Romanos 4:1-25
4 Wa beyoʼ, ¿baʼax túun ken k-aʼal tu yoʼolal Abrahán, le k-úuchben taataoʼ?
2 Koʼox aʼalikeʼ, wa ka aʼalaʼak toj u kuxtal Abrahán tu yoʼolal le baʼaxoʼob tu beetoʼ, yaan baʼax oʼolal kaʼach u nojbaʼalkúuntkuba; baʼaleʼ maʼ tu táan Diosiʼ.
3 Chéen baʼaleʼ, ¿baʼax ku yaʼalik le Kiliʼich Tsʼíiboʼ? «Abrahaneʼ tu tsʼáaj u fe tiʼ Jéeobaeʼ* ka ilaʼab bey juntúul máak toj u kuxtaleʼ.»
4 Baʼaleʼ le boʼol ku tsʼaʼabal tiʼ le máax ku meyajoʼ maʼatech u yilaʼal bey junpʼéel nojoch utsileʼ, baʼaxeʼ bey junpʼéel baʼax pʼaxaʼantiʼeʼ.
5 Chéen baʼaleʼ le máax maʼ tu kʼubik u yóol tiʼ le baʼaxoʼob ku beetik chéen letiʼoʼ, baʼaxeʼ ku tsʼáaik u fe tiʼ Dios, le máax aʼalik toj le j-kʼeban máakoʼ, ku yilaʼal toj u kuxtal yoʼolal u fe.
6 Le ka tʼaanaj xan David tiʼ le kiʼimak óolal ku yantal tiʼ le máax ku yaʼalaʼal tumen Dios toj u kuxtal kex maʼ táan u kuxtal jach jeʼex u yaʼalik le leyoʼ, tu yaʼalaj:
7 «Kiʼimak u yóol le máaxoʼob tsʼoʼok u perdonartaʼal le baʼaloʼob tu beetoʼob tu contra le ley yéetel tsʼoʼok u tuʼubsaʼal u kʼebanoʼoboʼ;
8 kiʼimak u yóol le máax junpuliʼ maʼ kun chʼaʼabil en cuenta u kʼebanoʼob tumen Jéeobaoʼ».
9 ¿Máaxoʼob túun le kun kiʼimaktal u yóoloʼoboʼ? ¿Chéen wa le máaxoʼob súutkʼuptaʼanoʼoboʼ,* wa tak le máaxoʼob maʼ súutkʼuptaʼanoʼoboʼ? Tumen toʼoneʼ k-aʼalik: «Abrahaneʼ yoʼolal u fejeʼ aʼalaʼab toj u kuxtal».
10 ¿Baʼax kʼiin túun ka aʼalaʼab tumen Dios toj u kuxtal? ¿Le tsʼoʼok u súutkʼuptaʼaloʼ wa le maʼ súutkʼuptaʼakoʼ? Le maʼ súutkʼuptaʼakoʼ.
11 Ka tsʼoʼokeʼ Abrahaneʼ tu kʼamaj le súutkʼuptajil bey junpʼéel chíikulal utiaʼal u yeʼesaʼal toj u kuxtal yoʼolal le fe tu yeʼesaj le maʼ súutkʼuptaʼakoʼ, utiaʼal beyoʼ ka u beetuba taatatsil tiʼ tuláakal le máaxoʼob ku yantal u fejoʼob kex maʼ súutkʼuptaʼanoʼoboʼ, utiaʼal xan ka aʼalaʼak toj u kuxtaloʼob,
12 yéetel ka u beetuba taatatsil tiʼ le chʼiʼibal súutkʼuptaʼanoʼ, baʼaleʼ maʼ chéen tiʼ le máaxoʼob ku súutkʼuptikubaʼoboʼ, baʼaxeʼ tak tiʼ le máaxoʼob táan u beetkoʼob jach jeʼex tu beetaj k-taata Abrahán yoʼolal le fe yanchajtiʼ táanil tiʼ u súutkʼuptaʼaloʼ.
13 Tumen maʼ yoʼolal ley aʼalaʼab u tsʼaʼabal junpʼéel túumben yóokʼol kaab tiʼ Abrahán wa tiʼ u chʼiʼibaliʼ, baʼaxeʼ tumen ilaʼab toj u kuxtal tu yoʼolal le fe tu yeʼesajoʼ.
14 Tumen wa chéen le máaxoʼob tsʼoʼokbesik le ley kun kʼamik le herenciaoʼ, le fejoʼ tsʼoʼok u pʼáatal mix baʼal u biilal, yéetel maʼ kun tsʼaabil le baʼax aʼalaʼab u tsʼaʼabaltiʼoboʼ.
15 U jaajileʼ, le Leyoʼ ku taasik u kʼuuxilil Dios, baʼaleʼ tuʼux minaʼan leyeʼ minaʼan xan kʼebaniʼ.
16 Le oʼolaleʼ, lelaʼ úuch tu yoʼolal le fejoʼ, utiaʼal ka eʼesaʼak u nojoch utsil Dios yéetel utiaʼal ka tsʼaʼabak tiʼ tuláakal u chʼiʼibal Abrahán le baʼax u yaʼalmaj Diosoʼ, maʼ chéen tiʼ le máaxoʼob ku tsʼoʼokbeskoʼob le Leyoʼ, baʼaxeʼ tak tiʼ le máaxoʼob yaan u fejoʼob jeʼex le yanchaj tiʼ Abrahán, le k-taataʼexoʼ.
17 (Lelaʼ bey jeʼex tsʼíibtaʼanilaʼ: «Tsʼoʼok in yéeyikech utiaʼal a beetaba taatatsil tiʼ yaʼab luʼumiloʼob».) Lelaʼ úuch tu táan Dios, le máax tiʼ tu tsʼáaj u fejoʼ, le máax xan ku kaʼa kuxkíintik le kimenoʼoboʼ yéetel ku tʼaan tiʼ le baʼaloʼob minaʼanoʼoboʼ bey jach yanoʼobeʼ.
18 Kex minaʼan baʼax oʼolal u páaʼtaʼal u yúuchleʼ, letiʼeʼ tu tsʼáaj u fe yaan u beetkuba taatatsil tiʼ yaʼab luʼumiloʼob yéetel tu creertaj le baʼax aʼalaʼabtiʼaʼ: «Bey kun kʼuchul yaʼabtal a chʼiʼibalaʼ».
19 Yéetel kex maʼ tu bineltaj fe tiʼeʼ tuukulnaj tiʼ u wíinklil tsʼoʼok u xuʼupul u muukʼ, tumen tsʼoʼok óoliʼ cien jaʼaboʼob tiʼ; tsʼoʼoleʼ Saraeʼ tsʼoʼok xan u pʼáatal maʼ tu páajtal u yantal u paalal.
20 Baʼaleʼ tu yoʼolal le baʼax aʼalaʼab u tsʼaʼabaltiʼ tumen Diosoʼ, Abrahaneʼ maʼ kaʼapʼéelchaj u tuukuliʼ, baʼaxeʼ tu creertaj baʼax aʼalaʼabtiʼ yéetel muʼukʼaʼanchaj u yóol tu yoʼolal u fe, táan u tsʼáaik nojbeʼenil tiʼ Dios,
21 yéetel jach u yojleʼ Dioseʼ jeʼel xan u páajtal u béeykuntik le baʼax tu yaʼalajtiʼoʼ.
22 Le oʼolal «ilaʼab bey juntúul máak toj u kuxtaleʼ».
23 Le úuchik u yaʼalaʼal «ilaʼab bey juntúul máak toj u kuxtaleʼ» tsʼíibtaʼabi, baʼaleʼ maʼ chéen tu yoʼolal letiʼiʼ,
24 baʼaxeʼ tak t-oʼolal, máaxoʼon aʼalaʼan yaan k-ilaʼal bey máakoʼob toj u kuxtaloʼobeʼ, tumen k-creertik le máax líiʼs k-Yuumtsil Jesús ichil le kimenoʼoboʼ.
25 Letiʼeʼ kʼuʼub tu yoʼolal k-kʼebanoʼob yéetel líiʼsaʼab utiaʼal ka béeyak u yaʼalaʼal de ke toj k-kuxtal.
