Éxodo 24:1-18
24 Ka tsʼoʼokeʼ Jéeobaeʼ tu yaʼalaj tiʼ Moisés: «Naʼaken teʼ montaña teʼ tuʼux yanenaʼ, taalak xan ta wéetel Aarón, Nadab, Abiú+ yéetel 70 tiʼ u nuuktakil u kaajil Israel. Unaj a chintaleʼex maʼ sen náach teʼ tuʼux yanenoʼ.
2 Chéen teech unaj a náatsʼal tin wiknal. Pero le uláakʼoʼoboʼ maʼ unaj u náatsʼloʼobiʼ, yéetel le kaajoʼ maʼ unaj u naʼakal ta wéetel teʼ montañaoʼ,+ teen Jéeoba aʼalik».
3 Moisés túuneʼ taaleʼ ka tu yaʼalaj tiʼ le kaaj tuláakal le baʼax tu yaʼalaj Jéeobaoʼ bey xan tuláakal u leyoʼob.+ Tuláakal le kaaj túunoʼ junmúuchʼ úuchik u yaʼalikoʼob: «Tuláakal le baʼax tsʼoʼok u yaʼalik Jéeobaoʼ yaan k-beetik».+
4 Moisés túuneʼ tu tsʼíibtaj tuláakal le baʼaxoʼob tu yaʼalaj Jéeobaoʼ.+ Líikʼ tempranoeʼ ka tu beetaj junpʼéel altar teʼ tuʼux ku káajal le montañaoʼ, ka tu waʼakúuntaj xan 12 u pʼéelal columnaʼob, cada columnaeʼ utiaʼal cada junpʼéel tiʼ le 12 tribuʼob yaan Israeloʼ.
5 Ka tsʼoʼokeʼ tu túuxtaj jujuntúul táankelem israelitaʼob utiaʼal u kʼubkoʼob tóokbil ofrendaʼob tiʼ Jéeoba bey xan utiaʼal u kʼubkoʼob toroʼob bey ofrendaʼob utiaʼal múul janaleʼ.+
6 Moisés túuneʼ tu chʼaʼaj táanchumuk tiʼ le kʼiʼikʼoʼ ka tu tsʼáaj tiʼ nukuch tazaʼob, yéetel le uláakʼ táanchumukoʼ tu wiʼiwitsʼaj yóokʼol le altaroʼ.
7 Le ka tsʼoʼokeʼ tu chʼaʼaj u libroil le pactooʼ ka tu kʼaʼam xokaj u yuʼub le kaajoʼ.+ Le kaaj túunoʼ tu yaʼalaj: «Tuláakal le baʼax tsʼoʼok u yaʼalik Jéeobaoʼ yaan k-beetik, yaan k-tsʼoʼokbesik».+
8 Moiséseʼ tu chʼaʼaj le kʼiʼikʼoʼ ka tu wiʼiwitsʼaj yóokʼol le kaajoʼ+ ka tu yaʼalajtiʼob: «Lelaʼ letiʼe kʼiʼikʼ eʼesik tsʼoʼok u káajal u meyaj le pacto tsʼoʼok u beetik Jéeoba ta wéeteleʼexaʼ yéetel ku yeʼesik de acuerdoʼex yéetel le baʼax ta wuʼuyeʼexaʼ».+
9 Moisés yéetel Aarón, Nadab, Abiú yéetel 70 tiʼ u nuuktakil Israeleʼ naʼakoʼob teʼ montañaoʼ,
10 ka tu yiloʼob u Dios le israelitaʼoboʼ.+ Tu yiloʼobeʼ yáanal u yook Dioseʼ yaan kaʼach junpʼéel baʼal bey jeʼex junpʼéel piso beetaʼan de zafiroeʼ, le baʼal jeʼelaʼ chíikaʼan tiʼ le kaʼan cuando minaʼan mix junpʼéel múuyaloʼ.+
11 Dioseʼ maʼ tu beetaj mix baʼal tiʼ u nuuktakiloʼob u kaajil Israeliʼ+ kex tu yiloʼob Dios tiʼ junpʼéel wayakʼ* mientras táan u janaloʼob yéetel táan u yukʼuloʼob.
12 Jéeoba túuneʼ tu yaʼalaj tiʼ Moisés: «Naʼaken teʼ montañaoʼ yéetel pʼáaten teʼeloʼ, tumen yaan in tsʼáaiktech le jaajay tuunich tuʼux in tsʼíibtmaj le leyoʼob yéetel le mandamientoʼob ken in tsʼáa tiʼ le kaaj utiaʼal in kaʼanskoʼoboʼ».+
13 Moisés yéetel Josué,+ le máax áantkoʼ, líikʼoʼobeʼ ka binoʼob junpʼíit maas táanil, Moisés túuneʼ naʼak tak tuʼux yaan le u jaajil Diosoʼ.+
14 Chéen baʼaleʼ antes u bineʼ tu yaʼalaj tiʼ u nuuktakil le kaajoʼ: «Páaʼtoʼoneʼex wayeʼ tak ken suunakoʼon.+ Jeʼel baʼaxak problemail kʼaʼabéet u juzgartaʼaleʼ+ jeʼel u páajtal u yilaʼal tumen Aarón yéetel Uureʼ».+
15 Moisés túuneʼ naʼak teʼ montaña teʼ tuʼux yaan le box múuyaloʼ.+
16 U nojoch poder Jéeobaeʼ+ chíikaʼan u yilaʼal yóokʼol le Montaña Sinaíoʼ,+ yéetel le box múuyaloʼ pʼáat seis días u pixmaj le montañaoʼ. Teʼ día siete túunoʼ Dioseʼ tu tʼanaj Moisés desde chúumuk tiʼ le box múuyaloʼ.
17 Le israelitaʼoboʼ tu yiloʼobeʼ u nojoch poder Jéeobaeʼ bey jeʼex u tóochʼbal kʼáakʼ tu punta le montañaoʼ.
18 Moisés túuneʼ ook ichil le múuyaloʼ ka seguernaj u naʼakal teʼ montañaoʼ.+ Letiʼeʼ pʼáat 40 días teʼeloʼ, bul kʼiin yéetel bul áakʼab tiaʼaniʼ.+
Notas
^ Tuláakʼ tuʼuxeʼ ku yaʼalaʼal «náay».
