1 Crónicas 12:1-40
-
Le máaxoʼob apoyart Davidoʼ (1-40)
12 Leloʼobaʼ letiʼe soldadoʼob taal u yiloʼob David tu kaajil Ziklag+ le táan u taʼakikuba tiʼ Saúl+ u hijo Keisoʼ. Letiʼobeʼ jujuntúul tiʼ le soldadoʼob jach u yojloʼob baʼateʼel ku apoyarkoʼob kaʼach David teʼ baʼateloʼ.+
2 Le soldadoʼobaʼ yaan u arcoʼob, tsʼoʼoleʼ yéetel u x-noʼoj kʼaboʼob bey xan yéetel u x-tsʼíik kʼaboʼobeʼ+ ku páajtal u chʼiinoʼob yéetel u yúuntunoʼob+ bey xan yéetel u arcoʼob. Letiʼobeʼ u sukuʼunoʼob* Saúl, láayliʼ tiʼ Benjamín u taaloʼobeʼ.+
3 U nojchil ichiloʼobeʼ Ayézer, tu yéeteleʼ tiaʼan Joásiʼ, tu kaʼatúulaloʼobeʼ u hijoʼob Seema le guibeatitaoʼ,+ tu yéeteloʼobeʼ tiaʼan xan Jeziel yéetel Pélet u hijoʼob Azmávetiʼ,+ tiaʼan xan Berakáiʼ, tiaʼan Jehú le anatotitaoʼ,
4 tiaʼan xan Ismayá le gabaonitaoʼ,+ letiʼeʼ jach u yojel baʼateʼel yéetel xokaʼan kaʼach ichil le treintaʼoboʼ+ yéetel letiʼ u nojchil ichiloʼob, tsʼoʼoleʼ tiaʼan xan Jeremíasiʼ, Jasiel, Joanán, Jozabad le guederatitaoʼ,
5 Eluzay, Jerimot, Bealías, Semarías, Sefatías le arifitaoʼ,
6 Elkaná, Isías, Azarel, Joézer yéetel Jasobeam le coreítaʼoboʼ,+
7 bey xan Joelá yéetel Zebadías u hijoʼob Jeroam le ku taal Guedoroʼ.
8 Jujuntúul tiʼ le gaditaʼob tu apoyartoʼob Davidoʼ yanchajoʼob tu yéetel teʼ tuʼux u taʼakmuba teʼ desiertooʼ,+ letiʼobeʼ soldadoʼob jach u yojloʼob baʼateʼel, kaʼansaʼanoʼob tubeel yéetel yaan kaʼach u nukuch escudoʼob yéetel u lanzaʼob. U táan u yichoʼobeʼ bey jeʼex u táan u yich le leónoʼoboʼ, yéetel jach táaj séeb u yáalkaboʼob bey jeʼex u yáalkab le kéejoʼob yóokʼol le montañaʼoboʼ.
9 Ézereʼ letiʼ u maas nojchil ichiloʼob, u kaʼatúuleʼ Abdías, u yóoxtúuleʼ Eliab,
10 u kantúuleʼ Mismaná, u cincoileʼ Jeremías,
11 u seisileʼ Atay, u sieteileʼ Eliel,
12 u ochoileʼ Joanán, u nueveileʼ Elzabad,
13 u diezileʼ Jeremías yéetel u onceileʼ Makbanay.
14 Tuláakal le jeʼeloʼobaʼ letiʼe gaditaʼob+ tsʼaʼanoʼob bey u nuuktakil le ejércitooʼ. Le máax maʼ jach yaan u muukʼoʼ jeʼel u páajtal kaʼach u baʼateʼel tu contra 100 máakoʼobeʼ, yéetel le máax maas yaan u muukʼoʼ jeʼel u páajtal kaʼach u baʼateʼel tu contra 1,000 máakoʼobeʼ.+
15 Letiʼobeʼ tu kʼáatmáansoʼob le Río Jordán teʼ yáax mesoʼ, teʼ kʼiinoʼob jeʼeloʼ kaʼanchajaʼan yéetel táan u tuul u jaʼil tu tséelikoʼob. Tu beetoʼob u púutsʼul le máaxoʼob kajaʼanoʼob teʼ táax luʼumoʼoboʼ, púutsʼoʼob tu tojil lakʼin yéetel tu tojil chikʼin.
16 Jujuntúul tiʼ u máakiloʼob Benjamín yéetel Judáeʼ binoʼob xan tu yiknal David teʼ tuʼux u taʼakmubaoʼ.+
17 Davideʼ jóokʼ u yiloʼobeʼ ka tu yaʼalajtiʼob: «Wa jach tu jaajil taaleʼex a wáanteneʼexeʼ teʼexeʼ in amigoʼex. Chéen baʼaleʼ wa taaleʼex a kʼubeneʼex tu kʼab in enemigoʼob kex mix baʼal kʼaas in beetmeʼ, u Dios k-úuchben láakʼtsiloʼob ka u yile yéetel ka u juzgarteʼex».+
18 U poder Dios túuneʼ taal tu yóokʼol Amasay+ u nojchil le treinta máakoʼoboʼ ka túun tu yaʼalaj:
«In yuum David, u hijo Jesé,+ toʼoneʼ a tiaʼaloʼon, tiaʼanoʼon ta wéeteleʼ.
Yanaktech jeetsʼelil, yéetel yanak xan jeetsʼelil tiʼ le máax áantkechoʼ,tumen a Dioseʼ táan u yáantkech».+
David túuneʼ tu kʼamoʼobeʼ ka tu tsʼáajoʼob xan ichil le máaxoʼob nuʼuktik u ejércitooʼ.
19 Jujuntúul máakoʼob tiʼ u tribu Manaséseʼ tu tsʼáajubaʼob xan tu tséel David le ka taal junmúuchʼ yéetel le filisteoʼob utiaʼal u baʼateloʼob tu contra Saúloʼ. Chéen baʼaleʼ teʼ kʼiin jeʼeloʼ Davideʼ maʼ tu yáantaj le filisteoʼoboʼ tumen u nuuktakil le filisteoʼoboʼ+ tu muchʼubaʼobeʼ ka tu chʼaʼtukloʼob maʼ u chaʼikoʼob u bin baʼateʼel tu yéeteloʼob. Letiʼobeʼ tu yaʼaloʼob: «Davideʼ yaan u tsʼáaikuba tu favor Saúl, u tsʼuulil, leloʼ jeʼel u beetik k-kíimsaʼaleʼ».+
20 Tiʼ u tribu Manaséseʼ leloʼobaʼ letiʼe máaxoʼob tu tsʼáajubaʼob tu tséel David le ka suunaj tu kaajil Ziklagoʼ:+ Adnaj, Jozabad, Jediayel, Miguel, Jozabad, Eliú yéetel Ziletay, letiʼobeʼ tsʼaʼan u nuʼuktoʼob kaʼach le u milesil máakoʼob yanoʼob tu tribu Manasésoʼ.+
21 Letiʼobeʼ tu yáantoʼob David utiaʼal ka baʼatelnak tu contra le múuchʼ máakoʼob ook u atacartoʼob le kaajoʼ. Tuláakal le soldadoʼob áant Davidoʼ jach yaan u páajtaliloʼob yéetel maʼatech u chʼaʼikoʼob saajkil.+ Letiʼobeʼ kʼuch u beetubaʼob u nuuktakil ichil le ejércitooʼ.
22 Sáamsamal u kʼuchul kaʼach uláakʼ máakoʼob utiaʼal u yáantoʼob David,+ hasta ka sen yaʼabchajoʼob, pʼáatoʼob jeʼex u yaʼabil u ejército Dioseʼ.+
23 Yaʼab máakoʼob u líiʼsmubaʼob utiaʼal le baʼateʼel taaloʼob tu yiknal David teʼ tu kaajil Hebrónoʼ.+ Letiʼobeʼ taal u luʼsoʼob le reino tu kʼab Saúl utiaʼal u máanskoʼob tu kʼab David jeʼex úuchik u yaʼalik Jéeobaoʼ.+ Le jaytúul máakoʼob taaloʼoboʼ letiʼe jeʼeloʼobaʼ:
24 tiʼ Judáeʼ taal 6,800 máakoʼob yaan u nuxiʼ escudoʼob yéetel u lanzaʼob, u prepararmubaʼob utiaʼal le baʼateloʼ.
25 Tiʼ Simeóneʼ taal 7,100 soldadoʼob jach u yojloʼob baʼateʼel yéetel maʼ saajkoʼobiʼ.
26 Tiʼ le levitaʼoboʼ taal 4,600 máakoʼob.
27 Jeoyadáeʼ+ letiʼ kaʼach u nojchil u paalal Aarón,+ tu yéeteleʼ tiaʼan kaʼach 3,700 u túulal máakoʼobiʼ.
28 Tu yéeteleʼ tiaʼan xan kaʼach Sadokiʼ,+ letiʼeʼ juntúul táankelem maʼatech u chʼaʼik saajkil yéetel yaan u páajtalil, tu yéetel Sadokeʼ taal xan 22 u túulal máakoʼob ku beetik u nuuktakil ichil u familiaʼob.
29 Tiʼ le benjaminitaʼob, u sukuʼunoʼob Saúloʼ,+ taal 3,000 soldadoʼobiʼ. Tak teʼ kʼiinoʼob jeʼeloʼ u maas yaʼabil tiʼ le benjaminitaʼoboʼ chúukaʼan kaʼach u yóol u apoyartoʼob Saúl yéetel u familia.
30 Tiʼ le efraimitaʼoboʼ taal 20,800 soldadoʼob jach u yojloʼob baʼateʼel yéetel maʼ saajkoʼobiʼ, máakoʼob jach kʼaj óolaʼanoʼob ichil u familiaʼob.
31 Tiʼ u táanchumuk tribu Manaséseʼ yéeyaʼab 18,000 soldadoʼob utiaʼal ka xiʼikoʼob u beetoʼob reyil David.
32 Tiʼ u tribu Isacareʼ taal 200 tiʼ u nuuktakil u familiaʼob, letiʼobeʼ jach yaan u naʼatoʼob, u yojloʼob baʼax unaj u beetik Israel bey xan tiʼ baʼax súutukil unaj u beetik. Tuláakal u sukuʼunoʼobeʼ tiaʼanoʼob yáanal u páajtaliloʼobeʼ.
33 Tiʼ u tribu Zabulóneʼ taal 50,000 máakoʼob jeʼel u páajtal u beetik u soldadoiloʼobeʼ, máakoʼob preparadoʼob utiaʼal baʼateʼel yéetel yaantiʼob jejeláas armaʼob. Tuláakloʼobeʼ tu apoyartoʼob David yéetel tuláakal u puksiʼikʼaloʼob.*
34 Tiʼ u tribu Neftalíeʼ taal 1,000 tiʼ u nuuktakiloʼobiʼ, tu yéeteloʼobeʼ taal xan 37,000 soldadoʼob yaan u nuxiʼ escudoʼob yéetel u lanzaʼob.
35 Tiʼ u tribu Daneʼ taal 28,600 soldadoʼob preparadoʼob utiaʼal baʼateʼel.
36 Tiʼ u tribu Asereʼ taal 40,000 máakoʼob jeʼel u páajtal u beetik u soldadoiloʼobeʼ, máakoʼob preparadoʼob utiaʼal baʼateʼel.
37 Tiʼ u tribu Rubén, tiʼ u tribu Gad yéetel tiʼ u táanchumuk tribu Manasés, le tribuʼob yanoʼob teʼ tuláakʼ u tséel le Jordánoʼ,+ taal 120,000 soldadoʼobiʼ, letiʼobeʼ yaantiʼob kaʼach jejeláas armaʼob.
38 Tuláakal le soldadoʼobaʼ preparadoʼob utiaʼal u binoʼob baʼateʼel. Taaloʼob tu kaajil Hebrón yéetel tuláakal u puksiʼikʼaloʼob utiaʼal ka u beetoʼob reyil David yóokʼol Israel. Tsʼoʼoleʼ tuláakal le u maasil israelitaʼob xanoʼ junpʼéeliliʼ baʼax u kʼáatoʼob, u kʼáatoʼob u beetoʼob reyil David.+
39 Tres días pʼáatoʼob tu yiknal David, teʼeloʼ tu jaantoʼob yéetel tu yukʼoʼob le baʼax preparartaʼabtiʼob tumen u sukuʼunoʼoboʼ.
40 Le máaxoʼob yanoʼob naatsʼ tiʼ letiʼob bey xan le máaxoʼob yanoʼob tu tribu Isacar, Zabulón yéetel Neftalíoʼ tu taasoʼob janal yóoʼ burroʼob, camelloʼob, mulaʼob yéetel yóoʼ wakaxoʼob. Tu taasoʼob harina, waajoʼob beetaʼan yéetel tikin higoʼob bey xan pasas, vino, aceite, yéetel yaʼabkach wakaxoʼob bey xan tamanoʼob. Tu taasoʼob tuláakal le baʼaloʼobaʼ tumen jach yaan kiʼimak óolal tu kaajil Israel.
Notas
^ U kʼáat u yaʼaleʼ tiʼ junpʼéeliliʼ tribu u taaloʼob.
^ Wa «Tuláakal le máaxoʼob tu tsʼáajubaʼob tu tséel Davidoʼ maʼ kaʼapʼéel u yóol u puksiʼikʼaloʼobiʼ».
