Mateo 2:1-23
2 Jesuseʼ síij tu kaajil Belén tiʼ Judea tu kʼiiniloʼob rey Herodes. Ka máan kʼiineʼ kʼuchoʼob tu kaajil Jerusalén jujuntúul astrologoʼob* Lakʼin u taaloʼob,
2 táan u yaʼalikoʼob: «¿Tuʼux yaan u rey le judíoʼob tsʼoʼok u síijiloʼ? Tumen le tiaʼanoʼon teʼ Lakʼinoʼ t-ilaj u estrellaeʼ, ka túun taaloʼon chintal tu táan».
3 Rey Herodeseʼ ka tu yuʼubaj lelaʼ jach péeknaj u yóol junmúuchʼ yéetel tuláakal u kajnáaliloʼob Jerusalén.
4 Tu muchʼkíintaj tuláakal u nuuktakil le sacerdoteʼob yéetel u escribailoʼob* le kaajoʼ, ka joʼopʼ u kʼáatiktiʼob tuʼux aʼalaʼan kun síijil le Cristooʼ.
5 Letiʼobeʼ tu yaʼaloʼobtiʼ: «Tu kaajil Belén tiʼ u luʼumil Judea, tumen bey tu tsʼíibtil le profetaaʼ:
6 ‹Teech u kaajil Belén tiʼ u luʼumil Judá, jach junpuliʼ maʼ junpʼéel chichan kaajech ichil le máaxoʼob gobernartik Judaoʼ, tumen tiʼ teech kun jóokʼol juntúul máax kun gobernar yéetel kun nuʼuktik Israel in kaajal›».
7 Herodes túuneʼ taʼakumbail úuchik u túuxtik tʼanbil le astrologoʼoboʼ, ka tu kʼáatajtiʼob jach baʼax kʼiin ka káaj u yilkoʼob le estrellaoʼ.
8 Tu túuxtoʼob Beleneʼ, ka tu yaʼalajtiʼob: «Xeeneʼex yéetel kaxteʼex tubeel le chan xiʼipaloʼ, yéetel ken a wileʼex tuʼux yaneʼ suuneneʼex a waʼaleʼexten, utiaʼal ka xiʼiken xan chintal tu táan».
9 Ka tsʼoʼok u yuʼubikoʼob baʼax tu yaʼalaj le reyoʼ, tu chʼaʼjoʼoltaj u binoʼob, le estrella tu yiloʼob le tiaʼanoʼob Lakʼinoʼ máan táanil tiʼob tak ka kʼuch yóokʼol le kúuchil tuʼux yaan le chan xiʼipaloʼ ka jeʼeli.
10 Ka tu yiloʼob tsʼoʼok u jeʼelel le estrellaoʼ, jach kiʼimakchaj u yóoloʼob.
11 Le ka ookoʼob teʼ najoʼ, tu yiloʼob tiʼ yaan le chan xiʼipal yéetel María u maamaoʼ, xolajoʼobeʼ ka chinlajoʼob tu táan. Tu jóoʼsoʼob le koʼokoj baʼaloʼob tu taasoʼoboʼ ka tu síiʼobtiʼ: oro, sak incienso yéetel mirra.*
12 Baʼaleʼ tumen tsʼaʼab u wayakʼtoʼob tumen Dios maʼ u suutoʼob tu yiknal Herodeseʼ, tu chʼaʼajoʼob yaanal bej utiaʼal u suutoʼob tu luʼumoʼob.
13 Ka tsʼoʼok u binoʼobeʼ, ¡ile!, ichil u wayakʼ Joseeʼ chíikpaj u ángel Jéeoba, ka tu yaʼalajtiʼ: «Líikʼen, chʼaʼ le chan xiʼipal yéetel u maamaoʼ, ka púutsʼkech tu luʼumil Egipto, tiʼ ka pʼáatkech tak ken in waʼaltech jeʼel u páajtal a lukʼleʼ; tumen Herodeseʼ jach taʼaytak u taal u kaxt le chan xiʼipal utiaʼal u kíimsoʼ».
14 Ka túun líikʼeʼ, tu chʼaʼaj le chan xiʼipal yéetel u maamaoʼ ka jóokʼ utiaʼal u bin Egipto teʼ áakʼab jeʼeloʼ;
15 teʼeloʼ tiʼ pʼáat tak ka kíim Herodesiʼ. Lelaʼ úuch utiaʼal ka béeychajak le baʼax tsʼíibtaʼab tumen u profeta Jéeobaoʼ: «In paaleʼ tu luʼumil Egipto yaan ka tin tʼanaj».
16 Herodes túuneʼ ka tu yilaj pʼaʼat kʼaasil tumen le astrologoʼoboʼ, jach pʼuʼuji, ka tu túuxtaj kíimsbil tuláakal le mejen paalaloʼob yanoʼob Belén yéetel teʼ kaajoʼob yanoʼob tu baʼpachoʼ, desde le táant u síijloʼoboʼ tak le yaan kaʼapʼéel jaʼab tiʼoboʼ. Lelaʼ bey tu beetil tumen tu chʼaʼaj en cuenta baʼax kʼiin ka yáax ilaʼab le estrella tumen le astrologoʼoboʼ.
17 Bey túun béeychajik le baʼax u yaʼalmaj profeta Jeremíasaʼ:
18 «Uʼuyaʼab u yúuchul okʼol yéetel awat okʼol tu kaajil Ramá; Raquel táan kaʼach u yoʼtik u paalaloʼob, yéetel maʼ tu yóotaj ka kiʼimakkúuntaʼak u yóoliʼ tumen tsʼoʼok u kíimil u paalal».
19 Ka tsʼoʼok u kíimil Herodeseʼ, le tiaʼan José tu luʼumil Egiptooʼ, aʼalaʼabtiʼ ichil junpʼéel wayakʼ tumen u ángel Jéeoba:
20 «Líikʼen, chʼaʼ le chan xiʼipal yéetel u maamaoʼ, xeen tu luʼumil Israel, tumen tsʼoʼok u kíimil le máaxoʼob kaxtik kaʼach le chan xiʼipal utiaʼal ka u kíimsoʼoboʼ».*
21 Ka túun líikʼeʼ, ka tu chʼaʼaj le chan xiʼipal yéetel u maamaoʼ, ka bin tu luʼumil Israel.
22 Baʼaleʼ le ka tu yojéeltaj Arquelao ku reinar Judea, tu lugar Herodes u taataeʼ, sajakchaj biniʼ. Ka tsʼoʼok xan u yaʼalaʼaltiʼ tumen Dios ichil junpʼéel wayakʼ baʼax unaj u beetkeʼ, bin Galilea;
23 ka kʼuch teʼeloʼ kajlaj tiʼ junpʼéel kaaj ku kʼaabaʼtik Nazaret utiaʼal ka béeychajak le baʼax kʼubéentaʼan tiʼ le profetaʼob ka u yaʼaloʼobaʼ: «Yaan u yaʼalaʼal Nazaretil tiʼ».
Notas
^ Leloʼobaʼ máakoʼob ku meyajtiʼob le estrellaʼob utiaʼal u yaʼalikoʼob baʼax ku taal u kʼiinoʼ.
^ Máakoʼob jach u kʼaj óoloʼob le Leyoʼ.
^ Junpʼéel clase polvo jach kiʼibok.
^ Lit.: «kaxtik u alma». Gr.: sikjé. Ilaʼak Tipʼ. 7A.
