1 Crónicas 14:1-17
14 Hiram,+ u reyil Tiroeʼ, tu túuxtaj máakoʼob utiaʼal u tʼaanoʼob yéetel David, tu túuxtaj xan u cheʼiloʼob cedro, máakoʼob ku meyajtikoʼob tuunich* yéetel carpinteroʼob utiaʼal u beetkoʼob u yotoch* David.+
2 David túuneʼ tu tsʼáaj cuentaeʼ jach tu jaajil tsʼoʼok u tsʼaʼabal tumen Jéeoba u beet u reyil tu yóokʼol Israel,+ tumen tsʼoʼok u beetaʼal u jach antal u páajtalil u reino, lelaʼ bey úuchik u beetik Dios yoʼolal Israel, u kaajaloʼ.+
3 Davideʼ yanchaj uláakʼ u yatanoʼob+ tu kaajil Jerusalén, yanchaj xan uláakʼ u hijoʼob yéetel u hijaʼob.+
4 U kʼaabaʼ u hijoʼob síijoʼob tu kaajil Jerusaléneʼ+ letiʼe jeʼeloʼobaʼ: Samúaj, Sobab, Natán,+ Salomón,+
5 Ibar, Elisúa, Elpélet,
6 Noga, Néfeg, Jafiya,
7 Elisamá, Beeliadá yéetel Elifélet.
8 Le ka tu yojéeltaj le filisteoʼob tsʼoʼok u tsʼaʼabal David u beet u reyil tu yóokʼol tuláakal Israeleʼ,+ tuláakloʼobeʼ naʼakoʼob utiaʼal u binoʼob baʼateʼel tu contra David.+ Le ka tu yojéeltaj David le jeʼeloʼ bin xan baʼateʼel tu contraʼob.
9 Le filisteoʼob túunoʼ ookoʼobeʼ ka joʼopʼ u atacarkoʼob le kaajoʼob yanoʼob tu Táax Luʼumil Refaímoʼ.+
10 David túuneʼ tu kʼáataj tiʼ Dios: «¿Unaj wa in naʼakal baʼateʼel tu contra le filisteoʼoboʼ? ¿Yaan wa a kʼubkoʼob tin kʼab?». Jéeobaeʼ tu yaʼalaj tiʼ David: «Xeen, naʼaken, tumen jach tu jaajil yaan in kʼubik le filisteoʼob ta kʼaboʼ».+
11 Davideʼ bin teʼ lugar ku kʼaabaʼtik Baal-perazimoʼ,+ teʼeloʼ tiʼ tu ganartoʼobiʼ. Letiʼ túuneʼ tu yaʼalaj: «Jeʼex u jeʼik bej le jaʼ ku yáalkaboʼ, bey úuchik u jeʼikten le u jaajil Dios junpʼéel bej chúumuk tiʼ in enemigoʼoboʼ». Le oʼolal tiʼ le lugar jeʼeloʼ tu tsʼáajoʼob u kʼaabaʼt Baal-perazim.*
12 Le filisteoʼoboʼ tu pʼatoʼob u imagenoʼob teʼeloʼ, David túuneʼ tu túuxtaj tóokbiloʼob.+
13 Tuláakʼ kʼiineʼ le filisteoʼoboʼ ookoʼobeʼ ka joʼopʼ u kaʼa atacarkoʼob le kaajoʼob yanoʼob teʼ táax luʼumoʼ.+
14 Davideʼ tu kaʼa kʼáataj tiʼ Dios baʼax ken u beete, chéen baʼaleʼ le u jaajil Diosoʼ tu yaʼalajtiʼ: «Maʼ unaj a bin paachil tiʼ letiʼobiʼ, baʼaxeʼ baʼpachtoʼob. Taʼakaba teʼ tuʼux yaan le cheʼob ku kʼaabaʼtik bekjaoʼ, le kéen tsʼoʼokkeʼ ka jóokʼol a atacartoʼob.+
15 Le kéen a wuʼuy bey táan u juum u xíimbal máakoʼob desde tu kaʼanlil u cheʼiloʼob bekjaoʼ atacartoʼob tumen le u jaajil Diosoʼ tiʼ ku bin táanil tiʼ teech utiaʼal u xuʼulsik tiʼ le soldadoʼob filisteoʼoboʼ».+
16 David túuneʼ tu beetaj jach jeʼex aʼalaʼabiktiʼ tumen le u jaajil Diosoʼ,+ tu xuʼulsoʼob tiʼ le soldadoʼob filisteoʼob desde Gabaón tak Guézeroʼ.+
17 Davideʼ kʼuch kʼaj óoltbil tiʼ tuláakal le luʼumoʼoboʼ. Jéeobaeʼ tu beetaj u chʼaʼabal saajkil tiʼ David tumen tuláakal le naciónoʼoboʼ.+
Notas
^ Wa «máakoʼob ku beetkoʼob pakʼoʼob».
^ Wa «palacio».
^ U kʼáat u yaʼal «U Yuumil le Bejoʼoboʼ».
