Mateo 4:1-25
4 Jesús túuneʼ bisaʼab tumen le kiliʼich muukʼ teʼ desierto utiaʼal ka túuntaʼak u yóol tumen le Kʼaasilbaʼaloʼ.*
2 Ka tsʼoʼok u máan cuarenta kʼiinoʼob yéetel cuarenta áakʼaboʼob maʼ jaankeʼ, wiʼijchaji.
3 Teʼ súutuk jeʼeloʼ taal le Kʼaasilbaʼaloʼ, ka tu yaʼalaj tiʼ Jesús utiaʼal u túuntik u yóol: «Wa u paalech Dioseʼ, aʼal ka suunak waajil le tuunichoʼobaʼ».
4 Baʼaleʼ letiʼeʼ tu núukajtiʼ: «Le Kiliʼich Tsʼíiboʼ ku yaʼalik: ‹Maʼ chéen yéetel waaj unaj u kuxtal wíinikiʼ, baʼaxeʼ tak yéetel tuláakal tʼaan ku jóokʼol tu chiʼ Jéeoba›».
5 Le Kʼaasilbaʼal túunoʼ tu bisaj Jesús teʼ kiliʼich kaajoʼ,* ka tu naʼaksaj tu maas kaʼanlil u baʼpakʼiloʼob le templooʼ
6 ka tu yaʼalajtiʼ: «Wa u paalech Dioseʼ pulaba kabal, tumen le Kiliʼich Tsʼíiboʼ ku yaʼalik: ‹Yaan u yaʼalik tiʼ u angeloʼob ka u kanáantechoʼob, yéetel yaan u chʼúuykechoʼob yéetel u kʼaboʼob utiaʼal maʼ a kʼolik a wook tiʼ mix junpʼéel tuunich›».
7 Jesuseʼ tu núukajtiʼ: «Le Kiliʼich Tsʼíiboʼ ku yaʼalik xan: ‹Maʼ unaj a túuntik u yóol Jéeoba a Diosiʼ›».
8 Le Kʼaasilbaʼal túunoʼ tu bisaj xan tiʼ junpʼéel sen kaʼanal puʼukeʼ ka tu yeʼesajtiʼ tuláakal u reinoiloʼob yóokʼol kaab bey xan u nojbeʼeniloʼob,
9 ka tu yaʼalajtiʼ: «Tuláakal le baʼaloʼobaʼ yaan in tsʼáaiktech wa ka xoltal a adorarten kex chéen juntéen».
10 Jesús túuneʼ tu yaʼalajtiʼ: «¡Xeen, Satanás! Tumen le Kiliʼich Tsʼíiboʼ ku yaʼalik: ‹Jéeoba a Dios unaj a adorartik, yéetel chéen letiʼ kʼaʼabéet a meyajtik›».
11 Le Kʼaasilbaʼal túunoʼ tu pʼataj, ka tsʼoʼokeʼ, ¡ile!, taal le angeloʼoboʼ ka joʼopʼ u tsʼáaikoʼob baʼax kʼaʼabéet tiʼ Jesús.
12 Ka tu yojéeltaj tsʼoʼok u kʼaʼalal Juaneʼ, bin Galilea.
13 Tsʼoʼoleʼ ka lukʼ tu kaajil Nazareteʼ, taaleʼ ka pʼáat kajtal Capernaum, tu jáal le kʼáaʼnáaboʼ, tu luʼumil Zabulón yéetel tu luʼumil Neftalí,
14 utiaʼal ka béeychajak le baʼax u yaʼalmaj le profeta Isaíasaʼ:
15 «¡U kajnáalileʼex Zabulón yéetel Neftalí, teʼex le yaneʼex tu bejil le kʼáaʼnáaboʼ, tuláakʼ u tséel le Jordanoʼ, Galilea le tuʼux kajaʼan le j-táanxel luʼumiloʼoboʼ!
16 Le máaxoʼob yanoʼob ich éeʼjochʼeʼeniloʼ tu yiloʼob junpʼéel nojoch sáasil, yéetel le yanoʼob yáanal u boʼoyil le kíimiloʼ, juulnaj le sáasil tu yóokʼoloʼoboʼ».
17 Desde le jeʼeloʼ, Jesuseʼ káaj u kʼaʼaytik yéetel u yaʼalik: «Kʼex a tuukuleʼex, tumen u Reinoil kaʼaneʼ tsʼoʼok u náatsʼal».
18 Le táan u xíimbal tu jáal u Kʼáaʼnáabil Galileaeʼ, tu yilaj kaʼatúul máakoʼob sukuʼuntsiloʼob: Simón tiʼ máax ku yaʼalaʼal Pedro, yéetel Andrés u yíitsʼin, táan u jáaychʼintkoʼob junpʼéel red teʼ kʼáaʼnáaboʼ, tumen letiʼobeʼ j-chuk kayoʼob.
19 Ka tu yaʼalajtiʼob: «Koʼoteneʼex tin paach, ka in beeteʼex j-chuk wíinikoʼob».
20 Tu séebaʼanil tu pʼatoʼob u redoʼobeʼ, ka binoʼob tu paach.
21 Ka tu chʼaʼjoʼoltaj u bineʼ, tu yilaj uláakʼ kaʼatúul máakoʼob sukuʼuntsiloʼob: Santiago yéetel Juan u paalal Zebedeo, tiʼ yanoʼob ichil le chan barco yéetel Zebedeo u taataʼoboʼ, táan u yutskíintikoʼob u redoʼob, ka túun tu tʼanoʼob.
22 Letiʼob túuneʼ tu séebaʼanil tu pʼatoʼob le chan barco yéetel u taataʼoboʼ, ka binoʼob tu paach Jesús.
23 Jesuseʼ ku máan u xíimbalt kaʼach tuláakal Galilea táan u kaʼansaj teʼ sinagogaʼoboʼ, táan u kʼaʼaytik u maʼalob péektsilil le Reinooʼ yéetel táan u tsʼakik tuláakal u jejeláasil kʼojaʼanil yéetel muʼyajil yaan tiʼ le máakoʼoboʼ.
24 Le baʼaxoʼob tu beetoʼ kʼuch ojéeltbil tiʼ tuláakal u luʼumil Siria, ka taasaʼab tu yiknal tuláakal le máaxoʼob kʼojaʼanoʼoboʼ, le yaan jejeláas muʼyajil yéetel kʼiʼinamil tiʼoboʼ, le okaʼan demonio tiʼoboʼ, le ku tsʼáaik ataque tiʼoboʼ* yéetel le minaʼan u muukʼ u wíinkliloʼoboʼ; ka tu tsʼakoʼob.
25 Tu yoʼolal lelaʼ yaʼabkach máakoʼob ku taaloʼob tiʼ Galilea binoʼob tu paach bey xan le ku taaloʼob tiʼ Decápolis, Jerusalén, Judea yéetel tiʼ uláakʼ u tséel le Jordanoʼ.
Notas
^ Lit.: «Diablo», u kʼáat u yaʼaleʼ j-líiʼsaj tʼaan.
^ Lelaʼ u kaajil Jerusalén.
^ Wa: «yaan epilepsia tiʼoboʼ».
