1 Crónicas 17:1-27
17 Le ka pʼáat kajtal David tu yotocheʼ,* letiʼeʼ tu yaʼalaj tiʼ Natán+ le profetaoʼ: «Ilawile, teneʼ kajakbalen tiʼ junpʼéel naj beetaʼan yéetel cedroʼob,+ chéen baʼaleʼ u cajail u pacto Jéeobaeʼ chéen tiʼ junpʼéel naj de nookʼ yaan».+
2 Natán túuneʼ tu núukaj tiʼ David: «Beet jeʼel baʼaxak taak u beetik a puksiʼikʼaleʼ, tumen le u jaajil Diosoʼ tiaʼan ta wéeteleʼ».
3 Jach teʼ áakʼab jeʼeloʼ Dioseʼ tu tʼanaj Natáneʼ ka tu yaʼalajtiʼ:
4 «Xeen a waʼal tiʼ David, le máax meyajtikenoʼ: ‹Lelaʼ letiʼe baʼax ku yaʼalik Jéeobaaʼ: «Maʼ teech kan beetik junpʼéel naj utiaʼal ka kajlakeniʼ.+
5 Tumen desde le ka tin jóoʼsaj Israel tu kaajil Egiptoeʼ teneʼ maʼ kajlaken tiʼ junpʼéel najiʼ, baʼaxeʼ chéen tsʼoʼok in wantal tiʼ junpʼéel naj de nookʼ yéetel tiʼ junpʼéel tabernáculo.*+
6 Tiʼ tuláakal le kʼiinoʼob táan in bin kaʼach yéetel u kaajil Israeloʼ, ¿jaytéen tin waʼalaj tiʼ le juezoʼob tin tsʼáaj utiaʼal u nuʼuktikoʼob in kaajal: ‹¿Baʼaxten maʼ ta beeteʼexten junpʼéel naj beetaʼan yéetel cedroʼobiʼ?›?»›.
7 Beoraaʼ aʼal xan tiʼ David, le máax meyajtikenoʼ: ‹Lelaʼ letiʼe baʼax ku yaʼalik Jéeoba, le máax gobernartik le ángeloʼoboʼ: «Teneʼ tin chʼaʼajech teʼ tuʼux ka kanáantik kaʼach le tamanoʼoboʼ, tin chʼaʼajech utiaʼal in tsʼáaikech a nuʼukt Israel, in kaajal.+
8 Teneʼ yaan in wantal ta wéetel jeʼel tuʼuxak ka xiʼikecheʼ,+ ta táan ken in xuʼuls* tiʼ tuláakal a enemigoʼob.+ Yaan xan in beetik u kʼaj óoltaʼal a kʼaabaʼ jeʼex kʼaj óolaʼanil u kʼaabaʼ le máakoʼob jach yaan u páajtaliloʼob teʼ yóokʼol kaabaʼ.+
9 Yaan in yéeyik junpʼéel lugar utiaʼal u yantal Israel, in kaajal, tiʼ ken in tsʼáaiʼ, tiʼ kun kajtaliʼ yéetel yaan u yantal jeetsʼelil tiʼ. Maʼ kun kaʼa beetbil u muʼyajoʼob tumen le kʼasaʼan máakoʼob jeʼex úuchik u beetaʼal u muʼyajoʼob úuchjeakiloʼ,+
10 desde teʼ kʼiinoʼob ka tin tsʼáaj juezoʼob yóokʼol Israeloʼ.+ Yaan in tsʼáaik tuláakal a enemigoʼob yáanal a kʼab.+ Tsʼoʼoleʼ teneʼ kin waʼalik xan tech: ‹Jéeobaeʼ yaan u beetik u reinar a paalal›.
11 Le kéen kʼuchuk u kʼiinil u xuʼulul a kuxtaleʼ, le kéen jeʼelkech yéetel a úuchben láakʼtsiloʼobeʼ teneʼ yaan in beetik ka reinarnak a chʼiʼibal,* juntúul tiʼ a hijoʼob,+ yéetel yaan in beetik maʼ u xuʼulul u reinar.+
12 Letiʼ kun beetikten junpʼéel naj,+ teen túuneʼ yaan in beetik maʼ u xuʼulul u kutal tu trono utiaʼal u gobernar.+
13 Teneʼ yaan in kʼuchul in beetinba u taata yéetel letiʼeʼ yaan u kʼuchul u beetuba in hijo.+ Maʼ kun xuʼulul in weʼesik in nojoch yaabilaj tiʼ,+ jeʼex úuchik u xuʼulul in weʼesik tiʼ le máax yanchaj antes tiʼ techoʼ.+
14 Yaan in beetik u kutal tin trono utiaʼal mantatsʼ,+ letiʼ yéetel u hijoʼobeʼ maʼ kun xuʼulul u gobernaroʼob»›».+
15 Natáneʼ tu yaʼalaj tiʼ David tuláakal le baʼax aʼalaʼabtiʼoʼ bey xan tuláakal le baʼax tsʼaʼab u yiloʼ.
16 Le ka tu yuʼubaj leloʼ le rey Davidoʼ kulaj tu táan Jéeobaeʼ ka tu yaʼalaj: «Jéeoba Dios, ¿máaxen teen, yéetel máax in familia utiaʼal ka a beet yaʼab baʼaloʼob t-oʼolal jeʼex le tsʼoʼok a beetik tak beoraaʼ?+
17 Tsʼoʼoleʼ Kiʼichkelem Yuum, maʼ chéen leloʼ, tsʼoʼok xan a waʼalik de ke in paalaleʼ yaan u pʼáatloʼob tak kʼiinoʼob minaʼan u xuul.+ Tsʼoʼoleʼ Kiʼichkelem Yuum Jéeoba, techeʼ tsʼoʼok a wilken bey juntúul máak jach importanteeʼ.*
18 ¿Baʼax maas jeʼel u páajtal in waʼaliktech yoʼolal le a wutsil tsʼoʼok a weʼesiktenoʼ? Si techeʼ jach maʼalob a kʼaj óoltmilen.+
19 Kiʼichkelem Yuum Jéeoba, techeʼ tsʼoʼok a beetik tuláakal le nukuch baʼaloʼobaʼ yéetel tsʼoʼok a weʼesik a kiʼichkelmil tumen jach a yaabiltmen yéetel tumen péeksaʼabech tumen a puksiʼikʼal a beete.*+
20 Kiʼichkelem Yuum Jéeoba, minaʼan uláakʼ jeʼex techeʼ.+ Chéen teech le u jaajil Diosoʼ.+ Bey u yeʼesik tuláakal le baʼax tsʼoʼok k-uʼuyik ta woʼolaloʼ.
21 Tsʼoʼoleʼ ¿yaan wa uláakʼ kaaj way luʼum jeʼex Israel, a kaajaleʼ?+ Teech binech a salvartoʼob utiaʼal ka kʼuchuk u beetubaʼob a kaajal.+ Ta beetaj u jach kʼaj óoltaʼal a kʼaabaʼ yoʼolal le baʼaxoʼob ta beetaj tu yoʼolaloʼoboʼ. Ta beetaj nukuch baʼaloʼob ku beetik u jaʼakʼal u yóol máak.+ Le ka tsʼoʼok a salvarkoʼob tiʼ u luʼumil Egiptoeʼ ta tojolchʼintaj xan uláakʼ kaajoʼob tu táanoʼob.+
22 Ta tsʼáaj Israel utiaʼal ka u beetuba a kaajal utiaʼal mantatsʼ,+ tsʼoʼoleʼ techeʼ, Kiʼichkelem Yuum Jéeoba, tsʼoʼok xan a kʼuchul a beetaba u Dios.+
23 Beoraaʼ, Kiʼichkelem Yuum Jéeoba, béeykunt utiaʼal mantatsʼ le baʼax tsʼoʼok a prometertik tiʼ teen yéetel tiʼ in paalaloʼ, beet jeʼex tsʼoʼok a waʼalikoʼ.+
24 Mix bikʼin ka tuʼubsaʼak a kʼaabaʼ, alabartaʼak+ utiaʼal mantatsʼ, utiaʼal beyoʼ ka páajchajak u yaʼalaʼal tumen le máakoʼoboʼ: ‹Jéeoba, le máax gobernartik le ángeloʼoboʼ, letiʼ u Dios Israel, letiʼ Dios tu kaajil Israel›, ta táan xaneʼ ka kulak mantatsʼ in hijoʼob teʼ tronooʼ.+
25 In Dios, techeʼ tsʼoʼok a weʼesikten de ke yaan a beetik u reinar in paalal, le oʼolal teneʼ maʼ tin chʼaʼik saajkil in beettech le oraciónaʼ.
26 Kiʼichkelem Yuum Jéeoba, teech u jaajil Dios, techeʼ tsʼoʼok a prometertikten tuláakal le baʼaxoʼob maʼalobtakaʼ.
27 Beet uts a bendecirtik in paalal, maʼ u xuʼulul u yantaloʼob ta táan. Kiʼichkelem Yuum Jéeoba, techeʼ tsʼoʼok a bendecirkoʼob, bey ka pʼáatkoʼob utiaʼal mantatsʼoʼ».
Notas
^ Wa «palacioeʼ».
^ Maʼ xaaneʼ u kʼáat u yaʼal «ku bin tiʼ junpʼéel naj de nookʼ tak tuláakʼ naj de nookʼ, yéetel tiʼ junpʼéel lugar tak tuláakʼ lugar».
^ Ich hebreoeʼ ku yaʼalaʼal kaʼach «ta táan ken in xotʼ».
^ Wa «descendencia».
^ Wa «yaan junpʼéel nojoch puesto tiʼeʼ».
^ Wa «yéetel tumen bey a kʼáatoʼ».
