41 Tu Kʼiinil le Juiciooʼ, u máakiloʼob Níniveeʼ yaan u líiʼsaʼaloʼob junmúuchʼ yéetel le generacionaʼ, letiʼob túuneʼ yaan u yaʼalikoʼob kʼaas baʼax tu beetaj u máakiloʼob le generacionaʼ, tumen letiʼobeʼ tu kʼexaj u tuukuloʼob yoʼolal le baʼax tu kʼaʼaytaj Jonasoʼ, baʼaleʼ, ¡ileʼex!, le máax yaan wayeʼ maas nojoch tiʼ Jonás.
42 Tu Kʼiinil le Juiciooʼ, u reinail Noojoleʼ yaan u líiʼsaʼal junmúuchʼ yéetel le generacionaʼ, letiʼ túuneʼ yaan u yaʼalik kʼaas baʼax tu beetaj le generacionaʼ, tumen le reinaaʼ taal desde tu maas náachil le Luʼumaʼ utiaʼal ka u yuʼub le baʼaxoʼob ku yaʼalik kaʼach Salomón tu yoʼolal le naʼat yanchajtiʼoʼ, baʼaleʼ, ¡ileʼex!, le máax yaan wayeʼ maas nojoch tiʼ Salomón.
43 »Le ken jóokʼok juntúul demonio tiʼ juntúul máakeʼ ku máan tiʼ tikin kúuchiloʼob táan u kaxantik tuʼux u jeʼelel, baʼaleʼ maʼ tu kaxtik.
44 Letiʼ túuneʼ ku yaʼalik: ‹Yaan in suut tin wotoch tuʼux lukʼenoʼ›; ken kʼuchuk túuneʼ ku yilik mix máak yaniʼ, baʼaleʼ míistaʼan yéetel jatsʼutskíintaʼan.
45 Letiʼ túuneʼ ku bineʼ ku taasik uláakʼ siete demonioʼob maas kʼasaʼanoʼob ke letiʼ, ken ookkoʼobeʼ tiʼ ku pʼáatloʼobiʼ, yéetel le bix u pʼáatal le máak ken tsʼoʼokkoʼ maas kʼaas tiʼ le bix yanil tu káajbaloʼ. Lelaʼ bey xan kun úuchul tiʼ le kʼasaʼan generacionaʼ».
46 Le táan kaʼach u kaʼansaʼal le yaʼabkach máakoʼob tumen Jesusoʼ, kʼuch u maama yéetel u yíitsʼnoʼobeʼ, ka pʼáatoʼob táankab yéetel tu yaʼaloʼob taak u tʼaanoʼob tu yéetel.
47 Le oʼolaleʼ, yaan máax aʼal tiʼ Jesús: «¡Ile! A maama yéetel a wíitsʼnoʼobeʼ tiʼ waʼalakbaloʼob teʼ táankaboʼ yéetel u kʼáatoʼob tʼaan ta wéetel».
48 Letiʼ túuneʼ tu yaʼalaj tiʼ le máax aʼaltiʼoʼ: «¿Máax in maama yéetel máax in wíitsʼinoʼob?».
49 Tu tichʼaj u kʼab tu tojil u disipuloʼobeʼ, ka tu yaʼalaj: «¡Ile! Jeʼel in maama yéetel in wíitsʼnoʼobaʼ.
50 Tumen jeʼel máaxak ka u beet le baʼax u kʼáat in Taata yaan teʼ kaʼanoʼ, letiʼ in wíitsʼin, in kiik wa in maama».
