1 Crónicas 20:1-8
20 Tu káajbal le añooʼ,* teʼ kʼiinoʼob suuk u jóokʼol le reyoʼob utiaʼal u baʼateloʼoboʼ, Joabeʼ+ tu nuʼuktaj junmúuchʼ soldadoʼobeʼ ka tu xuʼulsaj tiʼ le luʼum tuʼux kajaʼan le ammonitaʼoboʼ. Kʼuch tak tu kaajil Rabáeʼ+ ka tu baʼpachtaj, chéen baʼaleʼ Davideʼ pʼáat Jerusalén.+ Joab túuneʼ tu atacartaj le kaajoʼ ka tu xuʼulsajtiʼ.+
2 David túuneʼ tu chʼaʼaj le corona yaan kaʼach tu pool Malcamoʼ. Le coronaoʼ tsʼaʼab tu pool David, u aalil le oro ikil beetaʼaniloʼ 34 kilos,* yaan xan kaʼach u jatsʼuts tuunichiloʼob. Davideʼ tu chʼaʼaj xan uláakʼ yaʼabkach baʼaloʼob teʼ kaajoʼ.+
3 Letiʼeʼ tu jóoʼsaj u kajnáaliloʼob le kaajoʼ ka tu tsʼáajoʼob utiaʼal ka u xotʼoʼob tuunich, utiaʼal ka meyajnakoʼob+ yéetel nuʼukuloʼob de fierro yaan u puntaʼob yéetel yaan u yejoʼob bey xan yéetel báatoʼob. Bey tu beetil David yéetel tuláakal le kaajoʼob yaan tiʼ le ammonitaʼoboʼ. Le ka tsʼoʼokeʼ David yéetel tuláakal u ejércitoeʼ suunajoʼob Jerusalén.
4 Le ka máan kʼiineʼ le israelitaʼoboʼ baʼatelnajoʼob yéetel le filisteoʼob teʼ tu kaajil Guézeroʼ. Teʼ kʼiinoʼob jeʼeloʼ, Sibekay+ le usatitaoʼ tu kíimsaj Sipai, juntúul tiʼ u paalal le refaímoʼoboʼ.+ Teʼ kʼiin jeʼeloʼ ganartaʼab le filisteoʼoboʼ.
5 Le ka yanchaj baʼateʼel tu kaʼatéen tu contra le filisteoʼoboʼ, Elanán u hijo Jaíreʼ tu kíimsaj Lamí u yíitsʼin Goliat+ le guititaoʼ. Lamíeʼ yaan kaʼach junpʼéel u lanza, u chowakil u yook u lanzaeʼ bey jeʼex u chowakil le cheʼ ku meyaj utiaʼal u beetaʼal telaoʼ.+
6 Le ka tsʼoʼokeʼ yanchaj tu kaʼatéen junpʼéel baʼateʼel tu kaajil Gat.+ Teʼeloʼ yaan kaʼach juntúul máak jach nojoch u wíinklil,+ tiʼ cada junpʼéel u kʼabeʼ yaan kaʼach 6 u dedos, yéetel tiʼ cada junpʼéel u yookeʼ yaan 6 u dedos, 24 dedos yaan kaʼach tiʼ. Letiʼeʼ juntúul tiʼ u paalal le refaímoʼob+ xanoʼ.
7 Le máakaʼ seguernaj u burlartik+ u kaajil Israel. Ka túun kíimsaʼab tumen Jonatán u hijo Simeá,+ u sukuʼun David.
8 Le máakoʼobaʼ u paalal le refaímoʼob+ kajaʼanoʼob kaʼach tu kaajil Gatoʼ.+ Letiʼobeʼ lúuboʼob tu kʼab David bey xan tu kʼab le máakoʼob yanoʼob tu yéeteloʼ.
Notas
^ Lelaʼ tu káajbal yáaxkʼiin. Óoliʼ tu mesil abril. Ilawil página 2692.
^ Ich hebreoeʼ ku yaʼalaʼal kaʼach «junpʼéel talento».